741-ə hissə-Rumi surə-50-54 şərifə ayəon

741-ə hissə

فَانظُرْ إِلَى آثَارِ رَحْمَتِ اللَّهِ كَيْفَ يُحْيِي الْأَرْضَ بَعْدَ مَوْتِهَا إِنَّ ذَلِكَ لَمُحْيِي الْمَوْتَى وَهُوَ عَلَى كُلِّ شَيْءٍ قَدِيرٌ (50)‏

Çən, bə Xıdo rəhməti əsər-əloməti erəx ki, çokonə zəmini çəy mardey bədiqə bəyji kardedə. həyğətən, Xıdovənd bımyon bəyji kardə kəse iyən əv bə harçi ğadire.

وَلَئِنْ أَرْسَلْنَا رِيحاً فَرَأَوْهُ مُصْفَرّاً لَّظَلُّوا مِن بَعْدِهِ يَكْفُرُونَ (51) 

Və ehanə qıləy vo(kulok) bıvğandəmon ki, həmonə(kaştemoni sahə) zard bıə holətədə bıvindon, çən, çımi bədiqə noşukur bedən(kufr kardedən).

Vəynə proqramədə çı vo iyən voşi iyən çəvon zəmin və çəy sakinon şoyvonəti roli barədə çandə nuktə ğeyd kardemone. ın ayəon hamyedə: kulok iyən voş bə Xıdo əmri əməl kardedən və çəvon təsiron həm çəy ixtiyorədəy. ehanə əv bıpyişe voş bə şoyvonəti boyis bəbe iyən zımostonədə mardə zəmini, de əvəsori vavaz iyən voşi bəyji iyən havz kardedə və Xıdo əgər irodəko kardey bəzıne sutunə iyən ziyon jıə vavazi bıvğndo ki, zəminisə bıə qırd məhsulon hışkəy iyən kavuyə livəon bənə pozi fəsli zardkəy bınəy.

Voşi çı bəşər iyən zəmini dimisə bıə co movcudaton jimonədə ziyodə təsir iyən bərəkətonış heste. çı doon iyən beməyon havzəti, çı həvo lətofət iyən təmizəti, çı honi iyən çeşməon sirob bıey, ruon cərəyon iyən atmosferi dərəcə balans bıey, ilahi dıjdə rəhməti təsironku qıləyni bə hisob omeydə. əmmo bəbe ilahi təsiron fəğət bın təbiiyə amilonədə məhdud məkəmon iyən bəbeımrujnə maddi dınyoku əlovə bə axırəti dınyo həm nəzəkəmon iyən bovəkəmon ki, Xıdovəndi ğudrətış heste ğıyoməti ruji bımyon bəyjikəy və bəvon sənibəton həyat baxşko.

Çın ayəonku umutedəmon:

1-Kərimə-Ğıroni voşış ilahi rəhmətış zınə və əy çı zəmini əhli jimoni moyə elan kardedə.

2-voşi voye iyən zəminədə ijən jimon, Xıdovəndi ğıyoməti ruji bərpo kardey iyən bımyon sənibəton bəyji kardey ğudrəti nışonəonkuye.

3-kamə zərfiyyəti soybon de telə hodisəon iyən problemon dim bə dim omeyədə, ıştə din iyən imoni çı dasto doydən və kofir bedən.

فَإِنَّكَ لَا تُسْمِعُ الْمَوْتَى وَلَا تُسْمِعُ الصُّمَّ الدُّعَاء إِذَا وَلَّوْا مُدْبِرِينَ (52) 

(Çəvon dılon mardən)Çən, tı kardey nibəzıneş(ıştə dəvəti) bə bımyon bırosnoş və(ijən) kardey nibəzıneş(ım dəvəti) bə peşt qordınə kəson quşi bırosnoş.

وَمَا أَنتَ بِهَادِي الْعُمْيِ عَن ضَلَالَتِهِمْ إِن تُسْمِعُ إِلَّا مَن يُؤْمِنُ بِآيَاتِنَا فَهُم مُّسْلِمُونَ (53) 

Və tı kuyə dılon çəvon zəlolətiku(bə rostəro) hidoyət kardə kəs niş və fəğət bəştı sıxani əşəxson quş doydən ki, (əvon)bəçəmə ayəon imon vardedən iyən(həxı vədə) təslim bedən.

In ayəon milləti bə çoqlə dastə təğsım kardedə.iminə dastə zohirədə bəyjin,əmmo həyğəton dərk kardedənin iyən imon vardedənin. dıminə dastə ə kəsonin ki, bo peyğombəron dəvəti məsey hozzı bedənin. əvon çı həxə sıxanonku dim qordıneydən iyən çəyku bə diyəro mandedən. seminə qrup əvonin ki, bo həxı vindey çəşışon ni iyən iyən ıştə roşışon qim kardə. çominə dastə muminonin ki, deştə çəş iyən quşi həxı ğəbul kardey dumon və çoko ki, həxı dərəson, çəy mığobilədə təslim bedən.

In ayəon nışon doydən ki, Ğıroni fərnənqədə cismoni jimon iyən mardeyku əlovə, çı insonon rufi cəhəto mardey həm hesteşone. vey mumkine ki, zohirədə mardə kəson, Ğıroni nəzəku bəyjin. bənə həxə royədə şəhid bıə kəson. və vey mumkine ki, fərdon zohirədə bəyjin, əmmo Ğıroni prizmaku mardə bə hisob omeydən. zira əvon ıştə roşon qim kardə iyən ilahi hidoyətiku məhrum mandən.

Çın ayəonku umutedəmon:

1-ehanə inson bo həyğəton ğəbul kardey hozzı nıbu, çı peyğombəri sıxan həm bəy təsir nibəkay.

2-quş, çəş iyən ağli soyb bıey kafi ni. muhim həxı ğəbul kardey ruhiyyəy ki, koməq kardedə inson həxı məse dumo bıbu iyən əy ğəbulkəyn.

3-inod iyən bə həxı peşt qordıney, insoni bə qıləy nığılə zəloləti eğandedə ki, həni bo oqardey imkon bə əməl omeydəni.

4-peyğombəron iyən dini rəhbəron, milləti hidoyət kardə kəsonin. nəinki, əvoni bın koy məcburkəyn.

5-imon iyən ğəlbiyə bovə, nəinki, kifoyət kardedəni, bəlkəm əmələdə təslim bıey həm lozıme.

اللَّهُ الَّذِي خَلَقَكُم مِّن ضَعْفٍ ثُمَّ جَعَلَ مِن بَعْدِ ضَعْفٍ قُوَّةً ثُمَّ جَعَلَ مِن بَعْدِ قُوَّةٍ ضَعْفاً وَشَيْبَةً يَخْلُقُ مَا يَشَاءُ وَهُوَ الْعَلِيمُ الْقَدِيرُ (54) 

Xıdoye ki, şımənış çı zəyifətiku ofəyəşe, peşo zəyfəti bədiqə, (bəşmə)zu (ğıvvə)baxşeşe. çən, çı zumandəti bədiqə, zəyfəti iyən piyəti ğərol doydə. əv harçi bıpyişe, xəlğ bəkay və əv əzın, ğadire.

Çun çın surə əsos movzu, ilahi neməton iyən tohidiyə nışonəon bəyon kardey be, ın ayə bə insoni umri sıftəku tosə çəy oxo bə mıxtəlifə mərhələon işorə kardedə və hamyedə: inson ıştə moku təvəlludiku tobə çandə sori, zəyif iyən ociz bedə. əmmo bəştə novcıvonəti iyən cıvonəti rəseyədə iyən ğudrət pəydu kardey bədiqə, ijən sənibəton bəştə zəyfəti iyən ocizəti dovrani rəseydə. Xıdovəndi ım mərhələonış ğərol doə və şımə bın koyədə hiç qıləy rolon ni. ehanə xılğət çı insoni ıştən ixtiyorədə bıəbe, hiçkəs nıəpişe piy iyən ociz bıbu və ıştə cismoniyə ğıvvə çı dasto bıdo. çən, cıvonəti iyən zumandəti çı inson ıştən dastədə ni və əy piy bıə faxti əy hufzko.

Çın ayəku umutedəmon:

1-insoni sıftə iyən oxo zəyfətiye. qıləy kəs ki, çı dıqlə zəyfəti miyono ğərolış qətə, bəbe bə çandə ruj zumandəti xoto, məğrurəti nıko. həmçinin çun insoniumr kırte iyən dıqlə zəyifə dovrani miyono ğərolış qətə, çəy ğədri bızınəmon iyən çəyku çokə şikilədə oko bıdəmon.

2-insoni zəyifəti iyən zumandəti dovran, de əzın iyən zumandə Xıdo həkimonə tədbiri bə əməl omeydə.