704-ə hissə-Ğəsəsi surə-38-42 şərifə ayəon

704-ə hissə

وَقَالَ فِرْعَوْنُ يَا أَيُّهَا الْمَلَأُ مَا عَلِمْتُ لَكُم مِّنْ إِلَهٍ غَيْرِي فَأَوْقِدْ لِي يَا هَامَانُ عَلَى الطِّينِ فَاجْعَل لِّي صَرْحاً لَّعَلِّي أَطَّلِعُ إِلَى إِلَهِ مُوسَى وَإِنِّي لَأَظُنُّهُ مِنَ الْكَاذِبِينَ (38) 

Fironi voteşe: ha çımı ğovmi yolon ha! (harçənd)az ğərəz ıştə boşımə qıləy məbud zınedənim. (əmmo bo təhğığiro)ha Haman ha! otəş sənə(kərpic tumokə) və qıləy bılındə ğullə bısoxt. ğasbu bə Mosə Xıdo dast pəydukəm. və həyğətən, mı əy duyəvıjonku zənn(fik) kardedəm.

Dəvardə bərnomədə votemone ki, Firon iyən çəy sarayədə bıə kəson, həzrəte Mosə(ə)-i təkzib karde və çəy mecuzəonışon sehro-codu zıneşone. həmçinin əvon iddio kardeşone ki, çəvon ənkə-bobon çı Mosə(ə)-i votə Xıdoşon zınəni iyən pərəstışışon kardəni.

In ayə hamyedə: çı fironi de həzrəte Mosə(ə)-i mıborizə bardey iyən çə həzrəti həxə sıxani bə milləti miyono bıə nufuzi vəy qətey roonku qıləyni ım be ki, əmrış karde qıləy bılındə ğullə bısoxton ta əv iyən çəy ğovmi yolon petatin bəpe və diyəkən ki, ayə çı Mosə(ə)-i votə Xıdo əyo bəçəş çiyedə ya ne?

Həyğətədə Firon bo əvomə camaati bə dast eğandeyro, ım əmrış sadir karde. əv dılış hestebe bə milləti bıvoti ki, mı ıştən xıdom və və boşımə co qılə məbud və xıdo zınedənim.əmmo boçımiro ki, şımə qımon nıkoyn az de Mosə şəxsi-ğərzım heste və hədərə çəy sıxanon rədd kardedəm, jıqo qıləy bılındə bina soxtedəm ta şımə yolon həm çımı sıxani səhih bıey dərkkəyn və deştə çəşi bıvindon ki, osmononədə jıqo qıləy Xıdo movcud ni və Mosə du votedə.

Çın ayəku umutedəmon:

1-kibr, yoləşəxəti  iyən məğrurəti ruhiyyə, bə həxı ğəbul kardey mane bedə.

2-de ”dumo həyğəti nəvey jesti” məxloği bə dast dənoe, bo iştimayi fiki inhirof kardey çı mıstəkbirə hukuməton şivəonkuye.

3-mıstəkbiron ıştəni çı qırd koon mərkəz zınedən. əvon ıştəni çı zəmini soyb və hakim zıneydən və bo cokəson hiç qıləy həxı malik bıey ğayil nin. ımruj həm Firon sıfətə hukuməton hestinki, ıştəni çı qırd dınyo soyb və yol zınedən.

وَاسْتَكْبَرَ هُوَ وَجُنُودُهُ فِي الْأَرْضِ بِغَيْرِ الْحَقِّ وَظَنُّوا أَنَّهُمْ إِلَيْنَا لَا يُرْجَعُونَ (39) 

Əv(Firon) iyən çəy ləşkər nohəxədə zəmini dimisə yoləşəxəti kardeşone və fik kardeşone ki, əvon bəçəmə təfə oqordıney nibəbeyn.

فَأَخَذْنَاهُ وَجُنُودَهُ فَنَبَذْنَاهُمْ فِي الْيَمِّ فَانظُرْ كَيْفَ كَانَ عَاقِبَةُ الظَّالِمِينَ (40) 

Çən, əmə(həm) əv iyən çəy ləşkərımon(deştə ğəhri) dəqətemone. və bə dıyo ğandemone. çən, odyəs ki, çı sıtəmkoron koy oxo çokonəye.

In ayəon bə Firon iyən çəy tərəfdoron koy oxo işorə kardedə və hamyedə: çəvon çı həxı mığobilədə mandey iyən məbdə və miadi inkor kardey və co tərəfiku çəvon bə co milləti kardə zılmo-sıtəm, boyis be ki, əvon həmonə bın dınyoədə bəştə cəzo bırəson əmə əvonımon Nili dıjdə ruyədə ğərğ kardemone. bəle! qıləy ru ki, çəvon jimon, ğudrət iyən sərvəti moyə be, bəçəvon qurıstoni oqordınemone və qırd əvon həmonə ruyədə eşin şin.

In ayəon bə bənə Fironi bıə hukuməton dıqlə xısusiyyyəton ki, çəvon suğuti amil be, işorə kardedə və hamyedə: qıləyni istikbar iyən yoləşəxəti ruhiyyə ki, əvon ıştəni bəsə milləti bəpe zıneydəbin və co qıləyni bəştə dasti jiyədə bıə zəyif iyən məzlumə milləti bıə zılmo-sıtəm və çəvon təbiiyə həxon ıştə lınqi jiyədə noey.

Çın ayəonku umutedəmon:

1-çı həx iyən həyğəti mığobilədə məmandəmon ki, oxoyədə əmə məhv bəbemon.

2-bə hisob-kitob, ğıyomət və axırəti etığod nıbey, insoni bə yoləşəxəti ruhiyyə dıço kardedə və ım çı qırd zolım iyən yoləşəxə insonon zılm və cinoyəton rişəy.

3-ilahi cəzoon fəğət bə axırəti ayid ni və Xıdovənd zolımə insonon həmınə bın dınyoədə həm xaro-zəlil kardedə.

4-tarıxi dırozi zolımkoron mıştərəkə tale və sərnıvışt hesteşone.

وَجَعَلْنَاهُمْ أَئِمَّةً يَدْعُونَ إِلَى النَّارِ وَيَوْمَ الْقِيَامَةِ لَا يُنصَرُونَ (41) 

Və əvonımon bə otəş(cəhəndımi) tərəf dəvət kardə rəhbəron ğərol domonevə(həlbəttə) ğıyoməti ruji(çəvon) qıləy koməqəkəşon nibəbe.

وَأَتْبَعْنَاهُمْ فِي هَذِهِ الدُّنْيَا لَعْنَةً وَيَوْمَ الْقِيَامَةِ هُم مِّنَ الْمَقْبُوحِينَ (42) 

Və bın dınyoədə bəvon nəhlət vığandemone və ğıyoməti ruji əvon yavə sıfətonku bəbeyn.

Vəynə ayəon dəvomədə ki, çı Fironıjon koy oxo bəyon kardedəbe, ın ayəon hamyedə: ğıyoməti ruji ki, qırd qınokoron bə cəhəndımi tərəf hərəkət bəkayn, fironıjon çəvon navədə bəşeyn və çəvon rəhbəron bəbeyn və çoko bın dınyoədə çəvon rəhbəron bin, axırətədə həm hejo bəvon bə cəhəndımi tərəf şıey koyədə rəhbərəti bəkayn.

Dınyoədə məzlum iyən çəvon dasti jiyədə bıə milləthejo bəvon nifin-noləiyən muminon hejo bəvon nəhlət kardedəbin. çəvon ım nopok və yavə siyrət və ro, ğıyoməto cilvə pəydu bəkay və millt əvoni de bevəcə surəton mışohidə bəkayn.

Çın ayəonku umutedəmon: 

1-bəştə ımrujnə ğudrət iyən imkonaton dıl dəvastə kəson, ğıyoməto çəvon hiç qıləy yaro-yavər və koməqışon nibəbe və əvon hətta ıştəni peroxney zuşon nibəbe, ısət çı bımando co kəson.

2-bə zolımon nifin iyən nəhlət kardey və bəçəvon ələyh şuar doey, Xıdovəndi icozə doə koonkuye.

3-dınyoədə bə zəlolət və kufri ulquon tabe bıə kəson,ğıyoməto dumo kofir iyən ro dəqıjnə kəson bəşe və de əvon bə ico məhşur bəbe.

4-insoni dınyoədə bıə yavə əməlon, bəçəy ğıyoməti ruji yavə sıfət bıey boyis bəbe.