726-ə hissə-Ənkəbuti surə-50-55 şərifə ayəon

726-ə hissə

وَقَالُوا لَوْلَا أُنزِلَ عَلَيْهِ آيَاتٌ مِّن رَّبِّهِ قُلْ إِنَّمَا الْآيَاتُ عِندَ اللَّهِ وَإِنَّمَا أَنَا نَذِيرٌ مُّبِينٌ (50) 

Və voteşone: çıro bəy çəy pərvərdıqori tərəfiku(bənə Mosə əso) qıləy mecuzə nozil bedəni? vuji: mecuzəon fəğət Xıdo paluye. (deçəy əmri nozil bedə)və az fəğət qıləy oşkoə tarsədəm.

أَوَلَمْ يَكْفِهِمْ أَنَّا أَنزَلْنَا عَلَيْكَ الْكِتَابَ يُتْلَى عَلَيْهِمْ إِنَّ فِي ذَلِكَ لَرَحْمَةً وَذِكْرَى لِقَوْمٍ يُؤْمِنُونَ (51) 

Ayə(ın mecuzə) boəvon kifoyət kardedəni ki, əmə(osmoniyə) kitob nozil kardemone ta dayima bəvon tilovət bıbu. həyğətən, bın kitobədə bo imon vardə dastə rəhmət iyən təzəkkur(nəsyət) heste.

Dəvardə proqramədə çı Kərimə-Ğıron iyən Peyğombəre-Əkrəm(s)-i risoləti həxəti nışonəonku bəyon be. ın ayəon hamyedə: de qırd ın nışonəon ijən kofiron bəhonə vardə holədə votedən ki, çıro Muhəmməd(s)  bənə Mosə(ə) iyən İsa(ə)-i qıləy mecuzə vardedəni?  Boçi əv çəmə dıli piyə çiyon bə vırə rosneydəni? Çıro hışkə biyabononku çı ovi çeşməon cari kardedəni? boçi çəy Xıdo tərəfiku qıləy nıvıştə bıə nomə omeydəni?

Həyğət ıme ki, əvon çı imon vaqrdey dumo bıənin. çoko ki, çı navkonə etnoson veyni həm de həzrəte Mosə(ə) iyən İsa(ə)-i iyən co pəyğombəron mecuzəon vindey, bəvon imon nıvardeşone və hejo dumo yənde vavunə vardedəbin.

Xıdovənde-Aləm Ğıronış qıləy əbədiyə mecuzə unvanədə bə peyğombər(s)-i nozil kardeşe və çəy inkor kardə kəson çanədə həm cəhd kardeşone, kardey nızneşone hətta bənə Ğıroni surəon qıləy surə biyəyn. çımisə əlovə mecuzə çı peyğombəron dastədə ni. bəlkəm, əv Xıdovəndi irodə kardə koonku qıləyniye ki, hafaxti əv irodəkəy əv bə həyğət bərəse və ım bə kofiron tələbi əsos ni.

Peyğombəron əsliyə vəzifə, milləti hidoyət və irşod iyən bəvon mıjdəvoni və tars doeye ki, ım həm de insoni ağl, məntığ iyən fıtrəti i omeydə. nəinki, bənə sehrboz iyən fokus bekardə kəson, əcib-ğərib iyən çoçinə hərəkəton əncom bıdəyn ta məxloği bəştə ətrofi cəmkəyn. peyğombər(s)-i ələyhdoron çə həzrətiku qıləy rədəvardə maddiyə mecuzə tələb kardedəbin. qıləy holədə ki, Kərimə-Ğıron islomi peyğombər(s)-i mənəvi iyən əbədiyəmecuzəy. barzə məzmunış bıə qıləy kitob ki, de qıləy şəxsi vositə vardə bıə ki, əy nə qıləy dərsış handə və nə qıləy məktəbış vində. əmmo de ilahi lutfi əv ıştən bo bəşəriyyəti tarıxi dırozi qıləy mellim be.

Çın ayəonku umutedəmon:

1-oxonə peyğombəri mecuzə, sıxani cinsiku iyən nıvıştə bıə kəlome ki, əbədi iyən cahanşumule.

2-Kərimə-Ğıron qıləy komilə kitobe və bə insoni qırd mənəviyə ehtiyocon inov cəvob doydə və həmmə əsrədə bıə nəslon əy famedən və dərk kardedən.

3-Kərimə-Ğıron insoni çı ğəflətiku bə diyəro kardə iyən ilahi oxoş nıbə rəhməti ğəbul kardə amile.

قُلْ كَفَى بِاللَّهِ بَيْنِي وَبَيْنَكُمْ شَهِيداً يَعْلَمُ مَا فِي السَّمَاوَاتِ وَالْأَرْضِ وَالَّذِينَ آمَنُوا بِالْبَاطِلِ وَكَفَرُوا بِاللَّهِ أُوْلَئِكَ هُمُ الْخَاسِرُونَ (52)‏

(Ha pəyğombər ha!)Bıvot: Xıdovəndi çımı deşmə miyono şoydəti kifoyət kardedə(və əv) osmonon iyən zəminədə bıə çiyon zıneydəvə bə botıli imon vardə iyən bə Xıdo kufr kardə kəson, əvon həmonə ziyonkoronin.

وَيَسْتَعْجِلُونَكَ بِالْعَذَابِ وَلَوْلَا أَجَلٌ مُّسَمًّى لَجَاءهُمُ الْعَذَابُ وَلَيَأْتِيَنَّهُم بَغْتَةً وَهُمْ لَا يَشْعُرُونَ (53) 

Əvon ki, tadibəsə ıştıku(ilahi) əzob tələb kardedən və ehanə qıləy mıəyyənə mıddət bıə nıəbe, hukmən əzob bəçəvon soyəx əvoy. (əmmo bızınən)qıləy holədə ki, əvon nızınə holədə əzob ğəflətən bəçəvon soyəx bome.

In ayəon itərəfiku bə islomi peyğombəri(s) təsəlli doydə ki, əgər kofiron ıştı risoləti inkorkəyn, tı ıştə royədə sıst və lır məbi. zira Xıdovənde-Aləm bəştı cəhdon şoyde və əv bın royədə tıni himoyə bəkay. co tərəfiku peyğombər bə kofiron elan kardedə ki, ehanə mı həyğətən peyğombər nıbum iyən jıqo duyədə bə Xıdo  nisbət doydəmbu, bə həmmə çi aqah bıə Xıdo bəçımı kardə koon şoyde və əv mıni bın surətədə rısvo bəkay.

Ayəon dəvomədə hamyedə: əmmo inodkorə kofiron voteydən: əgər rost voteydəş, jəqoədə Xıdo əzobi boəmə nozilkə. qıləy holədə ki, zıneydənin Xıdovənd bə insonon mohlət doydə ta əvon ıştə jimoni roy vıjniye koyədə ozodonə hərəkətkəyn.

Çın ayəonku umutedəmon:

1-kofiron kufr iyən botıli royədə ğədəm şode iyən çəvon bə Xıdo imon nıvardey, bə imoni əhli sıstəti boyis nıbu. zira Xıdovənd əvoni vindedə və oxoyədə ım kofironin ki, çı ziyonkoronku bəbeyn.

2-Xıdovənde-Aləm çı pəyğombəri sədoğət və rostəvıjəti təsdığ kardedə iyən bəy şoydəti kardedə.

3-İlahi ğəhro-ğəzəb,həkimonə iyən bə qıləy hisob-kitobi əsose, nəinki, əculonə və bə dastpoçəti əsos. ilahi əzob bəçəy irodə tabeye, nəinki, bə inodkor və noaqahə fərdon tələbi əsos.

يَسْتَعْجِلُونَكَ بِالْعَذَابِ وَإِنَّ جَهَنَّمَ لَمُحِيطَةٌ بِالْكَافِرِينَ (54) 

Əvon ıştıku rəyrə qıləy əzob tələb kardedən və holın ki, cəhəndımi kofironış əhotə kardə.

يَوْمَ يَغْشَاهُمُ الْعَذَابُ مِن فَوْقِهِمْ وَمِن تَحْتِ أَرْجُلِهِمْ وَيَقُولُ ذُوقُوا مَا كُنتُمْ تَعْمَلُونَ (55) 

Qıləy ruj(bome) ki, əzob əvoni çəvon səyku iyən çəvon lınqi jiku dəbəqəte. (həmonə ruji Xıdovənd)bəhamye: ıştə(dınyoədə) kardə koon(cəzo) bıçaştənən.

Vəynə ayəon dəvomədə ki, çı kofiron məsxərəamizə tələbon ki, bə peyğombəri votedəbin ki, Xıdoku tələbkə rəyrə bo əmə əzob nozilkəy, ın ayəon hamyedə: şımə boçi hədərə dastpoçəyon? ısətən həm şımə cəhəndımədə jimon kardedon. əmmo əy dərk kardeydəniyon. çı zılm iyən beədoləti, canq iyən xunrukarde, noroməti və təhlukə iyən iztirob və pəjmurdəti və sayirə cəhəndımədə.

Əvon qımon kardeşone ki, əzob fəğət çı tufon, seyl iyən zəlzələku iborəte. şımə kardə koon nəticə, bo şımə iyən bo camiyə omə ğərəz mısibət və problemon co çi nin və həmonə bın dınyoədə şımə əzob, şımə kardə noloyığə koon nəticəy. həlbəttə şımə axırətədə həm bə qıləy cəhəndımi vardi bəbiyon ki, çəy otəşi şuləon çı har tərəfiku şıməni dəbəqəte və boşımə fərol kardeyo hiç qıləy ro nibəmande.

Çın ayəonku umutedəmon:

1-Xıdovəndi dınyoədə bo kofiron həlokətiro bıə təxır, boçəvon tobə iyən oqardeyo qıləy fırsəte. əmmo əvon çın fırsətiku oko doydənin.

2-har əməli qıləy botınış heste ki, axırətədə əv zohir bəbe. cəhəndım həm çı insonon dınyoədə bıə əməlon təcəssıme.