754-ə hissə-Səjdə surə-15-19 şərifə ayəon

754-ə hissə

إِنَّمَا يُؤْمِنُ بِآيَاتِنَا الَّذِينَ إِذَا ذُكِّرُوا بِهَا خَرُّوا سُجَّداً وَسَبَّحُوا بِحَمْدِ رَبِّهِمْ وَهُمْ لَا يَسْتَكْبِرُونَ(15)  

Fəğət ə kəson bəçəmə ayəon imonışon heste ki, hafaxti ım ayəon bəçəvon yod vardey bıbu, bə səjdə şedən və deştə pərvərdıqori sıtoyişi təsbih voteydən və əvon təkəbbır kardedənin.

Vey mumkine i dastə insonon imoni iddioədən. əmmo çəvon rəftor iyən qoftar fərğ karededə. imoni iddioşon heste, əmmo çəvon ko iyən əməlon de Kərimə-Ğıroni i omeydəni. imoni iddioədən, əmmo nə Xıdo mığobilədə bə səjdə şedən və nə çı məxloği vədə təvozukorin. həm bə Xıdo pemandedənin, həmən milləti palu məğrurəti kardedən.

In ayə de”(innəma)” kəlimə bino bedə ki, həsr iyən inhisori bəyon kardedə. yəni ım xısusiyyəton fəğət bə jıqo şəxson məxsuse. əvon həyğiyə muminonin və cokəson duyədə imoni iddioədən.

Həyğiyə mumini xısusiyyəonku ıme ki, əv Xıdo kəlomi iyən Ğıroni vədə təslime. joqo ki, hafaxti Ğıroni sədo bıməso, təslim bıə holədə səjdə kardedə və de ilahi təsbih və sıtoyişi məşğul bedə. ya hafaxti bə Ğıroni ayəon əsos,bəy pand və nəsyət doey bıbu, hədərə bə təkəbbır iyən məğrurəti dıço bedənin.

Əvon itərəfo bə ilahi neməton şukr kardedən və co tərəfo çı dınyo jimoni mısibət iyən problemon bə Xıdo qıy şodedənin və əy hestemoni aləmi koonədə çı harcurnə noğisətiku pok zınedən.

Çın ayəku umutedəmon:

1-Xıdovəndi vədə səjdə kardey iyən əy təsbih və sıtoyiş kardey, çı həyğiyə muminon nışonəonkuye. qıləy mısılmon ki, nımoj votedəni, həyğətədə bə imoni dərəcə nayil bıəni.

2-səjdə holədə vey çokə zikr, de”subhanə rəbbiyəl ə`la və bi həmdihi” kəlimə, pərvərdıqore-aləmi sıtoyiş iyən təsbih kardeye.

3-çə səjdə erj iyən ğeymətış heste ki, çəy bədiqə inson bə məğrurəti dıço nıbu.

تَتَجَافَى جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفاً وَطَمَعاً وَمِمَّا رَزَقْنَاهُمْ يُنفِقُونَ (16) 

(Muminon şəvi faxti)Iştə vırəonku əyştedən və ıştə pərvərdıqori de tars iyən umu vanq jeydən və çəmə bəvon ruzi kardə çiyon infoğ(baxş) kardedən.

فَلَا تَعْلَمُ نَفْسٌ مَّا أُخْفِيَ لَهُم مِّن قُرَّةِ أَعْيُنٍ جَزَاء بِمَا كَانُوا يَعْمَلُونَ (17) 

Hişkəs zınedəni bəçəvon çəşon ruşinəti boyis bıə kom muhimmə mıkofot boəvon niyon kardə bıə. ım çəvon əncom doə koon mıkofote.

Vəynə ayədə ki, bə muminə şəxsi Xıdovəndi mığobilədə de xuzu iyən mutiyə holi səjdə kardeyış işorə karde, ın ayəon bə imoni əhli kali co xısləton işorə kardedə və əy çı mumini xısusiyyətonku zınə holədə hamyedə: əvon nəinki, ıştə fərz iyən vocibə nımojon ədo kardedən, bəlkəm həmmə kəsi hıtə şəvi i nimədə ıştə yonqoku əyştedən və nımoj votedən, mınocot kardedən iyən de Xıdo razo-niyozi məşğul bedən. de Xıdo razo-niyoz kardeyro vey çokə faxt, həmonə şəvi iniməy. boçi ki, bə zəmonədə inson çı ko iyən fiki məşğələonku bə diyəroye və əv de huzuri-ğəlbi kardey bəzıne deştə Xalıği razo-niyozkəy. şəvi nimə insoni boştə kardə qınoon bə yod vardey xoto vey mınosibə fırsəte və əv de lovə iyən dıvo vositə, ıştə Xıdoku baxşeş iyən məğfırət tələb kardedə və bə cəhəndımi dıço nıbey xoto, ıştə çəşi arsi rukardedə və bə ilahi lutf iyən rəhməti dıl dəvastedə.

Təbiiye ki, deştə Xıdo bıə ım rabitə, əy bə Xıdovəndi bandəon koon rəsey ko tərəf həm sovğ doydə.əv ıştə zu vışkiye ğədərədə bə ehtiyocinə şəxson rəseydə, çəvon problemon həll kardedə və çəy pərvərdıqori bəy əto kardə çiyon, bəçəy bandəon infoğ iyən baxş kardedə.

Ayə dəvomədə jıqo şəxson əcr iyən səvobi barədə hamyedə: əvon ki, çı harcurnə riyokorəti iyən ıştəni nışon doeyku bə diyəro,de eşğ iyən əloğə həm de Xıdo ibodəti məşğul bedən və həmən bə Xıdo bandəon koon rəseydən, boəvon mıkofaton bəbe ki, əy hiçki təsəvvır kardey nibəzıne. həyğətədə, ğərəz Xıdo hiçki zınedəni ki, bo jıqo şəxson nəzədə qətə bıə ım muhimmə əcr çiçku iborəte.

Çın ayəonku umutedəmon:

1-həyğiyə mumin,nə ıştəni ilahi ğəzəbiku əmonədə zınedə və nə çı ilahi rəhmətiku məyus bedə. əv hejo çı tars iyən umu miyono jimon kardedə və bə məğrurəti iyənməysuəti giriftor bedəni.

2-rəbədə əyşte və bo Ğıroni tilovət kardey, şəvi nımoji votey iyən de pərvərdıqore-aləmi razo-niyoz kardey xoto,haniku oğo bıey, həyğiyə muminon nışonəonkuye.

3-bo ilahi behisobə mıkofoti ğəbul kardey xoto, sıbi faxti tikəy saxti iyən çətinəti kəçey lozıme.

أَفَمَن كَانَ مُؤْمِناً كَمَن كَانَ فَاسِقاً لَّا يَسْتَوُونَ (18) 

Ayə muminə şəxsi məsəl bənə fosiğə şəxsiye?(ne əsla! ım dıqlə qrup) mısovi nin.

أَمَّا الَّذِينَ آمَنُوا وَعَمِلُوا الصَّالِحَاتِ فَلَهُمْ جَنَّاتُ الْمَأْوَى نُزُلاً بِمَا كَانُوا يَعْمَلُونَ (19) 

Əmmo imon vardə kəson iyən çokə ko kardə kəson, çən, bəçəvon kardə koon xoto, bo əvoni ğəbul kardeyro(vəhışti) boğonku məğamon hozzı bıə.

Navnə ayəon dəvomədə,ın ayəon rostə muminon de duyədə imoni iddio kardə kəson mığoyisə kardedə və hamyedə: şımə çı har dastə koy oxo bıvindənən ta bızınən ki, bə Xıdo əmron pemandə kəson bə kon vırə rəseydən və əmələn bə Xıdo nıpemandə iyən imoni iddio kardə kəson oxoy çoko orəxeydə və ım dıqlə qrup hiçfaxti Xıdo palu i iyən mısovi nin.

Ayəon dəvomədə, vəhışti qıləy vırə zınedə ki, Xıdovəndi əvış boştə saleh iyən çokə ko soybə muminon hozzış kardə və hakəs bəştə koon mıtənosib çın məğamiku bəhrə bəbarde.

Çın ayəonku umutedəmon:

1-bo milləti bə imoni tərəf dəvət kardey xoto, həyğiyə mumini jimoni de fosiğ iyən qınokoron jimoni mığoyisəkəmon ta millət çı har dıqlə dastə mısbət iyən mənfiyə cəhəton de oşkoə holəti dərk kon.

2-imon çı əməliku co ni və vəhışt çı insonon əməlon mıkofote. nəinki, imoni iddio kardə kəson vırə.