694-ə hissə-Nəmli surə-89-93 şərifə ayəon

694-ə hissə

مَن جَاء بِالْحَسَنَةِ فَلَهُ خَيْرٌ مِّنْهَا وَهُم مِّن فَزَعٍ يَوْمَئِذٍ آمِنُونَ (89) 

Hakəs çokə ko biyəy, boəy çəy əməlisə veyçokə(mıkofat) bəbe. və əvon çə ruji tarsiku əmonədən.

وَمَن جَاء بِالسَّيِّئَةِ فَكُبَّتْ وُجُوهُهُمْ فِي النَّارِ هَلْ تُجْزَوْنَ إِلَّا مَا كُنتُمْ تَعْمَلُونَ (90) 

Və hakəs ki, yavə ko biyəy çən, bəsə dimisə bə cəhəndım şodey bəbe. (bəvon votey bəbe)ayə şımə əncom doə çiyonsə əlovə bəşmə cəzo doey bedə?

Vəynə proqramədə çı dınyo oxo iyən ğıyoməti bərpo bıeyku sıxan votey be. ım ayəon bə ğıyomətədə mıkofat iyən cəzo sistemi işorə kardedə və hamyedə: ilahi elm iyən hikmət tələb kardedə ki, insonon ıştə əncom doə çiyon mığobilədə cəvobdeh bıbon. zira Xıdovənde-Aləm bəvon ağl iyən irodə ətoş kardə və əvon deştə ixtiyori bə ğərol omeydən və vıjniyedən.

Həyğət ıme ki,insonon fəğət bın dınyoədə ıştə kardə koon i baxşi nəticə vindedən. zira dınyo çı bəşəri əməlon komilə mıkofat iyən cəzo zərfiyyətış ni. əmmo axırəti aləmədə ki, bənə dınyo zəmon iyən məkani cəhəto məhdudiyyətonış ni, hakəs ıştə kardə koon təsir iyən nəticə komilə formədə bəvinde və bəçəy əsos bəvon cəzo doey bəbe.

Bə ın ayə əsos, hakəs çokə ko əncom bıdo, çokə mıkofat bəy əto bəbe. həlbəttə de ın şərti ki, çəy çokə ko de riya iyən məğrurəti zay nıbu çı miyoniku nışo və solim bə məğsəd bırəso.

Çın ayəonku umutedəmon:

1-çokə ko əncom doeysə vey muhim, əvoni bənə riya, təkəbbır və co qınonku hifz kardeye və ımon boyis bedə ki, insoni kardə çokə koon çı miyoniku bışon və bə axırət nırəson.

2-ilahi mıkafaton, çı çokə şəxsi kardə çokə əməlonsə bəpeye. əmmo ilahi cəzo çı qınokori kardə koon əndoəzədəy.

إِنَّمَا أُمِرْتُ أَنْ أَعْبُدَ رَبَّ هَذِهِ الْبَلْدَةِ الَّذِي حَرَّمَهَا وَلَهُ كُلُّ شَيْءٍ وَأُمِرْتُ أَنْ أَكُونَ مِنَ الْمُسْلِمِينَ(91) 

(Ha pəyğombər ha! bəvon vuji:)Bərosti bəmı əmr bıə ki, Xıdovəndi bəy ehtirom noə çın şəhri pərvərdıqori pərəstışkəm. və həmmə çiyon fəğət boəye. (bəy məxsuse)və bəmı əmr bıə təslim iyən itoəti əhliku bıbum.

وَأَنْ أَتْلُوَ الْقُرْآنَ فَمَنِ اهْتَدَى فَإِنَّمَا يَهْتَدِي لِنَفْسِهِ وَمَن ضَلَّ فَقُلْ إِنَّمَا أَنَا مِنَ الْمُنذِرِينَ (92) 

Və(həmçinin əmr bıə) Ğıroni tilovətkəm. çən, hakəs hidoyətış ğəbul karde, fəğət bəştə xəyri əvış ğəbul kardə. və hakəs roş dəqıjnə, çən vuji: (mı cəvobdeh nim, zira)az fəğət tars doəkəsim.

In ayəon və peşonə ayə ki, Nəmli mıborəkə surə oxonə ayəy, çı peyğombər(s)-i de Məkkə mışrikon oxonə sıxani bəyon kardedə və hamyedə ki, ehanə şımə çı bıtpərəstətiku dast nıkəşiyon, bıznən ki, çımı vəzifə ilahi ayəon bəşmə rosney iyən bəşımə xəbərdorəti doeye və mı ım ko de çokə formə əncomım doe. ım şıməniyon ki, bəbe deştə irodə və ixtiyori çın dıqlə royku qıləyni bıvıjniyon. şımə ya Xıdo sıxani ğəbul bəkayon və bə hidoyət bərəsiyon və ya çı həxı mığobilədə bəmandiyon və bə zəloləti dıço bəbiyon. həlbəttə şımə çımon har qıləyni ki, bıvıjniyon, çəy mənfəət və ziyon bəşmə ıştəni bome bərəse. qımon məkənən ki, şımə imon vardeyku, bəmı qıləy xəy bərəse və ya şımə inkor bəmı qıləy zərəl bərosne.

Az ıştə vəzifə Xıdovənde-Mutəali mığobilədə əncomım doə və bəçəy əmron mı təslimim. mı Kəbə kədə şımə noə çu iyən sığə bıton əvəzi, Kəbə kə iyən çın muhtərəmə şəhri Xıdo pərəstış kardedəm və nəinki, ım kə bəlkəm, qırd hestemoni aləm bəy məxsuse.

In ayəon bə peyğombər(s)-i dıqlə fərğ doə məsuliyyət və vəzifə işorə kardedə. çəvonku qıləyni fərdiyə məsuliyyəte ki, əv həm vahidə Xıdo pərəstış kardey iyən bəçəy əmron təslim bıeye.çın cəhətiku peyğombər(s) həm bənə co mısılmınone. əmmo co qıləyni risoləti məsuliyyəte. yəni ayəon iblağ və rosney və bə milləti çəşnavi doey. jıqo niki, peyğombər(s) həm bənə hukmdor iyən podşoon, fəğət əmrkəy və məxloğ həm bəçəy əmron itoətkəy. əv sıftədə bəştə votə çiyon əməl kardedə və əv həm bənə co mısılımınon bəbe bə ilahi dini əhkam və təlimon əməlkəy.

Çın ayəonku umutedəmon:

1-peyğombəron bə Xıdovəndi əmron tam təslimə formədə əməl kardəşone. əvon nə ıştəku hiççi votəşon ni və nə ıştənbəsə qıləy koşon kardəni.

2-peyğombəron və dini mıbəllığon vəzifə, ilahi ayəon ruşinə formədə bə milləti rosneye. ısət çəvon ğəbul kardey ya nıkardey və imon vardey bəçəvon ıştəni ayide.

3-insonon hejo Xıdo zikr kardeyku ğəfləti mə`rəzədən. bəçəyro peyğombəron dini vəzifə ıme ki, bə məxloği xəbərdorəti bıdəyn və əvoni çəvon koon ağıbətiku bıtorsonon.

وَقُلِ الْحَمْدُ لِلَّهِ سَيُرِيكُمْ آيَاتِهِ فَتَعْرِفُونَهَا وَمَا رَبُّكَ بِغَافِلٍ عَمَّا تَعْمَلُونَ (93)

Sıtoyiş(fəğət) bə Xıdo məxsuse. rəyrə(əv) ıştə ayəon bəşmə nışon bədoe və əyro bəzıneyn. və ıştı pərvərdıqor şımə əncom doə çiyonku bexəbə ni.

In ayə ki, Nəmli mıborəkə surə oxonə ayəy, de bə Xıdovəndi şukr iyən sepasi bə oxo rəseydə. bənə Ğıroni yolə neməton xoto bəy şukr kardey. çun Kərimə-Ğıron insonon bə hidoyət rosneydə və peyğombəron hejo bənə dıləsutə mellimon insonon bə hərəbaxtəti rosney fikədə bıən.

In ayə hamyedə: və omə millət Xıdovəndi elm, hikmət iyən ğudrəti nışonəon veyə qılə şoyd bəbeyn. ə nışonəon ki, çı dınyo vey qədə məxloağatikuş qətə de tosə çəy həmməysə dıjd və diyərodə yəni osmoni kurə iyən planetonədə bıə  məxloği. həlbəttə, çı fərdon nəzə formə fərğ kardedə. anatomikə otağədə de çəxo qıləy insoni şış və ciqəri poə kardə doktor ki, məğsədış əy bo tələbon şərh doeye, de ciqəri kəbob kardeyro əy de kıləvordi poə kardə məğazə soybi  fəğr kardedə. har deynən zohirədə iqlə ko kardedən, əmmo iyo dıqlə hədəf və nəzə heste.

Ehanə hestemoni aləm və sistemi məxloğ və xəlğ bıə çi bızınəmon, harçi bıvindəmon əy çı aləmi pərvərdıqori nışonəonku bəznemon və əgər əy behədəfə təbyət bızınəmon, əmə bəvədə ıştə Xalıği zıneyku ğafil bəmandemon. çı Xalığiku bıə ım ğəflət, bə insoni fik iyən rəftori ziyodə təsir noydə.

Çın ayəku umutedəmon:

1-Ğıroni nozil bey iyən Peyğombəre-Əkrəmi be`sət, dıqlə yolə neməte ki, bəbe hejo bəçəvon xoto şukr kəmon.

2-çəmə tosə ısət ilahi ayəonku vində çiyon, çəvon ibaxşe. de bəşəri elmi inkişofi, Xıdovəndi hestemoni aləmədə bıə əzəmət və ğudrəti tojə ayə və nışonəon oşko bəbe.

3-əmə ilahi mohləton Xıdovəndi ğəfləti nışonəon məzınəmon. zira Xıdovənde-Aləm hejo bəçəmə kardə koon nəzorət kardedə və çı Xıdovəndi ım dayimiyə nəzorət, çəy rububiyyəti şə`nonkue.