713-ə hissə-Ğəsəsi surə-79-82 şərifə ayəon

713-ə hissə

فَخَرَجَ عَلَى قَوْمِهِ فِي زِينَتِهِ قَالَ الَّذِينَ يُرِيدُونَ الْحَيَاةَ الدُّنيَا يَا لَيْتَ لَنَا مِثْلَ مَا أُوتِيَ قَارُونُ إِنَّهُ لَذُو حَظٍّ عَظِيمٍ (79) 

(İruj Ğarun)Deştə qırd cəh-cəloli ıştə ğovmi miyono zohir be. (de ın səhnə vindey) dınyo jimoni dumo bıəkəson(ah kəşeşone və) voteşone: ey kaş bə Ğaruni doə bıə çiyon, bəmə həm doey bıəbe. bərosti ki, çəy(çı nemətonku) dıjdə bəhrəş heste.

وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ لِّمَنْ آمَنَ وَعَمِلَ صَالِحاً وَلَا يُلَقَّاهَا إِلَّا الصَّابِرُونَ (80) 

Və(əmmo) bəvon(həyğiyə) elm iyən aqahəti doə bıə kəson voteşone: vay bıbu bə şımə! bo imon vardə kəson iyən çokə ko əncom doə kəson bıəilahi mıkofot(çəy mol-dıvlətisə) vey çoke. və(ım mıkofoti) ğərəz səbrəkəyon cokəs ğəbul nibəkay.

Vəynə proqramədə votemone ki, Ğarun çı həztəte Mosə(ə)-i tərəfdoronku qıləyni be. əv deştə ziyodə mol-dıvləti fəxr kardedəbe iyən məğrur be. əv de tuğyongərəti məşğul bedəbe və oxoyədə çı imoni dayirəku xaric be.

In ayəon bə Ğaruni yavə əməlonku qıləyni işorə kardedə. qıləy rəftor ki, ımrujnə bəşəri cəmiyyətədə həm, çəy analoq ziyod mışohidə bedə. ıştə puli bə cokəson nışon doey iyən cokəson bə odəm nızıney və bənə ımi bıə mıxtəlifə holon. qahi faxti bə cokəson heyrəti boyis bıə de dəb-dəbəninə kəon soxtey və qahi faxti həm bə qıləy boho ğeymətinə maşini penıştey və deəy çı şəhri kuçə-vıjoronədə manevr karde və qardey. qahi faxti həmçinin de qıləy qlamurin, cəh-cəlolin iyən əzəmətinə ziyofəti doey ki, ım bə ıştəni nışon doey iyən isrofi boyis bedə.

Imon xudpəsənd iyən sərxoşə sərvətinə şəxson kardə koonku qıləynin. ım ıştəni jıqo nışon doey, boyis bedə ki, məxloğ de noumudə formə qıləy ah bıkəşon iyən ıştəni fəğır iyən bədbəxtə inson hisobkəyn və qımonkəyn ki,  jıqo ərbobə insonon bəştə hərəbaxtəti vey bılındə noxtə rəsən. həlbətt, dərəsə iyən famə insonon həm hestin və dərk kardedən ki, nə sərvət coyli xoşbəxti vardey bəzıne və nə ərbobə şəxson həyğiyə baxtəvəronin. vey mumkine ki, mol-dıvləti soybon bə ruhi iyən xıyzoniyə problemon mıbtəlo bıən və çəvon sərmoyə bəçəvonrifoh iyən xoşbəxti boyis bıey əvəzi, bəçəvon dardı-sər iyən bədbəxi boyis bıə.

Çın ayəonku umutedəmon:

1-mol-dıvləti soyb bıey bevəc ni, əmmo fəxr kardey, ıştəni nışon doe və de dəb-dəbə jimon kardey ki, ım cokəson təhğır kardey dumo ıştə vardedə, bə xoş nomə koonku qıləyniye.

2-ehanə camiyə hukmdoron, bə Ğaruniyə ruhiyyə iyən qlamurinə jimoni dıço bıbon, ım bə camiyə fərhəng iyən erjon təsir bənoe və milləti bə qlamurinə jimoni tərəf sovğ bədoe.

3-dınyopərəstəti, çı beməxə iyən diyəro nıvində kəson oruzuye, nəinki çı dərəsə iyən ağılmandə insonon oruzu.

4-çı dınyo qırd sərvət, ilahi bo pok iyən salehə şəxson nəzədə qətə vəhışti mığobilədə, qıləy beçiz iyən bemiğdorə çiye. çən,veyçoke sərəsə iyən famə insonon milləti çı dınyopərəstətiku nəhykəyn.

فَخَسَفْنَا بِهِ وَبِدَارِهِ الْأَرْضَ فَمَا كَانَ لَهُ مِن فِئَةٍ يَنصُرُونَهُ مِن دُونِ اللَّهِ وَمَا كَانَ مِنَ المُنتَصِرِينَ (81) 

Çən, əv iyən çəy kə bə zəmini ji berdemone. və hiç dastə nıbe ki, çı Xıdo ğəhri mığobilədə bəy koməqkəyn və ıştən həm ıştəni mıdofiyə kardey hınəş nıbe.

وَأَصْبَحَ الَّذِينَ تَمَنَّوْا مَكَانَهُ بِالْأَمْسِ يَقُولُونَ وَيْكَأَنَّ اللَّهَ يَبْسُطُ الرِّزْقَ لِمَن يَشَاءُ مِنْ عِبَادِهِ وَيَقْدِرُ لَوْلَا أَن مَّنَّ اللَّهُ عَلَيْنَا لَخَسَفَ بِنَا وَيْكَأَنَّهُ لَا يُفْلِحُ الْكَافِرُونَ (82) 

Və həyğətən, çəy zinə məğami oruzu kardə kəson(de ım səhnə vindey) voteşone: vay bıbu bəmə! quya Xıdovənd(rızğo) ruzi bəştə bandəon hakəsiki, bıpyişehevuj ya tanq bəkay. (və)əgər Xıdovənd bəməş mınnət noey nıəbe, bərosti əməni həm(de əy) bə zəmini nığılə vırə əbardi. vay! jıqo bızın kofiron xilos nibəbeyn.

Milləti deştə mol-dıvləti təhğır kardey iyən Xıdo peyğombəri mığobilədə tuğyongərəti və de bə axırəti ehtiyoc nıbey bəhonə, Ğaruni koş bə vıər rosneşe ki, Xıdovənd de qıləy şiddətinə zəlzələ vositə çəy kə, boğo-bostonon iyən qırd xəzinəş bə zəmini ji bardeşe və çəvon hiç qıləy əsər-əlomətış nıhaşteşe. həlbəttə Kərimə-Ğıron çı navkonə milləton de buməlarzə vositə bə həlokət rəseyış xəbəş doə. əmmo bın macəradə fəğət Ğarun iyən saray bə zəmini ji şe və bə cokəson hiç qıləy zərəl nırəse. ım ıştən qıləy co mecuzə be. çoko ki, Firon ıştəni çı Misri iyən Nili soyb zıneydəbe, həmonə Nili ruyədə ğərğ be və çəy ğudrət iyən hukumət bərbod be şe.

Əvomə millət de ilahi mezuə vindey, ğəfləti haniku oğo be və etırof kardeşone ki, hədərə ıştə dılədə çı Ğaruni sərvəti oruzuşon kardə. zira çı hakəsi ruzi Xıdo dastədəy. əve ki, bəştə elm iyən hikməti əsos, rızğo-ruzi çı məxloği miyono təğsım kardedə və de bəvon doə çiyonmıtonosib, çəvonku sıvol-cəvob bəbe.

Çın ayəonku umutedəmon:

1-çı yoləşəxəti, sərxoşəti iyən tuğyongərəti oxo, həğorət iyən həlokəte.

2-sərvət, çanəndə həm ziyod bıbu, insoni çı ilahi ğəhro-ğəzəbiku peroxne əzıni.

3-de məsələon rəftorədə, rə ray və hukm mədəmon. çı Ğaruni sərvəti vindəkəson, sıftədə oruzu kardedəbin ki, ey kaş bəmə həm jıqo sərvət doey bıəbe. çən, peşo çəy koy oxo vindey bədiqə, voteşone ki, çok çəmə jıqo qıləy mılk nıbe.

4-çı cokəson mol-dıvləti oruzu kardey əvəzi, bə Xıdovəndi bəmə doə neməton ğane bıbəmon və bıznəmon bə dınyo qırd oruzuon rəsey, mumkine bo əmə məsləhət nıbu.