879-ə hissə-Ğafiri surə-48-52 şərifə ayəon

879-ə hissə

قَالَ الَّذِينَ اسْتَكْبَرُوا إِنَّا كُلٌّ فِيهَا إِنَّ اللَّهَ قَدْ حَكَمَ بَيْنَ الْعِبَادِ(48) 

Təkəbbır kardə kəson(cəvobədə) bəvoteyn: (ısət)əmə həmmə otəşədəmon. zira, Xıdovənd ıştə bandəon miyono(de ədoləti) mıhokimə kardedə

وَقَالَ الَّذِينَ فِي النَّارِ لِخَزَنَةِ جَهَنَّمَ ادْعُوا رَبَّكُمْ يُخَفِّفْ عَنَّا يَوْماً مِّنَ الْعَذَابِ (49)‏

Və otəşədə bıə kəson bə cəhəndımi hıvoskəon bəvoteyn: ıştə pərvərdıqoriku tələbkənən ki, çəmə əzobiku i ruj bəkamko.

قَالُوا أَوَلَمْ تَكُ تَأْتِيكُمْ رُسُلُكُم بِالْبَيِّنَاتِ قَالُوا بَلَى قَالُوا فَادْعُوا وَمَا دُعَاء الْكَافِرِينَ إِلَّا فِي ضَلَالٍ (50) 

(Cəhəndımi məmuron)Bəvoteyn: aya şımə peyğombər boşımə ruşinə dəlilon nıvardeşone? bəvoteyn: ço. bəvoteyn: çən, dıvokənən(və Xıdo vanqkənən) əmmo, çı kofiron dıvo zəlolətədəy(və bə qıləy vırə nibərəse).

Navnə proqramədə votemone ki, çı kufr iyən şırki yolon və çəvon tərəfdoron cəhəndımədə de iyande hesı-pes iyən mıbohisə bəkardeyn. ıştə yolon dasti jiyədə fərdon əvoni çəvon bə cəhəndım eqıniye amil bəzıneyn və çəvonku komək tələb bəkardeyn ta əvoni çı cəhəndımi otəşiku xiloskon.

In ayəon hamyedə: çı kufr iyən şırki sərdor iyən yolon ki, bəştə dasti jiyədə bıə kəson qıləy cəvob doey zıneydənin, bəvon bəvoteyn: çəmə həmmə tale və sərnıvışt eyniye və əmə həmmə bə cəhəndımi otəşi dıço bıəmon. zira, Xıdovənde-Aləm ıştə bandəon miyono de ədoləti hukm doydəvə bəçəy hukmi əsos əmə həmmə ivrədə iyomon. ehanə əmə qıləy nicoti ro pəydu kardeyımon zınəbe, şımə fiki kardey əvəzi bənav, əmə ıştə xilosi və perəxey fikədə əbimon. ısət həm bızınən ki, çəmə dastiku hiç qıləy ko əvoni.

Çəvon dasti jiyədə bıə kəson ki, ıştə yolonku noumu bəbeyn, peşo bə cəhəndımi hıvoskə və məmuron soyəx bəşeyn və çəvonku tələb bəkardeyn ki, hiç nıbu çəmə əzobiku iruj bəkamkon əvon kardey bızınon lıski istirohətkon və orom bıbon. əmmo, çı cəhəndımi məmuron bıə firiştə və mələkon, bəvon bəvoteyn: boçi şımə bə mıstəkbir iyən yoləşəxə fərdon pemandey əvəzi, bə ilahi peyğombəron soyəx nışiyon? bəqəm əvon boşımə ruşinə dəlilonışon nıvarde və boşımə huccət təmom nıkardeşone? cəhəndımi əhl iğror bəkardeyn ki, bəle. əvon yəni peyğombəron omin və çəvon sıxanon məsemone. əmmo, əmə çəvon sıxanon ğəbul nıkardemone və əmə bəvon kofir bimon.

Ilahi məlayikon bəvoteyn: çən, taxsi hejo şımə ıştənikuye. ısət ki,jıqoye, şımə ımrujnə etırof iyən iğror kardey və ıştə dəvardə rujonku peşmonəti, boşımə hiç qıləy foydə və mənfəətış nibəbe. liza, çanədə şımə Xıdo vanqkon, əv bə icobət nibərəse və ğəbul nibəbe və şımə cəzoku həm hiççi bəkam nibəbe.

Çın ayəonku omutedəmon:

1-əvon ki, dınyoədə çı həxı mığobilədə bə təkəbbırəti iyən məğrurəti dıço bıən, ğıyoməti ruji bə zıllət və həğorəti giriftor bəbe ki, həni boəvon hiç qıləy nicoti roy nibəbe.

2-isnonon miyono adilonə və səhihə hukm doey fəğət bə Xıdo məxsuse. hədərə çı cokəson həxədə hukm mədəmon.

3-cəhəndımi əzob dayimiye və bəvədə hiç qıləy təxfif və sıvıkəti həm mevcud ni. çanədə əmə dınyoədəmon çı tobə iyən inobəku oko bıdəmon və oqardəmon ta çı axırəti əzobiku ozod bıbəmon.

4-cəhəndımədə kofir iyən yavə insonon ko jıqo saxt və şiddətin bəbe ki, bə cəhəndımi məmuron ki, bəvon əzob doey xoto əyoon, pənoh bəbardeyn və çəvonku komək tələb bəkardeyn. həlbəttə, çəvon ım tələb kardey həm hiç qıləy foydəş nibəbe.

5-ilahi sınnət və adət ıme ki, çanədə huccət bə ikəsi təmom nıbu, bəy cəzo doey nibəbe.

إِنَّا لَنَنصُرُ رُسُلَنَا وَالَّذِينَ آمَنُوا فِي الْحَيَاةِ الدُّنْيَا وَيَوْمَ يَقُومُ الْأَشْهَادُ (51) 

Beşək, əmə ıştə peyğombəron və imon vardə kəson, dınyo jimonədə və qıləy ruj(ğıyomətədə) şoydon bəsəpo bəheşteyn, komək bəkardemon.

يَوْمَ لَا يَنفَعُ الظَّالِمِينَ مَعْذِرَتُهُمْ وَلَهُمُ اللَّعْنَةُ وَلَهُمْ سُوءُ الدَّارِ (52) 

Qıləy ruj ki, sıtəmkoron uzrxahəti(boəvon hiç qıləy) foydəş nibəbe və nifin bəvon(bıbu) və boəvon qıləy yavə kə(və məğam) heste.

Dasti jiyədə bıə kəson qımon kardedəbin ki, çı kufri yolon iyən ğudrəti soybon ehtiyoc bıə zəmonədə bəvon komək kardey bəzıneyn, əmmo ğıyoməti ruji çı kufr iyən zəloləti yolon bə ikəsi komək kardey nibəzıneyn. bə zolım iyən kofirə fərdon əks, peyğombəron və salehə şəxson ğıyoməti ruji çı Xıdovəndi hevujə rəhmət və koməkiku bəhrə bəbardeyn. çoko ki, ın ayəon de oşkoə formə hamyedə: Xıdovənde-Aləm çı peyğombər və muminon vəliyy və yole və dınyo iyən axırətədə bəvon komək bəkarde. Xıdovənd iyo de qıləy kulliyə əsli nomi dınyo iyən axırətədə bə peyğombəron iyən muminon ziyodə koməki elon bəkarde.

Dınyoədə de ğeybiyə imdod və koməkon çı muminon ruhiyyə zumand bəkarde və bə deşmınon dıli qıləy vəhşət və dəhşət ebəğande. həmçinin əv çı tuğyongərə deşmınon hiylə və məkrinə planon vəy bəqəte və həyğiyə muminon bəçəvon mıxolifon səbarz və ğalib bəkarde. əmmo, ğıyoməti ruji bo kofirə zolımon rısvoyəti iyən bədbəxtəti ruje. qıləy zəmon ki, həmmə məxloğat cəm bəbeyn, şoydon bəçəvon ələyh şoydəti bəkardeyn və həmonə yolə məhzərədə qıləy əcibə rısvoyəti çəvon dovnə dəbəqəte. həmonə ruji şoydon bə muminon nəf və xeyri şoydəti bəkardeyn və bəçəvon çı mıstəkbir iyən yoləşəxə fərdonsə barzəti boyis bəbeyn. təkəbbırinə zolımon ki, çəvon uzrxahəti həmonə məhkəmədə boəvon hiç qıləy foydəş nibəbe və məhşəri əhli nəhlət və nifin əvoni dəbəqəte. həmonə zolımon həm ilahi rəhmətiku məhrumin və həmən çəvon dınyodə bıə tərəfdoron bəvon nifin bəkardeyn. əvon çı cəhəndımi otəşi vey yavə vırədə ğərol bəqəteyn və çı rufi iyən cismi nəzəku çı təzyiğ iyən əzobi jiyədən.

Umumən çı Kərimə-Ğıroni ım de dəvardə peyğombəron torıxi nəğl kardey metod və şivə, muminə şəxson de zolımon canq və mıborizə cərəyonədə çı Xıdovəndi komək və imdodon zikr kardedə. ım bəçəy xotoye ki, muminon ıştə zəmonə zolımon mığobilədə ğoym bımandon, mığovimət nışon bıdoyn, nəhoyəyədə ilahi imdod və koməkon bəvon nəsib bəbe və əvon bəsə ıştə deşmınonsə səbarz bəbeyn.

Çın ayəonku omutedəmon:

1-ilahi qətiyyə sınnət və adətonku qıləyni, oxoyədə ənbiya iyən muminon və həxı əhli bə botıli əhli səbarzətiye. həlbəttə, de ım şərti ki, muminon ıştə imon iyən ilahi peyğombəron royədə ğoym və sabit ğədəm bımando.

2-imoni foydə və təsiron dınyo iyən axırətədə muminon dəbəqəte və fəğət bə axırəti ruji məxsus ni.

3-çı muminon səbarzəti həxədə ilahi və`dəon, boəvon təsəllibaxşe və bəvon çı deşmınon əzob-əziyyət, təzyiğ iyən təhdidon mığobilədə umu iyən mığoviməti ğıvvə baxş kardedə.