948-ə hissə-Muhəmmədi surə -33-35 şərifə ayəon

948-ə hissə

یَا أَیُّهَا الَّذِینَ آمَنُوا أَطِیعُوا اللَّهَ وَأَطِیعُوا الرَّسُولَ وَلَا تُبْطِلُوا أَعْمَالَکُمْ‏‏(33)

Ha imon vardə kəson ha!bə Xıdo itoətkənən və bə peyğombəri pemandənən və(de bə Xıdo iyən bəçəy peyğombəri nıpemandey)ıştə əməlon botıl məkənən.

Vəynə proqramədə çı kofiron iyən mınofiğon barədə sıxan votedəbe,ın ayə bə muminon xitob kardə holədə hamyedə:ha imoni əhl ha!mığət bıbənən ki,bənə mınofiğon bə Xıdo iyən bəçəy peyğombəri fərmonon zidd beməşənən.əvon de zıvoni ıştəni bə İlahi əmron təslim nışon doydən,əmmo əmələdə deəy mıxolifət kardedən və ya ıştə vəzifə əncom doydənin.

Şımə ki,ıştəni həyğiyə mumin iyən bə Xıdo və bəçəy rəsuli məhzə formədə təslim zıneydon,bəpe əmələdə həm nışon bıdənən ki,bə Pərvərdıqore-Aləmi  fərmoni muti və təslimiyon.nəyinki,bəşmə meyl iyən tələbon əsos əməlkon və şımə kərohəton bıə çiyon vobıdənən.çın ayəku omutedəmon:

1-imoni şərt,Xıdo iyən çəy rəsuli fərmonon mığobilədə təslim bıeye.zira Xıdo iyən çəy rəsuli fərmonon icro nıkardə holədə bıə imon,həyğiyə imon ni.

2-Ğıroni kənoyədə Xıod-Rəsuli(s) siyrə və sınnət həm huccəte.liza bo dini zıneyro bəpe bəçəvon har dıqləyni dığğət kardey bıbu.

3-fəğət çokə koon əncom doey vəs kardedəni.bəlkəm bənə şırk,riba ya ucb iyən məğrurəti bıə ofotonku əməli muhafizə kardey həm lozıme.

إِنَّ الَّذِینَ کَفَرُوا وَصَدُّوا عَن سَبِیلِ اللَّهِ ثُمَّ مَاتُوا وَهُمْ کُفَّارٌ فَلَن یَغْفِرَ اللَّهُ لَهُمْ(34)

Kofir bıə kəson və (milləti) Xıdo royku oqəteydən,peşo kufri holədə dınyoku bışo,Xıdovənd hiçvaxti əvoni nibəbaxşe.

Bə Kərimə-Ğıroni ayəon əsos,Xıdovənd Əbaxşe iyən ziyodə qıno və qınokoron baxşeydə.eyni holədə fərdonku idastə ıştə şırk iyən kufrədə isror kardedən,çı qıno iyən cokəson inhirofi səbəbon hozzı kardedən və de tobə ıştə umri oxo bın botılə metodədə sabit mandedən.jıqo fərdon bo Xıdovəndi rəhməti ğəbul kardero zəminə baği haşteydənin və bə İlahi məğfırəti şomil beydənin.çın ayəku omutedəmon:

1-Xıdovənd tobə və oqardemoni ro boştə həmmə bandəon ojış haştə.əmmo əkəson ki,bə kufr iyən şırki və de Xıdovəndi roy mıxolifət kardey isrorkon və de ın holi çı dınyoku bışon,bə İlahi rəhmət iyən məğfırəti şomil nibəbeyn.

2-İnsoni koy oxo həxədə vey muhimmə nuktə ıme ki,ayə əv maqi zəmonədə bənə mumini çı dınyoku bəşe ya bənə kofiri.

3-kufr ki,bə de həxı inodkorəti xoto bıbu,xətərnoke və insoni İlahi rəhməti ğəbul kardeyku məhrum bəkarde.

فَلَا تَهِنُوا وَتَدْعُوا إِلَى السَّلْمِ وَأَنتُمُ الْأَعْلَوْنَ وَاللَّهُ مَعَکُمْ وَلَن یَتِرَکُمْ أَعْمَالَکُمْ(35)

Çən,sıstəti məkənən ta (deşmınon) bə sazişi dəvətkon.qıləy holədə ki,şımə barziyon və Xıdovənd deşməy iyən hiçvaxti şımə koon (mıkofotiku) kam nibəkarde.

Navnə ayəon dəvomədə ın ayə bə imoni əhli xitobən hamyedə:mığət bıbənən ki,imonışon sıst bıə fərdon sıxanon bəşmə təsir nınon ta nəticədə şımə çı deşmınon mığobilədə mığovimət nışon doey əvəzi,deəvon saziş kardey dumo bıbon.

Sulh iyən saziş.bə zəmon ğəbul bıənine ki,deşmınon ıştə xusumətiku dast bıkəşon,bəşmə həxon ehtlırom bınon  və deşmə qıləy sulhamizə jimonışon bıbu.əmmo qıləy deşmın ki,har ruj çı məkrinə planon dumoe və çı Xıdo dini məhf kardey fikədəy,deəy sulh iyən saziş bastey,dinədə sıstəti iyən dınyoədə rohət tələbəti nışonəy.

Xıdovənd  çı imoni əhli izzət və əzəmətış tələb kardə və ehanə muminon mığovimət nışon bıdon və sabit ğədəm bımandon,Xıdo həm əvoni bəsə çəvon deşmınisə barz bəkarde.əmmo əkəson ki,bəştə tars,sıstəti iyən rohət tələbəti dəlili xoto,deştə ğəssəm hardə deşmıni saziş kardedə.ım ko fəğət zıllət iyən xarəti boəvon bə ərməğon bəvarde.

Ruşine ki,deşmıni mığobilədə mığovimət nışon doey,xarconış heste.əmmo təcrubə sobitış kardə qıləy dırozə mıddətədə de deşmıni sazişi xarcon,bəsə çəvon mığobilədə mandey xarcisə veye.çımisə əlovə hakəs çı əhle imoni izzət iyən barzəti dumo bıbu,əgər bın royədə bəy qıləy ziyon həm bırəso,Xıdovənd loyığinə şikilədə çəy əvəzi bebəşe və çəy səvob iyən mıkofotiku hiççi bəkam nibəkarde.çın ayəku omutedəmon:

1-imoni əhl,bəpe ıştə nəfər və imkonaton kam bıey və çı deşmınon nəfər və təchizoton ziyodətiku bə tars iyən dıdıləti dıço nıbon.çıro ki,Xıdovənd de imoni əhliye və ikəs ki,Xıdo deəye,nəhoyətən səbarz bəbe.

2-imon de sıstəti,kıvoləti iyən rohət tələbəti mıtobiğ və i omeydəni.

3-de deşmıni mıborizə meydonədə imoni əhl sulh iyən sazişi təklifi doydənin.zira ım çəvon bə xoş nıomə  tars və zəyfəti nışonəy.əmmo əgər deşmın sulh tələbko və məsləhət bıbu,ğəbul beydə.

4-Xıdovənd bo imoni əhli izzət və əzəmətış tələb kardə və deştə hidoyəti Xıdo dini royədə bə mehkəm mandə kəson nusrət və komək kardedə.