696-ə hissə-Ğəsəsi surə-5-8 şərifə ayəon

696-ə hissə

وَنُرِيدُ أَن نَّمُنَّ عَلَى الَّذِينَ اسْتُضْعِفُوا فِي الْأَرْضِ وَنَجْعَلَهُمْ أَئِمَّةً وَنَجْعَلَهُمُ الْوَارِثِينَ (5)‏

Və əmə irodə kardemone bə zəmini dimisə zəyif bıə kəson mınnət bınəmon və əvoni(zəminisə) rəhbəron iyən varison ğərol bıdəmon.

وَنُمَكِّنَ لَهُمْ فِي الْأَرْضِ وَنُرِي فِرْعَوْنَ وَهَامَانَ وَجُنُودَهُمَا مِنْهُم مَّا كَانُوا يَحْذَرُونَ (6) 

Və bəvon zəmini dimisə ğudrət və imkonat baxşkəmon. və çəvon tərəfiku bə Firon iyən boçəy(vəziri) Hamani iyən bəçəvon ləşkəri çəvon çəyku tarsə çi nışon bıdəmon.

Dəvardə bərnomədə votemone ki, bə həzrəte Mosə(ə)-i əmr be ki, bə Fironi soyəx bışo və əy bə Bəni-İsrayli kardə zılmo-sıtəmiku nəhykəy. zira Firon əv ğovmış bə xaro-zılləti tərəf kəşəşbe və de mıxtəlifə bəhonəon çəvon merdon kışteydəbe və çəvon jenon boştə kəniz kardedəbe.

In ayəon hamyedə: Firon qımon kardedəbe ki, hejo ıştə ğudrəti taxtədə bəmande və çəy dıli çiçış bıpyo əy bə vırə bərosne. həni xəbəş nıbe ki, Xıdovəndi irodə ımi tələb kardedə ki, əv sıtəmkorə hukuməton həmonə bın dınyoədə bə zılləto-xari vadi dıço bəkay və çə sıtəmkoron dasti jiyədə bıə məzlumon bə ğudrəti taxti bərosne və bəvon hakim bəkay.

Firon iyən çəy vəzir Haman hejo tarsış hestebe ki, iruj Bəni-İsrayil ğıyom bəkayn və çəvon hukuməti sərnəqun və məhv bəkayn. əve bəvon sqxtə əzob-əziyyəton doydəbe və əvoni bə işkəncə məruz haştedəbe  və çəvon inğilobi iyən otəşbəqəvə cıvonon bə ğətl rosneydəbe. əmmo Firon iyən çəy odəmon tarsə çi, de ilahi rodə və tələbi bəçəvon sə ome. Bəni-İsrayil de həzrəte Mosə(ə)-i rəhbərəti bəvon ğalib ome və çəvon sarayon iyən ziyodə sərvəton varis iyən soyb bin.

Həlbəttə, Xıdovəndi irodə, de dəlil iyən be məntığ ni. ehanə qıləy millət bıpyoşe ki, çı zolımə hukuməton sultəku ozod bıbu, bəbe bın royədə cəhd və hərəkətkəy və Xıdovənd həm bəvon koməq bəkay və əvoni çı sıtəmkoronsəpe bə səbarzəti bərosne. ım Xıdovəndi ğətiyə sınnət və adəte ki, tarıxi dırozi bıə və har qıləy millət deştə əməl və rəftori ıştə tale təyin kardedə və bəbe əvon deştə irodə ıştə tale və sərnıvışti əvəzkəyn.

Bə islomiyə rəvoyəton əsos, axırız-zəmonədə İmom Məhdi(əc) ki, çı İslomi peyğombəri(s)-i nəslikue, zuhur bəkay və sıtəmkoron iyən zolımon məğlub bəkay və mustəz`əf iyən məzlumon bə hukumət bərosne ta ədolət çı aləmi şərğo-ğərəbədə hakim bıbu.

Çın ayəonku umutedəmon:

1-Xıdovəndi irodə iyən tələb ıme ki, sıtəmkorə hukuməton rınə pəley bıbu və məzlum iyən muztəz`əfon bə hukumət bırəson.

2-zolımə hukuməton istedadinə kadron bə zəyifəti məruz haştedən ta kardey bızınon rohətə formədə bə milləton sultə pəydukəyn.

3-dınyo ayəndə və vəomə bə mustəz`əf iyən məzlumon məxsuse və ım qıləy bəşorəte ki, Xıdovəndi çəy və`dəş doə ta de bə ayəndə umu, boəy rəseyro cəhdkəmon.

4-sıtəmkor və tağutə hukuməton uxrəviyə əzobisə əlovə, bın dınyoədə həm bə ilahi ğəzəbi tuş bomeyn və əvon de muminon dasti zəlilo-xar bəbeyn.

وَأَوْحَيْنَا إِلَى أُمِّ مُوسَى أَنْ أَرْضِعِيهِ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ (7) 

Və əmə bə Mosə mo ilhom kardemone ki, bəy şıt bıdəy. çən, hafaxti çı fironıjonku boəy tarsı be, əy bə dıyo şodə və(çın əmriku) mətars və(çəyku bə diyəro bıeyro) ğəmqin məbi. (zira)əmə əy bətı obəqordınemon iyən əy çı pəyğombəronku ğərol bədomon.

فَالْتَقَطَهُ آلُ فِرْعَوْنَ لِيَكُونَ لَهُمْ عَدُوّاً وَحَزَناً إِنَّ فِرْعَوْنَ وَهَامَانَ وَجُنُودَهُمَا كَانُوا خَاطِئِينَ (8) 

Çən, fironıjon əvışon(vinde və oviku) peqəteşone ta oxoyədə çəvon deşmon iyən bəçəvon norohətçəti boyis be. həyğətən, Firon, Haman iyən çəy ləşkər xətokoronku bin.

In ayəon bə həzrəte Mosə(ə)-i təvəlludi macəra və bəçəy bədiqə bıə hadisəon işorə kardedə və ımi ilahi ğətiyə ğanunonku zıneydə ki, əv mustəz`əfon bə zolımkoron oxoyədə səbarz bəkay.

Kahinon bə Fironi xəbəşon doəbe ki, ımsor çı Bəni-İsrayliku qıləy tojə tifl bə dınyo bome ki, vəomədə ıştı hukuməti bə oxo bərosne. bə həmınə dəlili xoto, Fironi əmrış karde ki, çı Bəni-İsrayliku bə dınyo omə ha tojə hırdəni bıkışton və bə hiçki rəhm nıkəyn. Mosə(ə) moku beydə, Xıdovəndi bəçəy mo ilhomış karde ki, bəy şıt bıdə və peşo əy bə qıləy sondoxçə dılə bınəy və Nili ru dılə şodəy ki, Xıdovənd əy obəqəte. çəymo həm bə ilahi əmri əsos jıqoş karde və ə əğılış bə sondoxçə dılə noşe və vadoşe bə ru dılə. əmmo ijən çəy tale və sərnıvıştiku norohət və ğəmqin be.

Co tərəfiku Firon iyən çəy həmsər ki, ıştə Nili ruy kəno bıə ğəsrədə nıştəbin, ovi dılədə hərəkət kardə qıləy sondoxçəşon mışohidə karde.Fironi əmrış karde ki, həmonə sondoxi çı oviku bə bi bekəyn. əy oj kardeyədə vindeşone ki, çəy dılədə tojə bə dınyo omə qıləy ğəşənqə tifli-məsum heste və nızıneşone ki, əy çiç bıkəyn. itərəfo fironi əmrış kardəbe ki, Bəni-İsrayli tojə bə dınyo omə hırdənon həmməy bıkışton və məlum be ki, ım əğıl həm çı İsrayli zoonku be ki, boçəy nicotiro əvışon bə dıyo şodəşonbe. co tərəfiku Fironi zoə fərzəndış nıbe və çəy jimoni həmro Asiyə dılış hestebeki, ım tifli-məsumi boştə fərzəndi unvanədə ğəbulkəy.

Əmmo çımonsə bəpe Xıdovəndi irodə be ki, Mosə(ə)-i moş rozi karde ki, çəy mo əy bə ovi dılə şodəy və Fironi jimoni həmro həm jıqo bə hırdəni aşığ bevə ım ko bə həmonə tojə bə dınyo omə əğıli kıştey mane be. de ın tərtibi Mosə(ə) ıştə deşmon bıə Fironi kədə və hiç qıləy təhlukış nıbə qıləy əmnə vırədə perəse ta vəoməyədə çı Fironi zolım iyən fosıdə hukuməti bə oxo bırosno.

Çın ayəonku umutedəmon:

1-sıvonədə, Xıdovənde-Aləm bo muminon vey çokə hami iyən hidoyətkəy və çı problemon həlli roon nışon doydə.

2-ğeybiyə imdodon nozil beıy, de maddiyə imkonatonku bəhrə bardey hiç qıləy ziddiyyətış ni. həm bəbe de çəmə ixtiyorədə bıə imkonaton bəştə vəzifəon əməlkəmon və həm bəbe bə Xıdovəndi təvəkkul kəmon. (çoko ki, Mosə(ə)-i mo bəştə hırdəni şıtış doe və əvış bə sondox noe iyən bə Xıdo təvəkkulış karde).

3-harçənd əmə ilahi əmron veyni fəlsəfə iyən hikməti zıneydənimon,əmmo bəbe ilahi əmron icroyədə ıştə dasto omə çiyon əncomdəmon. zira yəğınən ilahi əmron dılədə sırron noey bıə və Xıdo hiç qıləy hukm behikmət ni.(bənə Xıdovəndi bə Mosə(ə)-i mo doə əmri.)