821-ə hissə-Saffati surə-50-61 şərifə ayəon

821-ə hissə

فَأَقْبَلَ بَعْضُهُمْ عَلَى بَعْضٍ يَتَسَاءلُونَ (50) ‏

Çən, çəvonku kali qıləyni bə coqləyni dim bəqəteyn və iyəndeyku sıvol bəkardeyn.

قَالَ قَائِلٌ مِّنْهُمْ إِنِّي كَانَ لِي قَرِينٌ (51)

Çəvonku qıləyni bəvote: çımı qıləy həmrom(dust) hestebe ki,

يَقُولُ أَئِنَّكَ لَمِنْ الْمُصَدِّقِينَ (52) 

Votedəbe: aya tı bərosti bə(ğıyoməti) bovə kardə kəsonkuş?

أَئِذَا مِتْنَا وَكُنَّا تُرَاباً وَعِظَاماً أَئِنَّا لَمَدِينُونَ (53) 

Aya mardimon tul bimon iyən astə bimon(ijən bəyji bəbemon və) bəmə cəzo doey bəbe?

Vəynə proqramədə votemone ki, vəhışti əhl bə taxton təkyə kardə holədə bəbeyn və vəhışti şoyvonətiyonədə deştə duston səmimi surtədə həmnişin iyən həmro bəbeyn.

In ayəon əhle-vəhışti de iyande diyaloq iyən votemononku qıləyniku məlumat doydə ta bəçəmə ğafilə insonon pand iyən dığğətin bıey boyis bıbu və bızınəmon ki, vey mumkine dınyoədə deiyande bıə duston iyən həmnişinon həni axırət iyən ğıyoməti ruji bə ico əbınin və iyandeyku co bəbeyn. yəni çəvonku qıləyni bə vəhışt iyən coqləyni bə cəhəndım bəşeyn.

In ayəon hamyedə: vəhışti əhl ıştə votemononədə dınyoədə dəvardə çiyonku sıvol bəkardeyn və harqıləyni ıştə xotırəon bə zıvon bəvardeyn. çəvonku qıləyni bəştə dınyoədə bıə dusti xotırəon işorə bəkarde ki, ğıyoməti ruji inkor kardedəbe iyən insoni çı mardey bəpeştə ijən sənibəton bəyji qıləy ğeyri-mumkinə ko zıneydəbe. əv hejo de təəccıbi ıştə muminə dustiku dəparseydəbe: aya tı,həyğətən bə jıqo qıləy çi bovə kardedəş? aya ıştı etığod heste ki, bəçəmə dınyoədə kardə koon xoto, bəmə ğıyoməti ruji cəzo ya mıkofat doey bəbe?

Çın ayəonku omutedəmon:

1-de bedin iyən zəyifə imoni soybon həmnişin bıey, ehanə bə insoni imon iyən etığodi zəyifəti boyis nıbu, qıləy maneəş ni.məxsusən əgər inson əvoni bə din iyən həxı səmt dəvət kardey bızıno və ya hiçnıbu bəçəvon ideloji sıvolon cəvob doey bızıno.

2-miadi inkor kardə kəson bo mardey bədiqə ijən bəyji bıey təkzibiro hiç qıləy ağli ya təcrubiyə dəlilışon mevcud ni. çəvon dəlil ın ko ğeyri-mumkin bıey iyən təəccıb kardeye.

3-ğıyoməti ruji insoni dınyoədə bıə xotırəon çı viro nibebəşe və bəçəy sə omə çiyon bəştə yod vardey bəzıne.

قَالَ هَلْ أَنتُم مُّطَّلِعُونَ (54) 

Ayə şımə(vəhışti əhl) piyədəyone çəy holiku aqah bıbon?

فَاطَّلَعَ فَرَآهُ فِي سَوَاء الْجَحِيمِ (55) 

Çən, çəy holiku xəbədo bıbənən və əy çı cəhəndımi miyono bəvindiyon.

قَالَ تَاللَّهِ إِنْ كِدتَّ لَتُرْدِينِ (56) 

Vəhışti əhl bəvote: bə Xıdo ğəssəm kam mandəbe ki, mıni həm bə məhfi(həlokəti) tərəf bıbo.

وَلَوْلَا نِعْمَةُ رَبِّي لَكُنتُ مِنَ الْمُحْضَرِينَ (57) 

Və ehanə pərvərdıqori nemət(və lutf) bıənəbe, hukmən,(mı həm bə cəhəndımi) vardə bıə kəsonku əbim.

Həmonə vəhışti əhl bıə şəxs, boştə vəhışti duston ıştə dınyoədə bıə xotırəon dəvom bədoe və bəvote: dınyoədə çımı bə ğıyoməti ruji etığodi xoto şək kardə fərd ısət bə cəhəndımi giriftor bıə. ehanə şımə kardey bızınon çəy duzəx və cəhəndımədə bıə məğami bıvindon. həlbəttə, mı həm deəy həmnişin iyən dust bıey xoto, çı fırsiye iyən inhirofi mə`rəzədə və hətto mumkin be, az həm ısət çəy kəno cəhəndımədə bim. əmmo, Xıdovənde-Aləm bəçımı imon iyən çokə koon xoto, bəmış lutfış kardee və mınış çı yolə bədbəxtətiku peroxneşe.

Çın ayəonku omutedəmon:

1-bə Ğıroni ayəon əsos, vəhışti əhl cəhəndımi əhli seyr bəkardeyn və havaxti bıpyişone çı duzəxi əhli vəzyətiku xəbədo bıey və deəvon votemon həm kardey bəzıneyn. əmmo, cəhəndımi əhli vəhışti əhli vindey nibəzneyn və çı vəhışti əhli holətiku aqah bıey əznin.

2-de dini inkor kardə kəson dustəti iyən həmnışinəti, qıləy surətədə ki, bə şəxsi imoni zəyfəti boyis nıbu, işkol iyən aybış ni.eyni holədə de jıqo fərdon dustəti təhlukənine və ehanə Xıdovəndi lutf iyən inoyətış bıənıbe, inson bə təsiri ji dəbəşe və bənə həmonə cəhəndımi əhli bəbe.

أَفَمَا نَحْنُ بِمَيِّتِينَ (58) 

(Peşo, bəştə vəhıştiyə duston bəvote:)Ayə əmə həni nibəmardemon?

إِلَّا مَوْتَتَنَا الْأُولَى وَمَا نَحْنُ بِمُعَذَّبِينَ (59) 

İlla həmonə sıftənə maq ki,(dınyoədə) bəçəmə soyəx ome və əmə həni hiçvaxti əzob əvindınimon.

إِنَّ هَذَا لَهُوَ الْفَوْزُ الْعَظِيمُ (60) 

Beşək, ım həmonə dıjdə hərəbaxtətiye(ki, bəmə nəsib be).

لِمِثْلِ هَذَا فَلْيَعْمَلْ الْعَامِلُونَ (61) 

Bəbe əməli əhl bo jıqo məğami cəhdkon.

Ruşine ki, ikəs bə vəhışt varid bıbu, zıneydə ki, bəçəy soyəx həni hiç qıləy əzob nibome. çıro ki, əgər ğərol be əzob booy, bə vəhışt daxil bıey bənav əvon bəy mıbtəlo bəbeyn. əmmo, ın mətləbi bəyod dənoey iyən əy de zıvoni zikr kardey bə dıqlə çi xotoye. qıləyni ilahi inoyət iyən lutfi zikr kardeye ki, şukr iyən təşəkkurəti zəminə bəy məxsuse. çın mətləbi zikri coqləyniş ıme ki, çı insoni həmməysə barzə hərəbaxtəti ıme ki, əv dayimi formadə ilahi vəhıştədə sakin bəbe və çı harcurnə noxəşəti iyən bənə dınyoədə bə maqi boyis bıə piyəmerdətiku bə diyəron. ımi həm zikr kardey lozıme ki, dınyo kırtə umr de renc,zəhmət iyən məşəğğəti pure. əmmo, oxoş nıbə axırəti jimon iyən vəhışti əhl qıləy dayimiyə asayiş və rifohışon bəbe.

Oxonə ayə vəhışti əhli bo dınyo əhli bəyon kardedə və hamyedə: ”ha dınyo jimonədə de tobə ısət fırsət bıə kəson və umrışon baği mandə kəson ha! çanədə şımə zu vışkiyedə çokə ko bıkənən ta boştə axırəti ziyodə azuğə ehtiyotkənən”. mol iyən sərvət qıləy məhsule ki, dınyoədə erj və ğeymətış heste iyən foydənine. əmmo, axırəti vıjorədə fəğət əməl hıryedən və insonon deçəvon əməlon pamuyedən. nəinki, deçəvon sərvət, ğudrət iyən şohrəti.

Çın ayəonku umutedəmon:

1-vəhıştədə maq iyən nıbey mevcud ni. əmmo, cəhəndımədə bə çandə kərə əzobi xoto, cəhəndımi əhl bəmardeyn iyən sənibəton bəyji bəbeyn.

2- həyğiyə hərəbaxtəti, fosidə muhitədə ıştəni çı inhirofon iyən fırsiyonku oqətey girovədəy ta solimə inson bə məğsəd bırəso.

3-insoni dınyoədə kardə koon bəpe bə dıjdə hərəbaxəti iyən aliyə hədəfon rəsey xoto bıbu və ehanə jıqo nıbu, inson bə həsrət iyən dıjdə xəsorəti dıço bəbe.