701-ə hissə-Ğəsəsi surə-26-28 şərifə ayəon

701-ə hissə

قَالَتْ إِحْدَاهُمَا يَا أَبَتِ اسْتَأْجِرْهُ إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ (26) 

Çəvonku qıləyni(bəştə pı) voteşe: ha dədə ha! əy bə xıdmət peqət. zira vey çokə odəmi bə xıdmət peqətedəş. qıləy kəs ki, zumand, əmine.

Dəvardə bərnomədə votemone ki, həzrəte Mosə(ə) bə həzrəte Şuəyb(ə)-i kinon ıştə pəson ov doey koyədə koməqış karde və həzrəte Şuəyb(ə)-i bəçəy bın koy xoto əvış bəştə kəş dəvət karde ta çəy zəhməton həxı bıdəy. ın ayə hamyedə: ıştə pı tərəfiku Mosə(ə)-i bəştə kə dəvət kardə kinə, bəştə pı təklifiş doe ki, əy bo pəsəvonətiro bə xıdmət peqəti ta çəy kinon məcbur nıbon ha ruj bo pəson çadovneyo bə biyabonon bışon.

Əv boştə bın təkilifiro, bə həzrəte Mos(ə)-i dıqlə xısusiyyətonış işorə karde: qıləy çə həzrəti bədəmi zumand bıey və co qıləyni çəy əmonətdor bıey. çı həzrəte Mosə(ə)-i dasti zu bəvədə mıəyyən be ki, əv coyli qonə vedrə ovi çı çoliku bekardeşe və bəqırd pəson ovış doe. əmmo çəy pokdovnəti və dırstə odəm bıey həm bə zəmon buruz be ki, bə həzrəte Şuəybi(ə)-i kə royədə, çə həzrəti kinə vədə şıey əvəzi, Mosə(ə) ıştən dəşe bə nav və Şuəyb(ə)-i kinə çı peştiku bəy ro nışon doydəbe ta çəy çəşon bə həmonə cıvonə kinə ğamət və bədəmi nıerəxo.

Çın ayəku umutedəmon:

1-fərzəndon, ısət çı kinə bıbu ya zoə, həxışon heste bəçəvon nəzə səhih omə çi, de məntığ iyən dəlili bəştə xıyzoni yolon təkilf bıdən və bın koyədə çı kinə de zoə miyono hiç qıləy fərğ ni.

2-bo şəxson bo xıdmət peqəteyro, bəbe de koy novi mınosib, çokə variyanti vıjniye lozıme.

3-dıqlə unsur, ğudrət iyən əmonotdorəti, de qıləy co iborəti, professiya və məsuliyyətin bıey, bə şəxson vəzifə aspardeyədə, dıqlə lozımə xısusiyyəte.

قَالَ إِنِّي أُرِيدُ أَنْ أُنكِحَكَ إِحْدَى ابْنَتَيَّ هَاتَيْنِ عَلَى أَن تَأْجُرَنِي ثَمَانِيَ حِجَجٍ فَإِنْ أَتْمَمْتَ عَشْراً فَمِنْ عِندِكَ وَمَا أُرِيدُ أَنْ أَشُقَّ عَلَيْكَ سَتَجِدُنِي إِن شَاء اللَّهُ مِنَ الصَّالِحِينَ (27) 

(Şuəybi bə Mosə)Voteşe: mı dılım heste ıştə çın dıqlə kinonku qıləyni ıştı jenkəm(bətı bıdəm, əmmo) de ım şərti ki, tı həşt sor bomı kokə. və əgər ın mıddəti bə da sor bırosnoş, çəy ixtiyor ıştı dastədəy. və mı həni əpyinime de tı ciddi(ğəddor) bıbum və rəyrə de Xıdo izni mıni çı salehə şəxsonku bəvindeyş.

قَالَ ذَلِكَ بَيْنِي وَبَيْنَكَ أَيَّمَا الْأَجَلَيْنِ قَضَيْتُ فَلَا عُدْوَانَ عَلَيَّ وَاللَّهُ عَلَى مَا نَقُولُ وَكِيلٌ (28)

(Mosə ğəbulış karde)Voteşe: ım(mığovilə) çımı deştı miyono(bərğərol be) ın dıqlə mıddəti bəsə(bə vırə) rosneme, çən bəmı qıləy sıtəm nibəbe və Xıdovənd bəçəmə votə çiyon, vəkile(şoyde).

Həzrəte Şuəyb(ə) Mosə(ə)-i bo pəsəvonətiro bə xıdmət peqətey barədə ıştə kinə təklifış ğəbul karde. əmmo qıləy mıcərrəd və sıboyə zoə çəy kədə deçəy cıvonə kinon bə ico jimon kardey nıəzıni. əve bə Mosə(ə)-i co qıləy təklifış doe və voteşe ki, tı boy deçımı kinon qıləyni izdivockə ta kardey bızınoş çımı kədə jimonkəş, bımandoş. əmmo çun piyedəşbe çəy pəsə ğələ çopanəti nimədə nımando, əve deəy şərtış bırniye ki, deçəy kinə vəyə kardey bədiqə, hiç nıbu həşt sor çəy palu bımando və ıştə pəsəvonəti dəvom bıdo. əv piyedəş nıbe Mosə(ə) izdivoci bəpeştə ıştə jimoni həmro dasti bıqəto bışo və çəvon xıyzoniku co bıbu. bın surətədə əv yəni Mosə(ə) nəyinki, bəvon koməqış kardəni, bəlkəm çı həzrəte Şuəyb(ə)-i kinonku qıləyni ki, bəştə pı koməq kardedəbe və çəy pəson ça doydəbe, çəy dastiku əstəni.

Liza həzrəte Şuəyb(ə) çəy izdivoci şərtış pəsəvonətiş elan karde ki, bəvədə çı ha dıtərəfi mənfəət təmin bedə. itərəfiyo məskən və kə,jimoni həmro iyən maaşi nıbey problem həll əbi və co tərəfiku həzrəte Şuəyb(ə)-i cıvonə kinon bo pəson çadovneyro bə de təhlukə pur bıə kəfşəni şıey əvəzi, kədə əmandin və bə kəy koon ərəsin.

Bəbe dığğətkəy ki, Mosə(ə)-i həşt sot pəsəvonəti, ısət çı kinə mehriyyə bıbu ya çəy əğdi şərt, ha holədə çı kinə tələb və təklif bıə və çəy mənfəət həm boəy bıə, nəyinki, boçəy pı.zira kinə məcburbe ki, bəştə pı piyəmerdəti xoto,haruj bışi bə biyabon və pəson ça bıdəy. çəy oruzu ımbe ki, qıləy pok iyən zumandə cıvon pəydu bıbu və deəy izdivockəy və pəsəvonəti məsuliyyəti bəştə gi peqəto ta əv çın qonə koyku ozod bıbu.

Eyni holədə həzrəte Şuəyb(ə) ın təklifi nışon doeyədə bə Mosə(ə)-i təkid kardedə ki, əmə bəştı ələyh ğəddorəti kardey fikədə nimon və tıni bə məşəğğət eğandey fikədə həm nimon. ıştı həm çı nəzə heste bıvot və  bəştə zıvon biyə ta əmə bıməsəmon. Mosə(ə) boəvon pəsəvonəti kardey holədə de Şuəyb(ə)-i kinonku qıləyni izdivoci şərti ğəbul kardedə və votedə: az həşt sor iyo bəmandem və bə şımə şərton əməl bəkam. ehanə dılım piye dı sor həm əlovə şımə palu bımandom, bəvədə az həm boşmə pəsəvonəti bəkam ta şımə jimoni təminkəm və həmən boştə jimoniro cəhd bəkam.

Çın ayəonku umutedəmon:

1-ehanə qıləy cıvon, pok, dırıstko və əmin bıbu, çı qıləy kinə pı ya co nezə odəmon tərərfiku bəy de həmonə kinə vəyə kardey təklifi doey, hiç qıləy problemış ni.

2-bo jenı-merdi mioyono bıə həyo pardə oqəteyro, izdivoc kardey bəsə iştiğal və koysə bənave.

3-bo vəyə kardey məğsədış bıə kinə mehriyyə təyin kardey koyədə,damad və zımo zu nəzədə bıqətənən və bəy təzyiğ məkənən.