705-ə hissə-Ğəsəsi surə-43-46 şərifə ayəon

705-ə hissə

وَلَقَدْ آتَيْنَا مُوسَى الْكِتَابَ مِن بَعْدِ مَا أَهْلَكْنَا الْقُرُونَ الْأُولَى بَصَائِرَ لِلنَّاسِ وَهُدًى وَرَحْمَةً لَّعَلَّهُمْ يَتَذَكَّرُونَ (43)‏

Və həyğətən, iminə nəslon məhv kardey bədiqə, bə Mosə kitob əto kardemone(ta deçəy vositə) bo milləti bəsirət iyən hidoyət və rəhmət bıbu, ğasbu əvon pand bıqəton.

Dəvardə proqramədə votemone ki, Firon iyən çəy ləşkəri koy de çəvon Nili ruyədə ğərğ bıey, bə oxo rəse. ın ayə hamyedə: Bəni-İsrayli ğovmi çı Fironi sultəku peroxney bədiqə, əmə boçəvon hidoyət iyən çəvon fik iyən bəsirəti səthi bəpe bardey xoto, Tovratımon bə Mosə(ə)-i nozil kardemone ta deçəy bəhrə vositə, əvon bə ilahi məxsusə lutf iyən rəhməti şomil bıbon. həlbəttə, ehanə əvon bə Tovrati kufrkəyn iyən çı həxı mığobilədə bımandon, bənə navkonə milləton ki, çoko dınyoədə bə Xıdovəndi ğəzəbi dıço bin, əvon həm jəqo bə həlokət bərəseyn.

Çın ayəku umutedəmon:

1-peyğombəron vığande iyən osmoniyə kitobon enovne, Yolə Xıdovəndi neməton iyən ilahi rəhmətiku bıə ta inson de bəsirət iyən hidoyəti roy bə hərəbaxtəti bırəso.

2-tarıxi dırozi Xıdovəndi sınnət iyən adət, hejo sabit iyən mıəyyən bıə. har qıləy ğovm və millət ki, çı həxı royku mınhərif bıə, oxoyədə bə həlokət rəsə.

وَمَا كُنتَ بِجَانِبِ الْغَرْبِيِّ إِذْ قَضَيْنَا إِلَى مُوسَى الْأَمْرَ وَمَا كُنتَ مِنَ الشَّاهِدِينَ (44) 

Və bə Mosə(nıbuvvəti) əmr doeyədə, tı çı(Turi bandi) ğərbi tərəfədə nıbiş və çı şoydonku nıbiş.

وَلَكِنَّا أَنشَأْنَا قُرُوناً فَتَطَاوَلَ عَلَيْهِمُ الْعُمُرُ وَمَا كُنتَ ثَاوِياً فِي أَهْلِ مَدْيَنَ تَتْلُو عَلَيْهِمْ آيَاتِنَا وَلَكِنَّا كُنَّا مُرْسِلِينَ (45) 

Əmmo əmə(veyə ğovmon) mıxtəlifə əsronədə xəlğ kardemone. çən, dırozə zəmonon bəvon dəvarde. və tı çı Mədyəni əhli miyono jimon kardəni ta(çəvon vəzyətiku aqah bıbuş) çəmə ayəon(Mədyəni barədə) boəvon(bo Məkkə əhali) bahandoş. lakin çəmə sınnət və adəte ki, bo hidoyətiro şəxson vığandəmon.

In ayəon bə ım nuktə təkid kardedə ki, Kərimə-Ğıronədə çı navkonə ğovmon iyən pəyğombəron barədə omə çiyon, bə islomi peyğombəri həx bıey dəlile. zira ə həzrət bə səhnəonku hiç qıləyədə bıə nıbe və fiziki huzurış pəydu kardə nıbe, əmmo bə navkonə ğovmon ayid bıə hodisəon mıfəssələ şikilədə bo milləti bəyon kardedəbe. Çoko ki, Turi bandı-kuyədə həzrəte Mosə(ə)-i nıbuvvəti macəra çandə əsr çı islomi peyğombəri(s) təvəlludi bənav bə əməl oməbe, Kərimə-Ğıronədə əv de təfsilati iyən de kali detalon zikr bıə. Ğıronədə Mədyəni şəhri xəbə iyən hodisəon ki, Mosə(ə) çı Misriku fərol kardeyədə əyo şıəbe və de həzrəte Şuəyb(ə)-i oşno bıey bədiqə, deçəy kinə izdivacış karde, həmçinin omə. ijən bə Mosə(ə)-i Mədyənədə da sor mandey  və peşo çə həzrəti bə Misr oqardey həm işorə bıə. jıləvoni çandə həzo əsr bənav bıə navkonə millət və ğovmon hodisəonku dəvardedə, əmmo çəvon sərquzəşton Kərimə-Ğıronədə omə.

Çın ayəonku umutedəmon:

1-Kərimə-Ğıronədə omə tarıxi xəbəon, umumən ğeybiyə xəbəon bıən ki, peyğombəri zəmonədə Məkkə camaat çəyku xəbəşon nıbe.

2-Ğıroni ecozi və islomi peyğombəri(s) həx bıey dəlilonku qıləyni, Ğıroni ğeybiyə xəbəonin ki, Ğıroni çandə qılə baxşonədə omə.

وَمَا كُنتَ بِجَانِبِ الطُّورِ إِذْ نَادَيْنَا وَلَكِن رَّحْمَةً مِّن رَّبِّكَ لِتُنذِرَ قَوْماً مَّا أَتَاهُم مِّن نَّذِيرٍ مِّن قَبْلِكَ لَعَلَّهُمْ يَتَذَكَّرُونَ (46) 

Və Mosə nido doə zəmon, tı Turi bandi kəno nıbiş, lakin(ım vəhy) ıştı pərvərdıqori tərəfiku qıləy rəhməte ta tı(deçəy vositə) ıştı bənav boəvon qıləy çəşnavi doəkəs nıomə ğovmi xəbərdorətikəş, ğasbu əvon pand bıqəton. 

Navnə ayəon dəvomədə iyən çı həzrəte Mosə(ə)-i barədə bıə Ğıroni xəbəon ğeybi bıey təkidi bədiqə, ın ayə bə İslomi Peyğombəri(s) xitob kardə holədə hamyedə: əmə bətı nozil kardə çiyon, ilahi lutfe ta de Bəni-İsrayli ğovmon sərquzəşton bəyon kardey, bə məxloği çəşnavi bıdoş iyən əvoni çəvon koy oxoyku bıtorsınoş.

Ruşine ki, de islomi peyğombəri(s) mıosir iyən i faxtədə jiyə Məkkə millət, qıləy peyğombərışon vində nıbe ta deçəy ro çı navkonə milləton sərquzəştonku aqah bıbon. çoko ki, dı-se əsr çə həzrəti bənav həm, qıləy peyğombər omənıbe ta ın xəbəon bəyonkəy. həlbəttə, bənə Hud(ə), Saleh(ə)iyən Şuəyb(ə)-i bıə peyğom bəron ki, Ərəbi-Cəzirədə iyən bə ətrofonədə məbus bıəbin, əmmo çəvon zəmononku anəndə dəvardəbe ki, çəvon zəmononku qıləy əsər-əlomət mandə nıbe.

Çın ayəku umutedəmon:

1-peyğombəron besət iyən osmoniyə kitobon enonvey hədəfonku qıləyni, bə milləti xəbərdorəti doeye ta əvon bə ğəfləti dıço nıbon və axırəti çı yodo benəkəyn.

2-ağl iyən fıtrət, ziyodə həyğəton bə insoni nışon doydə. əmmo veyə amilon həm bə ım daxiliyə nidoku ğafil bıey boyis bedə. liza pəyğombəron bə insonon təzəkkur iyən xəbərdorəti doydən, ğasbu əvon pand bıqəton və bə rostə roy tərəf oqardon.