788-ə hissə-Fatiri surə-3-6 şərifə ayəon

788-ə hissə

يَا أَيُّهَا النَّاسُ اذْكُرُوا نِعْمَتَ اللَّهِ عَلَيْكُمْ هَلْ مِنْ خَالِقٍ غَيْرُ اللَّهِ يَرْزُقُكُم مِّنَ السَّمَاءِ وَالْأَرْضِ لَا إِلَهَ إِلَّا هُوَ فَأَنَّى تُؤْفَكُونَ (3)‏

Ha məxloğ ha! Xıdo bəşmə əto kardə neməton bə yod dənənən. aya ğərəz Xıdovəndi bəşmə osmon iyən zəminiku ruzi doə xalığ heste? sıvoy əv qıləy məbud ni. çən, çokonə çı həxıku bə botıli tərəf oqordıney bedon?

وَإِن يُكَذِّبُوكَ فَقَدْ كُذِّبَتْ رُسُلٌ مِّن قَبْلِكَ وَإِلَى اللَّهِ تُرْجَعُ الأمُورُ (4) 

Və ehanə tıni təkzib kardedən(norohət məbi, zira) ıştı bənav pəyğombəron həm təkzib bıən və qırd koon bə Xıdovəndi tərəf obəqarde.

Vəynə proqramədə bə ilahi hevujə neməton işorə be. ın ayəon bə Xıdovəndi xalığiyyət iyən rəzzağiyyəti yeganə bıey işorə be və hamyedə: çı osmon iyən zəminiku bıə maddi iyən mənəviyə qırd neməton boşmə nozil bedə, çı İ bıə Xıdovəndi tərəfikuye. həmonə Xıdo ki, şımənış ofəyə iyən bəşmə ruzi doydə. nəinki, xılğəti aləm çı iqlə Xıdo dastədə bıbu və ruzi rosney ko çı coqləyni Xıdo dastədə bıbu və qıləy mevcud bıbu ki, əvon həm çı Xıdo məxloğin ğərəz əv co nə qıləy Xalığ heste və nə razığ. liza sıvoy əv şımə bə hakəsi ki, çı rızğo-ruzi umuon bıbu, jəqodə bə inhirofi dıço bəbiyon.

Ayəon dəvomədə bə peyğombər(s) iyən mısılmınon dılvandi doydə ki, ehanə kofiron iyən mışrikon islomi təlimon təkzib kardedən iyən bo həxı ğəbul kardey hozzı ninbu, bəvədə şımə bə ıştə qətə roy həxədə bıey şəkk məkənən, bəlkəm ıştə royədə sabit ğədəm iyən ğoym bımandənən və bızınən ki, qırd koon oxo bə Xıdovəndi tərəf oqardedə. əv bəçəvon kufr iyən inkori xoto bəvon cəzo bədoe, çoko ki, bəşmə imon iyən istiğoməti xoto, bəşmə səvob və mıkofat bədoe.

Çın ayəonku umutedəmon:

1-bə ilahi neməton dığğət kardey, Xıdo roy zıney iyən kufr və şırkiku bə diyəro bıeye.

2-harçənd Xıdovənd razığe, əmmo əv deştə ofəyə təbiiyi səbəbon vositə, rızğo-ruzi doydə.

3-dəvardə milləton sərquzəşton mutoliyə kardey, bə insoni həxə royədə istiğomət kardey iyən çı botılı zohiri əzəmət iyən ğudrətiku nıtarsey boyis bəbe.

4-bə miadi dığğət kardey, insoni çı dini deşmınon iyən telə hodisəon mığobilədə ğoym iyən sabitğədəm bəkarde.

يَا أَيُّهَا النَّاسُ إِنَّ وَعْدَ اللَّهِ حَقٌّ فَلَا تَغُرَّنَّكُمُ الْحَيَاةُ الدُّنْيَا وَلَا يَغُرَّنَّكُم بِاللَّهِ الْغَرُورُ (5) 

Ha məxloğ ha! Xıdovəndi və`də həxe. çən, dınyo jimon şıməni bə dast nıdəno iyən məbodə dəğələ(şəyton) şıməni bə dast dəno iyən de Xıdo(kərəmi) məğrurko.

Navnə ayəonədə bə Xıdovəndi xalığiyyət iyən razığiyyətədə bıə vahidəti mevzu işorə be. ın ayə çə bəhsi dəvomədə Xıdovəndi ğıyoməti ruji barədə bıə və`dəon işorə kardedə və hamyedə: ğıyoməti ruji məhkəmədə bə hisob-kitobi ayid bıə çiyon iyən bo çokəkə əkəyon iyən yavə ko soybon və`də doə bıə vəhışt iyən cəhəndım, ımon həx iyən həyğəte. çən, mığət bıbənən ki, nə şımə dınyo rızğo-ruzi şıməni çı axırətiku ğafil nıko və nə şəytoniyə və`dəon ki, bə Xıdovəndi Rəhmon, Rəhim iyən Əbaxş bıey işorə kardə holədə, şıməni bo qıno kardero təşviğ iyən tərğibnıko.

Çın ayəku umutedəmon:

1-çı şəytoni bo insonon bə qıno tərğib kardeyro bıə hiylə və çəmonku qıləyni, əy bə ilahi baxşeşi umudəvo kardeye. qıləy holədə ki, ilahi əvfi şərayit, çı qınonku tobə kardey iyən peşmonətiye, nəinki, bə qıno tərəf rəğbət kardey.

2-ehanə şəyton kofiron de dınyo zər-zibo iyən cilvəon bə dast dənoydəbu, çı muminonku idastə həm de bə ilahi kərəm iyən baxşeşi umudəvo kardey, əvoni bə qıno mıbtəlo kardedə.

إِنَّ الشَّيْطَانَ لَكُمْ عَدُوٌّ فَاتَّخِذُوهُ عَدُوّاً إِنَّمَا يَدْعُو حِزْبَهُ لِيَكُونُوا مِنْ أَصْحَابِ السَّعِيرِ (6) 

Beşək, şəyton şımə deşmıne. çən, şımə həm əy deşmın bızınən. həyğətən, əv ıştə dastə bəştə tərəf vanq jeydə ta(əvon) çı cəhəndımi əhl bıbon.

Vəynə ayə dəvomədə, ın ayə bə qırd insonon məxsusən bə muminon çəşnavi iyən xəbərdorəti doydə ki, şəyton şımə xılğəti zəmoni sıftəku deşmə deşmınətiş kardə iyən bo bəşmə səjdə kardey hozzı bıəni. çun, əv bə ın əmri nıpemandey xoto, ilahi dərqoyku tojniye be, ğəssəmış harde ki, çanədə kardey bızıno şımə insonon ro dəqıjno iyən bə zəloləti ro eğando. çən, şımə həm əy ıştə deşmın bızınən iyən bəçəy vəsvəsəon dığğət məkənən.

Ayə dəvomədə hamyedə: jıqo ni ki, şəytoni bəşmə qıləy sultə iyən hakimiyyətış bıbu və kardey bızıno şıməni bə qıno məcburko. bəlkəm çəy nufuz fəğət bə ə şəxsone ki, əvon ıştən dılışon heste çəy dumo bışon və çəy tərəfdoron cəmədə bıbon. təbiiye ki, jıqo fərdon oxo cəhəndım bəbe iyən əvon de şəytoni bə ico otəşi dılədə ğərol bəqəteyn.

Çın ayəku umutedəmon:

1-fəğət ıştə məmləkəti ovi, zəmini, mol, con iyən namusi deşmınon fikədə məbəmon, harçənd ımon həm muhimme. əmmo bəbe çı imon iyən əxloği deşmınon fikədə həm bıbəmon. çıroki, ehanə ğafil bıbəmon, şəyton əməni bə qıno iyən inhirofi dıço bəkarde.

2-əgər çı qırd həyğiyə muminon şomil bıə hizbullah umumiyə mənoku xaric bıbəmon, bə hizbuşşəytoni dastə giriftor bəbemon iyən qıləy roy sape ğərol bəqətemon ki, həni çəyu xaric bıey mumkin nibəbe və çəy oxo həm şiddətinə əzobe.