755-ə hissə-Səjdə surə-20-25 şərifə ayəon

755-ə hissə

وَأَمَّا الَّذِينَ فَسَقُوا فَمَأْوَاهُمُ النَّارُ كُلَّمَا أَرَادُوا أَن يَخْرُجُوا مِنْهَا أُعِيدُوا فِيهَا وَقِيلَ لَهُمْ ذُوقُوا عَذَابَ النَّارِ الَّذِي كُنتُم بِهِ تُكَذِّبُونَ (20)‏

Və əmmo(imoni dayrəku xaric bıə) fosiğə şəxson. çən, çəvon vırə otəşe. hafaxti əvon irodəkən ki, çəyu bə bi beşon, ijən əyo oqordıney bəbeyn və bəvon votey bəbe: şımə hejo təkzib kardə otəşi əzobi bıçaştənən

وَلَنُذِيقَنَّهُمْ مِنَ الْعَذَابِ الْأَدْنَى دُونَ الْعَذَابِ الْأَكْبَرِ لَعَلَّهُمْ يَرْجِعُونَ (21) 

Və beşək(ğıyoməti) həmonə dıjdə əzobisə əlovə(bın dınyoədə) bəvon nezə əzobiku bəçaştevnomon ta ğasbu bə Xıdo tərəf oqardon.

Navnə proqramədə Xıdovəndi hamyeşe: Xıdovəndi palu mumin de fosiği i iyən mısovi ni. mumin bəştə çokə əməlon xoto bə vəhışti loyığe və əyo əvon məskun bəbeyn. ın ayəon hamyedə: əmmo ə kəson ki, imoni iddioədən və əmələdə bə ilahi əmron muti bedənin iyən bəçəy əmron pemandedənin, əvon bə cəhəndım şodey bəbeyn və boçəvon çəyu viteyro hiç qıləy roşon nibəbe.

Həlbəttə, əvon dınyoədə de mıxtəlifə formə tənbih bedən ta ğasbu tobəkon iyən ıştə yavə koonku dast bıkəşon və axırətədə bə əzobi giriftor nıbon. əmmo ğıyoməti ruji tobə bə bastə bıə və həni çəyu bə dınyo oqardey imkon ni.

Bə rəvoyəton əsos, insoni bın dınyoədə de kali mısibəton, noxəşətiyon iyən de əzob-əziyyəton dim bə dim omey, inov boəvoni tənbih iyən oğo kardeyro bıə ilahi cəzoonin ta əv ıştə xilofə koonku dast bıkəşo.

Çın ayəonku umutedəmon:

1-qıno iyən fısğo-fucur, qahi faxti jıqo insoni əhotə kardedə ki, jıqo bızın əv ğıyoməti ğəbul kardedəni və əy inkor kardedə.

2-ilahi cəzoon fəğət bə ğıyoməti ayid ni. dınyoədə həm Xıdovənd bə bəzi insonon cəzo doydə. ım ıştən qıly neməte ki, həmonə qınokorə inson bəştə boy, ıştə qınooku tobəko iyən bə rostə roy tətəf oqardo.

3-ilahi ğəhro-ğəzəb həm insoni tərbiyə cəhətədəy və həmən ilahi rəhmətiku sərçəşmə seydə.

وَمَنْ أَظْلَمُ مِمَّن ذُكِّرَ بِآيَاتِ رَبِّهِ ثُمَّ أَعْرَضَ عَنْهَا إِنَّا مِنَ الْمُجْرِمِينَ مُنتَقِمُونَ (22) 

Bəvon deçəvon pərvərdıqori ayəon vositə təzəkkur(pand) doey bədiqə,əmmo(ijən) çəyku dim qordınə kəsisə vey sıtəmkor kon şəxse? həyğətən, əmə çı qınokoronku intiğom bəstənemon.

Bın ayədə Xıdovənd həyğəti nızınə, ilahi ayə iyən əmronku bə diyəro mandə və əy inkor kardə kəson, bə əzobi loyığ bıə zolımon hisob kardedə. Ğıroni mədəniyyətədə bəştə zılm və bə qıno iyən cinoyəton giriftor bıey, mumkine bəsə bə cokəson zılm kardeysə bəpe bıbu. zira zılmi həmonə mənşə bə cokəson sıtəm kardeye. muminə inson hiçfaxti bə cokəson zılm kardey fikədə ni. əmmo kofir iyən həxı puşniyə şəxson,de rohətə formə çı cokəson həx-huğuğon zay kardedən və bəvon sıtəm kardedən.

Çın ayəku umutedəmon:

1-inodkorəti ruhiyyə boyis bedə ki, bə insoni təzəkkur iyən pand doə faxti, əv ıştə yavə koyku dast kəşey əvəzi, tikəy həm bəvədə isror kardedə və bə qıno batlaği vey eşedə.

2-de qınokoron rəftorədə, qahi faxti pand doey bədiqə, bəbe əvon de şiddəti tənbih həm bıbon.

‏ وَلَقَدْ آتَيْنَا مُوسَى الْكِتَابَ فَلَا تَكُن فِي مِرْيَةٍ مِّن لِّقَائِهِ وَجَعَلْنَاهُ هُدًى لِّبَنِي إِسْرَائِيلَ (23) 

Və həyğətən, əmə bə Mosə kitob(osmoniyə Tovrat) domone. çən, deəy mıloğat kardey(koyədə) şəkkı nıbu. əmə həmonə(kitobi) bo Bəni-İsrayli  hidoyəti moyə ğərol domone

وَجَعَلْنَا مِنْهُمْ أَئِمَّةً يَهْدُونَ بِأَمْرِنَا لَمَّا صَبَرُوا وَكَانُوا بِآيَاتِنَا يُوقِنُونَ (24) ­

Və Bəni-İsrayli miyono rəhbəron ğərol domone ki, de çəmə əmri(milləti) hidoyətkəyn. çun əvon həm səbr kardeşone və həmən bəçəmə ayəon yəğınışon hestebe.

إِنَّ رَبَّكَ هُوَ يَفْصِلُ بَيْنَهُمْ يَوْمَ الْقِيَامَةِ فِيمَا كَانُوا فِيهِ يَخْتَلِفُونَ (25) 

Həyğətən, ıştı pərvərdıqor ğıyoməti ruji çəvon ıştə miyono ixtilof kardə çiyon barədə mıhokimə bəkay(hukm bədoe).

In ayəon sıftədə bə tarıxi dırozi bıə peyğombəron besəti iyən osmoniyə kitobon enovniye işorə kardedə və hamyedə: hiç qılə şəkko-şubhə nıbə holədə, əmə bimon ki, bə Mosə(ə)-i kitob domone ta Bəni-İsrayli bə rostə roy tərəf hidoyətkəy iyən əvonımon çı Fironi sultəku ozod kardemone. çın ğovmi miyono həm idastə odəmon de Mosə(ə)-i bə ico binvə de bə fironi ələyh bıə mıborizədə səbrışon karde və ğoym mandin. əvon bə ilahi və`dəon iyən Tovrati yəğınışon hestebe və kardeyışon zıne bə deşmoni ğələbə pəydukəyn iyən bə camiyədə rəhbərəri məğami bırəson. jıqo şəxson bə Xıdo kitob iyən bə peyğombəron əmron əsos camiyədə hukumət kardedən və ilahi əmron icro kardedən.

Im həyğiyə muminon ki, deştə ğoymə imon iyən istiğoməti bə hukumət rəseydən, bəştə iyən bə milləti dıli tələbon və həvəson tabe bedənin, bəlkəm əvon bə Xıdo əmron mutin iyən bəçəy əmron əsos ko kardedən. əvon Xıdo hukmi bəsə milləti raysə bəpe zıneydən və bəştə həvaye-həvəson pemandey əvəzi, bə Xıdo kitob iyən ğanunon əsos hukumət kardedən.

Həlbəttə, Bəni-İsrayli ğovm həm bə ixtilofon dıço bıəbin ki, ım həm bəçəvon miyono təfrığə eqıniye boyis bıəbe. çəvon qırd ım ixtilofon mənşə, çəvon çı həxı dim qordıney iyən bəştə həvaye-nəfsi dığğət kardey be. liza Xıdovənde-Aləm de təhdidamizə formə hamyedə: jıqo dastə insonon ki, məxloği miyono çı təfrığə amil bə hisob omeydən, bızınən ki, ğıyoməti ruji çəvon hisob de Xıdoye və əv bəştə ədoləti əsos de əvon rəftor bəkay.

Çın ayəonku umutedəmon:

1-pəyğombəron besət, tarıxi dırozi qıləy bəyənde anqıl bıə cərəyone. ım cərəyon islomi pəyğombəri bənav həm qıləy dırozə tarıxış bıə və bəbe bə osmoniyə rəhbəron hiç qıləy şək nıkəmon.

2-imon iyən Xıdo royədə istiğomət kardey, bo rəhbərəti lozım bıə şərtonkuye. inson bəbe bəştə hədəfi yəğınış bıbu və de tobə çəy oxonə mərhələ mığovimətko ta bo camiyə idorə kardeyro bıə ləyoğətış bıbu.

3-dini rəhbəron hiçfaxti bəbe bo məxloği hidoyət kardey xoto məyus nıbon.zira ixtilof həmişə movcud bıə.