722-ə hissə-Ənkəbuti surə-31-35 şərifə ayəon

722-ə hissə

وَلَمَّا جَاءتْ رُسُلُنَا إِبْرَاهِيمَ بِالْبُشْرَى قَالُوا إِنَّا مُهْلِكُو أَهْلِ هَذِهِ الْقَرْيَةِ إِنَّ أَهْلَهَا كَانُوا ظَالِمِينَ (31) 

Və çoko çəmə vığandəyon bo İbreymi qıləy mıjdəvoni(fərzəndi təvəlludi) vardeşone, voteşone: əmə ım məntəğə məhv əkəyonimon. zira çəvrə millət sıtəmkoronin.

قَالَ إِنَّ فِيهَا لُوطاً قَالُوا نَحْنُ أَعْلَمُ بِمَن فِيهَا لَنُنَجِّيَنَّهُ وَأَهْلَهُ إِلَّا امْرَأَتَهُ كَانَتْ مِنَ الْغَابِرِينَ (32) 

(İbreymi)Voteşe: Lut bın məntəğədəy. firiştəon voteşone: (mətars)əmə çın məntəğə odəmonku vey aqahimon. şək ni əv(Lut) iyən çəy xıyzoni nicot bədomon. ğərəz çəy jimoni həmro ki, əv(çəmə zəobi dılədə) mandə kəsonkue.

Dəvardə proqramədə votemone ki, Lut(ə)-i ğovm qıləy fosid iyən qınokorə insonon bin. əvon bə həzrəti məntığiyə sıxanon quş doey əvəzi, bəy məsxərə kardedəbin iyən əy duyəvıj hisob kardedəbin.əmmo həzrəte Lut(ə) çə cinoyətkoron təhdid iyən təzyiğon mığobilədə mande və ıştə nəhy əz munkəriku dastış nıkəşe. əv Xıdovəndiku tələbış karde ki, əy çə həmonə qınokorə ğovmi səpe səbarzkəy.

In ayəon hamyedə: Xıdovəndi məlayikonış bəhəzrəte İbreym(ə)-i tərəf vığandeşe ta əy çı fərzəndi soyb bıeyku xəbədokəy və həmən bə Lut(ə)-i ğovmi omə əzobi nozil bıeyku əy aqahkəy. zira həzrəte Lut(ə) bə məntəğədə çəy şəryəti təblığ kardə qıləy pəyğombər be və Xıdovəndi çəy çı qınokoron barədə bıə dıvoş mıstəcob və ğəbulış kardəş be.

Kərimə-Ğıron hamyedə: həzrəte İbreym(ə)de ilahi əzobi nozil bıey xəbə məsey, bə məntəğədə jiyə çı həzrəte Lut(ə)-i ağıbətiku vey norohət be. əmmo məlayikon cəvobədə hamyeşone ki, bə ilahi adəton əsos, əmə hışki de tari bə ico nibəsutnemon və fəğət bə qınokoron cəzo bədomon. hətta çı Lut(ə)-i jimoni həmro ki, çı muminon səf və cərqəku co bəbe və bə kofirə dastə anqıl qıniyəbe, çın ilahi ğanuniku mustəsna nıbe. əv deməkə ki, çı pəyğombəri kədə jiyedəbe, əmmo çı perəxə kəsonku nıbe.

Çın ayəonku umutedəmon:

1-ilahi firiştəon, hestemoni aləmi xıdmətçiyonin. əvon həm ilahi bəşorəti doə məmurin və həmən ilahi ğəhr və əzobi məmur.

2-boştə cinsi ğərizə və ehtiyocon təmin kardeyro, çı səhihə royku mınhərif bıey, zılm hisob bedə. bəştə,bə xıyzoni iyən bə camiyə bıə zılm.

3-ehanə camiyədə zılmo-sıtəm pevolo bıbu, çə cəmiyyəti millət bə həlokəti nez bəbeyn.

4-jimoni həmro iyən fərzəndon ıştə roy vıjiniyedə ozodin. Lut(ə)-i jimoni həmro de kofiron roşe, əmmo çə həzrəti fərzəndon ıştə pı roşon qəte.

وَلَمَّا أَن جَاءتْ رُسُلُنَا لُوطاً سِيءَ بِهِمْ وَضَاقَ بِهِمْ ذَرْعاً وَقَالُوا لَا تَخَفْ وَلَا تَحْزَنْ إِنَّا مُنَجُّوكَ وَأَهْلَكَ إِلَّا امْرَأَتَكَ كَانَتْ مِنَ الْغَابِرِينَ (33) 

Və çəmə vığandəyon Luti palu omeyədə, çəvon omeyku norohət be və ıştə dastış(çəvon himoyəku) kırtış karde(bırniyeşe). (məlayikon)voteşone: mətars iyən ğəmqin məbi. əmə tıni iyən ıştı xıyzoni nicot bədomon. illa ıştı jimoni həmro ki,(əv əzobədə) mandə kəsonkue.

إِنَّا مُنزِلُونَ عَلَى أَهْلِ هَذِهِ الْقَرْيَةِ رِجْزاً مِّنَ السَّمَاءِ بِمَا كَانُوا يَفْسُقُونَ (34) 

Həyğətən, əmə bə ım məntəğə bəçəvon fısği(qınon) xoto çı osmoniku qıləy əzob rubəkəmon.

وَلَقَد تَّرَكْنَا مِنْهَا آيَةً بَيِّنَةً لِّقَوْمٍ يَعْقِلُونَ (35) 

Və çın məntəğəku bo fik-fam kardə kəson qıləy ruşinə nışonə(ibrəti dərs) baği haştemone.

Kərimə-Ğıroni co ayəonku bə dast omeydə ki, həzrəte Lut(ə) sıftədə ilahi məlayikonış nızıne. zira əvon qıləy cıvonə reçinə zoə formədə çəy palu omin. liza ıştə qınokorə ğovmi bəçəy mehmonon təcavuz kardeykunorohət be. əve əv bə dardı-ğəmi dıço be və vey norohət be ki, çokonə ımoni çə cinoyətkorə ğovmiku nığodəy, hifzkəy.

Əmmo firiştəon ıştnəşon təğdım karde və əvışon xatırcəm kardeşone ki, çın nopokə ğovmi dast bəvon nibərəse. zira ım qınokorə ğovm rəyrə bə qıləy əzobi giriftor bəbeyn ki, ğərəz çəvon volo iyən  vironə bıə kə-bəon, çəvonku hiç qıləy əsər-əlomət nibəmande.

Bə ın ayəon əsos, ıştə qınoədə isror kardey və əy camiyədə pevolo kardey, qıləy təhlukəninə koye ki, nəinki, məxsusə fərdon, vey mumkine çı camiyə pokə insonon həm bə ilahi əzobi dıçokəy. əv həm qıləy əzob ki, bə cokəson ibrəti boyis bedə.

Bə Kərimə-Ğıroni co ayəon əsos, sıftədə qıləy şiddətinə buməlarzə çə fosiğə ğovmi jimon kardə Sedomi şəhrış lorzıne, çən peşo çı osmoniku sığə voşon bəçəvon sə rube və həmməkəs iyən həmmə çiyonış çı sıği jiyədə dəfnış karde haşteşe.

Çın ayəonku umutedəmon:

1-ehanə camiyə fosid bıbu, mumkine həmon fəsod bə camiyə qırd vırəon siroyətkəy. bın surətədə hətta pokə xıyzonon həm ıştə kədə əmniyyətışon nibəbe və ıştə fərzəndon ağıbətiku norohət bəbeyn.

2-mehmoni ehtiromi oqətey, bə kə soybi ohdəy və bəbe çı kə soybi kədə çəy hurmət oqətey bıbu.

3-mumini bəştə dini ğeyrətış heste və ha vırədə qıləy xətər, fəsod iyən inhirof mışohidəkəy, ıştəku qıləy reaksiyə nışon doydə, nəinki əv de lağeydə formə çın be hurmətəti iyən beiffətəti kənoku dəvardedə.

4-Xıyzoniyə rabitəon və de pokə şəxson ğohuməti əloğə bıey, coyli bə insoni dınyo iyən axırətədə hərəbaxtəti boyis bedəni. vey mumkine(bənə Lut(ə)-i jimoni həmro) peyğombəri jimoni həmro ki, çəy vırə cəhəndımədəy və vey mumkine Fironi jimoni həmro vəhışti barzə məğamədəy.