654-ə hissə-Şuəra surə-27-33 şərifə ayəon

654-ə hissə

قَالَ إِنَّ رَسُولَكُمُ الَّذِي أُرْسِلَ إِلَيْكُمْ لَمَجْنُونٌ (27) 

(Fironi bəştə ətrofi)Voteşe: bəşmə tərəf vığandə bıə peyğombər həyğətən səfiye.

قَالَ رَبُّ الْمَشْرِقِ وَالْمَغْرِبِ وَمَا بَيْنَهُمَا إِن كُنتُمْ تَعْقِلُونَ (28) 

Mosə voteşe: (Əv)çı məşrığ və məğrıb iyən çımon miyono bıə çiyon pərvərdıqore, əgər ıştə ağli oko bıdon.

Navnə bərnomədə bə həzrəte Mosə(ə)-i de Fironi miyono bıə diyaloqi kali baxşi işorə kardemone. bın votemonədə Firon bəştə ğudrəti əsos Mosə(ə)-i təhğır iyən məsxərə kardedə ta çəy ətrofədə bıə kəson bə Mosə(ə)-i sıxanon təsiri ji nıdəşon.

Firon de vey qustaxəti iyən beədəbəti,həzrəte Mosə(ə)-i təhğır kardedə və əy səfi hisob kardedə və bəştə ətorfədə bıə kəson voteydə:Xıdo bəşmə tərəf vığandə çın merdi sədə ağl ni.əmmo Mosə(ə) de ədəb iyən əxloği bəçəy ətrofədə bıə kəson votedə ki, şımə ki ağlon heste və tikəy fik-fam iyən ıştə ağli oko bıdoyn, dəbərəsiyon ki, şımə pərvərdıqor çın dıjdə dınyo və aləmi şərğ iyən ğərbi pərəvrdıqor bıə həmonə Xıdoe. Firon bəşmə duyədə votedə ki,”ənə rəbbukum ə`la” yəni(az şımə barzə pərvərdıqorim) qıləy holədə ki, əv fəğət çın zəmini kurə ihissədə yəni çı Misri sərzəminədə hukumət kardedə və zəmini co hissəon çəy mılk bə hisob emeydəni və əv əyo sultəş ni.

Həzrəte Mosə(ə)-i ım sıxanon həyğətədə Fironi sıxanon cəvob be ki,əv ə həzrətış təhğır kardeşe və voteşe ki, tı cındoş.Mosə(ə) piyedəşbe bıvoti ki, az cındi nim,bəlkəm divonə və beməxə ə kəse ki, aləmədə bıə pərvərdıqori əzəməti qırd ım nışonə və əsəron vindedə, əmmo çəy mığobilədə təzim kardedəni.

Çın ayəonku umutedəmon:

1-təkəbbır iyən bə həxı ələyh beşə kəson, təfəkkur iyən təəğğul kardey əvəzi,çı təhğır iyən məsxərə kardey şivəonku oko doydən.

2-çı peyğombəron ələyhdoron taktikaonkuıme ki, yolə şəxsiyyəton səfi hisob kardedən.

3-bə zəmin iyən osmoni hakim bıə hestemoni aləmi ğoym iyən sabitə ğanunon, həmçinin çı zəmini ıştə iyən həşi qırdo qardey, ijən həşi mıəyynənə zəmonədə eşe-beşeyku sərəseydəmon ki, ım dınyo de alim, həkim iyən mudəbbirə Xıdo vositə idorə bedə.

قَالَ لَئِنِ اتَّخَذْتَ إِلَهاً غَيْرِي لَأَجْعَلَنَّكَ مِنَ الْمَسْجُونِينَ (29) 

(Fironi)Voteşe: Ha Mosə ha! əgər tı sovə mı co qıləy məbud ğəbulkəyş, beşəkk tıni zindonədə dustağ bəkam.

قَالَ أَوَلَوْ جِئْتُكَ بِشَيْءٍ مُّبِينٍ (30) 

(Mosə)Voteşe: botı qıləy oşkoə nışonə həm biyəm, ijən(jıqo bəkaş)?

قَالَ فَأْتِ بِهِ إِن كُنتَ مِنَ الصَّادِقِينَ (31) 

(Fironi)Voteşe: ehanə rost voteydəşbu, həmonə nışonə biyə.

Fironi çoko vindeşe ki, Mosə(ə)-i təhğır iyən ə həzrəti məsxərə kardey hiç qıləy foydəş ni və Mosə(ə) ıştə sıxaniku dast kəşeydəni,əvış de işkəncə iyən dustağ kardey təhdidış karde və voteşe: qımon məkə ki, tı harçi bıvotış əmə həm ıştı votə sıxanon mığobilədə tam bəjənımon və tıni bəştı ıştən holi vabədəmon ta tı çı peyğombərəti iddio bıkoş iyən milləti bəçəmə ələyh bo usyon kardeyro dəvətkoş. ne jıqo ni! ha Mosə ha! ehanə ğərəz mı co qıləy Xıdo tı bıvıjnoş və dılı bıbu məxloği bə həmonə Xıdo tərəf dəvətkoş, tı çın sarayku beşey əzıniş və əmə tıni bə zindon şobədomon və əyo həm bətı anəndə işkəncə bədomon ta tı ıştə iddioku dast bıkəşoş.

Əmmo Mosə(ə) çı Fironi ım dıjdə təhdidi vədə nıtarse və ilahi ğudrətiku  bəhsış karde və  hamyeşe: az qıləy Xıdom ğəbul kardə iyən pərəstış kardedəm ki,çəy ğudrəti nışonəon ruşin iyən oşkoe. qıləy nışonəon ki, nə tı iyən nə ıştı ətrofədə bıə kəson jıqo nışonəon vardeyku ocizin.Firon ki, jıqo qıləy oşkoə cəvobi çəş kardedə nıbe, bovə nıkardə holədə voteşe: ehanə ıştı jıqo ğudrətı hestebu, əy nışon bıdə ta əmə əy bıvindəmon.

Çın ayəonku umutedəmon:

1-repressiya iyən hoziyəti, çı tağutə rejimon nışonəonkue ki, əvon nəinki,bo həxə sıxani intişor iyən  pevolo bıey icozə doydənin, bəlkəm həx votəkəson bə həbsxonə şoydən iyən bəvon işkəncə həm doydən.

2-təhdid, çı zolımə hukuməton metodonkue.əve bəbe dini rəhbəron de zılmo-fəsodi mıborizədə ıştəni bəbe bo saxtəti iyən məşəğğəton hozzıkəyn.

3-mecuzə, bo həx bıey isbot kardey roonkue ki, peyğombəron əvoni təkzib kardə kəson mığobilədə çəyku oko doydəbin.

فَأَلْقَى عَصَاهُ فَإِذَا هِيَ ثُعْبَانٌ مُّبِينٌ (32) 

Çən, ıştə əso bığand və bə ikkərə(həmonə əso) əşivo be.

وَنَزَعَ يَدَهُ فَإِذَا هِيَ بَيْضَاء لِلنَّاظِرِينَ (33) 

Və ıştə dastış ıştə kəşə-bıniku bə bi bekardeşe və ğəflətən çəy dast bo təmşoəkəyon sipyi və vavriski doə(formədə) bəçəş çiye.

De Xıdovəndi əmri Mosə(ə) məmur be ki,ıştə çuku bıə əso çı Firon iyən çəy saray odəmon mığobilədə şodəy ta əv qıləy dıjd iyən ruşinə mecuzə bıbu və çəy risoləti oşkoə şikilədə təsdığkəy. de ilahi əmri həmonə ləvo bə qıləy dıjd iyən tarsnokə mori oqarde ta çəy bədiqə həni Firon bəştə icozə nıdəy ki,Mosə(ə)-i de zindon iyən işkəncə bıtorsıni və ıştə ğudrətiku dəm bıjəno. çən,peşo Mosə(ə) çı umud iyən tars və niqəronəti bərtərəf kardey nışonə bıə co qıləy mecuzəş nışon doe. əv həm ımbe ki, ə həzrət ıştə dasti ıştə kəşə-bıni jiku bekardeydəbe və əv bə vində kəson çoçinəti boyis bıə bənə vavriski doə iyən sipyə formədə be.

Tosə ısət hiçkəs çəy vədə mandey ğudrətış nıbə iyən mıtləğə ğudrəti iddio kardə kəsi mığobilədə, ım dıqlə mecuzə bo Firon iyən boçəy ətrofi vey sanqin be. joqo ki, ım ko bə Fironi hukuməti taxti larzey iyən çəy ğudrəti bə sıvoli ji bardey boyis əbi. əve Firon bə qıləy çorə kardeyfik dəşe vəbə Mosə(ə)-i behtononış ğande ki, və omə proqramonədə bəy işorə bəbe.

Çın ayəonku umutedəmon:

1-zolım iyən hışkəqiyə fərdon koon vədə bəbe ğoym bımandi iyən əy bəbe məğlubkəy.

2-bo odəmon cəlb kardeyro, çı cazibədorə çiyonku oko doey, çı həxə roy tərəfdoron şivəonku bıə. çoko ki,həzrəte Mosə(ə) de “Yəde-Bəyza” yəni(vavriski do iyən sipyə dasti) əyo hazır bıə kəson nəzəş bəştə cəlb karde