827-ə hissə-Saffati surə-106-113 şərifə ayəon

827-ə hissə

إِنَّ هَذَا لَهُوَ الْبَلَاء الْمُبِينُ (106)

Bərosti, ın həmonə oşkoə imtovon be.

وَفَدَيْنَاهُ بِذِبْحٍ عَظِيمٍ (107) 

Və əmə qıləy dıjdə ğıboni bəy fido kardemone.

وَتَرَكْنَا عَلَيْهِ فِي الْآخِرِينَ (108) 

Və vəoməyon miyono boəy qıləy(çokə nom bə dumo) nomone.

Vəynə proqramədə votemone ki, çoko ki, İbreym(ə) iyən İsmayil(ə) bo ilahi əmri icro kardero hozzı bin, Xıdovəndi vanqış je ki, ha İbreym ha! bətı royada vində çi, tı çoko lozıme bə vırə rosne və ıştə vəzifə bə vırə rosneyədə sıstəti iyən səhlənkorəti nıkarde.

In ayəon hamyedə: Xıdovəndi deçəy pı dasti həzrəte İsmoyli(ə) zibh kardey məğsəd, bo İbreym(ə)-i qıləy imtovon be, nəinki, Xıdovəndi dılış hestebe İsmoyl(ə)-i xuni deçəy pı dasti bəsə zəminisə rubo. ım qıləy imtovon be ki, mıəyyən bıbu aya İbreym(ə) hozzıe ıştə dıli ıştə fərzəndiku bıbırno və Xıdo fərmoni bə vırə bırosno ya ne? Həyğətədə, Xıdovənde-Aləmi hədəf, İbreym(ə)-i ıştə fərzəndiku dıl bırniye be, nəinki, çəy sə bırniye. liza, çoko ki, əvon ıştə hozzı bıeyışon nışon doe, Xıdovəndi əmrış karde ki, İbreym(ə) çı İsmoyli(ə) əvəzi, qıləy dıjdə ğoçi Xıdo royədə ğıboniko ta ım İbreymə(ə) sınnət və adət tarıxi dırozi çəyku bə yadiqar bımando. həmçinin, boçımi xoto be ki, Xıdo Kə zayitron və Məkkədə həcci mərosimədə iştirok kardə kəson, Mina sərzəminədə İbreym(ə) iyən İsmoyl(ə)-i bə yod vardedən və Xıdo royədə ğıboni kardedən.

Çın ayəonku omutedəmon:

1-fərzəndiku dast kəşe iyən pı de fərzəndi rabitəku dıl bırniye, ilahi saxtə imtovonkuye ki, İbreym(ə) iyən İsmoyl (ə) çın imtovoniku səbarz xaruc bin.

2-Xıdo royədə ğıboni kardey, İbreymə(ə) sınnət və adəte ki, ha sor Ğıbonə idədə Məkkə iyən islomi sayir şəhr və sərzəminonədə bə vırə rosney bedə.

3-veyə insonon heste ki, ıştə bəpeştə çokə əməlon noydən. əve çəvon nomon çı vəomə milləton miyono əbədiyə formədə mandedə.

سَلَامٌ عَلَى إِبْرَاهِيمَ (109) 

Səlom bıbu bə İbreymi.

كَذَلِكَ نَجْزِي الْمُحْسِنِينَ (110) 

Əmə jıləvoni bə çokə koəkəyon mıkofot doydəmon.

إِنَّهُ مِنْ عِبَادِنَا الْمُؤْمِنِينَ (111) 

Həyğətən, əv çəmə muminə bandəonku be.

Navnə ayəon dəvomədə ki, İbreym(ə) ıştə fərzəndi zibh kardey koyədə səbarz bıey bəpeştə Xıdovəndi bə ə həzrəti məxsusə lutfi bəyon kardedəbe, ın ayəon tarıxi dırozi Xıdovəndi bə ə həzrəti vığandə səlomi bəyon kardedə. peşo hamyedə: ın lutf iyən inoyət fəğət bə İbreym(ə)-i məxsus ni və hakəs ki, ıştə mol, con iyən piyə çiyon ğədərədə Xıdo royədə çəyku dəvardo, bə ilahi məxsusə mıkofaton şomil bəbe.

Hakəs imoni əhl bıbu və Xıdovəndi bandəçəti royədə hərəkətko iyən məhzə formədə bəy təslim bıbu, bənə İbreym(ə)-i bə Xıdovəndi səlom iyən lutfi şomil bəbe və ıın ko tarıxi dırozi hejo dəvom pəydu bəkarde.

Çın ayəonku omutedəmon:

1-Xıdovənd Kərimə-Ğıronədə bəştə pəyğombəron səlom vığandedə. əmmo, islomi pəyğombəri(s) barədə həm Xıdo və həmən firiştə və məlayikon bə ə həzrəti səlom və salavat vığandedən və bın cəhətədə Xıdovənde-Xalığ muminonku həm tələb kardedə ki, hejo bə ə həzrəti səlom iyən salavat bıvğandon.

2-Bə harcurnə çokə ko, dınyo iyən axırətədə de İlahi mıkofati cəvob doey bəbe.

3-ilahi cəzo iyıən mıkofati nizom, bə qıləy mıəyyənə ğanun və sınnəti əsose. nəinki, bə məxsusə zovğ iirodə və tələbi əsos bıə qıləy koye.

وَبَشَّرْنَاهُ بِإِسْحَاقَ نَبِيّاً مِّنَ الصَّالِحِينَ(112) 

Və bəy çı salehə pəyğombəronku bıə İshoğımon domone.

وَبَارَكْنَا عَلَيْهِ وَعَلَى إِسْحَاقَ وَمِن ذُرِّيَّتِهِمَا مُحْسِنٌ وَظَالِمٌ لِّنَفْسِهِ مُبِينٌ (113) 

Və bəy iyən bə İshoği bərəkət və xəy əto kardemone və çə dıqlə nəsliku kali qıləyni çokə koəkə iyən(bəziyon) oşko bəştə sıtəm kardedən.

Kərimə-Ğıron vəynə ayəonədə bə həzrəte İbreym(ə)-i fərzəndi yəni İsmoyl(ə)-i işorə kardedəbe və bın ayəonədə İsmoyl(ə)-i de cqıləy səbrəkə iyən həlimə nevcıvoni nomi zikr kardedə. əmmo, ın ayəon çı İbreym(ə)-i coqlə fərzənd yəni İshoğ(ə)-i həxədəy ki, Xıdovəndi çəy pəyğombərəti və`dəş bə həzrəte İbreym(ə)-i  doəş be.

Qıləy pəyğombər ki, bənə co pəyğombəron çı sallehon iyən çokə ko soybonku be. liza, ilahi məxsusə lutf iyən inoyət bəy şomil be. qıləy lutf ki, Kərimə-Ğıron əy de bərəkəti nomi zikr iyən təbir kardedə. həmmə çiyədə bərəkət yəni umr və jimonədə, nəsl iyən zurriyədə və əndişə iyən məktəbədə. zira, bərəkət dəvomin iyən abədiyə xeyi mənoədy. əbədiyə xəeyonku qıləyni ıme ki, Bəni-İsrayli pəyğombəron çı həzrəte İshoğ(ə)-i nsəliku be. həlbəttə, islomi əziz-qıramiyə pəyğombər(s) çı həzrəte İsmoyl(ə)-i nəsliku be.

Çın ayəon oxoyədə hamyedə: həlbəttə, həzrəte İshoğ(ə)-i nəsliku bıə qırd fərzəndon çokə ko soybon nıbin. bəlkəm, çəvon i dastə zolım iyən qınokor bin. ım çı bəşəri irodə iyən ixtiyori tələbonin ki, deməkə çı qıləy pokə varisku həm bə əməl omə, əmmo əv nodırıstə roy həm vıjniye və bə əksə roy səmt həm hərəkət kardey bəzıne.

Çın ayəonku omutedəmon:

1-pəyğombəron xanedan həm mumkine çı noxələfə fərzəndi soyb bıbon. de pəyğombəron ya pokə insonon nəsəbi ya xıyzoniyə rabitə, sırfən çı fərdon hidoyət pəydu kardey mənoədə ni. mumkine pı Xıdo dərqoyədə vıjniyə bıə kəsonku bıbu, əmmo fərzənd həxə royku mınhərif bıbu.

2-həzrəte İbreym(ə)-i ıştə fərzənd iyən xıyzoni həxədə kardə dıvo, İsmoyl(ə), İshoğ(ə) iyən çəvon bəpeştə omə nəslonədə  ilahi ziyodə lutfon ğəbul kardey zəminəş hozzı karde. əmə həm hejo boştə fərzəndon iyən omə nəslon saleh və ləyoğətin bıey xoto, dıvokəmon.