903-ə hissə- Şura surə -24-28 şərifə ayəon

903-ə hissə

أَمْ یَقُولُونَ افْتَرَى عَلَى اللَّهِ کَذِبًا فَإِنْ یَشَأِ اللَّهُ یَخْتِمْ عَلَى قَلْبِکَ وَیَمْحُ اللَّهُ الْبَاطِلَ وَیُحِقُّ الْحَقَّ بِکَلِمَاتِهِ إِنَّهُ عَلِیمٌ بِذَاتِ الصُّدُورِ ﴿٢٤﴾ 

Ya votedən: Əv bə Xıdo du(iftiro) ğandedə. çən, ehanə Xıdo bıpyişe bəştı dıli mıhi bəjəne və Xıdo botıli məhf bəkarde və həxı deştə kəlməon ğoym bəkarde. həyğətən, Əv sinəonədə bıə sırronku aqahe.

Vəynə bərnoməonədə bə peyğombəri(s) Əhli-Beyti məhəbbətiku(s) sıxan votey be və votemone ki, ım de Xıdo-Rəsuli(s) risoləti mənəvi mıkofoti nomi elon bıə. ın ayə hamyedə: həlbəttə, kali mınofiğonku bə Xıdo-Rəsuli(s) iftiro ğandedəbin ki, ım ko hejo çı peyğombəri ıştən tərəfikuye ki, əv əy bə Xıdo nisbət doydə və çə həzrəti çı Ğıron, vəhy iyən bə Əhli-Beyti(ə) məhəbbəti barədə bıə sıxanon Xıdo tərəfiku nozil bıəni.

Xıdovənde-Xalığ çın fərdon cəvobədə hamyedə: əgər peyğombər(s) jıqo bıko, Xıdovənd bəçəy dıli mıhi bəjəne və icozə nibədoe Xıdovəndi tərəfiku nozil nıbə qıləy çi bəy nisbət bıdo. zira, ehanə Xıdovənd bəy mane nıbu, çı milləti zəloləti zəminə hozzı bəbe və ım bo milləti hidoyətiro bıə de İlahi hikməti mıtobiğ iyən i omeydəni. çoko ki, Hağğə mıborəkə surə 44-ə ayəku de tobə 46-ə şərifə ayəonədə omə:” və əgər sıxanonku ibaxşış(duyədə) bəmə nisbətış doəbe, əy de zumandəti əqətimon və çəy dıli rəği əbırnimon”.

Ayəon dəvomədə bə ın nuktə təkid kardedə ki, Xıdovənd botıli məhv iyən əy rısvo kardedə və icozə doydəni ki, botıl bə vəhyi ro pəyduko. Əv deştə nozil kardə kəlməon həxı ğoym iyən bərpo kardedə.

Çın ayəku omutedəmon:

1-muminə inson peyğombəri Xıdovəndi tərəfiku vardə çi ğəbul kardedə və bəy bovəş heste. nəyinki, ıştən bıpyişe ğəbulko və nıpyişe inkorko yaanki, bəy be etınoko.

2-Xıdovənd de ikəsi zərfətış ni.hətto əgər çəy peyğombər qıləy nodırıstə ko həm bə Xıdo nisbət bıdo, əy rısvo bəkarde, çəy du foş bəkarde və əy çı vəhyi ğəbul kardeyku məhrum bəkarde.

3-Həxı səbarzəti iyən botıli məhf bıey, çı Xıdovəndi bo imoni əhli bıə ğətiyə və`dəy.

وَهُوَ الَّذِی یَقْبَلُ التَّوْبَةَ عَنْ عِبَادِهِ وَیَعْفُو عَنِ السَّیِّئَاتِ وَیَعْلَمُ مَا تَفْعَلُونَ ﴿٢٥﴾ 

Və əve ki, ıştə bandəon tobə ğəbul kardedə və qınoonku dəvardedə və şımə kardə koon zıneydə.

وَیَسْتَجِیبُ الَّذِینَ آمَنُوا وَعَمِلُوا الصَّالِحَاتِ وَیَزِیدُهُمْ مِنْ فَضْلِهِ وَالْکَافِرُونَ لَهُمْ عَذَابٌ شَدِیدٌ ﴿٢٦﴾ 

Və imonışon vardə iyən salehə əməl bə vırə rosnə kəson tələbi icobət(ğəbul) kardedə və ıştə fəzli boəvon ziyod kardedə və həlbəttə bo kofiron qıləy saxtə əzob heste.

Xıdovəndi bə bəşəri bıə muhimmə lutfonku qıləyni ıme ki, dayima boştə xətokorə bandəon oqardemoniro, roy oj haşteye və boçəvon tobə kardero hiç qıləy məhdudiyyət ğayil ni. əmə insonon adətən çəmə həxədə zılm kardə iyən uzr piyə kəson, çandə kərə xəto bəpeştə ijən çəy uzri ğəbul kardedəmon və hətto bəy uzrxahəti icozə həm doydənimon.

Əmmo, Xıdovəndi hamyəşe ki, çımı bandəon ha zəmon ıştə kardə koonku peşmon bin və oqardon, çı tobə ro boəvon oje və Əv çəvon fırsiyəon bəbaxşe. ım qıləy holədəy ki, Xıdovənd çəmə kardə koon botın iyən zohiriku xəbədoye və çəy dığğətinə elmiku hiççi punhon ni.

Xıdovəndi bəştə bandəon bıə lutf, çəvon qınon baxşeysə əlovə, həmçinin çəvon tələbon həm icobət və ğəbul bəkarde. bın mənoədə ki, Xıdo imon vardə iyən çokə ko kardə kəson tələbon ğəbul bəkarde və ğasbu bəçəvon fik və zehni həm nıomə və çəvon tələb kardə çiysə həm barz bıə çiyon bo bəşəri hozzı bəkarde və ıştə fəzliku bəvon bəbaxşe. çı aləmon pərvrədıqori ım lutf və mərhəmət bə muminon məxsuse.

Çın ayəonku omuteydəmon:

1-İslomədə sıv mevcud ni. oqardemoni ro həmişə oje və hakəs har qıləy şərayitədə oqardey bəzıne.

2-Xıdo bə qınokoron və`dəş doə ki, ehanə əvon tobəkon, çəvon qınoon bəbaxşe. həyğətədə, Əv de ın və`də xətokori bo oqardemoniro təşviğ kardedə.

3-dıvo ğəbul bıey şərt, bə Xıdo imon vardey iyən çokə koon əncom doeye.

وَلَوْ بَسَطَ اللَّهُ الرِّزْقَ لِعِبَادِهِ لَبَغَوْا فِی الأرْضِ وَلَکِنْ یُنَزِّلُ بِقَدَرٍ مَا یَشَاءُ إِنَّهُ بِعِبَادِهِ خَبِیرٌ بَصِیرٌ ﴿٢٧﴾ 

Və əgər Xıdovənd ruzi boştə bandəon hevujko, (əvon)zəmini dimisə tuğyon iyən sıtəm bəkardeyn. əmmo, Əv çiçış piye, çəy əndoəzədə nozil bəkarde. zira Əv ıştə bandəonku aqah və vindedə.

وَهُوَ الَّذِی یُنَزِّلُ الْغَیْثَ مِنْ بَعْدِ مَا قَنَطُوا وَیَنْشُرُ رَحْمَتَهُ وَهُوَ الْوَلِیُّ الْحَمِیدُ ﴿٢٨﴾ 

Və Əve ki, voşi millət(çəy omeyku) noumu bıey bədiqə nozil kardedə və ıştə rəhməti hevuj kardə və Əv bə tarıfi loyığ rəhbəre.

In ayəon bə dınyo koonədə hakim bıə İlahi hikməti usuli işorə kardedə və hamyedə: xılğəti nizom bə inson iyən əşyo zərfiyyəti əndozə və mığdori əsos ofəyə bıən və Xıdovənd ğadire ki, bə harçi iyən hakəsi çəy ixtiyorədə bıə çiysə həm veyə imkon və zu bıdo. əmmo, ım ko deçəy hikməti mıtobiğ və i ni. zira, ım ko bə insonon tuğyon iyən yoləşəxəti və bə iştimoyi nizomi bəyənde qıniye boyis bəbe.

Həmmə insonon Xıdovəndiku ruzi vusət və hevujəti tələb kardedən və çın tələbon icobət kardey bo Xıdovəndi imkonış heste. əmmo, Xıdovəndi hikmət jıqo tələbon bə həyğət rəsey icozə doydəni.

Bandəon miyono ruzi təğsım kardey bə qıləy dəğiğə hisobi əsose ki, aləmon pərvərdıqor boştə bandəonış nəzədə qətə. çıro ki, Əv bəştə bandəon nisbətədə xəbədoe və əvoni vindedə. Əv çı hakəsi zərfiyyəti zıneydə. liza bə qıləy mığdor və hisobi əsos və tıbğe məsləhət, ruzi ıştə bandəon miyono təğsım kardedə.

Torıxi təcrubə nışon doydə ki, bə ziyodə ruzi iyən rifohi rəsə insonon umumən Xıdoşon çı viro bekardə və bə zılm, tuğyon iyən harınəti dıço bıən. zira çı insoni iştəhoş si beydəni və bə qıləy əndozədə bıə sərvət iyən ğudrəti iğno və ğane beydəni. əv dılış heste çı cokəson bıə çiyon bə dast biyo, harçənd de zılm iyən sıtəmi bə ico həm bıbu. bə həmonə dəlili xoto, Xıdovənd çanədə bıpyişe və məsləhət bızıno, ruzi nozil bəkarde.

Binobərin, çəmə insonon vəzifə təbiiyi həddədə boştə məaş iyən jimoni rufohi təmin kardero bıə səy və cəhdonin. eyni holədə bəpe bızınəmon ki, xılğəti nizom iyən İlahi hikmət bəçəmə tələbon tabe ni və xılğəti nizomədə təadul və balansi bəyənde nıqniye mığdorədə bəmə ruzi omeydə rəseydə.

Həlbəttə, qahi zəmon ruzi kam bıey bə insoni ıştən sıstəti iyən kıvoləti xotoye. ım kaməti iyən məhrumiyyət bə Xıdovəndi hətmiyə piye əsos ni, bəlkəm çmə insonon əməlon nəticəy ki, əmə bəy giriftor bıəmon. çən, əgər səy nıkəmon və de ruzi umu bınıştəmon, hiççi bəçəmə dasti nibərəse. zira Xıdovəndi və`dəş doəni ki, bə bekoə fərdon ruzi bərosne.

Ğasbu qıləy ləms iyən mışohidə bıə dəlil ım bıbu ki, çı insonon ruzi Xıdo dastədəy, voşi voyeye ki, bəşəri bəvədə hiç qıləy rolış ni. voşi voye Xıdovəndi elm iyən ğudrəti nışonəonkuye. ehanə voş və kulok nıvo, ğəhəti iyən hışkəsori bəbe və əgər voş booy, bə ovdonəti iyən neməti hevujəti və ziyodəti boyis bəbe. Xıdovənd de voşi enovney ıştə rəhməti əhotə hevuj kardedə. de voşi vositə mardə zəminon bəyji beydən, beməy və rəsəyon beşedən və çı insonon iyən co coninə məxloğaton peşoməninə ovon təmin beydə. ımon çəyku hikoyət kardedə ki, Xıdovənd bəştə bandəon bənə qıləy dıjdə xıyzoni çok-çoki yolyəti kardedə, əvon həm həm əy sıtoyiş və bə tarıifi loyığ vindedən.

Çın ayəonku omutedəmon:

1-bandəon dıvoon ğəbul kardey, İlahi hikməti çərçivədəy. zira qahi vaxti çı insoni kali tələbon isticobət kardey, bəçəy tuğyongərəti və yoləşəxəti boyis beydə.

2-xılğəti nizom bə qıləy hisob, kitob iyən əndozə tabeye və harçi ıştə vırədə mıhosibə bıə.

3-voş və kulok İlahi rəhməti nışonə və təzahure.

4-insoni muşkilaton iyən məyusəti zəmonədə bıə pənohqo fəğət Xıdoye.