703-ə hissə-Ğəsəsi surə-33-37 şərifə ayəon

703-ə hissə

قَالَ رَبِّ إِنِّي قَتَلْتُ مِنْهُمْ نَفْساً فَأَخَافُ أَن يَقْتُلُونِ (33) 

(Mosə)Voteşe: Xıdolim ha! həyğətən, az çəvonku(fironıjonku) qıləynim kıştə. çən, tarsedəm ki, əvon mıni bə ğətl bırosnon.

وَأَخِي هَارُونُ هُوَ أَفْصَحُ مِنِّي لِسَاناً فَأَرْسِلْهُ مَعِيَ رِدْءاً يُصَدِّقُنِي إِنِّي أَخَافُ أَن يُكَذِّبُونِ (34) 

Və çımı bo Harun ki, çəy zıvoni(bəyon) çımı zıvonisə vey fəsihe(bıremonış çoke). bəmı koməq kardeyro demı bıvğand ta mıni təsdığkəy. həyğətən, tarsedəm ki,(fironıjon) mıni təkzibkəyn.

Navnə proqramədə votemone ki, Xıdovənd Turi bandədə bə həzrəte Mosə(ə)-i məmuriyyətış doe ki, bə Fironi saray bışo iyən əy və çəy ətorəfədə bıəkəson bə İ bıə Xıdo tərəf dəvətkəy.

In ayəon hamyedə: həzrəte Mosə(ə) ın məmuriyyəti əncom doey royədə, ıştə dıqlə problemiku qəpış je. qıləyni çəy bə Bəni-İsrayliku bıə ikəsi mıdofiyə kardey xoto qıləy ğıbtiyə fərdi kıştey iyən Fironi hukuməti məmuron bo əy qəteyro əy təğib kardey macəra be. və ə həzrət peşo bəştə dıminə muşkili işorəş karde və voteşe: çımı zıvon lozım bıə əndozədə fəsih ni və bıremonım tikəy zəyife və mumkine az ım dıjdə məmuriyyəti çok-çoki bə vırə rosney nızınom. çən, icozə bıdə çımı bo Harun həm demı bə ico boy ta çı Fironi təkzibon mığobilədə bəmı koməq bıbu və deştə fəsih iyən çokə bəyoni həyğəton mıdofiyəkəy.

Çın ayəonku umutedəmon:

1-məsuliyyəti ğəbul kardə faxti, bəbe ıştə zəyifə noxtə iyən problemon dırıst iyən sadiğonə formədə bəyonkəy və bo əvoni bərtərəf kardeyro mınosibə təklifon iyən həlli roon nışon bıdəmon.

2-çok iyən fəsihə bəyon, bo dini təblıği koyədə mıvəffəğ bıeyro vey lozımə əbzoronkue.

3-dıjdə məsuliyyəon əncom doey koyədə çı cokəson zu iyən imkanatonku həm oko bıdəmon və har qıləy ğıvvə çəy vırə istifodəkəmon.lozım ni qırd koon coyli bə vırə bırosnəmon.

قَالَ سَنَشُدُّ عَضُدَكَ بِأَخِيكَ وَنَجْعَلُ لَكُمَا سُلْطَاناً فَلَا يَصِلُونَ إِلَيْكُمَا بِآيَاتِنَا أَنتُمَا وَمَنِ اتَّبَعَكُمَا الْغَالِبُونَ (35)‏

(Xıdovəndi)Hamyeşe (niqəron məbi)əmə ıştı bazu(kəşon) deştı bo vositə ğoym bəkamon və bo şımə barzəti iyən sultə ğərol bədomon. çən, de çəmə ayəon bərəkəti(əvon) bəşmə dast pəydu kardey nibəzıneyn. şımə iyən bəşımə tabe bıkəson ğalib bomeyn.

Xıdovəndi həzrəte Mosə(ə)-i tələbonış ğəbul karde və icozəş doe ki, çəy bo Harun(ə) həm bın təhlukəninə royədə deəy bə ico bıu və bəy koməqkəy ta deın vositə çı Mosə(ə)-i har dıqlə problem həll bıbu. əvvəla ikəs curət pəyu kardey nızıno bə Mosə(ə)-i qıləy zərəl bırosni ya çəy kıştey fikədə bıbu. saniyən çı Fironi məclisədə Harun(ə)-i huzur, əvon de həyğəton iyən de ruşin və məntığiyə dəlilon bəyon kardey, bə Fironi odəmon təsəllut pəydukən və de ilahi mecuzəon nışon doey bəvon ğalib boyn.

Deməkə ki, Harun(ə) bəsə Mosə(ə)-isə yol və fəsih iyən zumandə bəyonış hestebe, əmmo Mosə(ə)-i veyə  kəmolatonış hestebe və bəçəvon xoto Xıdovəndi əvış bo peyğəmbərəti vıjniyeşe iyən əvış çı kitob və şəryəti soybış karde. çəy bo Harun(ə) həm peyğombər be, əmmo bəbe dıminə şəxsi unvənədə ıştəbo Mosə(ə)-i kənoyədə iyən deəy bıbu. qıləyni deştə mecuzəon Fironi mot bahaşto və co qıləyni deştə bəyonaton əy məğlubkəyn.

Çın ayəku umutedəmon:

1-de botıli mıborizədə, lozım ni çı həxı de botıli miyono odəmon miğdor mısovi bıbu. qahi faxti dı nəfər de zumand iyən ruşinə istidlolon, bə ziyodə botılə dastəon səbarz omeydən.

2-bəbe bə Xıdo merdon iyən həxı tərəfdoron komıqkəy ta çı zolımon dast bəvon nırəso iyən bəvon sultə pəydu kardey nızınon.

3-hətta ilahi ənbiya həm həxı de botıli mıborizə mesaji rosney, bə vəomə umu iyən peştıpurəti etiyociş heste. Xıdovənd Mosə(ə) iyən Harun(ə)-i iyən bəçəvon tərəfdoron ğələbə və`dəş doe və əvonış umudəvo kardeşe.

فَلَمَّا جَاءهُم مُّوسَى بِآيَاتِنَا بَيِّنَاتٍ قَالُوا مَا هَذَا إِلَّا سِحْرٌ مُّفْتَرًى وَمَا سَمِعْنَا بِهَذَا فِي آبَائِنَا الْأَوَّلِينَ (36) 

Çən, çoko ki, Mosə de ruşinə ayə(və mecuzə) bəçəvon soyəx ome, voteşone: (ım ğərəz)pesoxtə bıə sehrisə co çi ni və əmə jıqo qıləy çi ıştə(navkonə) dədə-bobonku məsəmon ni.

وَقَالَ مُوسَى رَبِّي أَعْلَمُ بِمَن جَاء بِالْهُدَى مِنْ عِندِهِ وَمَن تَكُونُ لَهُ عَاقِبَةُ الدَّارِ إِنَّهُ لَا يُفْلِحُ الظَّالِمُونَ (37) 

Və Mosə(çəvon cəvobədə) voteşe: çımı pərvərdıqor bəçəy tərəfiku hidoyət vardə kəson vey aqahe(xəbədoe) və(əv zıneydə) axırəti veyçokə ağıbət bo kon kəsone. bərosti ki, sıtəmkoron nicot pəydu nibəkayn.

Həzrəte Mosə(ə) iyən çəy bo Harun(ə) de har mumkinə roy vositə ıştənışon bə Fironi sarayışon rosne və çı camaati cəmədə huzurışon pəydu karde. əvon fironi bə İ bıə Xıdo dəvəti bədiqə, ilahi mecuzəonış bəvon nışonış doe. Mosə(ə )əsoş bə mori peqordıne və ıştə dastış bəştə yəxə dılə dənoşe və bi bekardeşe ki, əv sipyi iyən vavriksi doə holədə bə nəzə çiyedəbe.

Fironıjon çı Mosə(ə) iyən çəy bo Harun(ə)-i ruşinə dəlil və sıxanonışon məse və çə həzrəti qırd mecuzəon vindeşone iyən bımi reaksiyaşon ım be ki, əvon əvışon ğərəz iftiro co çi nızneşone iyən əvışon təkzib karde. fironıjon iddio kardedəbin ki, çəmə navkonə dədə-bobon bə İ bıə Xıdo pərəstış kardedə nıbin, əve əmə ımi ğəbul nibəkamon. əvon voteşone: Mosə mecuzəon həm bənə sehro-coduye ki, əv ıştəku ımış pesoxtə və duyədə əy bə Xıdo nisbət doydə və əy çı bəşəri koy fovğədə bıə qıləy ko zıneydə. bə ın təkzibon cəvobədə həzrəte Mosə(ə)-i voteşe: ehanə mı ımonım ıştəku pesoxtəmebu iyən əvoni bə Xıdo nisbət doydəmbu, Xıdovənde-Aləm ımoni şıməsə vey çok zıneydə və əv vey aqahe. çən, bəbe əv de qıləy formə mıni rısvokəy və icozə nıdəy ki, az ıştəni çəy tərəfiku omə pəyğombər təğdımkəm və bo milləti hidoyət kardey əvəzi, əvoni bə zəlolət eğandom.

Həlbəttə, şımə ım təkzibi rəğ-rişə, çımı vardə dəlil iyən istidlolon kifoyət nıkardey ni, bəlkəm şımə kardə zılmo-sıtəme ki, şımə dılon heste əy ijən dəvom bıdoyn ta bəştə qımoni əsos, şımə deəy ıştə hukuməti oqətiyon. liza şımə çımı sıxanon ğəbul kardedəniyon və ım ko boyis bəbe ki, şımə dınyo iyən axırətədə nicot pəydu nıkoyn.

Çın ayəonku umutedəmon:

1-dini təlimon ğəbul kardeyədə, ağl, məntığ iyən dəlil meyare, nəinki, çı navkonə əbo-əjdodi sıxan və şıə roon.

2-iftiro iyən təkzib, tarıxi dırozi çı muslih iyən pəyğombəron mıxolifon vey muhimmə sənət və taktikəonku bıə.

3-bə ilahi pəyğombəron hidoyəti pemandey, bə insoni hərəbaxtəti iyən çokə ağıbəti soyb bıey boyis bəbe.