845-ə hissə-Sadi surə-59-66 şərifə ayəon

845-ə hissə

هَذَا فَوْجٌ مُّقْتَحِمٌ مَّعَكُمْ لَا مَرْحَباً بِهِمْ إِنَّهُمْ صَالُوا النَّارِ (59) 

(Bə duzəxi yolon votey bəbe:)In(bəşmə pemandə) dastəy ki, deşmə bəico bə duzəx varid bəbeyn. (Əvon bəvoteyn:)Boəvon qıləy xəşomə ni. zira ki, əvon bə otəş eqıniyən(bə cəhəndım daxil bıən).

قَالُوا بَلْ أَنتُمْ لَا مَرْحَباً بِكُمْ أَنتُمْ قَدَّمْتُمُوهُ لَنَا فَبِئْسَ الْقَرَارُ (60) 

Əvon bəştə rəhbəron bəvoteyn: bəlkəm, boşımə xəşomə nıbu ki, şımə ın əzob çımi bənav boəmə vığandəyone. çən, çı bevəcə vırəy.

قَالُوا رَبَّنَا مَن قَدَّمَ لَنَا هَذَا فَزِدْهُ عَذَاباً ضِعْفاً فِي النَّارِ (61)‏

Bəvoteyn: Xıdolim ha! hakəsi ın əzobış boəmə hozzı kardə, çən, çəy əzobi otəşi dı bərobər ziyodkə!

Vəynə proqramədə ğıyoməti ruji çı sıtəmkor iyən tuğyongəron kali cəzoon  bəyon be. ın ayəon dəvomədə hamyedə: duzəx və cəhəndımi əhl bə əyo tojə varid bıəkəson pişvoz nibebəşeyn, bəlkəm bəvon sıxan bəğandeyn və əvoni mızəmmət bəkardeyn. bə Kərimə-Ğıroni ayəon əsos, həm zəloləti rəhbəron ıştə tərəfdoron və həmən çəvon tərəfdoron əvoni mızəmmət bəkardeyn və əvon bə iyande sə-sıxan bəkardeyn. əvon ıştə bə cəhəndım eqıney bəiyənde qiy şobədon, ıştə rəhbəron mığəssır bəzıneyn və bə iyande nifin iyən nəhlət bəkardeyn.

Duzəxi məmuron nə kufr iyən şırki yolon bəvoteyn: ımon şımə dınyoədə bıə tərəfdoron bin ki, ımruj həm dastə-dastə deşmə bəico və şımə dumo bə cəhəndım daxil bəbeyn. əvon ki, dınyoədə şımə dumo bin iyən bəşmə pemandedəbin, ımruj cəhəndımədə de şımə ivrən və şımə həmmə duzəxi otəşədə bəsutiyon.

Im qıləy umumi ğaydə və dəbe ki, keynə qıləy dastə bə qıləy vırə daxil bıbon, əyo bıə kəson bəvon xəşomə votedən. əmmo, çı kuf iyən şırki  rəhbəron ki, ıştə tərəfdoron bənav bə cəhəndım varid bıən,bə cəhəndım tojə daxil bıəkəson jıqo bəvoteyn: bə duzəx xəş oməniyon! və ə kəson ki, bə cəhəndım varid bıə holədən, bəştə rəyis iyən rəhbəron bəvoteyn: şımə ıştən həm xəş oməniyon! ım şımə biyon ki, bəçəmə bə ın vırə eqıney boyis biyon və əmə jıqo bə duzəxi dıço bimon. peşo, əvon Xıdovəndiku tələb bəkardeyn ki, çəvon rəhbəron əzobi dı bərobərkə və dı kərə veykə. zira, əvon bəçəvon tərəfdoron zəlolət iyən ro qim kardey səbəb bıən.

Çın ayəonku umutedəmon:

1-cəhəndımi əhl iyande mızəmmət bəkardeyn və bə iynade nifrət bəkarde. har dastə ıştə tərəf mığobili mığəssır bəzıneyn və bəiyande nosəzoə sıxan bəvoteyn.

2-ğıyomət insoni dınyoədə kardə koon təcəssıme. əv, harçənd ıştə əməlon nəticə əyo mışohidə bəkarde.

3-ıştə qıno bəcokəson qiy şodey nibəzne. harçənd kufr iyən şırki yolon mığəssırin iyən çəvon əzobe dı bərobəre, əmmo, hiçcurə çəvon tərəfdoron çı məsuliyyətiku vitey nibəzıneyn.tərəfdoron ki, çəş bastə holədə bə kufr iyən zılmi yolon itoət kardedəbin, ıştən həm mığəssırin və har dıqlə dastə cəhəndımədə bəsuteyn.

وَقَالُوا مَا لَنَا لَا نَرَى رِجَالاً كُنَّا نَعُدُّهُم مِّنَ الْأَشْرَارِ (62) 

Və bəvoteyn: çıro çəmə əvoni şər hisob kardə merdon(cəhəndımədə) vindedənimon.

أَتَّخَذْنَاهُمْ سِخْرِيّاً أَمْ زَاغَتْ عَنْهُمُ الْأَبْصَارُ (63) 

Aya əmə(nohəxədə) bəvon məsxərə kardedəbimon? ya(əvon duzəxədən və bəçəmə çəşon) qıniyedənin?

إِنَّ ذَلِكَ لَحَقٌّ تَخَاصُمُ أَهْلِ النَّارِ (64) 

Otəşi(duzəxi) əhli ım mıcodilə(hesı-pes) hukmən vağe bəbe.

Cəhəndımi əhl dınyoədə ıştəni yolə şəxsiyyət və iştimayi məğamış bıə kəson zıneydəbin. əvon qımon kardedəbin ki, imoni əhli əksəriyyət, cəmiyyəti miyono elm iyən kəmoli cəhəto vey saru iyən beyjin. əvon har qıləy fırsətədə bə ləyoğətinə insonon istehzo kardedən və deştə zıvon iyən rəftoron məsxərə kardedəbin.

In ayəon hamyedə: quya əvon çəş kardedəbin, ısət ki, əvon ıştən bə cəhəndım eqıniyən, dılışon hestebe muminon həm bə cəhəndım eqınon. əmmo,çun əvon imoni əhli cəhəndımədə vindedənin, votedən: aya əmə əvoni nohəxədə məsxərə kardedəbimon və əvon ısət vəhıştədən? yaan ki,əvon cəhəndımədən ki, əmə əvoni vindedənimon?

Imruj həm istemar iyən imperiyalistə ğudrəton həm intizorışon heste ki, çəvon dınyo mıxtəlifə noxtəonədə bıə zım iyən sıtəmon mığobilədə, sıtəm vində milləton hiç qıləy reaksiyə nışon nıdon və bəçəvon mədəniyyət iyən erjon təslim bıbon. ehanə ədolət tələb iyən imoninə fərdonku idastə həm de zolımon mıborizə bıbon, məzlumon həxon mıdofiyəkon və çı sultəgərə ğudrəton mığobilədə bımandon, əvoni kişvəri ya dınyo nizomi bəyənde jıə şərə ğıvvə iyən usyonçi hisob kardedən.

Çın ayəonku umutedəmon:

1-vey mumkine ki, dınyoədə bəvon məsxərə kardey bıbu, əmmo ğıyoməti ruji nicot pəydu kardə kəsonku bəbeyn. əvon bə vəhışt bəşeyn, əmmo əvoni bə ləğ noəkəson bə cəhəndım.

2-dınyoədə fərdon bəçəvon zohiri əsos mıhokimə məkəmon. vey mumkine ımruj zohirədə exroc və aybəcor bıəkəson, ğıyoməti ruji  barzə məğami soyb bıbon.

قُلْ إِنَّمَا أَنَا مُنذِرٌ وَمَا مِنْ إِلَهٍ إِلَّا اللَّهُ الْوَاحِدُ الْقَهَّارُ (65) 

Vuji: mı fəğət tarsədəm və ğərəz vahid, ğəhrəkə Xıdo hiç qıləy mə`bud mevcud ni.

رَبُّ السَّمَاوَاتِ وَالْأَرْضِ وَمَا بَيْنَهُمَا الْعَزِيزُ الْغَفَّارُ (66) 

Osmonon və zəmini iyən çə dıqlə miyono bıə çiyon pərvərdıqore, nufuz ğəbulnıkə iyən vey əbaxşe.

Cəhəndımi əhli barədə sıxan votən ayəon oxoyədə, Xıdovənde-Aləm bə islomi əzizə peyğombər(s)-i jıqo hamyedə: bə mışrik iyən kofiron və bəçəvon yolon vuji: mı həm bəşmə çəşnavi doydəm ki, şımə dəvardə milləton torıxiku ibrət peqətən və ıştə şırk iyən kufriku dast bıkəşən. şımə bızınən ki, ğərəz vahidə Xıdo co qıləy mə`bud mevcud ni.qıləy mə`bud ki, çəy ğudrəti oxoş ni və hiçkəs çəy mığobilədə mığovimət nışon doy əzıni. əv osmon iyən zəmini xalığe və qırd hestemoni aləmi koon tədbiri vindedə. həlbəttə, ıştə mislış nıbə ğudrət iyən məğlub nıbəti kənoyədə, əv bəçəy tərəf oqardə bəştə xətokor iyən qınokorə bandəon nisbətədə vey mehribon iyən əbaxşe.

Çın ayəonku umutedəmon:

1-bəşorəti kənoyədə bəpe tars və xəbərdorəti həm bıbu ta ğəfləti pardə çı insonidıliku pok bıbu, bışo. çun, inson ıştə jimonədə de kali xətər iyən  zəloləti amilon dimbədim omeydə, təzəkkur iyən pand bəçəy oğoəti iyən çı inhirof və kəcətiyonku ozodəti boyis bıbu.

2-qırd aləm iqlə mudir iyən irodə jiyədəy və pərvərdıqore-aləmi ğudrət iyən tədbir bə qırd hestemoni aləmi hakim və cariye.

3-Xıdovəndi həm benəhoyətə ğudrətış heste və həmən oxo iyən  intəhoş nıbə rəhmət. bə dınyo nizomi əks ki, adətən ğudrəti soybonədə lutf iyən rəhmət mevcud bedəni.