919-ə hissə- Zuxrufi surə -70-78 şərifə ayəon

919-ə hissə

ادْخُلُوا الْجَنَّةَ أَنْتُمْ وَأَزْوَاجُکُمْ تُحْبَرُونَ ﴿٧٠﴾

Şımə iyən şımə jimoni həmroon de xoşholəti və şoyvonəti bə vəhışt daxil bıbənən.

یُطَافُ عَلَیْهِمْ بِصِحَافٍ مِنْ ذَهَبٍ وَأَکْوَابٍ وَفِیهَا مَا تَشْتَهِیهِ الأنْفُسُ وَتَلَذُّ الأعْیُنُ وَأَنْتُمْ فِیهَا خَالِدُونَ ﴿٧١﴾

Zərinə zərf iyən piyoləon çəvon qırdo bəqordıneyn(ta çandə nev hardənin iyən peşoməninə çiyonku bəhrə bıbon) və əyo dılon piyə və cismon ləzzət bardə çiyon hozzıe və şımə əyo əbədi bəmandiyon.

 وَتِلْکَ الْجَنَّةُ الَّتِی أُورِثْتُمُوهَا بِمَا کُنْتُمْ تَعْمَلُونَ ﴿٧٢﴾

Və ım vəhışte ki, bəşmə kardə koon xoto bə merıs bardəyone(boşmə bə irs mandə).

لَکُمْ فِیهَا فَاکِهَةٌ کَثِیرَةٌ مِنْهَا تَأْکُلُونَ ﴿٧٣﴾

Əyo boşımə ziyodə miyvəon heste ki, çəvonku bəhardiyon.

Vəynə bərnomə oxonə ayəonədə bımi işorə kardey be ki, Xıdo tərəfiku bə salehə bandəon bəşorət doydəbe ki, ğıyoməti ruji boəvon hiç qıləy tars və xof nibəbe. ın ayəon çı vəhışti tevsifədə hamyedə: əkəson ki, dınyoədə imoni hifzi və oqətey royədə ıştə jimoni həmroon muşkiloton və saxtiyon şərik və həmto bıən, ğıyoməti ruji həm şoyvonəti iyən xoşəti məğamədə ıştə jimoni həmro kənoyədə bəbeyn və iyandeyku co nibəbeyn. əvon bə şoyvonəti iyən xoşholəti ğərğ bəbeyn və ın şoyvonəti holəton çəvon çehrəonədə məlum bəbe.

Qırd ləzzət və xoşətiyon ki, çı imoni əhl dınyodə bəştə imoni hifz və oqətey xoto, çəvonku məhrum mandəbin, Xıdovənde-Xalığ ğıyoməti ruji çəy əvəzi bebəşe. vəhışti xosədimə xodimon de vey ləzizə hardənin iyən peşoməninə çiyon vey ğəşənq və vey çokə zərf və ğabonədə bə muminon nav bebəşeyn və harçi ki, əvon bıpyişone, boəvon hozzı bəkardeyn. əv həm qıləy neməton ki, orəxeydəni və bə oxo rəseydəni. vəhışti əhl oxonə oroməti iyən asayişi dılədə və hiç qıləy norohəti nıbə holədə çı eyşo-işrəti dılədə bəbeyn və harçiku ləzzət bardə holədə çı hiççiku rəncidə və norohət nibəbeyn.

Ayəon dəvomədə bə vəhışti dıqlə co neməton işorə kardedə və hamyedə: vəhıştədə dıli xoş omə iyən çəşi çəyku ləzzət bardə çiyon mevcude. çı ğəşənq və bə dıl nıştə təbir? həmçinin bo vəhışti əhli çın oxoş nıbə neməton bə oxo nırəsey barədə bıə norohətçəti iyən çəvon çın asayişi bə oxo rəsey ayid bıə fiki çı miyoniku bardero hamyedə: şımə əyo əbədi bəmandiyon.

Ayəon dəvomədə şımə irs bardə vəhışti ım xosə neməton səbəbi, şımə dınyoədə kardə çokə koon zıneydə. həyğətədə bə ım nuktə işorə kardedə ki, şımə ıştən nicot iyən perəxey əsliyə amil, hejo şımə ıştən kardə koone. çın ayəon oxoyədə çı vəhışti miyvəonku sıxan bə miyon vardedə. vəhışti doon dayima ziyodə miyvəonışon heste və vəhışti əhl çın çandə nev iyən xoşə təmış bıə ləl-qılonku tənavul bəkardeyn və bəhardeyn.

Çın ayəonku omuteydəmon:

1-imoninə jimoni həmroon axırətədə həm bə ico və iyande jimoni həmroon bəbeyn.

2-əvon ki, dınyoədə bo Xıdo roziyəti xoto noməhrəm iyən ğeyri-əxloği səhnəon vindeyku ıştə çəşon vi kardedən, axırətədə həm de vəhışti reçinə jimoni həmroon bə ico bıeyku ləzzət bəbardeyn. həlbəttə qıləy ləzzət ki, de dınyəvi ləzzəton mığoyisə kardənin ni.

3-dınyəvi ləzzət iyən xoşiyon məhdud iyən foniye. bə həmmə xoşi iyən ləzzəton rəsey əv həm dayimi surətədə fəğət vəhıştədə imkonış heste.

4-vəhışt, bə çokə ko soybon məxsuse və əməl nıbə holədə bə vəhışti daxil bıey çəş kardə kəson intizor, qıləy puçə xiyole.

5-vəhışti ləzzət baxş kardə nemətonku qıləyni, nevbənev və ziyodə miyvəon mevcud bıeye.

إِنَّ الْمُجْرِمِینَ فِی عَذَابِ جَهَنَّمَ خَالِدُونَ ﴿٧٤﴾

Beşək, mucrimon(qınokoron) cəhəndımi əzobədə əbədi bəmandeyn.

لا یُفَتَّرُ عَنْهُمْ وَهُمْ فِیهِ مُبْلِسُونَ ﴿٧٥﴾

(Əzob)Çəvonku bəkam nibəbe və əvon əyo məyusin.

وَمَا ظَلَمْنَاهُمْ وَلَکِنْ کَانُوا هُمُ الظَّالِمِینَ ﴿٧٦﴾

Və əmə bəvon sıtəm nıkardemone, bəlkəm əvon ıştən sıtəmkor bin.

Ğıyoməti ruji vəhışti əhli vəzyəti bəyon kardey bəpeştə, ım ayəon bə mucrim iyən qınokoron tale və sərnııvışti işorə kardedə ta insonde ım dıqlə qrupi ğıyoməti ruji bıə ağıbəti mığoyisə kardey, dınyoədə boştə rostə roy bıvıjno. sıftədə hamyedə: çoko ki, çokə ko soybon vəhıştədə əbədi bəmandeyn, mucrim iyən qınokoron həm cəhəndımədə əbədi bəmandeyn.

Həlbəttə de bə coqlə ayəon iyən rəvoyəton dığğət kardə holədə həmmə mucrimon dayimi iyən əbədi surətədə cəhəndımədə əbədi nibəmandeyn. fəğət ə mucrim və qınokoron cəhəndımədə dayimi bəmande ki, çəvon dınyoədə bıə jimoni roy xətt nışon doydə ki, ehanə əvon bın dınyoədə həzo sor həm jimonışon kardəbe, ijən ıştə sıtəm, inod iyən de həxı deşmınətiku dast nıəkəşin. təbiiye jıqo şər və inodkorə fərdon bo əzobiku nicot pəydu kardero ya bəvədə təxfifiro bo İlahi rəhməti ğəbul kardero qıləy ləyoğətışon ni və əyo boəvon qıləy perəxey ro həm mevcud ni. liza əvon əyo bə məyusəti dıço bəbeyn.

Ayəon dəvomədə Xıdovənd bə jıqo fərdon zılmış kardə və de dınyəvi məhdudə umri boəvon uxrəvi noməhdudə cəzoş təyin kardə qımoni vəy qəteyro, ım nuktə bəyod dənoydə ki, əvon ıştən jıqo qıləy tale boştə hozzı kardəşone. çəvon ım əbədiyə əzobi əsl mənşə çəvon ıştən zolımonə əməlonin.

Imrujnə dınyoədə həm huğuği nəzəku curmi təsiron iyən çəy cəzo miyono qıləy tənasub iyən həmahənqəti mevcude və de curm iyən cinoyəti zəmoni dırozi qıləy rabitəş ni. əve bə kali cinoyəton mırtəkib bıey, hətto çəy zəmon kırt həm bıbu, çəy dıroz mıddətinə və qahi zəmon əbədiyə həbsi cəzoş həm heste.

Çın ayəonku omutedəmon:

1-Ğıroni tərbiyəvi məbnoədə çəşnavi iyən bəşorət iyande kənoye ta qıləy fərd hədərə bə məğrurəti iyən məyusəti dıço nıbon.

2-çoko ki, çokə ko insoni bə vəhışt daxil bıey boyis bəbe, bə cəhəndımi varid bıey amil həm hejo çı insonon ıştən əməlonin.

3-Xıdovənd bə ikəsi sıtəm kardedəni, əmmo bədə ko soyb bıə zolımi bəçəy cəzo rosneydə.

وَنَادَوْا یَا مَالِکُ لِیَقْضِ عَلَیْنَا رَبُّکَ قَالَ إِنَّکُمْ مَاکِثُونَ ﴿٧٧﴾

Və fəryod bəkəşeyn ki, ha malik ha! ıştı pərvərdıqor çəmə maqi bırosno(və əməni bıkışto). əv bəvote: şımə(iyo) hejo bəmandiyon(və qıləy nicoti ro ni).

 لَقَدْ جِئْنَاکُمْ بِالْحَقِّ وَلَکِنَّ أَکْثَرَکُمْ لِلْحَقِّ کَارِهُونَ ﴿٧٨﴾

Bərosti əmə həxımon boşımə vardemone. əmmo şımə veyni həxıku xoşıon nıome.

Cəhəndımədə mucrim iyən zolımon şərayit  anədə yavə və saxt bəbe ki, əyo bıə kəson çorə ro fəğət maq və mardey bəzıneyn və çı cəhəndımi məmuriku tələb bəkardeyn ki, Xıdovəndiku çəvon mardey tələbko ta əvon çın vəzyətiku xilos bıbon. əmmo bəvon jıqo cəvob doey bəbe ki, çəvon ım oruzu ğəbul bıənin ni və şımə iyo əbədi bəmandiyon.

Ehanə dınyoədə inson kardey zıneydə de intihori ıştə jimoni bə oxo rosneydə, ğıyomətədə jıqo qıləy çi imkonış ni.hətto çı cəhəndımi sutunə otəş və saxtə əzob bə cəhəndımi əhli maqi boyis nibəbe. ayəon dəvomədə çı qınokoron cəhəndımədə bıey həmməysə muhimmə dəlili, çəvon çı həxıku vitey və bə həxı ələyh beşey zıneydə və hamyedə: əvon dınyoədə həxə sıxani məseyku xoşışon omeydə nıbe və əvon ıştə həvaye-nəfs və ıştə həmfikon nəfsani meylon dumo bin. əvon nəyinki, həxı ğəbul kardedə nıbin, bəlkəm boçəy məsey və çəy barədə təfəkkur kardey həm hozzı beydə nıbin. nəhoyətən, de həxı ım mıborizə bardey bəçəvon bə cəhəndımi əbədiyə əzobi dıço bıey boyis be.

Çın ayəonku omutedəmon:

1-dınyoədə bəpe ıştə əməl və rəftoronku mığət bıbəmon ta axırətədə maqi oruzu məkəmon ki, hiçvaxti əv ğəbul nibəbe.

2-İlahi əzob və cəzo, huccəti təmom kardey bəpeştəy. çən, əkəs bə cəhəndım ebəqıne ki, həxış dərəsəni və deəy deşmınətiş kardə.

3-həxı ğəbul kardey və çəy mığobilədə təslim bıey, çı insoni dınyo iyıən axırətədə hərəbaxtəti amile. çoko ki, de həxı deşmınəti kardey bə insoni dınyo iyən axırətədə bədbəxtəti boyis bəbe.