istehsoli rovnəğ,inkişofi mehvər-37

Mehribonon səlom, şımə ruj bə xəyr bıbu, şıməro hərəbaxtəti iyən xuşbəxtiyəti urzu kardəm. ımruj bənə dəvardə 3şanbə rujon de “İstehsoli rovnəğ, inkişofi mehvər” nomo bərnomə şımə xıdmətədəmon. Şıməni dəvət kardəm de ım bərnomə dəmə bə ico bımandən.

Əzizon dəvardə bərnomədə bə İron İslam Respublika muxtəlifə şəhronədə muhimm iyən erjinə məədənon işorə kardımone. Kerman ostanədə Mese sərçeşmə və Mese meydok məədənon ki dınyoədə profiri metodiku istifodə kardə mənbəonku qıləyni bə hisob omeydən. Həmçınin kermanədə Qol Qohər nomo bıə osonə sığə məədən həm mıvcude ki Miyonə şərğədə vey yol iyən məşhurə osonə sığəonku bə hisob omeydə. həmçınin dəvardə bərnoməde votımone ki ğərəz Kerman, Yəzd ostan həm ki bənə İroni 2 minnə məədəni mərkəzi məşhure, muxtəlifə məədəni mənbəon şomile. Çadorməlo məədən, Bafği osonə sığ, mərkəzi Pelato( Şah qəz iyən Şimoli anomali) və Mehdi abadi zardə mıs iyən qrafit ki İroni vey yolə məədənonku bə hisob omeydə, Yəzd ostanədə ğəror qətəşone. həmçınin İroni Şimol ğərb və Zəncan ostanədə Ənquran qrafit və zardə mıs məədən, İroni muhimmə mədəni mənbəonku bə hisob omeydən.

Əmmo xosə Tolışon, Zərşuran nomo bıə tılı məədən, İroni vey yolə məədənonku co qıləynie ki Ğərbi Azərbaycan ostanədə ğərorış qətə. Zərşuran tılı məədən, bənə İroni vey yolə məədəne ki 15 kilometr de Təxte Suleymani mədəni iyən turizmə irson məcmuə fasiləş heste.

Çı İroni Xorasane Rəzəvi ostani şərğədə, Neyşaburi Firozə məədən, İroni yolə məədənonku co qıləyni bə hisob omeydə ki nə fəğət İronədə bəlkəm dınyoədə, Neyşaburi Firozə məədən vey yolə məədənku bə hisob omeydə. ım məədən vey çokə keyfiyətinə Firozə sıği soybe, anədə ki dınyoədə bənə Firozə sığ erjon ğeymət noey mığyos bə hisob omeydə və dınyo həmmə kişvəron ıştə Firozə erjon de İroni Neyşaburi Firozə sıği muğaisə kardedən. har sor ım məədən de 9 həzo ton zımhori, 19 ton istehsoli zərfiyətış bəbe. Hisob kitobon nışoş do ki har ton ım məədəni xomə firozə sığiku, 8 tosə 10 kiloqerəm firozə bə dast omeydə.

Əzizə duston, İroni məədəni mənbəonku co qılə bə sığ məədən işorə karde bəbe. dınyoədə sığ məədənon baxşədə, İron 4minnə vey yolə məədənon soybe. 25 faiz çı İroni mədənonku, bina sığon məədənonku şomile. ım məədənonədə muxtəlifə bekardə bıə sığon vucud, bə ım məədənon əhəmiyyəti əlovəş kardə. Bə ım məədənonədə, bekardə bıə sığon muxtəlifə ranq iyən curi xoto, İron bənə bina sığə məədəni beheşti məşhur bıə. İroni bina sığə mədənonədə muxtəlifə sığon bois bıə ki ım baxşədə istehsol bıə məhsulon, muvəffəğ bıbun, vujuronədə muxtəlifə səliğəon cəzb ko. dınyoədə İroni istehsol bıə sığon, keyfiyət iyən muxtəlifə ranqon iminnə vırə soybe. De tərtibi və bə məşhur bıə məədənon əsos, Mərmərit, Qranit, Çini, Travertən və Mərmər İroni vey muhimmə bina sığonku şomil bıdə.

Mehribonon, tosə bərnomə ım baxşi , İroni inə sənaye yəni mədənon barədə bə şımə xıdmət məlumatoni təğdim kardemone, ısət pidəmone bərnomə idomədə bə İroni sənaye baxşədə, co qılə baxşon işorə kəmon ki məsrəfi qurupədə ğərorışon qətə. Bənə maşini istehsol sənaye, kə əbzaron, xorəkon və şışte sənaye.

Əzizon, Tehroni birjədə ə şirkəton iyən istehsol bıə mərkəzon hestin ki karde zınəşone vujurədə ıştə səhmon edaşteyro vey çokə şəroyeti hozzo kon.ım şirkəton əcumlə, xorəkon iyən peşoməninə sənayein ki İroni sərmoyə vujurədə, bəştə zərfiyəton, məxsusə xusiyəton və bə idxolon vabəstə nıbey xoto, vey çokə vırə soybin.

İroni birjə vujuronədə xorəkon sənaye iştirok bois bıə ki şirkəton, bəştə məhsulon keyfiyəti əlovə kardey, təyin bıə standardon rioyət kardey, və ıştə istehsoli keyfiyəti stabiləti oqəteyro vey cəhd kon.

Həmçınin birjə vujuron ım fırsəti icod kardedə ta iğtisodi fəaliyəton şəfofiyət iyən bə şirkəton informasiya və məlumaton dast peydo kardey vositə, mıştərion iyən de mırəfəkəyoni zıney iyən informasiya əlovə bıbu, iyən co tərəfiku həminə baxşədə sərmoyə noeyro çəvon etımo həm əlovə bıbu.

İroni xorəkon sənaye barədə bəpe bıvotəmon ki kişvərədə pevıloəti iyən hevujəti nəzəku, hiç qılə sənaye bə xorəki sənaye miğdor hevuj iyən komil ni. İronədə vey kamə məntəğə mıvcude ki çəyədə xorəki baxş çı məhəlli və ya çı sənəti ğolibədə nıbu. Dəvardə 20 sori mıddətədə, xorəkon sənaye baxşədə, sərmoyəon ki əncom bıə, vey çəşəçi iyən diğğətine. kali sənaye bənə ğəndə xokə, ordə, nun, şıtə məhsulon, şini və şukulat baxşədə İroni şirkəton və istehsol mərkəzonədə, daxıli ehtiyocon vey be, və ım məsələ məhsulon ixracatiro vey çokə vəziyət iyən şəroyeti icodış kardə. əmmo İroni xorək sənaye baxşədə, insoni sərmoyə nəzəku, co qılə baxşonku vey, məşhur iyən tədbirinə mudiron və koşınoson prosniye lozime. Həminə cəhətədə dəvardə 20 soronədə bə İroni xorəkon universition miğdor vey əlovə bıə. de diğğət bə həminə baxşi sərmoyə, kamə miğdori və çəy muğabilədə vey ko icod kardey zərfiyəti, xorək sənaye bənə çokə sənaye iyən baxşi bə hisob varde bəbe.

Səmimi həmzıvonon bə ım bərnomə quş doe xoto şıməku təşəkkur kardedəm,dəvət kardəm de Tolışi rədio bə ico bımandən və bə co bərnoməon həm quş bıdənən.