804-ə hissə-Yasini surə-13-19 şərifə ayəon

804-ə hissə

وَاضْرِبْ لَهُم مَّثَلاً أَصْحَابَ الْقَرْيَةِ إِذْ جَاءهَا الْمُرْسَلُونَ (13) 

Tı boəvon çə şəhri(Antakyəvıjon) əhali misoli biyə(bıjən) ki, Xıdo vığandəyon bəçəvon tərəf omin.

إِذْ أَرْسَلْنَا إِلَيْهِمُ اثْنَيْنِ فَكَذَّبُوهُمَا فَعَزَّزْنَا بِثَالِثٍ فَقَالُوا إِنَّا إِلَيْكُم مُّرْسَلُونَ (14) 

Bə zəmon ki,(ıştə pəyğombəronku) dı nəfər bəçəvon səmt vığandemone. çən, əvonışon təkzib kardeşone. peşo de seminə şəxsi(ə dılə) zumand kardemone. çən, voteşone: bərosti əmə(Xıdo tərəfiku) bəşmə tərəf vığandə bıəmon.

Dəvardə ayəon bə muminon iyən kofiron çı ilahi peyğombəron təlimon mığobilədə bıə rəftroron mığoyisə işorə kardedəbe. ın ayəon çə bəhsi dəvomədə hamyedə: ha pəyğombər ha! bo Məkkə mışrikon ibrət qəteyro çı navkonə ummətonku nımonuəon bəyonkə ki, çandə qılə pəyğombər boçəvon hidoyətiro oməbe. əmmo bə həmonə ğovmon inodkorəti iyən kəcbəsəti xoto, əvon ilahi pəyğombəron dəvətışon ğəbul nıkarde və qırd deəvon mıxolifətışon karde. jıqo bızın əvon boımiğəbul kardey hozzı nıbin ki, Xıdovəndi ikəsış de peyğombəri nomi bəçəvon səmt vığandəşe. əvon qımon kardedəbin ki, Xıdovənd əvonış bəçəvon ıştən holiş vadoəiyən çəvon ixtiyor heste ki, çəvon dıli çiçış piyedə iyən çoko dərəsedən, jəqo həm əy əncom bıdon.

Liza ilahi pəyğombəron hejo bə ım nuktə təkid kardedəbin ki, əmə ıştən-bəsə qıləy ko kardedənimon, bəlkəm Xıdo tərəfiku qıləy əmrımon ğəbul kardə ki, şıməni bəçəy dini tərəf dəvətkəmon. əmə çəy vığnadə iyən çəyku qıləy xəbə vardə rəsulimon və əmə boştə hiççimon piyedəni.

Çın ayəonku umutedəmon:

1-dəvardə etnoson iyən çəvon sərquzəşton mıtoliyə kardey, bovəomə qıləy ço iyən nuri roye.

2-ilahi pəyğombəron boştə risolət iyən missiyə bə vırə rosnero, bə milləti soyəx şedəbin və çəş kardedənıbin ki, camaat bəçəvon soyəx bışon.

3-bəzi vaxt çandə qılə pəyğombər izəmonədə bə qıləy ğovmi tərəf vığandey bedəbin və deçəvon hidoyəti ko məşğul bedəbin.

قَالُوا مَا أَنتُمْ إِلاَّ بَشَرٌ مِّثْلُنَا وَمَا أَنزَلَ الرَّحْمن مِن شَيْءٍ إِنْ أَنتُمْ إِلاَّ تَكْذِبُونَ (15) 

Kofiron voteşone: şımə həm fəğət bənə əmə qıləy insoniyon və Rəhmonə Xıdo bəşmə qıləy çi nozil kardəşni. şımə ğərəz duy co çi votedəniyon.

قَالُوا رَبُّنَا يَعْلَمُ إِنَّا إِلَيْكُمْ لَمُرْسَلُونَ (16) 

Pəyğombəron voteşone: çəmə pərvərdıqor zıneydə ki, əmə bəşmə səmt vığandə bıəmon.

وَمَا عَلَيْنَا إِلاَّ الْبَلاَغُ الْمُبِينُ (17) 

Və çəmə vəzifə(həm) oşko iyən ruşinə təblığisə co çi ni.

Ilahi pəyğombəron dəvəti mığobilədə kofir iyən mınkiron qıləy məntıği cəvobışon nıbe və əvon fəğət ımi votedəbin: şımə deəmə çı tafuton heste? şımə həm bənə əmə qıləy insoniyon və ehanə Xıdo piyəşbe ki, ikəsi boçəmə hidoyətiro bıvğando bəbe əv həm çı mığərrəb iyən bə Xıdo nezə mələkonku bıənin be, nəinki, bənə çəmə ıştəni qıləy inson. de qıləy co iborəti kofiron dılışon hestebe ki, bıvoton: ”əmə bə bənə ıştən bıə qıləy odəmi tabe nibəbemon və bəbe Xıdo vığandə kəs çəməsə bəpe iyən deəmə qıləy farğış bıbu”.

Qıləy holədə ki, ehanə qıləy firiştə bo bəşəri hidoyətiro oməbe, həmonə fərdon ijən əvotin:” əv  boəmə vardə bənə hardey-peşomey iyən jenı-merdəti ğanunon və sayirə çiyon ıştən əməl kardedəni və əv fəğət bəmə əmr kardedə”.

Əmmo Xıdovənd  insonon  ki, maddi cəhəto iyən bəşəri ehtiyocon cəhəto bənə co insonone, bo milləti hidoyətiro vığandəşe. çımisə əlovə Xıdovəndi bəştə pəyğombəri əmrış kardə ki, əv sıftədə bəştə votə çiyon əməlko ta millət təsəvvır nıko ki, bəçəy əmr kardə çiyon əməl iyən əy icro kardey mumkin ni. ehanə mışrikon Xıdo vucudi ğəbul kardedənbu, çəy hikmət iyən rəhmət tələb kardedə ki, çı insonon ıştən cinsiku ikəs bo bəşəri hidoyətiro vıjniye bıbu və insonon bəçəvon ıştən holi nıvado. qıləy holədə ki, mışrikon rəhmonə Xıdo elon kardedəbin ta bıvoton çəmə mehribonə Xıdo bəçəmə ələyh ğəddor nibəbe və əv boəmə hiç qıləy vəzifəş təyin kardəşni, bəlkəm əmənış bəçəmə ıştən holi vadoəşe ta çəmə dıli çiçış piyedə əy həm bə vırə bırosnəmon.

Ilahi pəyğombəron bəştə mıxolifon bıə cəvob ım be ki, həmonə Xıdo ki, şımənış ofəyə iyən şımə həm bəy etığodon heste, əmənış vığandə və əmə ğərəz çəy əmr kardə çiyon bəşmə rosney co qıləy vəzifəmon ni. əgər əmə duyəvıj bıəbimon, bəbe Xıdovəndi əmənış rısvo kardəbe və icozəş doə nıbe  ki, əmə duyədə bə Xıdo qıləy iftiro bığandəmon.

Çın ayəonku umutedəmon:

1-kali insonon qımon kardedən ilahi rəhməti məno, çı insonon be ğeyd iyən beşərt bıeye və boəvon hiç qıləy məhdudiyyət ni. qıləy holədə xıyzoni soxtemonədə həm pı-mo ki, boştə fərzəndi çı rəhməti məzhəre, əy bəçəy ıştən holi vadoydəni, bəlkəm, boçəy tərbiyə vindero əy bə məktəb vığandedə və dayimən çəyku tələb kardedə ki, bəştə dərsi aspardemoni çok-çoki əməlko.

2-ilahi pəyğombəron ıştə vəzifə iyən təblıği koyədə bəştə vəzifə əməl kardedən və ıştəni çı nəticə zamin zıneydənin. harçənd çı məxloği veyni imon vardedənin və nibəvardeyn. əmmo pəyğombəron həm ıştə vəzifəon çok-çoki bə vırə rosnedən və de tobə ıştə oxonə nəfəsi ıştə royədə mandedən.

قَالُوا إِنَّا تَطَيَّرْنَا بِكُمْ لَئِن لَّمْ تَنتَهُوا لَنَرْجُمَنَّكُمْ وَلَيَمَسَّنَّكُم مِّنَّا عَذَابٌ أَلِيمٌ (18) 

(Kofiron bə ənbiya)Voteşone: əmə şımədə qıləy nəhsəti vindedəmon.(şımə vucud bəçəmə bədbəxti boysi bıə) və ehanə şımə ıştə sıxanonku dast nıkəşon hukmən əmə şıməni sənqsar bəkardemon və çəmə tərəfiku qıləy dardnokə əzob(işkəncə) bəşmə bome bərəse.

قَالُوا طَائِرُكُمْ مَعَكُمْ أَئِن ذُكِّرْتُم بَلْ أَنتُمْ قَوْمٌ مُّسْرِفُونَ (19) 

(Ənbiya cəvobədə)Voteşone: şımə nəhsəti hejo şımə ıştəkuye. aya əgər bəşmə pand(nəsyət) doey bıbu,(şımə ımi nəhs bəzıniyon?). ne, şımə qıləy həddiku dəvardə(isrofəkə) ğovmiyon.

Vəynə ayəon dəvomədə ın ayə bə peyğombəron mıxolifon məntıği işorə kardedə və hamyedə: əvon çı pəyğombəron sıxanon məsey iyən bəçəvon insoni və əxloğiyə təlimon dığğət kardey əvəzi, de təhdid iyən təhğıri zıvoni hərəkətışon karde və votedəbin: ”şımə çəmə cəmiyyətədə bıə vucud bəçəmə bədbəxtəti boyis bıə. ya şımə ıştə sıxanonku dast bıkəşənən yaan ki, şımə çı şəhriku xaric bıbənən bışənən və yaan ki, bəşmə vey yavə işkəncə və əzobon bədomon və şıməni bəkıştemon.

Çın ayəonku umutedəmon:

1-təkzib, təhğır iyən təhdid, bə həxə roy səmt dəvət kardə ilahi peyğombbəron mığabilədə mandə mıxolifon şivə be.

2-bənə fal ya ço xorafiyə çiyon bovə kardey, çı cohiliyyə zəmoni adətonku be. ikəsi ki, qıləy məntığış ni, bə xorafati dast ğandedə.

3-kufr iyən qıno bə insoni bədbəxtəti boyis bedə, harçənd zohirədə əv çı rifoh iyən asayişi dılədə həm bıbu.

4-isrof fəğət məhsulon məsrəfədə ni, bəlkəm çı həxı mığobilədə bıə harcurnə tuğyongərəti çı insoniyyəti həddiku dəvardeye.