789-ə hissə-Fatiri surə-7-8 şərifə ayəon

789-ə hissə

الَّذِينَ كَفَرُوا لَهُمْ عَذَابٌ شَدِيدٌ وَالَّذِينَ آمَنُوا وَعَمِلُوا الصَّالِحَاتِ لَهُم مَّغْفِرَةٌ وَأَجْرٌ كَبِيرٌ (7) 

Bo kofiron saxtə əzob heste və əkəson ki, imonışon vardə iyən çokə ko əncom doydən, boəvon baxşeş iyən dıjdə mıkofat heste.

Vəynə proqramədə çı şəytoni de insoni bıə deşmınətiku, insoni bə cəhəndım eqıniye iyən çı şəytoni dastədə bıeyku sıxan votedəbe, ın ayə hamyedə: kufr iyən həxı inkor karde, çı şəytoni bə insoni sultə pəydu kardey zəminə iyən boəy qıləy yavə ağıbət hozzı kardedə. əmmo əgər insonimoni əhl iyən çokə soyb bıbu, hətto əgər bə şəytoni vəsvəsəon iyən xətoon həm giriftor bıbu, Xıdovənde-Aləm çəy qınoon bəbaxşe və bəştə lutf iyən fəzli şomil bəkarde.

Ruşine ki, be əmələ imoni hiç qıləy foydəş iyən mıkofatış ni. əmmo kufr ıştən coyli bə insoni çı vəhıştiku diyəro bıey boyis bedə. zira qıləy vaxt ki, səhfə roy vıjniyedə, hiçvaxti bəştə məğsədi nibərəse, hətto ehanə həm bə vey çokə mərkəbon suvar həm bıbon.

Çın ayəku umutedəmon:

1-ıştə koy oxo həxədə fik kardey, insoni tərbiyə iyən hərəbaxtətiyədə təsirış heste. zira insoni ko de marqi təmom nibəbe iyən ağılmandə inson diyəro vindedə.

2-ta insonon qınon baxşey nıbu, çəy bə vəhışt varid bıey iyən mıkofati ğəbul kardey zəminə hozzı nibəbe. inson de qonə qıno bo, bə vəhışt varid bıey əzıni. zira vəhışt çı nopokon vırə ni.

أَفَمَن زُيِّنَ لَهُ سُوءُ عَمَلِهِ فَرَآهُ حَسَناً فَإِنَّ اللَّهَ يُضِلُّ مَن يَشَاءُ وَيَهْدِي مَن يَشَاءُ فَلَا تَذْهَبْ نَفْسُكَ عَلَيْهِمْ حَسَرَاتٍ إِنَّ اللَّهَ عَلِيمٌ بِمَا يَصْنَعُونَ (8) 

Çən, aya çəy bədə əməl boəy dərostə bıə iyən əy çok vindəkəs(bənə hidoyət bıə kəsiye?). çən, beşək Xıdovənd harki bıpyişe(loyığ bızıno) bə zəlolət ebəğande və harki bıpyişe(loyığ bızıno) hidoyət bəkarde. çən, məhaşt boəvon həsrət hardey xoto, ıştı con çı dasto bışo. zira, Xıdovənd bəçəvon əncom doə çiyon komilə surətədə aqahe.

Navnə ayə dəvomədə ki, çı dıqlə qrup yəni mumin iyən kofiron ağıbəti bəyon kardedəbe, ın ayə hamyedə: kufr iyən inkori ruhiyyə boyis bedə ki, inson yavə koon çok bıvindo iyən çoko lozıme həyğəti dərk kardeyku məhrum bıbu. çımisə əlovə əv ıştəni isloh kardey fikədə həm bedəni iyən çı hiçkəsi nəsyəti həm ğəbul kardedəni.

Kofiron çun Xıdo ğəbul kardedənin, həmmə çiyon deştə nəfsi mığoyisə kardedən və təbiiye ki, inson bə rədəvardə ləzzət iyən şəhvəton rəseyro, kali bevəcə koon ğəşənq cilvə doydə. əmmo muminon ıştə koon de ilahi əmron mığoyisə kardedən iyən ıştə nəfsaniyə tələbon etosneydən.

Təbiiye kufr iyən bəştə nəfsi tələbon tabe bıey, insoni ilahi hidoyəti ğəbul kardeyku məhrum kardedə iyən əy bə inhirofi tərəf şıkırneydə. əmmo bə Xıdo imon ilahi hidoyəti ğəbul kardey zəminə hozzı kardedə iyən insoni siratəl mustəğimədə bə navi tərəf bardedə.

Ayə oxo bə peyğombəre-əkrəm(s) iyən qırd mısılmınon tovsiyə kardedə ki, şımə bə həxə sıxani quş nıdoə iyən boəy ğəbul kardey hozzı nıbə fərdon holi həsrət iyən təəssıf məhənən və ıştə con və rufi bə zəhmət dəmənən. çıro ki, çəvon ko de Xıdoye iyən Xıdovənd çəvon botın və zohiriku xəbədoe.

Tarıx şoydəti kardedə ki, pəyğombər(s) bo milləti hidoyət kardey xoto vey dıləsut be. Kərimə-Ğıron peyğombəri vəsfi barədə jıqo hamyedə: əv bo milləti hidoyəti xoto vey həris be və bə muminon nisbətədə vey rəhmin be. binobərin çın ayə murad iyən məğsəd,ım ni ki, bə milləti zəloləti xoto təəssıf məhəmon iyən norohət məbəmon, bəlkəm çəy məğsəd ıme ki, təəssıf iyən norohətçəti əməni çı hərəkət iyən cəhdonku nıoqəto və ya bə yə`s iyən noumudəti dıço məbəmon və qımon məkəmon ki, çəmə dəvət iyən təblıği hiç qıləy təsirış ni.

Çın ayəku umutedəmon:

1-insoni nəfsi xətəronku qıləyni yavə çiyon ziynət doey iyən bo xilofə koon bəhonə vardeye. de qıləy co iborəti inson sıftədə boştə qıno vavunə vardedə, çən peşoəy əncom dodə.

2-çok iyən yavə koon bəbe de ağl iyən rufi meyaron bıpaməmon, nəinki, de dıli piyə çiyon.

3-Xıdovənde-Aləm qınoş çı ro dəqıjniye amilış ğərol doə. ım zəlolət iyən inhirofəti bə insoni ıştən əməli əsose. kofirəinsonon inhirofə roon bəştə inodkorəti əsos vıjniyedən və ım ko həm bəçəvon zəloləti ziyod bıey boyis bedə.

4-bo milləti hidoyəti xoto bəbe həris bıbu iyən bəçəvon zəlolətiro təəssıf bıhardi. əmmo bəbe çın təəssıf iyən həsrəti qıləy həddı-marzış həm bıbu.