869-ə hissə-Ğafiri surə-7-9 şərifə ayəon

869-ə hissə

الَّذِينَ يَحْمِلُونَ الْعَرْشَ وَمَنْ حَوْلَهُ يُسَبِّحُونَ بِحَمْدِ رَبِّهِمْ وَيُؤْمِنُونَ بِهِ وَيَسْتَغْفِرُونَ لِلَّذِينَ آمَنُوا رَبَّنَا وَسِعْتَ كُلَّ شَيْءٍ رَّحْمَةً وَعِلْماً فَاغْفِرْ لِلَّذِينَ تَابُوا وَاتَّبَعُوا سَبِيلَكَ وَقِهِمْ عَذَابَ الْجَحِيمِ (7)‏

(Xıdo)Ərşi kırniyə mələkon və əvon ki, çəy ətrofədən, bəştə pərvərdıqori həmdo-təsbih votedən və bəy imonışon heste. və bo muminon məğfırət tələb kardedən. (və votedən)Xıdolim ha! ıştı elm və rəhməti həmmə çiyonıış dəqətə. çən, tobə kardə kəson və bəştı(şıə) roy tabe bıə kəson bıbaxş və əvoni cəhəndımi əzobiku hifzkə(oqət).

Bə Kərimə-Ğıroni ayəon əsos, firiştə və mələkon hestemoni aləmi nizomi sistemi xıdmətçiyoninvə veyə koonədə əvon Xıdo de insoni miyono vositən. ım ayə bə məlayikon de insoni miyono bıə irtibat və rabitə coqlə cəhəti işorə kardedə və hamyedə: ilahi mığərrəbə firiştəon ki, hestemoni aləmi tədbiri mərkəzədəy yəni ilahi ərşi kırrneydən. ım mələkon deməkə ki, ıştən de ilahi təsbih iyən sıtoyişi məşğulin, əvon həmçinin bo imoni əhli dıvo kardedən və boəvon istiğfor kardedən.

Çəvon sıxan jələvoniye: Xıdolim ha! tı itərəfiku çəvon qırd xəto və qınoonku xəbədoş və co tərəfiku həm ıştı rəhməti dayirə həm vey hevuj və qeşe, çən çı tobəkoron xətoku dəvard və icozə mədə ki, əvonbə cəhəndımi otəşi dıço bıbon.

Həyğətədə, ın ayə bə muminon bəşorət və mıjdəvoni doydə ki, ilahi ərşi həml kardə və kırnə məlayikon ki, çı ğeybi aləmi həmməysə zumandə ğudrəton bə hisob omeydən, şımə hami iyən himoyədoronin. əvon hejo və dayima boşmə dıvo kardedən və Xıdoku tələb kardedən ki, şıməni bəştə oxoş nıbə əfv iyən rəhməti şomilko, şımə xəto və qınoon bıbaxşo və şıməni çı cəhəndımi əzobiku ozodko. əvon şımə bın dınyoədə bıə səbarzətiyon və axırəti aləmədə bıə nicot pəydu kardey və perəxey Xıdoku tələb kardedən və ım bo muminon dıliqaməti və dılvandətiro həmməysə yolə vositəy.

Isət inson hissko ki, dınyo bə maddi nizomi iyən məhsus bıə aləmi məhdud ni, bəlkəm qıləy ğeybi ğudrət heste ki, imoni əhl himoyə kardedə və bəy hami beydə, bın de renc iyən əzobi pur bıə dınyoədə boəy qıləy yolə himoyəy. ım hisson bə insoni Xıdo royədə umu, şoyvonəti iyən mığoviməti ğudrəti baxş kardedə.

Çın ayəku omutedəmon:

1-Xıdo dərqoyədə mığərrəbə firiştə və mələkon bo muminon dıvo kardey və əvoni himoyə kardey, umu baxş kardey və mıjdəvoniye. ım ıştən bə iilahi ayini tərəfdoron dılvandəti boyis bedə.

2-bo cokəson dıvo kardey, qıləy bə xoş omə erj və koye. əmə həm çı firiştəonku omutəmon və çı cokəson həxədə dıvokəmon və Xıdoku bo co fərdon xey-bərəkət tələbkəmon.

3-insoni de Xıdo iyən deçəy mələkon rabitə, imon iyən salehə əməle. ehanə ım ittisol və dəçıkemoni rismoni ğoym bıbu, inson dınyo iyən axırətədə çı suğut iyən həlokətiku nicot pəydu bəkarde.

رَبَّنَا وَأَدْخِلْهُمْ جَنَّاتِ عَدْنٍ الَّتِي وَعَدتَّهُم وَمَن صَلَحَ مِنْ آبَائِهِمْ وَأَزْوَاجِهِمْ وَذُرِّيَّاتِهِمْ إِنَّكَ أَنتَ الْعَزِيزُ الْحَكِيمُ (8) 

Pərvərdıqor ha! əvoni iyən çəvon pıon, jimoni həmroon və fərzəndonku hakəs ki, loyığe(səlohiyyətışon heste) ıştı bəvon və`də doə boğon daxilkə. həyğətən, tı əziz iyən həkimə Xıdoş.

وَقِهِمُ السَّيِّئَاتِ وَمَن تَقِ السَّيِّئَاتِ يَوْمَئِذٍ فَقَدْ رَحِمْتَهُ وَذَلِكَ هُوَ الْفَوْزُ الْعَظِيمُ (9) 

(Xıdolim ha!)Əvoni bədə(çiyonku) oqət və hakəsi ki, (tı)həmonə ruji bədiyonku oqətoş, çən bəştə rəhməti şomilı kardə və ım həmonə yolə perəxeye.

Vəynə ayəon dəvomədə ki, çı firiştə və məlayikon bo muminon dıvo iyən istiğfori bəyon kardedəbe, ın ayəon hamyedə: firiştə və mələkon Xıdovəndiku nəyinki, bo muminon çı qınoonku pok bıey iyən əzobiku bə diyəro mandey tələb kardedən, bəlkəm çəvon deştə xıyzoni uzvon bə ico vəhıştədə əbədi mandey həm tələb kardedən.

Həlbəttə, çı xıyzoni uzvoni hissəku məğsəd, bə vəhışti daxil bıey ləyoğət pəydu kardə kəsonin. zira, ğıyoməti ruji famili və xıyzoni, nəsəbi(avlodəti) ya səbəbi(jenı-merdəti) rabitəon kardey nibəzıne çı fərzənd ya pı-mo çı insoni kəno ğərol bıdo və bə vəhışti daxil bıey şərt, imon iyən əməle salehətiye.

Əmmo, ım umu heste ki, ehanə vəhışti əhl Xıdoku tələbkon ki, ıştə pı-mo, jimoni həmro iyən fərzəndon kəno bıbon, Xıdovənd həm çəvon har qıləyni ki, səlohiyyət və ləyoğətışon bıbu, deştə lutf iyən kərəmi bəbaxşe və əvoni iyande kəno ğərol bədoe. ım ko de ilahi ədolət iyən izzəti zidd həm ni. liza, Xıdovənde-Aləm Kərimə-Ğıroni co ayəonədə və`də doydə ki, əmə çı muminə insonon nəsl və fərzəndon vəhıştədə bəçəvon əbo-əjdodon mulhəğ bəkardemon və dəbəçeknemon. ım və`dəXıdovəndi palu xıyzoni erj iyən əy ğoym kardeybəyon kardedə.

Peşonə ayəon bə firiştə və məlayikon çı muminon həxədə bıə dıvo kardey koy işorə kardedə ki, dınyo iyən axırətədə bo imoni əhli çı bəd və yavə koonku bə diyəro bıey tələb kardedə və əy bo muminon ilahi nışonə və ayə hisob kardedə. həyğətədə, hədəf ıme ki, rostə muminon de məxsusə ehtırom iyən təkrimi bə vəhışt varid bəbeyn.

Təbiiye ki, əgər ikəs bə mələkon dıvoon məşmul bıbon, cəhəndımiku perəxon və bə ilahi rəhməti vəhışti ro pəydukon, bə hərəbaxtəti iyən xoşbəxtəti vey aliyə dərəcon rəsən. qıləy çi ki, çəy barzə çi bo bəşəri təsəvvır kardey bıəni.

1-bo cokəson həxədə dıvo kardey, çı Xıdo ovliya və firiştəon şivə və metode. bə inhirofi dıço bıə kəson nəhlət və nifin kardey əvəzi, Xıdo dərqoyədə boəvon dıvokəmon, boəvon rəhmət və məğfırət tələbkəmon.

2-çanədə ki, inson çı qıno nopokətiyonku pok nıbu, bə ilahi vəhışti varid bıey səlohiyytış ni.

3-yolə perəxey iyən hərəbaxtəti, insoni çı maddi iyən mənəvi ofotonku səlomət mandey girovədəy.