718-ə hissə-Ənkəbuti surə-14-18 şərifə ayəon

718-ə hissə

وَلَقَدْ أَرْسَلْنَا نُوحاً إِلَى قَوْمِهِ فَلَبِثَ فِيهِمْ أَلْفَ سَنَةٍ إِلَّا خَمْسِينَ عَاماً فَأَخَذَهُمُ الطُّوفَانُ وَهُمْ ظَالِمُونَ (14)‏

Və bərosti Nuh bəçəy ğovmi tərəf vığandemone. çən, çəvon miyono həzo soriku penco sor bəkam(nəvsa penco sor) mande(əmmo məxloği veyni bəy imon nıvardeşe). çən, əvon sıtəmkor bıə holədə tufoni əvon dəqəte.

فَأَنجَيْنَاهُ وَأَصْحَابَ السَّفِينَةِ وَجَعَلْنَاهَا آيَةً لِّلْعَالَمِينَ (15) 

Çən, əv iyən kəşti sərnişinonro peroxnemone. və ə(macəra) bo aləmon(ibrəti) nışonə ğərol domone.

In ayəon iyən peşonə ayəon bənə Nuh(ə), İbreym(ə), iyən Mosə(ə)-i bıə peyğombəron zəmonədə jiyə navkonə ğovmon sərquzəşton işorə kardedə və deəvon bə ico bıey imoni iyən bəvon nıpemandey mizoni bəyon kardedə.

Bə ın ayəon əsos, deməkə ki, həzrəte Nuh(ə) bə i həzo sori nez deştə ğovmi dəvəti, əvoni torsıney iyən deçəvon irşodi ko məşğul be, əmmo qıləy vey kamə hissə bəy imon vardeşone və milləti əksəriyyət de kufr iyən inodkorəti məşğul bin.liza de Xıdovəndi tələbi qıləy dıjdə tufon iyən ovəyzi əzob nozil be və çə həzrəti qırd deşmın iyən mıxolifonış məhvış karde və fəğət muminon nicot pəydu kardeşone ta əvon bo peşonə omə nəslon qıləy ibrəti dərs bıbu və bızınon ki, ehanə ummət de zılmi məşğul bıbu və çı həxı mığobilədə bımando, oxoyədə bə həlokət bərəse.

Çın ayəonku umutedəmon:

1-imon iyən kufr, çı ğovmon həmonə bın dınyoədə bıə həlokət iyən nicoti koyədə təsiriş heste.

2-Ğıroni prizmaku həzo sor dırozə umr kardey imkonış heste. liza bə həzrəte İmom Məhdi(əc) i həzo dı sa sorisə tosə ısət jimon kardey etığod, qıləy imkonış bıə koye.

3-dini təblıği koyədə, səbr iyən sabitğədəməti lozıme və bəbe çı milləti veyni imon vardey çəş məkəmon.

وَإِبْرَاهِيمَ إِذْ قَالَ لِقَوْمِهِ اعْبُدُوا اللَّهَ وَاتَّقُوهُ ذَلِكُمْ خَيْرٌ لَّكُمْ إِن كُنتُمْ تَعْلَمُونَ (16) 

Və(bə yod biyə) İbreymi ki, bə zəmon bəştə ğovmi voteşe: Xıdo pərəstışkənən iyən çəyku bıtarsənən. ehanə bızınon ım(ko) boşımə vey çoke.

إِنَّمَا تَعْبُدُونَ مِن دُونِ اللَّهِ أَوْثَاناً وَتَخْلُقُونَ إِفْكاً إِنَّ الَّذِينَ تَعْبُدُونَ مِن دُونِ اللَّهِ لَا يَمْلِكُونَ لَكُمْ رِزْقاً فَابْتَغُوا عِندَ اللَّهِ الرِّزْقَ وَاعْبُدُوهُ وَاشْكُرُوا لَهُ إِلَيْهِ تُرْجَعُونَ (17) 

Həyğətən, şımə Xıdo əvəzi bıton pərəstış kardedon və qıləy dıjdə du boftedon. həyğətən, Xıdo əvəzi pərəstış kardə kəson şımə rızğo-ruzi soyb nin. çən,(boştə) ruzi Xıdo palu bınəvənən iyən bəy pərəstışkənən və boəy şukrkənən ki, bəçəy tərəf oqordıney bəbiyon.

Həzrəte Nuh(ə)-i bədiqə,həzrəte İbreym(ə) dıminə “ulul-əzm” peyğombəre ki, milləti çı bıtpərəstətiku nəhy kardedəbe və əvoni bə İ bıə Xıdo pərəstışi tərəf dəvət kardedəbe. ə həzrət çı bıtpərəsti rəğ-rişəonku qıləyni, bə mol-dıvləti ehtiyocin bıey zıneydəbe və bəvon xitob kardə holədə hamyeşe: ehanə şımə bəştə fəğırəti iyən ehtiyoci xoto, bıton mığobilədə ibodət kardedon, bızınən ki, ım beconə cismon şımə jimonədə hiç qıləy rolışon ni iyən əvon şımə ehtiyocon bərtərəf  kardey nibəzıneyn.

Əmmo əgər şımə Xıdo pərəstışkoyn iyən bəçəy neməton şukrkoyn, həm çı çı ım beconə cismon bandəçətiku ozod bəbiyon və həmən şımə qıləy şəxsi mığobilədə səjdə bəkayon ki, dınyoədə qırd şımə rızğo-ruzi çəy dastədəy və şımə mardey bədiqə bıə şımə koy oxo həm deçəy dastiye.

Çın ayəonku umutedəmon:

1-ibodət iyən pərəstış, təğva iyən qınonku bə diyəro nıbə holədə, hiç qıləy foydəş ni.

2-ıştə maddiyə jimonədə Xıdo əvəzi cokəson təsirəkə zınə kəson, inov bə şırki giriftor bıən.

3-din, çoko milləti boştə maddiyə ehtiyocon təmin kardey iyən bo rifohiro cəhd kardey dəvət kardedə, çəvonku həmçinin bə Xıdo neməton şukr kardey iyən fəğət bəy pərəstış kardey həm tələb kardedə.

وَإِن تُكَذِّبُوا فَقَدْ كَذَّبَ أُمَمٌ مِّن قَبْلِكُمْ وَمَا عَلَى الرَّسُولِ إِلَّا الْبَلَاغُ الْمُبِينُ (18) 

Və əgər(mıni) təkzib koyn(təəccıbış ni) zira şımə bənav bıə umməton(həm ıştə peyğombərışon) təkzib kardəvə(Xıdo) Rəsuli vəzifə ğərəz ruşinə təblıği co çi ni.

Ayəon dəvomədə, həzrəte İbreym(ə) bın ayədə bə bıtpərəston xitob kardedə hamyedə: çımı intizorım ni ki, qırd millət Xıdo dini ğəbulkəyn və imon biyən. zira dəvardə ğovmon təcrubə nışon doydə ki, dəvardə milləton veyni həm ıştə peyğombəronışon inkor kardə iyən çəvon dəvətışon ğəbul kardəni. çımı iyən qırd ilahi peyğombəron vəzifə, ilahi dəvəti rosneye və çı məxloği ın dəvəti ğəbul kardey ya nıkardey mığobilədə çımı həni co qıləy məsuliyyət və vəzifəm ni. çımı ko Xıdo dini təblığe və az çımi mığobilədə məsuliyyətım heste və bımi cəvobdehim. ehanə həmmə millət kofir həm bıbon, bəçımı ohdə hiççi ni.

Çın ayəku umutedəmon:

1-peyğombəron milləti bo imon vardey xoto, məcbur kardedənıbin. əvon ıştə vəzifə ibloğ iyən rosney zıneydəbin, nəinki, məcbur kardey.

2-muminon çəş nıkəyn ki, qırd məxloğ bənə əvon bə Xıdo imon biyən. ehanə əvon ıştə təblıği vəzifə bə vırə bırosnon, çı kofiron mığobilədə hiç qıləy məsuliyyətışon nibəbe.