Istehsoli revnəğ Ixtisodi mehvər

Çandə qılə dəvardə proqramonədə çı İroni de hamsuyə kişfəron miyono bıə ixtisodi rabitə və muamiləon həxədə sıxan votemone.ım haftə bə İroni de Farsi Xəlic ya korfəzi kəno bıə kali kişfəron miyono bıə ixtisodi rabitə və muamiləon işorə bəkardemon.lutfən….

İroni deştə hamsuyə məmləkəton min cumlə de Farsi Xəlic ya korfəzi kəno bıə kali kişfəron miyono mıxtəlifə sahonədə min cumlə ıştə ixtisodi rabitəon hevuj kardey,çı İron İslom Respublikə stratejikə siyosətonku qıləyniye.bın istiğomətədə çı İron İslom Respublikə tərəfiku 1398-ə Həşi sori “Hormozi sulh” nomo plan bə İMT nışon doey be.çın planiku hədəf Farsi Xəlic,Omani dıyo iyən Hormozi tanqədədə xarici ğıvvon mıdoxilə iyən iştirok nıbə holədə de məntəğə kişfəron vositə sulh iyən əmniyyəti bərğərol kardey be.qıləy mıdoxiləon ki,de tobə ısət bo məntəğə,ovə quzərqo iyən dəvardəco,bo dıyəvonəti əmniyyəti,bo nat ioyən enerji nəğliyyotiro çandə qılə muşkilot iyən təhdidonış bə əməl vardəbe.məələsəf və de təəssıfi ğeyd kardey lozıme ki,çı Farsi Xəlici reqiyoni bəzi kişfəron deştə zəmini bo hərbi bazə və paleqonon icod kardey məxsədi çı amerkə ixtiyotrədə ğərol doey,çı məntəğə əmniyyət və oromətişon bəyənde jıə və de təhdidon dimbədim kardəşone.“Hormozi sulhi” plan çı məntəğə məmləkəton miyono çəvon sakinon rifoh iyən ozavziye cəhətədə,çəvon dıyəvonəti əmniyyəti təmin kardey,bo kişfəron miyono dı tərəfinə ticorəti təşviğ kardey,ixtisodi hevujə rabitəon bəpğərol kardey,çı milləton miyono həmkoəti bərpo kardey və bo kollektiv əmniyyəti icod kardero bəçəvon miyono mevcud bıə ixtilofon rəseyku iborət be.bın plani daxilədə bənə məzhəbon nez kardey,mədəni mubodiləon,turizm sektori inkişof doey və ixtisodi həmkoətiyonku iborət mevzuon mevcud be…..

Farsi Xəlic ya korfəzi kəno bıə kişfəron miyono ixtisodi baxşonədə bo sərmoyə iyən investisiya noeyro ticori rabitəon hevuj kardeyro ziyodə fısət və potensiyalon mevcude.məsələn bə xorəki maddəon sənaye,hotelsoxtey iyən turizm sektorədə ovdonəti hərəkəton,ovi təmin kardey,inşaat və bina soxtey məhsulon ticorət və həmçinin bə bəzi dəvo-damon məhsulon təmini məsələ işorə kardey bəbe.İron bın zəminəon har qıləyniyədə sərmoyə noey iyən fəoliyyəti ğudrətış heste və bımi qıləy məxsusə meylış həm heste.məsələn bın sahədə bıə İroni de Farsi Xəlic ya korfəzi kəno bıə sayir kişfəron miyono mevcud bıə çı xorəki maddəon sahədə bıə mıtoğobilə mənfəəti işorə kardey bəbe.Farsi Xəlic ya korfəzi kəno bıə ğərolış qətə kişfəron bəştə coğrafi şərayiti əsos xorəki maddəon idxal kardə məmləkətonin.çəvon de İroni nezə hamsuyəti boyis bıə ki,bo ın məsrəf və istehlokəkə məmləkəton əmtəə və məhsulon nəğliyyot iyən kırney ğeymət saru bıbu və nəticədə ım məsələ boəvon vey foydənine…

Farsi Xəlic ya korfəzi kəno bıə məmləkəton miyono İron iyən İƏƏ kişfər çandə dırozə sorone ki,qıləy ixtisodi nezə rabitəonışon heste.harçənd ki, kali devrəonədə ım rabitəon bə amerkə iyən bəçəy mıttəğfiğon bə İroni məmləkəti zidd bıə sanksiyə iyən ixtisodi blokadə dəlili xoto de etat-petati bə ico bıə.çı Əməroti şeyx nıştə haft qılə şəhronku qıləyni Dubay şəhre ki,çandə dırozə soron çın kişfəri de İroni iyən de xarici dınyo miyono bıə ixtisodi irtiboton mərkəz bıə və ım şəhr çı İroni xarici ticori şərkonku qıləyni bə hisob omeydə.çandə da həzo İronıj çı Dubay şəhri ticori mərkəzonədə iyən İƏƏ kişfəri coqlə noxtəonədə jimon iyən ko kardedən.Dubay şəhrədə 3 milyonisə ziyodə insonon jiyedən ki,çəvon 600 həzo nəfər və xonəxo İronıjonin.İroni təğribən 6 həzo şirkət Dubay şəhrədə ğeyd kardey bıə və 8 həzo İronıjə aktivə kommersant və tociron İƏƏ kişfərədə bo fəoliyyət nışon doeyro lisenziyəşon heste.İroni idxol bıə məhsulon veyni de Əməroti roy mıxsusən de Dubay şəhri roy vositə bə iron sənibəton ixracat beydə.İron çı İƏƏ kişfəriku bo sayir kişfəronku daxil bıə məhsulon bənə bəndərqo iyən porti unvoni çəyku oko doydə.İroni bə Əməroti ixracat kardə məhsulon xısusədə bə natə ğazon,ğazi hidrokorboron, nat-kimya məhsulon,alminiyum,ləl-cəvahiron,boho ğeymətinə filiz iyən metalon,katod,mısi sof kardə bıə katodi hissəon, həlolon,dasti sənaye və bənə pustə,zəfəron iyən miyvəon bıə di təsərrufot iyən aqrar sənaye məhsuloinin…..