723-ə hissə-Ənkəbuti surə-36-40 şərifə ayəon

723-ə hissə

‏ وَإِلَى مَدْيَنَ أَخَاهُمْ شُعَيْباً فَقَالَ يَا قَوْمِ اعْبُدُوا اللَّهَ وَارْجُوا الْيَوْمَ الْآخِرَ وَلَا تَعْثَوْا فِي الْأَرْضِ مُفْسِدِينَ (36) 

Və bə Mədyəni(milləti) tərəf çəvon bıvə Şueybro vığandemone. çən,(əy) voteşe: ha çımı ğovm ha! Xıdo pərəstışkənən! və bə ğıyoməti ruji umudəvo bıbənən iyən zəmini dimisə fəsod məkənən.

فَكَذَّبُوهُ فَأَخَذَتْهُمُ الرَّجْفَةُ فَأَصْبَحُوا فِي دَارِهِمْ جَاثِمِينَ (37) 

Əmmo əvon əvışon təkzib karde və(de ın səbəbi) zəlzələ əvonış dəqəte və sıbi faxti ıştə kəonədə bəsə dimisə eqıniyəbin mardəbin.

Vəynə bərnomədə bə Lut(ə)-i ğovmi işorə kardemone. ın ayəon bə həzrəte Şuəyb(ə)-i risoləti macəra işorə kardedə və hamyedə: həmonə peyğombər həm bənə co qırd pəyğombəron, milləti bə Xıdo pərəstışi iyən bə ğıyoməti bovə kardeytərəf dəvət kardedəbe və hamyeşe: qıno iyən bə Xıdo əmron nıpemandey, bəşmə çı zəmini dimisə fısğo-fucuri boyis bıə və şımə çı camiyə soxtemoni bə zılm iyən beədoləti tərəf şıkırneydon.

Əmmo məələsəf bənə co navkonə etnoson, Şuəyb(ə)-i ğovm həm ıştə peyğombərışon bə həşə je. əvon bəçə həzrəti boçəvon islohiro bıə bənə boə iyən dıləsutə moyizə və pandonışon quş nıdoe və əvışon ğəbul nıkarde. Kərimə-Ğıron hamyedə: bəçəvon peyğombəron təkzib iyən bə qıno mırtəkib bıey xoto, çəvon ağıbət jıqo be ki, əvon bın dınyoədə bə ilahi şiddətinə əzobi giriftor bin və əvon de buməlarzə vositə zəmini əvonış ebordıne haşteşe.

Çın ayəonku umutedəmon:

1-tohid iyən miad, çı ənbiya və peyğombəron dəvəti sərlovhə bıə.

2-peyğombəron de milləti rəftor, bənə boə iyən dustə formədə bıə, nəinki, əvon ıştənışon bəpe pekırnə və çı sultə dumo bıən.

3-fəğət bə qıno mırtəkib bıey, bə əzobi nozil bıey boyis bedəni. zıne-zıne bıştə qınoyədə isror karde iyən de həxı inodkorəti kardey, ilahi ğəhro-ğəzəbi dumo ıştə vardedə.

وَعَاداً وَثَمُودَ وَقَد تَّبَيَّنَ لَكُم مِّن مَّسَاكِنِهِمْ وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ وَكَانُوا مُسْتَبْصِرِينَ (38)

Və Ad iyən Səmud(ğovmımon) həm(həlok kardemone) vəbeşəkk çəvon kali jimon kardə(xərobə bıə) kə-bəon boşımə oşkoe və şəytoni çəvon əməlonış bo əvon ziynətış doe və əvonış Xıdo royku oqəteşe. qıləy holədə ki, çəvon(bo həxı çı botıliku co kardeyro) bəsirətışon hestebe.

In ayə bə Ad iyən Səmud ğovmon koy oxo işorə kardedə. bənə Hud(ə) iyən Saleh(ə)-mon bıə peyğombəronvəzifəşon hestebe əvoni hidoyətkəyn. ım dıqlə ğovm ki, çəvon sərquzəşton Kərimə-Ğıroni co ayəonədə omə, ıştə peyğombəronışon inkor karde və aqahonə surətədə de əvon mıxolifət kardedəbin iyən bəçəvon əmron pemandedənıbin.

Kərimə-Ğıron bə Məkkə milləti xitob kardə və hamyedə: ım dıqlə ğovmi məxloğ həm bə ilahi əzobi giriftor bin və çəvon vironə bıə kə-bəon əlomət çı Məkkə şimal iyən cənubədə, çı Şam iyən Yəməni roysə ğərolış qətə, boşımə vey oşkoe və şımə ıştə səfəronədə əy mışohidə kardedon. əmmo ijən şımə ibrət peqəteydıniyon.

Ayə dəvomədə çəvon bə ım cəzo dıço bıey amili, çəvon bə şəytoni pemandey zıneydə ki, əv de dınyəviyə ziynəton vositə, əvonış bə dast dənoə. deməkə ki, çəvon ixtiyorədə bənə daxiliyəağl və fıtrəti əbzoron iyən bənə peyğombəron dəvəti bıə xariciyə amilon hestebe, əmmo ijən əvon çı həxə royku mınhərif bin və bə zəloləti dıço bin.

Çın ayəku umutedəmon:

1-bə cokəson ibrəti boyis bıə dəvardə ğovmon tarıxiyə əsəron baği haştey və oqətey, qıləy lozımə koye.

2-şəytoni ko, yavə çiyon ziynət cilvə doeye. şəyton çı insoni bəştə ağl iyən fıtrəti əsos yavə zınə çiyon, boəy ğəşənq cilvə doydə. məsələn, eqoistəti, yoləşəxəti və deştə sərvət iyən ğudrəti fəxr kardey koon, şəytoni çı insoni nəzə ğəşənq cilvə doə çiyonin.

وَقَارُونَ وَفِرْعَوْنَ وَهَامَانَ وَلَقَدْ جَاءهُم مُّوسَى بِالْبَيِّنَاتِ فَاسْتَكْبَرُوا فِي الْأَرْضِ وَمَا كَانُوا سَابِقِينَ (39) 

Və Ğarun, Firon iyən Hamanro(həm həlok kardemone) və bərosti Mosə hejo de ruşinə dəlilon(mecuzəon) bəçəvon tərəf ome. (əmmo)əvon zəminisə təkəbbır iyən yoləşəxəti kardeşone. və(de ım həmmə ijən) Xıdo əzobiku fərol kardeyışon nızıne.

فَكُلّاً أَخَذْنَا بِذَنبِهِ فَمِنْهُم مَّنْ أَرْسَلْنَا عَلَيْهِ حَاصِباً وَمِنْهُم مَّنْ أَخَذَتْهُ الصَّيْحَةُ وَمِنْهُم مَّنْ خَسَفْنَا بِهِ الْأَرْضَ وَمِنْهُم مَّنْ أَغْرَقْنَا وَمَا كَانَ اللَّهُ لِيَظْلِمَهُمْ وَلَكِن كَانُوا أَنفُسَهُمْ يَظْلِمُونَ (40) 

Çən, çəvon har qıləyni bəçəvon qınon xoto bə(əzobi) giriftor kardemone. çən, bəçəvon kali qıləyni sə hırdə sığ peşandə tufon vığandemone və çəvon bəzi qıləyni osmoniyə barzə vanqi(dəhşətinə sədo) dəqəteşe. və çəvon kali qıləyni bə zəmin dəkandemone. və bəzi qılə həm(ovədə) ğərğ kardemone. və jıqonə be ki, Xıdovəndi bəvon sıtəm nıkardeşe, bəlkəm əvon ıştən-bəştə zılm kardeşone.

Dəvardə ğovmon koy ağıbəti bəyoni bədiqə, ın ayəon tarıxədə bıə bənə Ğarun, Firon iyən Hamani bıə yoləşəxə iyən sıtəmkorə insonon koy oxo işorə kardedə. Ğarun bəştə ziyodə mol-əmvoli xoto bə təkəbbırəti dıço be. ğudrət iyən səltənət Fironış bəçəy ixtidori pik həddış rosnəbe və əv de tuğyon iyən yoləşəxəti məşğul be. Haman həm çı Fironi vəzir be iyən çəy cinoyətonədə de əy şərik be.

Həzrəte Mosə(ə) ım se xonəxoş deştə irşod iyən moyizəon vositə bə Xıdo tərəf dəvətış karde və huccətış bəvon təmom karde. əmmoəvon çı həxı mığobilədə təslim nıbin iyən ıştə noloyığə koon və metodonku dastışon nıkəşe. əvon çı Mosə(ə)-i yəni ilahi yolə peyğombəri vədə mandin və ə həzrəti kıştey fikədə bin. Im fərdon jıqo fik kardedəbin ki, deştə tuğyongərəti kardey bəzıneyn ilahi irodə vədə bımandon. əmmo de Xıdovəndi irodə, zəmini Ğarunış ebordıne və əvış ıştə jiyədə mədfunış karde. ovi həm Fironış ıştə dılədə ğərğış karde və əv Nili ruyədə eşe şe.

Ayəon dəvomədə bə ilahi dınyoədə bıə curbəcurə əzobon işorə kardedə ki, Ğıroni co ayəonədə əvon de təfsilati omə. Adi ğovm de hırdə sığon  bə ico bıə bə qılə dıjdə tufoni giriftor kardeşe ki, i haftə bəşəv-bəruji mıddətədə ım sığə voş bəçəvon sə rube və əvonış məhvo-nobud  kardeşe. Səmud ğovm həm de osmoniku omə dəhşətinə sədo iyən şiddətinə buməlarzə vositə bə həlokət rəsin. həmçinin çəvon ipoə zəmini ebordıneşe şin ya ovi dılədə ğərğ bin şin.qırd ımon çəvon bın dınyioədə bıə əzobonin ki, vağe bıə.

Çın ayəonku umutedəmon:

1-çı təkəbbırəti iyən ıştəni pekırney oxo, həlokət və məhv bıeye. ğudrət, sərvət iyən co imkonaton, yavə ko soybə insonon nicot doey əzıni.

2-Xıdovəndi ğudrət bəsə həmmə ğudrətonsə bəpeye və çı həxə ayini iyən çəvon rəhbəron vədə mandəkəson, qımon nıkəyn ki, Xıdovəndi mığobilədə mandey hınəşon bəbe.

3-Xıdo əzob i formədə ni və Xıdovəndi dast əzob doey koyədə oje və əv de har formə bə yavə ko soybon əzob bədoe.

4-hakəsi tale və sərnıvışt, çəy ıştən əməlon girovədəy.