932-ə hissə-Casiyə surə -26-32 şərifə ayəon

932-ə hissə

قُلِ اللَّـهُ یُحْیِیکُمْ ثُمَّ یُمِیتُکُمْ ثُمَّ یَجْمَعُکُمْ إِلَى یَوْمِ الْقِیَامَةِ لَا رَیْبَ فِیهِ وَلَـکِنَّ أَکْثَرَ النَّاسِ لَا یَعْلَمُونَ(26)

Vuji:Xıdovənde ki,bəşmə həyot baxş kardedə.peşo kışteydə və peşo ğıyoməti ruji ki,bəvədə hiç qıləy şəkk ni,(həmməy) qırdə bəkarde.əmmo milləti veyni zıneydənin.

وَلِلَّـهِ مُلْکُ السَّمَاوَاتِ وَالْأَرْضِ  وَیَوْمَ تَقُومُ السَّاعَةُ یَوْمَئِذٍ یَخْسَرُ الْمُبْطِلُونَ(27)

və osmonon iyən zəmini hukmronəti bə Xıdo məxsuse və qıləy ruj ki,ğıyomət bərpo bəbe,həmonə ruji botıli əhl ziyon bəvindeyn.

Navnə proqramədə bə munkiron sıxanon işorə kardey be ki,bo ğıyoməti ğəbul kardero əvon peyğombəri(s) iyən muminonku ıştə əbo-əjdodi bəyji kardey tələb kardedəbin.ın ayə çəvon cəvobədə hamyedə:şımə ıştən ki,ısət bəyjiyon,kom kəsi şıməş ofəyə və bəşmə həyotış baxş kardə?aya şımə ıştə Xalıği inkor kardedon?ehanə şımə bın bovədon ki,ikəsi şıməş ofəyə,çən çıro ğəbul kardedəniyon ki,həmonə Xalığ şıməni ijən sənibəton ofəye bəzıne?boçi şımə çı təfəkkur iyən təəğğuli əvəzi,bə həmmə çiyon deştə çəşon nəzə kardedon?

Ayəon dəvomədə bə ın nuktə təkid kardedə ki,əgər şımə Xıdo ğudrətədə bo duborə xılğətiro şəkkon heste,ləzi osmonon iyən zəmini əzəmətədə fik-famkənən ta bıvindənən ki,qıləy ğudrət ki,ım əzəmətinə dınyoş ofəyə və çı hestemoni aləmi mailk iyən hakime,beşək şıməni sənibəton xəlğ kardeyku ociz ni.çən,mığət bıbənən həxı əvəzi,bə botıli tabe məbənən ki,ğıyoməti ruji bə həsrət iyən xəsorəti dıço bəbiyon.boçi ki,şımə bəvədə həni ıştə umri sərmoyəon çı dasto doə və ğərəz həsrət iyən ğəmo-ğussə co hiççi bə daston vardəni.

Beşək,insoni umr,ağl,zəko iyən istedod çəy bın dınyoədə bıə sərmoyəy.əmmo bə botıli meylışon bıə fərdon əvoni de dınyo rədəvardə çiyon mıbodilə kardedən və ğıyoməti ruji ki,fəğət imon iyən salehə əməl bə dardi dəvo bəkarde,bəvədə əvon ıştə ziyon kardey dəbərəseyn.çın ayəonku omutedəmon:

1-insoni iminə jimon,bəçəy ğıyoməti ruji duborə və sənibəton həyoti mumkinəti qıləy dəlile.

2-milləti veyni xılğəti nışonəonədə fik-fam kardey əvəzi,intizorışon heste həmmə çiyon deştə çəşon mışohidəkon ta əy ğəbulkon.

3-ğıyoməti ruji botıl hisob kardə kəson həmonə ruji səbərəseyn ki,bə qıləy dıjdə xəsorəti dıço bıən.

وَتَرَى کُلَّ أُمَّةٍ جَاثِیَةً  کُلُّ أُمَّةٍ تُدْعَى إِلَى کِتَابِهَا الْیَوْمَ تُجْزَوْنَ مَا کُنتُمْ تَعْمَلُونَ(28)

Və(bəruji) har qıləy umməti bə zonu nıştovnə (holədə) bəvindeyş.har qıləy ummət boçəvon ıştə pərvəndə (nomyəe-əmali) səmt vanq kardey bəbeyn(və bəvon votey bəbe)ımruj bəşımə (dınyoədə) əncom doə çiyon (xoto)cəzo doey bəbe.

هَـذَا کِتَابُنَا یَنطِقُ عَلَیْکُم بِالْحَقِّ إِنَّا کُنَّا نَسْتَنسِخُ مَا کُنتُمْ تَعْمَلُونَ(29)

ıme çəmə kitob ki,həxədə bəşmə ələyh sıxan votedə.həyğətən,əmə şımə əncom doə çiyon nıvışteydəbimon.

In ayəon ğıyoməti ruji bə tərsim kəşedə ki,insonon bəştə tars iyən niqəronəti xoto,bə zonu nıştovney bıən və ıştə vəzyəti ruşin və məlum bıey çəş kardedən.

Ayəon ğıyoməti ruji səhnəon tevsifədə hamyedə ki,har qıləy ummət bəçəvon ıştən kitobi səmt vanq kardey bəbeyn.hakəsi əməlon çı naviku hozzı kardey bıə.zira İlahi firiştəon və məlayikon məmur bin ki,çı har qıləy insoni çəy umri dırozi çəy çok iyən bədə koon həmmə ğeydkon ta hiççi çı ğələmiku nıeqıno və ımruj ğıyoməti ruji məhkəmədə həmonə nusxəku bəçəy ıştəni bıdon ta qımon nıkon hədərə bəvon cəzo və ya mıkofot doey beydə.

Peşo Xıdovəndi tərəfiku bəvon xitob kardey bəbe ki,ım çəmə kitobe ki,həxədə bəşmə ələyh sıxan votedə və şımə kardə koon bəşmə təğdım kardedə.həmonə ruji şımə dılon çiçışon piye bə vırə rosneyone və hiçvaxti bovə kardedə nıbiyon ki,şımə əməlon qıləy vırədə səbt və nıvıştey beydə.əmmo əmə fərmon domone ki,şımə qırd koon səbt və nıvıştey bıbu.çın ayəonku omutedəmon:

1-hestemoni nizom bə həx iyən ədoləti əsos idorə beydə iyən qıləy hisob-kitobış heste və çı insoni həmmə əməlon səbt və nıvıştey beydə.

2- ğıyoməti ruji insoni cəzo ya mıkofoti məbno və əsos,çəvon dınyoədə kardə çok iyən bədə əməlonin.

3-har qıləy insoni qıləy pərvəndə iyən dosyeş heste ki,çəy kardə həmmə koon de dığğəti iyən bə həyğəton əsos əyo ğeyd kardey beydə.təbiiyie bə əməlon dəğiğə şikilədə nıvıştey bıə imon, insoni çı mucrimonə iyən yavə koonku obəqəte.

.

فَأَمَّا الَّذِینَ آمَنُوا وَعَمِلُوا الصَّالِحَاتِ فَیُدْخِلُهُمْ رَبُّهُمْ فِی رَحْمَتِهِ  ذَلِکَ هُوَ الْفَوْزُ الْمُبِینُ(30)

Çən,imon vardə iyən salehə koon bə vırə rosnə kəson,çəvon pərvərdıqor əvoni bəştə rəhməti daxil bəkarde,ım həmonə oşkoə hərəbaxtətiye.

وَأَمَّا الَّذِینَ کَفَرُوا أَفَلَمْ تَکُنْ آیَاتِی تُتْلَى عَلَیْکُمْ فَاسْتَکْبَرْتُمْ وَکُنتُمْ قَوْمًا مُّجْرِمِینَ(31)

və əmmo əkəson ki,kufrışon kardə(bəvon votey bəbe) bəqəm çımı ayəon boşımə handey beydə nıbe?əmmo şımə yoləşəxəti kardeyone və mucrim (qınokorə)dastə biyon.

Ğıyoməti ruji məhkəmə oxoyədə insonon bə dıqlə dastə təğsım bəbeyn və har qıləy qrup bəştə cəzo bərəseyn.salehə muminon iyən fosiğə kofiron dastə.

İmoni əhl bə İlahi məxsusə rəhmət iyən lutfi şomil bəbeyn ki,dınyo iyən axırəti hərəbaxtəti əvoni çəş kardedə və ım qıləy oşkoə səbarzətiye.həlbəttə bə məxloğati hisobi rəsey bəpeştə  fəğət əkəson bə həxı rəhməti mərkəzi ro pəydu bəkardeyn və çın dıjdə nemətonku bəhrə bəbardeyn ki,çı imonisə əlovə çəvon salehə əməlon sərmoyəşon həm bıbu.əmmo bə kofiron votey bəbe bəqəm çımı ayəon boşımə tilovət beydənıbe,əmmo şımə bə təkəbbır iyən yoləşəxəti dıço biyon. bəle,əvon İlahi rəhmətiku məhrum və bə suğut iyən həlokəti dıço bəbeyn.zira həxı dumo bıey iyən bəy tabe bıey əvəzi,əvon İlahi sıxanon mığobilədə mandin iyən bəy istehzo və yoləşəxəti kardeşone və əmələn həm bə harcurnə curm iyən qıno mırtəkib bin.çın ayəonku omutedəmon:

1-imon iyən salehə əməl iyandeyku co ni və har qıləyni coyli bə insoni səodəti səbəb nibəbe. imon de çokə koon bə ico,çı har qıləy şəxs iyən camiyə xoşbaxtəti dumo ıştə vardedə.

2-kufri rəğ-rişə,çı həxı mığobilədə təkəbbır iyən yoləşəxətiye.

3-curm iyən qıno rəğ-rişə,Xıdovənd iyən çəy fərmonon vədə kufr iyən tuğyongərətiye.

وَإِذَا قِیلَ إِنَّ وَعْدَ اللَّـهِ حَقٌّ وَالسَّاعَةُ لَا رَیْبَ فِیهَا قُلْتُم مَّا نَدْرِی مَا السَّاعَةُ إِن نَّظُنُّ إِلَّا ظَنًّا وَمَا نَحْنُ بِمُسْتَیْقِنِینَ(32)

Və havaxti votey beydəbe:Xıdovəndi və`də həxe və ğıyoməti bərpo beyədə qıləy şək ni, votedəbin:əmə zınedənimon ğıyomət çiçe?(əy) ğərəz zənni co çi fikk kardedənimon iyən bə yəğın rəsənimon.

Navnə ayə dəvomədə ki,İlahi ayəon vədə çı kofiron təkəbbır iyən inodkorətiku sıxan votedəbe,ın ayə hamyedə:çın təkəbbıri nışonə ım be ki,havaxti imoni əhl çı ğıyoməti bərpo bıey barədə qıləy sıxan votedəbin iyən bəşmə pand və təzəkkur doydəbin,şımə bəy dığğət iyən çəy barədə fik-fam kardey əvəzi,votedəbiyon:ğıyomət çiçe əmə famedənimon?.kom kəsi əvış vində ya çəyku məlumotış doə ta əmə əy ğəbulkəmon?şımə muminon sıxanon həm qıləy qımon iyən zənni əndozədə boəmə qıləy erjış ni və əmə bə ğıyoməti ruji vucudi qıləy elm pəydu kardey zıneydənimon.

Odəmi dığğəti cəlb kardə çi ıme ki,ehanə bə həmonə fərdon votey bıəbe ki,bənə otəşi qıləy xətər şıməni təhdid kardedə,bilofosilə və vey rə əksul-əməl nışon ədoyn və çın ehtımoliyə xətəri dəf kardey dumo əbin.əmmo ğıyoməti xısusədə hətto bəçəy səhih bıey ehtımoli həm dığğət kardedənıbin.çın ayəku omutedəmon:

1-imoni əhl bəpe həxə sıxani bə həmmə insonon quşi bırosno ta huccət boəvon təmom bıbu, harçənd milləti veyni əy ğəbul kardedənin.

2-bə ğıyoməti ruji yəğın ne,hətto bəçəy əməl omey zənn iyən qımon kardey həm insoni bəpe bə cərayim iyən qınon mırtəkib bıeyku oqəto.zira çəy xətər və ziyon vey dıjde.