717-ə hissə-Ənkəbuti surə-8-13 şərifə ayəon

717-ə hissə

وَوَصَّيْنَا الْإِنسَانَ بِوَالِدَيْهِ حُسْناً وَإِن جَاهَدَاكَ لِتُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا إِلَيَّ مَرْجِعُكُمْ فَأُنَبِّئُكُم بِمَا كُنتُمْ تَعْمَلُونَ (8) 

Və bə insoni sıfarış kardemone ki, bəştə pı-mo çokikəy. və əgər ə dıqlə cəhdkoyn, ıştı nızınə çiyon bəmı şərik bıdoyn,(bəvədə) bəvon itoət məkə. (qırd)şımə oxo bəçımı tərəfe. çən, şıməni şımə əncom doə çiyon(həyğətiku) aqah bəkamon.

وَالَّذِينَ آمَنُوا وَعَمِلُوا الصَّالِحَاتِ لَنُدْخِلَنَّهُمْ فِي الصَّالِحِينَ (9) 

Və imon vardə kəson iyən çokə ko kardə kəson, beşək bə salehon zumrə bəvardemon(daxil bəkamon).

Islami sıftənə soronədə i dastə cıvonon bə islomi peyğombəri(s) imon vardəşon be və çıbıtpərəstətiku dastışon kəşəbe. əmmo çəvon pı-moon mışrik iyən bıtpərəst bin və çəvonku tələb kardedəbin ki, çı peyğombəri vardə ayiniku dast bıkəşon. hətta kali moon vəşyənəti aksiyaşon dəvordıne və xorək hardedənıbin. əvon çəş kardedəbinki, bəştə fərzəndon de jıqo moəti hisson təzyiği,əvoni çın koyku bə diyərokəyn. əmmo de ın holi ijən kardeyışon nızıne ıştə fərzəndon çı islomi ayiniku cokəyn.

In ayəon bə cıvonon iyən çı şırk və şırki xıyzoni dılədə jiyə qırd şəxson xitob kardedə və hamyedə: qıləy holədə ki, xıyzoni iyən məktəbiyə rabitəon miyono qıləy ziddiyyət icod bıbu, dini hifz kardey valideyni rizoyəti cəlb kardeysə vey muhimme və bəbe bə emossiya iyən hisson xoto diniku dast nıkəşi. həlbəttə çı pı-mo ehtiromi oqətey hejo lozıme və çanədə mumkine bəbe bəvon çokətikəy və çəvon ehtiyocon bərtərəf kardeyu, çəvon xıdmətədə bəbe bımandi.

Ayəon dəvomədə bə xıyzoni qırd uzvon,ısət çı valideyn bıbu ya fərzənd , xitob kardedə və hamyedə: şımə qırd koon bın dınyoədə səbt iyən ğeyd bedə və bəbe qıləy ruj şımə bəştə kardə koon xoto cəvob bıdoyn və ğıyoməti ruji çı pok iyən salehə şəxson kəno fəğət imoni əhl iyən çokə ko soybon bəbeyn.

Çın ayəonku umutedəmon:

1-bə valideyni çoki və ehson kardey, hiç qıləy ğeydo-şərtış nıbə holədə qıləy insoniyə koye və əvon çı mısılmon bıbon ya kofir, bəbe bəvon xıdmətkəy və ehtiromkəy.

2-bə şırki dəvət,həyğətədə bə qıləy bedəlil iyən cohilonə koy tərəf dəvəte və çın koy hiç qıləy elmi iyən əğli əsosış ni.

3-fərzəndon səhihə roy vıjniye koyədə ozodin. pı-mo kardey nibəzıne əvoni bəştə şıə roy tərəf məcburkəyn.

وَمِنَ النَّاسِ مَن يَقُولُ آمَنَّا بِاللَّهِ فَإِذَا أُوذِيَ فِي اللَّهِ جَعَلَ فِتْنَةَ النَّاسِ كَعَذَابِ اللَّهِ وَلَئِن جَاء نَصْرٌ مِّن رَّبِّكَ لَيَقُولُنَّ إِنَّا كُنَّا مَعَكُمْ أَوَلَيْسَ اللَّهُ بِأَعْلَمَ بِمَا فِي صُدُورِ الْعَالَمِينَ (10) 

Məxloği kali qılə(de zıvoni) votedən: bə Xıdo imon vardemone. çən, hafaxti Xıdo royədə qıləy əzob-əziyyət bıvindon, milləti əzob-əziyyəti Xıdo əzobi unvanədə ğərol bədoyn və əgər ıştı pərvərdıqoriku qıləy koməq bırəso, de təkidi votedən: əmə deşmə bimon. ayə Xıdo bə aləmon dılonku dəvardə çiyon vey aqah ni?

وَلَيَعْلَمَنَّ اللَّهُ الَّذِينَ آمَنُوا وَلَيَعْلَمَنَّ الْمُنَافِقِينَ (11) 

Və hukmən Xıdo imon vardə kəson zıneydə və(həmçinin) mınofiğon həm zıneydə.

Vəynə ayəon dəvomədə ın ayəon bə muminon co qılə qrupi işorə kardedə ki, fəğət jimoni rifoh iyən asayişədə əvon ıştəni bənə muminon bardedən və hafaxti de muşkilat iyən problemon dim bədim boyn, həni bəvədə ıştə dini oqətey boəvon saxt və çətin bedə və ıştə imoniku dast kəşeydən və ıştəni bəkəno okırneydən. əmmo çoko problemon bərtərəf bedə və muminon ijən sənibəton bə ğudrət rəseydə, əvon ıştəni de muminon şərik zıneydən. əvon votedən: əmə qırd vırəonədə deşmə iyən şımə kəno bimon. çən, bın ğələbədə əmə deşmə şərikimon.

Ayəon dəvomədə hamyedə: Xıdovənde-Aləm çı qırd insonon botıniku aqahe və zıneydə ki, kon şəxs de tosə ıştə oxonə nəfəsi ıştə dinədə ğoym-ğoym mandedə və kon fərd ıştə imoniku dast kəşeydə.

Çın ayəonku umutedəmon:

1-kali şəxson imon çəvon zıvonədəy və zıvoniye, nəinki ğəlbi. çən, bə imoni iddio kardə kəsi etımod məkəmon. zira həyğiyə muminon saxtəti iyən məşəğğəti faxti məlum bedə.

2-qahi faxti imon vardey ya əy oqətey, xarcış heste ki, imoni əhl bəy tov vardedə və çətinətiyon ğəbul kardedə.

3-mınofiğon fırsət tələbə fərdonin. təhlukə faxti vitedən və ğələbə faxti ıştəni çı milləti kəno ğərol doydən  ta bə dast omə çiyonku bəhrə bobən.

وَقَالَ الَّذِينَ كَفَرُوا لِلَّذِينَ آمَنُوا اتَّبِعُوا سَبِيلَنَا وَلْنَحْمِلْ خَطَايَاكُمْ وَمَا هُم بِحَامِلِينَ مِنْ خَطَايَاهُم مِّن شَيْءٍ إِنَّهُمْ لَكَاذِبُونَ (12) 

Və kofron bə imon vardə kəson votedən: şımə bə çəmə ro pemandənən(ehanə şımə qınon bıbu) şımə qınon bəştə ohdə pebəqətemon. qıləy holədə ki, əvon hiççi ıştə qınonku bəştə ohdə nipebəqəteyn. şəkni əvon duyəvıjonin.

وَلَيَحْمِلُنَّ أَثْقَالَهُمْ وَأَثْقَالاً مَّعَ أَثْقَالِهِمْ وَلَيُسْأَلُنَّ يَوْمَ الْقِيَامَةِ عَمَّا كَانُوا يَفْتَرُونَ (13) 

Beşək əvon həm ıştə(qınon) bo və həmən cokəson boon bəştə duş pebəqəten. və yəğın ki, ğıyoməti ruji çəvon duyədə boftə çiyonku sıvol(cəvob) bəbe.

Mışrikon cəhd kardedə bin ki, muminon çəvon royku oqordınon və bəştə şırki tərəf okornon. ın ayə hamyedə: əvon bə imon vardə kəson votedəbin: şımə həm bəçəmə iyən bəçəmə dədə-bobon roy oqardənən və və çı peyğombəriku dast bıkəşənən. ehanə ım ko səhv iyən qıno nıbu, iyo hiç qıləy problem ni. ne, əgər iyo qıno həm bıbu, əmə şımə qınon bəştə ohdə pebəqətemon və boşımə hiççi nibəmande.

Ayəon dəvomədə hamyedə: əvon ıştə bın iddioədə du votedən. zira cəzo iyən mıkofot Xıdo dastədəy, nəinki, çəvon. əvon kardey nibəzıneyn çı qınokori cəzo bəştə kul peqəton və əy maafkəyn. həlbəttə ehanə qıləy şəxs de ım nodırstə sıxanon vositə bə zəlolət eqıno və ıştə imonku dast bıkəşo, ğıyoməti ruji cəzo bəvinde və bəçəy zəloləti boyis bıə şəxsi ıştən qınosə əlovə, bəy çəy çı royku bekardə kəson qıno bo həm jıey bəbe və əv çəvon bo həm ıştə kulədə bəşıkırne.

Çın ayəonku umutedəmon:

1-deşmınon çı muminonku dast kəşedənin. qahi faxti de işkəncə və qahi faxti de duyə və`dəon və hejo çımi dumon ki, muminon bəştə kufr iyəm şırki tərəf okornon.

2-islomi ideoloqiyədə, hiç kəs çı cokəsi qıno bəştə qi peqəte nibəzıne. vəya iddio kardey mibəzıne ki, ıştı qıno bəçımı ohdə.

3-əmmo qıləy şəxs cokəsi çı royku beko, çəy qınoyədə şərike və deçəy dasti mınhərif bıə qırd kəson qıno bəçəy giye. həlbəttə ım çı qıno kardə kəsi qınoku bə kam nibəkay.