854-ə hissə-Zuməri surə-11-16 şərifə ayəon

854-ə hissə

‏ قُلْ إِنِّي أُمِرْتُ أَنْ أَعْبُدَ اللَّهَ مُخْلِصاً لَّهُ الدِّينَ (11) 

Bıvot: bərosti bəmı Xıdo pərəstış kardey əmr bıə. qıləy holədə ki, dinim boəy xolisim kardə.

وَأُمِرْتُ لِأَنْ أَكُونَ أَوَّلَ الْمُسْلِمِينَ (12) 

Və fərmonım sıə ki, iminə mısılmon bıbum.

قُلْ إِنِّي أَخَافُ إِنْ عَصَيْتُ رَبِّي عَذَابَ يَوْمٍ عَظِيمٍ (13) 

Bıvot: həlbəttə, ehanə bəştə pərvərdıqori nisbətədə isyonkom, dıjdə ruji əzobiku tarsım heste.

Vəynə proqramədə bə təğva, çokə ko bə vırə rosney, səbr iyən sabitğədəməti işorə be ki, qırd ımon çı imoni əhli nışonəonkuon. ın ayəon çın bəhsi dəvomədəbə Peyğombəre-Əkrəm(s)-i xitob kardə holədə hamyedə: de oşkoə formə bə mışrikon elonkə ki, bəmı çı Xıdovəndi tərəfiku əmr bıə ki, ıştə din iyən ayini çı harcurnə şırkiku xoliskəm və fəğət bo Xıdo bandəti bıkom. həmçinin,az məmurim ki, imoni əhli miyono bo Xıdo pərəstışiro bənav dəşim və çı harcurnə şırkamizə əməl iyən rəftoriku bə diyəro bımandom.

Ayəon dəvomədə hamyedə: hakəs bə ilahi fərmon iyən əmron nıpemando. bə qıləy yavə əzobi dıço bəbe və bın koyədə çı peyğombər iyən co mısılmınon miyono hiç qıləy tafut və farğ mevcud ni. ilahi əmron mığobilədə təslim bıey, dınyo iyən axırətədə ilahi ğəhr və ğəzəbiku perəxey mənoədəy və bın koyədə peyğombər(s)-i bəsə co mısılmınonsə ziyodə məsuliyyətış heste.

Peyğombəron bəsə co insononsə boştə hiç qıləy imtiyoz və bəpe bıey ğayil nıbin və əvon həm bənə cokəson ıştəni çı Xıdo bandə zınedəbin və bəçəy əmron təslim bedəbin. ım ıştən bəçəvon həxəti iyən həğğaniyyəti qıləy çokə dəlile. bə kali duyədə nıbuvvəti iddio kardə kəson əks ki, milləti bə Xıdo tərəf dəvət kardey əvəzi, əvoni bəştə səmt səlo jeydəbin və ya boştə qıləy məxsusə imtiyoz nəzədə qətedən.

Çın ayəonku omutedəmon:

1-peyğombəron, Xıdo xəbə və mesajon bə milləti rosnə kəsonin. əvon ıştəku hiççi votedənin və ya qıləy ko əncom dodyənin.

2-Xıdo pərəstışi çı harcurnə şırkamizə rəftor iyən fikiku xolis kardey, ilahi peyğombəron həmməysə muhimmə vəzifəonku bıə.

3-ğıyoməti ruji ilahi məhkəmədə çı peyğombər iyən co insonon miyono hiç qıləy tafut ni və çəvon qıləy məxsusə imtiyozışon nibəbe.

قُلِ اللَّهَ أَعْبُدُ مُخْلِصاً لَّهُ دِينِي (14)

Vuji: az, fəğət Xıdo pərəstış kardedəm. qıləy holədə ki, ıştə dinım boəy xolis kardəme.

فَاعْبُدُوا مَا شِئْتُم مِّن دُونِهِ قُلْ إِنَّ الْخَاسِرِينَ الَّذِينَ خَسِرُوا أَنفُسَهُمْ وَأَهْلِيهِمْ يَوْمَ الْقِيَامَةِ أَلَا ذَلِكَ هُوَ الْخُسْرَانُ الْمُبِينُ (15) 

Çən, şımə ğərəz əv harçi dılon heste pərəstışkənən. (ha pəyğombər ha! bəvon)vuji: bərosti(həyğiyə) ziyonkoron əkəsonin ki, ıştən iyən çəvon əhl(nezə odəmon) ğıyoməti ruji ziyonışon kardə. aqah bıbənən ki, ım həmonə oşkoə ziyone.

Navnə ayə dəvomədə ki, peyğombəri hamyeşe: bəmı əmr bıə ki, Xıdo dini xolisonə elonkəm və Xıdo de qıləy komilə ixlosi pərəstışkəm.bın ayəonədə hamyedə: az əmələdə həm jıqo kardəme. zira, əvvəla fəğət Xıdo pərəstış kardedəm. nəyinki, ğərəz əv co çiyon. saniyən, bın pərəstışədə hiççi iyən hiçkəsi bo Xıdo şərik ğərol doydənim. peşo bə mışrikon xitob kardə holədə hamyedə: mı şıməni bə xolis iyən pokə dini tərəf vanq və dəvət kardedəm. ısət ki, şımə əy ğəbul kardedəniyon, çiçon piyedə pərəstışkənən və bızınən ki, şımə bə dıjdə ziyon iyən xusroni dıço bıəyon. zira, de ğərəz Xıdo co çiyon pərəstış kardey, həyğətədə şımə ıştən iyən ıştə nezə odəmonın ğıyoməti ruji bə qıləy oşkoə ziyoni giriftorın kardə. şımə qımon məkənən ki, maliyyə xəsorət və ziyon həmməysə dıjdə ziyone. bəlkəm, həyğiyə xəsorət və ziyon axırəti ruji ziyonone. qıləy ruj ki, yavə ko soybon səbərəseyn ki, Xıdo bəvon doə istedodon, imkonaton və ıştə vucudi həmmə sərmoyəonışon hədərə çı dasto doəşone vəəvon kəmoli kəsb kardey və bə əbədiyə hərəbaxtəti rəsey əvəzi, sıvoy xəsorət iyən ziyoni co hiççişon bə dast vardəni. çımisə əlovə boəvon həni hiç qıləy ro mandəni ta əvon ıştə dəvardə xəto iyən qınon əvəzi beşon. ım həmonə oşkoə xəsorət və ziyone.

Çın ayəonku omutedəmon:

1-peyğombəron, ilahi əmron bə vırə rosney koyədə navəjən və navədə şıə kəsonin. əvon cokəsonku bənav və deştə qırd vucudi ilahi fərmonon icro kardedəbin. hiçvaxti jıqo bıəni ki, əvon milləti bə həxı səmt dəvətkon, əmmo ıştən bəy əməl və rioyət nıkon.

2-peyğombəron vey muhimmə vəzifəonku qıləyni, Xıdo dini çı harcurnə şırk, bidət, xorafat iyən təhrifiku təmiz iyən pok kardey bıə. çıro ki, ımon çı dini dıjdə ofotonku bə hisob omeydən.

3-peyğombəron, Xıdo dini xəbə və mesajon bə qırd milləti rosnə məmuronin. əmmo, zıneydən ki, millətiku idastə çəvon həxə sıxanon ğəbul nibəkardeyn. demiyən ijən əvon məyus və nomum bedənin və bəştə kon dəvom doydən.

4-inson nəyinki, fəğət ıştə vədə, bəlkəm ıştə xıyzoni mığobilədə həm məsuliyyətış heste. bə dini təlim iyən erjon əsos fərzəndon tərbiyə, aylədə valideynon vəzifəonku qıləyniye.

لَهُم مِّن فَوْقِهِمْ ظُلَلٌ مِّنَ النَّارِ وَمِن تَحْتِهِمْ ظُلَلٌ ذَلِكَ يُخَوِّفُ اللَّهُ بِهِ عِبَادَهُ يَا عِبَادِ فَاتَّقُونِ (16) 

Boəvon, çəvon sə pentoniku otəşiku qıləy ləjim və(həm) çəvon po bıniku(otəşiku) ləmon heste. ım qıləy cəzoye ki, Xıdo deəy  bəştə bandəon tars doydə. ha çımı bandəon ha! çımıku bıtarsənən.

In ayə bə ğıyoməti ruji həyğiyə ziyonkoron vəzyəti işorə kardedə və hamyedə: duzəx və cəhəndımi otəşi şoləon əvoni çı har tərəfiku dəbəqəte və həni bo fərol kardeyro hiç qıləy ro nibəmande. ın, həyğətədə bo həmmə insonon qıləy çəşnavi və xəbərdorətiye ki, ehanə dınyoədə çı təğva roy nıqəton və Xıdoku nıtarson, mumkine ğıyoməti ruji əvon həm bə jıqo qıləy dardnokə tale və sərnıvışti dıço bıbon.

Çın ayəku omutedəmon:

1-kufr, şırkiyən Xıdo çı viro bekardey, bə insoni fəlokət iyən bədbəxti boyis bəbe. ikəs ki, dınyoədə çı şırk iyən kufri royış qətəbu, axırətədə bə ilahi ğəhro-ğəzəbi dıço bəbe ki, bənə otəşi çəy dim və sıfəti bəsutne.

2-cəhəndımi otəşiku perəxey yeqanə roy, pərhizkorəti iyən qınoku bə diyəro mandeye. qıno bənə qıləy otəş icod kardə maddəy ki, fəğət deçəy vəy qətey, bə cəhəndımi otəşədə sutey mane bıey bəbe.