649-ə hissə-Furğani surə-74-77 şərifə ayəon

649-ə hissə

وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَاماً (74) 

Və əkəson ki,voteydən: Xıdolim ha! çəmə jimoni həmroon iyən fərzəndonku bəçəmə çəşon ruşinəti boyis bıə çi bəmə ətokə! Və əməni çı pərhizkoron rəhbər ğərol bıdə.

Navnə proqramədə Xıdovənd çı həyğiyə muminon sıfətonış aşmarde. ın ayə çəvon yonzəminə xısləti bəyon kardedə və hamyedə: əvon bəştə xıyzoni iyən fərzəndon tərbiyə qıləy məxsusə dığğət nışon doydən və çəvon mığobilədə qıləy məsuliyyət hiss kardedən. liza Xıdovəndiku tələb kardedən ki, əv çəvon ıştə pokə hırdənon tərbiyə koyədə bəvon koməqkəy. qıləy fərzənd ki, hafaxti bəvon erəxeyədə şo iyən xoşhol bıbon və ehanə çəvon ğəmo-ğussəşon bıbu,çəvon yodo beşo.

Təbiiye jıqo fərzəndon qıləy aylədə tərbiyə vindedən və perəseydən ki, həmonə aylədə jenı-merdəti rabitə bə əxloğiyə prinsipon iyən insoniyə hisson əsos idorə bedə və çı pı-moku ha qıləyni bəştə iyənde iyən fərzəndon mığobilədə bıə vəzifəon çok-çoki əməl kardedən və bın koyədə səhlənkorəti əncom doydənin.

Ayə dəvomədə bə Xıdo çokə bandəon vey aliyə sıfəton işorə kardedə və hamyedə: əvon çı cəmiyyətiku co jiyedənin və bəy lağeyd nin, bəlkəm əvon deştə jimoni səhnəonədə bıə huzuri camiyə bə inkişof iyən kəmoli tərəf hidoyət kardedən. əvon fəğət bəştə xoşbəxtəti fik nin, bəlkəm əvon çı cəmiyyəti co şəxson hərəbaxtəti fikədən və Xıdovəndiku tələb kardedən ki,bo muminon rəhbərəti iyən əvoni bə ilahi sərostə ro tərəf hərəkəti koyədə bəvon koməqkəy. əvon jıqo ıştə səpe ko kardedən ki, bo muminon ulqu iyən bo cokəson jimonədə nımunə bedən.

Çın ayəku umutedəmon:

1-fərzəndi tərbiyə koyədə, çı lozım bıə aqahətisə əlovə,bəbe cəhd və təloş həm bıkəy iyən Xıdovəndiku həm mədəd tələbkəy.

2-salehə fərzənd, çı pı-mo çəşi nure iyən bəçəvon fəxri boyis bedə.

3-jenı-merd bəbe çı iyənde dıli şoyvonəti səbəbon hozzıkəyn və bəbe bə iyənde de məhəbbət iyən şovği nəzəkəyn.

4-islomi camiyə mudiriyyət iyən rəhbərəti bəştə ohdə qətey, bə Xıdo pok iyən xolisə bandəon loyığe.

أُوْلَئِكَ يُجْزَوْنَ الْغُرْفَةَ بِمَا صَبَرُوا وَيُلَقَّوْنَ فِيهَا تَحِيَّةً وَسَلَاماً (75) 

Əvon(Rəhmoni bandəon) bəçəvon səbr kardey xoto(bəvon) vəhıştiyə otağon doey bəbe və vəyo de tatə səlomi dim bə dim bəbeyn.

خَالِدِينَ فِيهَا حَسُنَتْ مُسْتَقَرّاً وَمُقَاماً (76) 

Əyo əvon əbədi bəmandeyn. çı çokə vırə iyən çokə mənzıle.

In ayəon çı Xıdovəndi xosə bandəon oxonə, donzəminə xısləti bəyon kardedə və bəçəvon vəhıştədə bıə məğami işorə kardedə hamyedə: çəvon çı muşkilot iyən problemon vədə səbr iyən istiğomət kardey və çəvon bəştə vəzifəon əncom doeyədə bıə mığovimət, səbəb bıə ki, əvon bə vəhışti vey çokə məkanon varid bıey ləyoğəti bə dast biyən iyən çı vəhışti əhli iyən məlayikon tərəfiku bəvon xəş omə votey bıbu iyən əvon əyo bə tə`rıfi loyığ vindey bıbu. əvon de oroməti iyən peştıpurəti bəştə vəhıştədə bıə əbədiyə jimoni dəvom doydən və ıştə ım məğami çı dasto doeyku norohət nin.

Odəmi dığğəti bəştə cəlb kardə nuktə ıme ki, bın ayəonədə Kərimə-Ğıron bə səbr iyən istiğomətin bıey təkid kardedə.deməkə ki çı “İbadur-Rəhmani” donzə qılə sıfəti soyb bıə bandəon xısusiyyəton-bəyon be, Kərimə-Ğıron ilahi mıkofoti bəyon zəmon, bə qırd ım xısusiyyəton hiç qıləy təkid kardedəni və fəğət səbri bə vəhışt varid bıey amili unvanədə ğeyd kardedə. ğasbu ım bəçəy xotoe ki, kəmolaton veyni qıləy kəsb kardey, bo ziyodə məxloği imkonış heste. əmmo ım xısusiyyəton ıştə umri dırozi oqətey, qıləy muşkilə məsələy və kamə odəmon çın məsuliyyətinə koy ohdəku omey zıneydən.

Çın ayəonku umutedəmon:

1-Xıdo bandə bıey, səbr iyən hovsələ tələb kardedə və ciddiyə əzm nıbə holədə bə ilahi nezə dərqo varid bıey əbıni.

2-vəhışti əhli xısusiyyətonku ıme ki, əvon əyo de sulh iyən səmimiyyəti jimon kardedən.

قُلْ مَا يَعْبَأُ بِكُمْ رَبِّي لَوْلَا دُعَاؤُكُمْ فَقَدْ كَذَّبْتُمْ فَسَوْفَ يَكُونُ لِزَاماً (77)

(Ha pəyğombər ha!)Vuji: əgər şımə dıvo nıbu,çımı pərvərdıqor bəşımə hiç qıləy ğeymət nibənoe. şımə həxon təkzib karde iyən rəyrə şımə təkzibi cəzo şımə yəxə bəqəte.

In ayə ki, çı Furğani mıborəkə surə oxonə ayəy, bə dıvo iyən ilahi mınocot və inoyəti işorə kardedə və hamyedə: insonon çı dınyo iyən axırəti muşkilatonku nicot doə çi, ıştə qınonku tobə kardey iyən Xıdovəndi dərqoyədə ahu-nolə və bəmesə co çi ni. həlbəttə məxloği veyni ilahi ayəon təkzib kardedən və kofir iyən mışrikon həxı deştə ğəlb iyən zıvoni inkor kardedən. əmmo muminon ki, deştə conı-dıli Xıdo həğğaniyyəti ğəbul kardedən iyən deştə zıvoni əy iğror kardedən, qahi faxti qıləy ko əncom doydən ki, əv bə Xıdo əmron ələyhe iyən inov əməliyə təkzib bə hisob omeydə.

Çın ayəku umutedəmon:

1-Xıdovəndi bə insoni inoyət və lutf kardey boyis bıə çi, dıvo iyən ilahi dərqoyədə ibodət kardeye və əmmo qıno iyən mə`siyyət ilahi ğəhro-ğəzəbi dumo ıştə vardedə.

2-dıvo iyən ibodəti tərk kardey, inov ilahi ayəon təkzib və bə Xıdo neməton nunkurəti bə hisob omeydə.