934-ə hissə-Əhğafi surə -1-5 şərifə ayəon

934-ə hissə

Bın bərnomədə Əhğafi mıborəkə surə bino kardedəmon.bə Adi ğovmi sərzəmini Əhğaf votedəbin.bəçəy xoto ki,əvrə səhro iyən huşco be.inşaallah çın surə 21-ə şərifə ayədə bə Adi ğovmi macəra işorə həm bəkardemon.sıftədə bə Əhğafi mıborəkə surə 1-2- iyən seminə şərifə ayəon tilovəti quş doydəmon:

بِسْمِ اللَّـهِ الرَّحْمَـنِ الرَّحِیمِ

(1) حم

Hamim.

تَنزِیلُ الْکِتَابِ مِنَ اللَّـهِ الْعَزِیزِ الْحَکِیمِ (2)

ım kitobi vığandey Əziz iyən Həkimə Xıdo tərəfikuye.

مَا خَلَقْنَا السَّمَاوَاتِ وَالْأَرْضَ وَمَا بَیْنَهُمَا إِلَّا بِالْحَقِّ وَأَجَلٍ مُّسَمًّى وَالَّذِینَ کَفَرُوا عَمَّا أُنذِرُوا مُعْرِضُونَ (3)

əmə osmonon iyən zəmin iyən çəvon miyono bıə çiyon ğərəz həx iyən de tosə qıləy mıəyyənə əcəli ofəyəmon ni və kofiron bəvon tars doə bıə çiyonku dim qordıneydən.

Im surə həm bənə Kərimə-Ğıroni coqlə 28 surəon de mığəttəə hərfon bino beydə və bənə əvon çın hərfon bəpeşt çı Ğıroni əzəmət iyən əhəmiyyəti həxədə sıxan votedə.quya Xıdovəndi dılış heste bıvoto: az şımə ixtiyorədə bıə həmonə çın əlifbo hərfonku qıləy kitobım təlif kardə ki,şımə çəy mislədə bıə qıləy kitobi vardeyku ociziyon və ım bə Ğıroni mecuzəti həmməysə vey çokə dəlile.

Bə Ğıroni çı Əziz iyən Həkimə Xıdovəndi tərəfiku enovney bıə təkid ki,çəy çandə qılə ayəonədə omə,çın osmoniyə kitobi məğami bəyon kardedə ki,bəçəy təlimon əməl kardey bə insoni izzət iyən zumandəti boyis beydə.zira Ğıroni qırd təlimon bə elm iyən hikməti əsose və hiç qıləy puçə sıxan iyən dəstur bəvədə pəydu beydəni.

Nəyinki,şəryəti kitob,bəlkəm təbyəti nizom həm bə həxı əsos ofəyə bıə və bə qıləy mıəyyənə bərnomə iyən zəmoni əsos idorə kardey beydə və bın nizomədə harçi ıştə məxsusə vırəş heste.

Beşək,nə çəy osmoniyə kitobədə bə həxı əks qıləy kəlmə mevcude və nə çəy xılğəti məcmuədə de həxı mıxolif iyən nomınəzzəmə qıləy çi heste.həmmə çi tənzim kardey,pamyuə bıə və bə həxı əsose.əmmo çoko ki,çın xılğəti qıləy sıftəş bıə,qıləy mıəyyənə oxo iyən əcəlış həm heste ki,deçəy zəmoni rəsey dınyo foni bəbe.

Həlbəttə,əkəson ki,Xıdovəndi vucudi de peyğombəron besəti inkor kardedən,bə Xıdovəndi Ğıronədə bıə ayəon,bə xılğəti nizomi və bə əğli iyən vəhyi çəşnaviyon be etinoəti kardedən.əvon həxıku fərol kardedən və çəyku dim qordıneydən.çın ayəonku omutedəmon:

1-Ğıron Xıdo kəlome ki,bə peyğombəri ğəlbi nozil və bə ə həzrəti zıvoni cari bıə.

2-təbyəti nizom iyən şəryəti ğanunon,har dıqləyni bə həx iyən hikməti əsose.zira har dıqləyni Alim iyən Həkimə Xıdoku nəşətış sıə.

3-xılğəti nizomədə inhirof,nodırıstəti iyən puçəti mevcud ni.

4-osmon,zəmin iyən həmmə hestemoni qıləy mıəyyənə zəmon və bə hisobi əsos oxoş heste və hiç qıləy ko təsodufi bə əməl omeydəni.

5-qırd hestemoni aləm həxə məsirədə hərəkət kardedə.fəğət insone ki,kardey bəzıne deştə nodırıstə intixobi həxə royku beşo və bə inhirofi səmt bışo.

قُلْ أَرَأَیْتُم مَّا تَدْعُونَ مِن دُونِ اللَّـهِ أَرُونِی مَاذَا خَلَقُوا مِنَ الْأَرْضِ أَمْ لَهُمْ شِرْکٌ فِی السَّمَاوَاتِ  ائْتُونِی بِکِتَابٍ مِّن قَبْلِ هَـذَا أَوْ أَثَارَةٍ مِّنْ عِلْمٍ إِن کُنتُمْ صَادِقِینَ (4)

Bıvot:şımə Xıdo əvəzi vanq jıə çiyon vindəyone?bəmı nışon bıdənən ki,əvon zəminku çiçışon ofəyə ya  osmonon (xılğətədə) şərikin? Ehanə rost votedon çın kitobi(Ğıroni)bənav qıləy kitob və ya (çımi bənav) qıləy elmi əsər bomı biyənən.

َومَنْ أَضَلُّ مِمَّن یَدْعُو مِن دُونِ اللَّـهِ مَن لَّا یَسْتَجِیبُ لَهُ إِلَى یَوْمِ الْقِیَامَةِ وَهُمْ عَن دُعَائِهِمْ غَافِلُونَ (5)

və kiye ğərəz Xıdo vanq jıə kəsisə vey zəlolətədə bıə kəs ki, tosə ğıyoməti ruji bəy cəvob doey nibəbe və əvon ıştə vanq jıə beyku bexəbədon.

Bın ayəondə İslomi əzizə peyğombəri(s) məmur beydə ki,bə Məkkə mışrikon bıvoto:şımə pərəstış kardə ım bıton xılğəti nizom və osmon iyən zəmini tədbirədə çı rol iyən iştirokışon heste?.şımə ıştən iğror kardedon ki,həşi,ovşım,osmon iyən zəmini xılğət de Allah iyən Xıdo vositə ofəyə bıə.çən,çıro  ım bıton pərəstış kardedon və boştə muşkiloton həlliro bə jıqo becon iyən ağl və şuurış nıbə mevcudaton soyəx şeydon?

Aya Kərimə-Ğıroni bənav boşımə qıləy kitob oməbe ki,əy bəşməş çı bıton pərəstışi icozəş doə? yaan ki,çı alimon tərəfiku qıləy elmi əsər bəşmə nışon doey bıə ki,şımə bəçəy əsos ğərəz Xıdo co mə`budon pərəstış kardedon?.bıton pərəstış bəpe bə qıləy ağli ya nəğli dəlili əsos bıbu.qıləy holədə ki,çın dıqlə dəlilonku hiç qıləyni şımə ixtiyorədə mevcud ni.çən,məlum beydə ki,şımə məslək bə puç iyən botılə fikon əsose.

Ayəon dəvomədə hamyedə:şımə hiç qıləy ağli ya nəğli dəlil nıbə holədə Xıdo əvəzi bıton ya sayir mə`budon vanq jeydon.qıləy holədə şımə zıneydon ki,əvon nə bəşımə qıləy cəvob doydən və nə şımə tələbon bə vırə rosney ğudrətışon heste.həyğətədə şımə mınhərif bıəyon və de şiddəti zəloləti dılədəyon.zura qıləy əşyo pərəstış kardedon və vanq jeydon ki,əslən şımə sıxanon məseydənin iyən şımə tələbonku qıləy çi dərk kardedənin və komilən çəyku bexəbən.çın ayəonku omutedəmon:

1-ğərəz dınyo ofəyə Xalıği royku co qıləy ro vıjniye,inhirof iyən zəloləte.

2-qahi zəmon lozıme mıxolifon bə hisobi əsos bıə sıvolon mə`rəzədə ğərol bıdəmon ta fik-famkon və ıştə sıst iyən beəsosəti dərkkon.

3-nəyinki,çu iyən sığə bıton,bəlkəm əzın iyən zumandə insonon həm ıştə iyən cokəson tələbon bə vırə rosneyədə ocizin və Xıdo əvəzi bəçəvon soyəx şıey iyən bəvon peştıpur bıey coyiz ni.

4-insoni kardə har qıləy ko ya bəpe bə ağli iyən nəğli dəlilon əsos bıbu və ya Xıdo,çəy rəsul iyən çə həzrəti pok və məsumə canişinon kəlomiku qıləy dəlilış bıbu.