786-ə hissə-Səba surə-48-54 şərifə ayəon

786-ə hissə

قُلْ إِنَّ رَبِّي يَقْذِفُ بِالْحَقِّ عَلَّامُ الْغُيُوبِ (48)‏

Vuji: həyğətən, ğeybi sırronku vey aqah bıə çımı pərvərdıqor həxı(bə dılon) ğandedə.

قُلْ جَاء الْحَقُّ وَمَا يُبْدِئُ الْبَاطِلُ وَمَا يُعِيدُ (49) 

Bıvot: həx ome iyən botıl qıləy çi bino kardey nibəzıne və nə əy tojə kardey.

Navnə ayəon dəvomədə çı islomi pəyğombəri(s) risoləti həxədə bıey barədə ın ayəon hamyedə: çı insonon botıniku aqah bıə Xıdo, zıneydə ki, kon şəxsi bo ilahi vəhyi ğəbul kardeyro ləyoğətış heste. liza peyğombərış ıştə tərəfku vığandə kəsi formədə vıjniyəşe iyən ilahi ayəon ki, qırd əvon bə həx iyən həyğəton əsose, bəçəy ğəlbi nozil bıə ta əvoni bə milləti bırosno.

De peyğombəri(s) omey iyən çəy ıştə risoləti bə vırə rosney, həx bə milləti rəsedə iyən ruşin bedə ki, bə ğərəz Xıdo tərəf bıə dəvəton həmmə botıle və hakəs iyən harçi Xıdo əvəzi bo milləti nışon doey bıbu, nə çəvon bo qıləy çi xəlğ kardey ğudrətışon heste və nə çəvon dastiku şıə çi oqordıneyro zuşon heste. kufr iyən şırk botılə roonin ki, çı həxı mığobilədə mandey iyən mığovimət kardey ğudrətışon ni. həlbəttə, təbiiye çanədə ki, həx bo umum mıxloği oşko iyən zohir nıbu, botıl covlan bəkarde iyən cəhd bəkarde ki, ıştəni zumand iyən sabit nışon bıdo. əmmo botıli umr kırt bəbe iyən çı insoni qımon kardə zəmonisə vey rə çı miyoniku bebəşe bəşe.

Çın ayəonku umutedəmon:

1-Xıdovənd həxe iyən harçi çəy tərəfikuye, həxe. çı həxı de botıli miyono meyar, ilahi sıxan iyən əməle.

2-həx bə botıli səbarz bəbe iyən qıləy kulliyə nəzədə botıli dastiku hiççi nibome.

3-dınyo de Xıdovəndi dasti bino bıə iyən bın miyono botıl qıləy hərəkət kardedə. əmmo bənə çı ovisə şıə anc-manci.

قُلْ إِن ضَلَلْتُ فَإِنَّمَا أَضِلُّ عَلَى نَفْسِي وَإِنِ اهْتَدَيْتُ فَبِمَا يُوحِي إِلَيَّ رَبِّي إِنَّهُ سَمِيعٌ قَرِيبٌ (50) 

Vuji: ehanə mı roy dəqıjnom, bəştə zərəli ro dəbəqıjnem və əgər hidoyət pəydukom, çən ım de çımı pərvərdıqori bəmı vəhy kardə çi(bərəkətiye) sayədəy. həyğətən, əv əməs, neze.

Bın ayədə Xıdovənd bə pəyğombəri əmr kardedə ta bə milləti elonko ki, hətto əv ıştən həm ki, Xıdo pəyğombəre iyən ilahi hidoyəti de vəhyi vositə ğəbul kardedə iyən hətto ilahi vəhy həm bıə nıəbe, əv ıştən həm bənə cokəson zəlolətədə əbi.

Ruşine ki, ağl həm boəmə insonon hucciyyətış heste iyən dəlile. əmmo ehanə ilahi vəhy bıə nıəbe, mumkin be ağl həm çandə qılə roon miyono, bo həxı çı botıliku co kardey koyədə bə səhfi dıço əbi iyən inson zəlolətədə əmandi.

Çın ayəku umutedəmon:

1-insoni zəlolət iyən hidoyəti təsir və nəticəon, bə cokəson rəsey bənav bə insoni ıştəni bərəse.

2-Xıdovəndki, insonış ofəyə, bəçəy ehtiyoc iyən holon həm bələde iyən çəy deçəy məxloği miyono hiç qıləy fosilə mevcud ni.

وَلَوْ تَرَى إِذْ فَزِعُوا فَلَا فَوْتَ وَأُخِذُوا مِن مَّكَانٍ قَرِيبٍ (51) 

Və kaş vindəbe ki, kofiron(çokonə) bə vəhşət eqıniyən və (həni)boçəvon vitey ro ni və (əvon)nezə royku dastgir bəbeyn.

وَقَالُوا آمَنَّا بِهِ وَأَنَّى لَهُمُ التَّنَاوُشُ مِن مَكَانٍ بَعِيدٍ(52) 

(Və bəzəmon)Bəvoteyn: bəy imon vardemone və çı konco çı diyəroku(bə imon vardey) dast pəydu kardey bəçəvon xeyri bəbe?

Bın ayəon iyən peşonə ayəonədə ki, çı Səba mıborəkə surə oxonə ayəonin, Xıdovənd bəştə peyğombəri iyən bə imoni əhli xəbə doydə ki, Ğıron iyən ğıyoməti bə həşə jıə kəson və bo həxı ğəbul kardey hozzı nıbə kəson vədə qıləy ruj mevcude ki, həmonə ruji əvon fəryod iyən zikməvulə bəjen. əmmo həni boəvon əyo hiç qıləy foydə nibəbe. həmonə ruji əvon imon vardey izhori bəkardeyn, əmmoçın imoni vardey hiç qıləy erjış ni. çoko ki, de ğıyoməti ruji əzobi vindey ibroz bıə imon, bə hiç qıləy dardi dəvo nibəkarde. zira imon bəbe de ixtiyori iyən de aqahəti bıbu, nəinki dast tarsi iyən məcburi surətədə.

Dınyo iyən axırətədə hiç qıləy cinoyətkor Xıdovəndi ğudrətiku fərol kardey nibəzıne. çoko ki, Xıdovənd bə həmmə kəsi neze, çəy mehr iyən ğəhr həm bəçəy çok iyən yavə bandəon neze. ısət çıməkoni cəhəto nezəti bıbu və ya məğami ya zəmoni.

Çın ayəonku umutedəmon:

1-tobə iyən inhirofiyə fik və əməlonku oqardey, dınyoədə imkonış heste. əmmo axırətədə bo oqarde həni fırsət nibəbe.

2-təbiiyə surətədə har qıləy kofir de əzobi vinde iyən xətəri hiss kardey, imon bəvarde, əmmo çı aqahonə formədə bıə imoni foydəş heste, nəinki, de tarsi, məcburi iyən iztirori holətədə bıə imoni.

3-ilahi ğəhr iyən əzob diyəro ni. Xıdovənd havaxti irodəko iyən bıpyo, ım har zəmon iyən məkonədə mumkine.

وَقَدْ كَفَرُوا بِهِ مِن قَبْلُ وَيَقْذِفُونَ بِالْغَيْبِ مِن مَّكَانٍ بَعِيدٍ (53) 

Qıləy holədə ki, çımi bənav bəy kufr kardedəbin və çı diyəroku bə toyki tiy(sığ) ğandedəbin(bə peyğombəri behton şodedəbin).

وَحِيلَ بَيْنَهُمْ وَبَيْنَ مَا يَشْتَهُونَ كَمَا فُعِلَ بِأَشْيَاعِهِم مِّن قَبْلُ إِنَّهُمْ كَانُوا فِي شَكٍّ مُّرِيبٍ (54)

(Nəhoyətən)Çəvon deçəvon tələbon miyono qıləy coəti eqıniye. çoko ki, çəvon bənav bənə əvon bıə kəson barədə həm jıqo be. zira əvon qıləy nığılə şəkkədə bin.

Vəynə ayəon dəvomədə, ın ayəon hamyedə: ımruj əzobi vindey bədiqə imon vardə kəson, dınyoədə jimon kardeyədə, Ğıroni həxəti iyən peyğombəri risoləti inkor kardedəbin. əvon bedəlil bə toykiyəti tərəf tiy ğandedəbin iyən ğeybi aləm ki, bə məbdə iyən miadi şomile, rədd kardedəbin. əvon peyğombəri sahir, məcnun iyən səfi zıneydəbin iyən çəy sıxanon iyən rəftoron həxədə bo təfəkkur kardey hozzı bedə nıbin.

Təbiiye ki, ğıyoməti ruji təkzib kardə kəson, hejo ıştə maddi ləzzəton iyən şəhvəton fikədə bıən iyən bə həmonə dəlili xoto, çı peyğombəron sıxanon ğəbul kardedə nıbin. əmmo çəvon tələbon dəvomış pəydu nıkarde və marqi çəvon deçəvon tələbon miyono qıləy fosiləş eğande və çoko ki, çəvon bənav bıə kofir iyən mınkiron həm bəştə orzuon nırəsin iyən çı dınyoku nokom şiin, əvon həm jıqo bin.

Çın surə oxonə ayə orəxədə, çı qırd ım muşkilaton rəğ-rişə, şək iyən tərdidi elon kardedə. şək iyən tərdid təbiiyə formədə bo qırd insonon mıxtəlifə zəminəonədə bə əməl omeydə. əmmo bəbe de təhğiğ iyən təfəkkuri çəyku dəvardi və bə yəğın iyən xatırcəməti bırəsi. sırfən mı şəkkım kardə ım inson Xıdo pəyğombəre iyən çəy sıxan osmoniyə vəhye, ın fərziyyəon Xıdovəndi palu ğəbul bıənin ni. zira de ağl iyən təfəkkuri bə nəticə rəsey əzıniş və çın dıdıləti iyən zənni holiku beşey əzıniş.

Çın ayəonku umutedəmon:

1-kufr iyən məbdə və miadi inkor kardey, qıləy elmi iyən ağliyə əsosış ni. bəlkəm, qımon iyən zənnbe əsose. bənə bə toykiyəti tiy ğande.

2-dınyo ləzzəton iyən şəhvəton faniye. boy çı uxrəviyə dayimiyə ləzzəton fikədə bıbəmon.

3-çı Ğıron iyən ğıyoməti həx bıey barədə idəfənin ıştə vəzifə ruşinkəmon və de tovə ıştə umri oxo şək iyən tərəddudi dılədə məmandəmon ki, çımi ziyodə zyonış bəbe.