826-ə hissə-Saffati surə-102-105 şərifə ayəon

826-ə hissə

فَلَمَّا بَلَغَ مَعَهُ السَّعْيَ قَالَ يَا بُنَيَّ إِنِّي أَرَى فِي الْمَنَامِ أَنِّي أَذْبَحُكَ فَانظُرْ مَاذَا تَرَى قَالَ يَا أَبَتِ افْعَلْ مَا تُؤْمَرُ سَتَجِدُنِي إِن شَاء اللَّهُ مِنَ الصَّابِرِينَ (102)

Çən, çoko(həmonə) nevcıvon ko iyən təloşədə deştə pı bə ico bıey sinni rəseyədə, çəy pı voteşe: ha çımı zoə ha! həyğətən, mı hanədə vindeme ki, tıni zibh kardedəm. çən, erəx ki, ıştı nəzə çokonəye?(əy çokonə vindedəş). voteşe: ha əzizə pı ha! bətı çiç əmr bıə əy bə vırə bıroson ki, ehanə Xıdo bıpyo, mıni səbrəkəyonku bəvindeyş.

Navnə proqramədə votemone ki, həzrəte İbreym(ə) Xıdovəndiku tələbış karde ki, vəy salehə fərzəndon ətoko. ın ayə hamyedə: Xıdovənde-Mənnani bəy əto kardə fərzənd çoko ki, bəştə nevcıvonəti iyən zizə oj kardə zəmoni rəse, Xıdovəndi de roya və hani roy vositə bə hzərəte İbreym(ə)-i əmr iyən fərmonış doe ki, ıştə fərzəndi Xıdo royədə zibhko.

Təbiiye ki, çın ko lozımə iyən şərt, çı pıə rizoyətisə əlovə, fərzəndi roziyəti və çəy ğəbul kardey lozım be. liza, ə həzrət bəştə fərzənd İsmoyli hamyeşe: bəmı jıqo qıləy əmr doey bıə ki, tıni Xıdo royədə ğıbonikəm. Aya tı bo ın saxtə ko hozzış ya ne? Bın barədə ıştı nəzə çiçe? De dədə dast ıştə fərzəndi zibh kardey?

Təbiiyə formədə adiyə insonon çın ilahi fərmoni mığobilədə çın sıvolonku bəhs kardedən: Xıdolim ha! ın çı koye ki, tı çımıku piyedə? ehanə dılı hestebe jıqo bıbu, çı sıftəku bəmı hiç fərzənd nıədəş? əgər həm ğərole ın fərzəndi ıştı royədə kıştey bıbu, çıro az ki, çəy pım, boçi mı ımi bə vırə bırosnom?

Əmmo, pəyğombəron bə risoləti məğami vıjniye bənav, Xıdovəndi bandən iyən bəçəy əmron təslimin. çəvon nəzəku Əv, əzın iyən hikməti soyb bıə Xıdoye ki, har qıləy əmr bıdo, bəçəy benəhoyətə elm iyən hikməti əsose. liza, hiç qıləy dəlil ni ki, mı deştə məhdudə elm iyən aqahəti çın əmr iyən fərmoni dəlili komilə surətədə dərkom.

Nevcıvonə İsmoyl(ə)-i cəvob ım be ki, voteşe: çımı əzizə pı! Xıdovəndi bətı əmr kardə çi bə vırə bırıson, pı deştə fərzəndi miyono bıə bəşəri hisson və atifəon bə kəno bınə və ıştə məmuriyyət iyən vəzifə bə vırə rosney fikədə bıbi. harçənd ın ko saxt iyən çətin həm bıbu. əmmo, aləmon vahidə pərvərdıqori əmri icro kardey koyədə bə həmmə saxtəti iyən muşkilaton tov bəvardem iyən tı mıni çı səbrəkəyonku bəvindeyş.

Çın ayəku omuteydəmon:

1-peyğombəron hanon inev boəvon ilahi vəhye. əmmo, ım çı fərdon barədə jıqo ni. liza, addiyə fərdon bəştə vində hani istinodən kardey nibəzıneyn boştə iyən bo cokəson qıləy vəzifə təyinkon.

2-bə fərzəndi dıl dəbaste bəbe bə ilahi əmron əncom doey, bə qıno irtikob bıey iyən bə Xıdo əmron nıpemandey mane nıbu.

3-bəştə vəzifə əməl kardey, bə səbr iyən sabitğədəməti ehtiyociş heste. bəbe bə ko saxtəti iyən çətinəti xoto, Xıdo əmriku vitey lozım ni.

‏ فَلَمَّا أَسْلَمَا وَتَلَّهُ لِلْجَبِينِ (103) 

Çən, çun har dıqləyni(bəçəmə əmron) təslim bin və İbreym ıştə fərzəndi dimış bəsə tulisə noşe(ta zibhko).

وَنَادَيْنَاهُ أَنْ يَا إِبْرَاهِيمُ (104) 

Əv nido jemone ki, ha İbreym ha!

قَدْ صَدَّقْتَ الرُّؤْيَا إِنَّا كَذَلِكَ نَجْزِي الْمُحْسِنِينَ (105) 

Həyğətən ki, ıştə hanı bə həyğətı rosne(bəçəmə əmri pemandiş). bərosti əmə bə çokə ko soybon jıləvoni mıkofot doydəmon.

İsmoyl(ə)-i ıştə bo ilahi fərmoni icro kardeeyro bıə  hozzıəti eloni bəpeştə ki, ım çı pı iyən zo Xıdo əmron mığobilədə təslimi nışonə be, İbreym(ə) ıştə fərzəndış bo zinhiro bəsə dimisə zəminisə olxortınışe və qədə-qədə hozzı bedəbe ta koy bə oxo bırosno. bə ləzədə nido iyən vanq ome ki, ha İbreym ha! əmə ıştku ıştə zoə sə bırniyemon nipiye, bəlkəm ıştıku ıştə dıli çəyku bırniyemon tələb karde ki, tı bın saxtə imtovonədə səbarz biş. çəmə bətı roya iyən hanədə əmr kardə çi, çoko lozıme bə həyğət rosne və nışonı doe ki, həm ilahi əmri bə vırə  rosney fikı heste və həmən çəy royədə ıştəku hiç qıləy sıstəti iyən səhlənkorəti nışon doydəniş.

Harçənd, İsmoyl(ə) zibh nıbe, əmmo İbreym(ə)-i niyyət ım be ki, ıştə fərzəndi Xıdo royədə zibhko. çəy həmonə niyyət vəs kardeşe və çı əməli əvəzi ğəbul be.

Umumən, dini fərhənqədə har qıləy ko erj və ğeymət çı insoni niyyətiku bəşıkrəy və çı mumini bo qıləy xəyə koyro bıə niyyət, çəy əməlisə vey erjin və ğeymətin hisob bıə.

Çın ayəonku omutedəmon:

1-Xıdo iyən bəçəy əmron təslim bıey, ilahi ovliya iyən pəyğombəron kəmolatonku qıləyniye. umumən, ə ko bə tarıfi loyığe ki, de Xıdo mığobilədə təslimi iyən deçəy roziyəti bə ico bıbu.

2-qahi vaxti ilahi əmron bi insoni imtovon kardey xotoye.

3-bə mənəviyə kəmolaton rəseyro qıləy həddı-marz mevcud ni. qahi vaxti(bənə İsmoyli bıə) qıləy nevcıvon de surəti bə kəmoli mərtəbəon rəseydə və bın royədə bənə(ibreymi bıə) ilahi dıjdə ovliya kəno ğərol qəteydə.

4-ehson, fəğət mali iyən puli cəhəto ni. Xıdo royədə ıştə coniku dəvarde həm i nev ehsone.