702-ə hissə-Ğəsəsi surə-29-32 şərifə ayəon

702-ə hissə

فَلَمَّا قَضَى مُوسَی الْأَجَلَ وَسَارَ بِأَهْلِهِ آنَسَ مِن جَانِبِ الطُّورِ نَاراً قَالَ لِأَهْلِهِ امْكُثُوا إِنِّي آنَسْتُ نَاراً لَّعَلِّي آتِيكُم مِّنْهَا بِخَبَرٍ أَوْ جَذْوَةٍ مِنَ النَّارِ لَعَلَّكُمْ تَصْطَلُونَ (29) 

Çən, çoko Mosə(ıştə mığovilə) mıddətış bə oxo rosneşe və deştə xıyzoni(Misriku) bə ro dəqıniye. Turi(bandi) tərəfiku qıləy otəşış vinde. bəştə xıyzoniş vote: (iyo)bımandənən! bərosti az qıləy otəşım vinde(şıdəm ki) ğasbu çəyku qıləy xəbə biyəm ya çə otəşiku i miğdor boşımə biyəm ta(deəy) qam bıbiyon.

Vəynə bərnomədə votemone ki, Həzrəte Mosə(ə) de həzrəte Şuəyb(ə)-i kinonku qıləyni vəyə kardeşe. əv ğəbulış karde ki, hiç nıbu həşt sor boəvon pəsvonətikəy və əgər ıştən piyeşe ki, dı sor həm ziyod bımando və bəvon xıdmətkəy. ın ayə hamyedə: Mosə(ə) bəştə əhdi bəvoş karde və da sor boəvon ğələvonəti kardey bəpeştə, ıştə jen-əğıli dastiku qəteşe ta bəştə moə sərzəmin bıə Misri tərəf hərəkətkəy. əmmo ro vey diyəro be və ziyodə xətəronış həm hestebe. əvon bə Şami sərzəmini rəseyədə, şəvi faxti roşon gim karde və qıləy bələdçi dumo bin ki, ro bəvon nışondəy.

Həzrəte Mosə(ə)çı diyəroku Turi bandi ətrofədə qıləy otəşış mışohidə karde. ıştən bəştə voteşe ki, əyo otəş sənəkəson hukmən ro bəzıneyn və bəmə nışon bədon. çımisə əlovə bın toyki iyən sardə şəvədə çə otəşiku itikə pebəqətem və boştə xıyzoni bəvardem ta əvon ıştəni qamkəyn.

Çın ayəku umutedəmon:

1-merd ıştə jen və xıyzoni ehtiyocon təmin kardeyədə cəvobdehe. xıyzon həm bəbe jimoni muşkilaton faxti bəbe bə kə yoli peşt və koməq bıbu.

2-bəştə vətəni əloğə bıey qıləy təbiiyə koye və hakəsi həxış heste hətta çandə dırozə soron bədiqə bəştə inə sərzəmini oqardo.

3-Mosə(ə) ziyodə soron fironi sarayədə jiyəbe, əve bəbe da sor pəsəvonətiş kardəbe və bə biyobonon eqıniyəbe ta çı saray əhli xıslətiku bə diyəro bıbu və bo vəomədə bıə jimoni muşkilaton hozzı bıbu.

فَلَمَّا أَتَاهَا نُودِي مِن شَاطِئِ الْوَادِي الْأَيْمَنِ فِي الْبُقْعَةِ الْمُبَارَكَةِ مِنَ الشَّجَرَةِ أَن يَا مُوسَى إِنِّي أَنَا اللَّهُ رَبُّ الْعَالَمِينَ (30) 

Çən, Mosə çəy(otəşi) palu omeyədə, çə də rostə tərəfiku həmonə mıborəkə məntəğədə çı qıləy do(miyono) nido doey be ki, ha Mosə ha! bərosti, mı Allah aləmon pərvərdıqorim.

Bə rəvoyəton əsos, həzrəte Mosə(ə)bə otəşi nez beyədə, vindeşe ki, çəy ısət vində otəş deçəy tosə ısət mışohidə kardə otəşon farğ doydə. qıləy otəş ki, çı havz iyən tojə doon miyonoe, nəinki, çı hışk bıə doonku şuləvər bedə. əv həm çəy şuləon ruşnəbaxş kardedə, nəinki, hərorətış heste və sutvonedə.

Mosə(ə) bın fikədə be ki, ım çokonə otəşe, ğəflətən qıləy vanqış məse və xitob bıə holədə votedəbe: ha Mosə ha! tıni bə ın vırə vardəkəs az bim. həmonə kəs ki, həm ıştı həmən kulli aləmi Xalığ iyən ixtiyori soybe.

Həyğətədə, Xıdovənde-Aləm kəlomış icod karde və jıləvoni deştə bandə Mosə(ə)-iş sıxan karde. qıləy sıxan karde ki, əvış çı co pəyğombəronkuş co karde və əv de “kəlimullah” ləğəbi məşhur be.

Çın ayəku umutedəmon:

1-dini fərhənqədə, bə Xıdo mənsub bıə məkanon, mığəddəs və ğurbinə məkanon bə hisob oemydən. harçənd bandı-ku iyən biyabon həm bıbon.

2-Mosə(ə) boştə xıyzoni otəş vardey iyən ro pəydu kardey dumo be ki, bə Turi bandi tərəf şe,əmmo Xıdovəndi əyo çı milləti hidoyəti məsuliyyətışbəçəy gi noşe. de qıləy co iborəti, çəmə vəzifə cəhdo-təloşe, əmmo çəy nəticə çəmə dastədə ni.

وَأَنْ أَلْقِ عَصَاكَ فَلَمَّا رَآهَا تَهْتَزُّ كَأَنَّهَا جَانٌّ وَلَّى مُدْبِراً وَلَمْ يُعَقِّبْ يَا مُوسَى أَقْبِلْ وَلَا تَخَفْ إِنَّكَ مِنَ الْآمِنِينَ (31) 

Və(ha Mosə ha!) ıştə əso şodə(bə zəmin). çən, çoko(Mosə əsoş şode) vindeşe ki, həmonə(əso) jıqo bə hərəkəte(lıvedə ki) jıqo bızın qıləy çısk və qədə more. bə peşto oqarde və bə dumo enırəxə holədə binoş karde bo vite. (bəy nido rəse ki) ha Mosə ha! bə nez(nav) boy və mətars! həyğətən, tı əmonədəş.

اسْلُكْ يَدَكَ فِي جَيْبِكَ تَخْرُجْ بَيْضَاء مِنْ غَيْرِ سُوءٍ وَاضْمُمْ إِلَيْكَ جَنَاحَكَ مِنَ الرَّهْبِ فَذَانِكَ بُرْهَانَانِ مِن رَّبِّكَ إِلَى فِرْعَوْنَ وَمَلَئِهِ إِنَّهُمْ كَانُوا قَوْماً فَاسِقِينَ (32) 

(Ha Mosə  ha ısət)Iştə dasti bəştə yəxə dənə(bəvindeyş ki) hiç qıləy noxəşəti, nəğs iyən ayb nıbə holədə əv sipyi iyən vavriski doə holədə bə bi bebəşe. və bo çı tarsiku ozod bıeyro, ıştə bazu cəmkə. çən, ım dıqlə dəlil(mecuzə) ıştı pərvərdıqori tərəfiku bə Firon iyən çəy ətrofi əşrafi tərəfi. bərosti ki, əvon qıləy fosiğə ğovmin.

Təbiiyə formədə Mosə(ə) de tosə ısət nıməsə noməlumə sədo məsey iyən de həmonə əcib-ğəribə səhnə mışohidə karde, bə çoçinəti iyən sərqərdonəti dıço bıəbe ki, ım sədo çokonə sədoye və ım çokonə səhnə be?

Çən, Xıdovənde-Aləm bo huccəti təmom kardey iyən bə Mosə(ə)-i dılvandi doey xoto və bəy dərosni çəy vində iyən məsə çi, Yolə Xıdo tərəfikue, bəy dıqlə mecuzəş nışon doe. qıləy çəy dastədə bıə ləvo bə mori təbdil bıey və co qıləyni çəy dasti sipyi bıey iyən vavriski doey. de ın dıqlə mecuzə vindey, Mosə(ə) sıftədə bəştə məsə çiyon peştıpur be, peşo Xıdovəndi tərəfiku bəy əmr be ki, de ın dıqlə mecuzə bə Misri tərəf hərəkətkəy. çəy iminə məmuriyyət və vəzifə  bə Fironi saray şıey be ki, əv i umr əyo jimonış kardəbe. əmmo ım dəfə bo Fironi bə İ bıə Xıdo tərəf dəvət kardey iyən bə Bəni-İsrayli kardə zılmiku dast peqəteyro be.

Çın ayəonku umutedəmon:

1-əkəs cokəson hidoyət kardey bəzıne ki, ıştən bəştə həxədə bıey xatırcəm bıbu.

2-bo camiyədə əsosinə islohat kardeyro, sıftədə bəbe bə zılmo-sıtəmi rəğ-rişə sərçəşmə soyəx bışi.

3-çı xətər və təhlukəku tarse iyən fərol kardey, çı bəşəri xısusiyyətonkue və pəyğombəron bın cəhəto, de co insonon hiç qıləy tafutoşon ni.