742-ə hissə-Rumi surə-55-60 şərifə ayəon

742-ə hissə

وَيَوْمَ تَقُومُ السَّاعَةُ يُقْسِمُ الْمُجْرِمُونَ مَا لَبِثُوا غَيْرَ سَاعَةٍ كَذَلِكَ كَانُوا يُؤْفَكُونَ(55) 

Və qıləy ruj ki, ğıyomət bərpo bəbe, qınokoron ğəssəm bəhardeyn ki, ğərəz i saati bə di dəqıniyənin. (əvon dınyoədə həm)jələvoni (həxıku)mınhərif bedəbin.

وَقَالَ الَّذِينَ أُوتُوا الْعِلْمَ وَالْإِيمَانَ لَقَدْ لَبِثْتُمْ فِي كِتَابِ اللَّهِ إِلَى يَوْمِ الْبَعْثِ فَهَذَا يَوْمُ الْبَعْثِ وَلَكِنَّكُمْ كُنتُمْ لَا تَعْلَمُونَ (56) 

Və bəvon elm iyən imon doə bıə kəson voteydən: hukmən şımə(bəçəy xoto ki) Xıdo kitobədəy tosə ğıyoməti ruji(bərzəxədə) mandəyon. çən, ım ruj ğıyoməti ruje, əmmo şımə zıneydənıbiyon.

فَيَوْمَئِذٍ لَّا يَنفَعُ الَّذِينَ ظَلَمُوا مَعْذِرَتُهُمْ وَلَا هُمْ يُسْتَعْتَبُونَ (57) 

Çən, həmonə ruji sıtəm kardə kəson uzrxahəti foydəş nibəbe və çəvon tobə ğəbul nibəbe.

Dınyoədə bıə kofir iyən qınokorə insonon xısusiyyətonku qıləyni ıme ki, ğıyoməti ruji inkor kardedən iyən əy ğəbul kardedənin. bə ın ayəon əsos, jıqo şəxson ğıyoməti ruji həm hozzı nin ki, və`də doə bıə saat omə rəsə və əvon bın səhnədə hozzı bıən. liza voteydən ki, ım həmonə dınyo jimoni dəvome və əmə iləzə hıtəmon iyən ısət oğo bıəmon. əmmo imoni əhl ki, həyğətışon pəydu kardə iyən qıləy mərıfətışon pəydu kardə, bəvon bəvoteyn: ın vırə ğıyoməti səhnəy və bə Xıdovəndi təyin kardəğanuni əsos, şımə dınyo jimon iyən bərzəxi aləmiku dəvardəyon və ımruj ğıyoməti ruji ilahi məhkəmədə cəm bıəyon.

Zolım iyən qınokoron çoko ki, dərəseydən ımruj ğıyoməti ruje və əvon məhkəmə vədə cəm bıən, uzrxahəti kardedən iyən bə tobə kardey fik dəşedən. əmmo bə ın ayə əsos, ğıyoməti ruji çı qınokoron uzrxahəti həni hiç qıləy foydəş ni və çəvon tobə ğəbul bıənin ni.

Çın ayəonku umuteydəmon:

1-kəcfikəti, insoni bə inhirofi tərəf bəbarde. əğedə iyən fikədə inhirofəti, camiyədə çı qıno iyən fəsodi zəminə hozzı bəkay.

2-elm iyən imon, mutəğabilə rabitəş heste. həyğiyə elm insoni bə imoni tərəf dəvət kardedə və imon həm milləti bə elm iyən zıney tərəf dəvət kardedə.

3-insoni tale çəy ıştən əməlon girovədəy. zılm iyən qıno, dınyo iyən axırətədə yavə ağıbətış heste.

4-uzrxahəti iyən qınonku oqarde, nəinki, dınyoədə, bəlkəm axırətədə həm foydəş heste.

وَلَقَدْ ضَرَبْنَا لِلنَّاسِ فِي هَذَا الْقُرْآنِ مِن كُلِّ مَثَلٍ وَلَئِن جِئْتَهُم بِآيَةٍ لَيَقُولَنَّ الَّذِينَ كَفَرُوا إِنْ أَنتُمْ إِلَّا مُبْطِلُونَ (58) 

Və bərosti bın Ğıronədə bo məxloği harcurnə misol vardəmone. və əgər boəvon mecuzə iyən nışonə bıvardoş, hukmən kofiron bəvoteyn: şımə ğərəz botıli co çi niyon.

كَذَلِكَ يَطْبَعُ اللَّهُ عَلَى قُلُوبِ الَّذِينَ لَا يَعْلَمُونَ (59) 

Jələvoni Xıdovənd bə nızınə(bemərıfətə) fərdon dıli mıhi jeydə.

Xıdovəndi tohid iyən i bıey, Kərimə-Ğıroni mıxtəlifə ayəonədə bəyon bıə. bın osmoniyə kitobədə çı jimoni səhih iyən dırıstə roy iyən çı əxloği yavə sıfətonku bə diyəro mandey şivə, mıxtəlifə ğalibədə nışon doey bıə. bəşəv-bəruj iyən sori mıxtəlifə faxtonədə Xıdo pərəstış kardey şivə izoh doey bıə. əğayid, əhkam iyən əxloğ ki,çı har Xıdopərəst iyən dindorə insoni fiki iyən əməliyə əsosi təşkil doydə, çı Kərimə-Ğıroni 6000 həzosə vey bıə ayəon miyono, bəyon bıə. həlbəttə, mıxtəlifə formə iyən surətədə. de ın holi həxı ğəbul kardey nıpiyəkəson, əy inkor kardə kəson və kofiron, qırd ımoni botıl hisob kardedən və bo ilahi ayəon məse hozzı bedənin.

Ayəon dəvomədəçı kofiron ım inkori jıqo bəyon kardedə. Xıdovənde-Aləm bə jıqo şəxson bəçəvon ıştə qınoədə isror kardey xoto, bəçəvon dıli mıhiş jıə və əvoni həyğəton dərk kardeyku məhrum kardedə. dırıst bənə dızdon ki, bəştə cinoyəton xoto bə zindon eqınieydən və əvoni həbs kardedən. bə dızdon xilofə koy xoto, ğazi həmbə ədoləti əsos əvoni məhkumko və nəticədə əvon çı ozodəti iyən səbəsojəti nemətiku məhrum mandedən. ehanə qınokoron tobəkon iyən ıştə qınoonku dast bıkəşon, Xıdovənd həm əvoni bəbaxşe. əmmo əgər əvon bəştə yavə koon dəvom bıdon, bəvədə bəçəvon dılon ğıfl bəjəne və əvoni həyğəton dərk kardey nemətiku məhrum bəkay.

Çın ayəonku umutedəmon:

1-Kərimə-Ğıron bo qırd məxloği omə və çı milləti mıxtəlifə dastəon de mıxtəlfə formə çəyku bəhrə bardedən.

2-çı botıli ətroəfədə qardə kəson, nəinki, həxı ğəbul kardeydənin, bəlkəm həxı botıl zınedən iyən muminon həm çı botıli əhl zıneydən. mığət bıbəmon ki, botıli rəhbəron yavə təbliğaton, bəmə təsir nıno.

3-kufr iyən de həxı inodkorəti kardey, bə ilahi hidoyətiku məhrum bıey, boyis bedə ki, hukmən çəy zərəl bə insoni ıştəni obəqarde.

فَاصْبِرْ إِنَّ وَعْدَ اللَّهِ حَقٌّ وَلَا يَسْتَخِفَّنَّكَ الَّذِينَ لَا يُوقِنُونَ (60)

Çən, səbrkə ki, həyğətən Xıdovəndi(ıştı barədə bıə) və`də həxe. və əkəson ki,(bə Xıdo iyən ğıyoməti ruji) yəğınışon ni, tıni bə sıvıkəti vodor nıkəyn.

In ayə ki, çı Rumi mıborəkə surə oxonə ayəy, hamyedə: imoni əhl hejotarıxi dırozi, bə kofiron əzob-əziyyəti məruz mandən. çən, bəbe səbr bıkəy iyən bə təhdid iyən təbliğaton təslim nıbu. zira Xıdovəndi və`dəş doə ki, ehanə imoni əhl sabit ğədəm bıbu iyən istiğomətkon,oxoyədə səbarz bəbeyn.

Ayə dəvomədə bə Xıdo Rəsul(s) iyən muminon hamyedə: əgər şımə bəçəvon sıxanon təsiri ji dəşiyon, bə tars iyən iztirobi dıço bəbiyon. bəvədə çı səbr iyən mığoviməti əvəzi, ıştəni hırd iyən ociz hisob bəkayon və bəştə kardə koon ğeymət nibədoyon.yaan ki, bə deşmınon norəvoə təsiron xoto, jıqo xışmqin iyən ğeyzin bəbiyon ki, ıştə oroməti iyən mətinəti çı dasto bədiyon və jıqo koon bəkayon ki, bəşmə camiyədə bıə məğami zərbə bəjəne və şıməni sıvık nışon bədoe.

Çın ayəku umutedəmon:

1-imoni əhl bəbe Xıdo royədə sabitğədəm iyən ğoym bıbu və çı deşmınon noloyığə koon vədə səbrkəyn.

2-mırəşulə eğandə be imon iyən bedinə fərdon, bəbe bəçəmə ğərolon təsir nıno. bə Xıdovəndi həxı tərəfdoron bə botılə dastə səbarzəti və`dəon bovəmon bıbu ki, ım ıştən bəçəmə xatırcəməti boyis bəbe.

3-səbr iyən hovsələ nıbəkəson, camiyə muhitədə sıvık iyən xəfif bəbeyn.