756-ə hissə-Səjdə surə-26-30 şərifə ayəon

756-ə hissə

أَوَلَمْ يَهْدِ لَهُمْ كَمْ أَهْلَكْنَا مِن قَبْلِهِم مِّنَ الْقُرُونِ يَمْشُونَ فِي مَسَاكِنِهِمْ إِنَّ فِي ذَلِكَ لَآيَاتٍ أَفَلَا يَسْمَعُونَ (26) 

Ayə boəvon ruşin nıbe ki, əmə çəvon bənav ziyodə ğəbiləon həlok kardemone? qıləy holədə ki, əvon həmonə həlok bıə kəson kəonədə şe-omey kardedən. həlbəttə, bın(koyədə) nışonəon heste, ayə məsedənin?

Vəynə proqramədə Xıdovəndi və`dəş doe ki, məzlumon intiğomi çı sıtəmkoronku bəstəne. ın ayə bəvon xitob kardə holədə hamyedə: ayə ım boşmə hidoyətiro kifoyət kardedəni ki, vindedon iyən zıneydon ki, navkonə veyə qınokorə etnoson əmə həlok kardemone və şımə ısət çəvon həmonə xərobə vırəonədə ğədəm şoydon poyedon? Ad iyən Səmud ğovmi xərobə vırəon çı Məkkə iyən Şami ro miyono be ki, millət ıştə ticori səfəron faxti çəyu dəvardedəbin. ə sərzəmin ki, qıləy ruj əyo zumand iyən sərvətinə milləton sakin bin, əmmo bəçəvon zılm, qıno iyə fəsodi xoto, bə bəloon dıço bin və ısət məhvo-nobud bıən mandən. jıqo bızın ki, həmonə ğovmon vironə bıə vırəon fəryod kardedə və çiyo dəvardə insonon bo çəyku ibrət peqətey dəvət kardedə. əmmo hiçkəsi quş ımoni məsedəni və bəvon dığğət kardedəni.

Çın ayəku umutedəmon:

1-kanə sivilizasiyaku mandə ğədimiyə əsəron, boəmə bəbe çı navkonə ğovmon taleku ibrət peqətey vırə bıbu, nəinki, çı şikil iyən film kəşə vırə.

2-dəvardə əsron, bo vəomə qıləy çoye. de ım şərti ki, inson deştə ojə çəş iyən quşi dəvardə hodisəon mutoliyəkəy və çəvonku ibrət peqəti.

3-ehanə çəmə məsə quşımon bıbu, xərobə iyən tərk kardə bıə vırəon hejo boəmə qıləy mesaj vığandedən.

4-bo vəomə milləti ibrətiro, dəvardə əsron əsəron oqətey, lozıme.

أَوَلَمْ يَرَوْا أَنَّا نَسُوقُ الْمَاء إِلَى الْأَرْضِ الْجُرُزِ فَنُخْرِجُ بِهِ زَرْعاً تَأْكُلُ مِنْهُ أَنْعَامُهُمْ وَأَنفُسُهُمْ أَفَلَا يُبْصِرُونَ (27) 

Navnə ayə dəvomədə ki, bə qınokoron nisbətədə ilahi ğəhro-ğəzəbi bəyon kardedəbe, ın ayə bə ilahi bəştə qırd xılğəti nisbətədə bıə hevujə lutf iyən rəhməti işorə kardedə və hamyedə: ayə vindedəniyon ki, Xıdovənd çokonə ovi bəsə hışk iyən be aləfə sərzəminisə ru kardedə ta həmonə sərzəminon havz iyən ovdonə bıbu və bo əyo jimon kardə inson iyən heyvonon mınosibə hardemonon hozzı bıbu?

Həyğət ıme ki, çun zəminisə bənə bandon, təpəon iyən dəon nohəmo iyən etat-petat və bılındə vırəonış heste, çı okeyan iyən dıyoonku bə dınyo ziyodə co noxtəon ov rosney imkon movcud ni. çımisə əlovə dıyo iyən okeyanon ovon nemekin iyən tele və əvoni peşomey mumkin ni.

Xıdovənde-Aləm de həşi vositə dıyo ovi buxar kardedə və əvoni bə avə təbdil kardedə və har dılqə muşkili həll kardedə. de ın tərtibi avəon de voy cərəyoni vositə bə hərəkət omeydən və de voşi formə bəsə hışk iyən bealəfə zəminonsə rubeydə. çımisə əlovə ovi buxar bıey cərəyonədə çı dıyo ovi tel iyən nemekətiku peqətey bedə və bo zəmini sakinon çəyku peşomey mumkin bedə. ım dıjdə nemət ki, qırd insonon əy hejo mışohidə kardedən, əmmo bəçəy əzəməti dığğət kardedənin. qıləy holədə ki, təbyətədə ovi qardışi cərəyon bə hisobi əsose ki, çımi həm bo dınyo sakinon jimoni dəvom pəydu kardeyro qıləy əsosə rolış heste.

Çın ayəku umutedəmon:

1-havzə təbyət iyən inson və heyvoni ətrof muhit, bo Xıdoşınosiro vey çokə klas iyən məktəbe. həlbəttə, əgər çın sinfi şogirdon çı zıney iyən mərıfəti dumo bıbon.

2-avəon hərəkət iyən çı dıyo və okeyanonku bə diyəro bıə məntəğəonədə voşi voye, təsadufi ni. bəlkəm, ımon de Xıdovəndi həkimonə irodə əncom bedə.

3-voşi voye iyən beməyon perəsey soxtemon, ilahi ayə və nışonəonkuye və bəbe çəyku de sodə holi dəməvardəmon.

وَيَقُولُونَ مَتَى هَذَا الْفَتْحُ إِن كُنتُمْ صَادِقِينَ (28) 

Və kofiron dəparsedən: ehanə rost voteydon, şımə ğələbə keynə bəbe?

قُلْ يَوْمَ الْفَتْحِ لَا يَنفَعُ الَّذِينَ كَفَرُوا إِيمَانُهُمْ وَلَا هُمْ يُنظَرُونَ (29) 

Bıvot: bızınənki, ğələbə ruji kofir bıə şəxson imon vardey boəvon hiç qıləy foydəş nibəbe və bəvon mohlət doey nibəbe.

فَأَعْرِضْ عَنْهُمْ وَانتَظِرْ إِنَّهُم مُّنتَظِرُونَ(30)

Çən, çəvonku bə diyəro bımand və çəşkə ki, əvon həm çəş kardedən.

In ayəon ki, çı Səjdə mıborəkə surə oxonə ayəy, vəynə ayə dəvomədə hamyedə: kofir iyən mışrikon hejo çı pəyğombəriku məseydəbin ki, həx bə botıli ğalib bome iyən Xıdovəndi jıqo qıləy və`dəş bəştə muminə bandəonış doə. liza əvon de istehzo iyən məsxəramizə formə bə pəyğombər(s) iyən mumimon voteydəbin ki, çən, şımə Xıdo doə ım və`dəon koncoon? Şımə ki, voteydəbiyon şımə Xıdo çı qınokoronku intiğom bəstəne və huccət təmom bıey bədiqəəvoni həlok bəkarde, ısət ım kom zəmon bə əməl bome bəs? Bın dınyoədə bəşmə və`də doə bıə ın cəzo keynə bome bərəse?

Xıdovənde-Aləm jıqo fərdon cəvobədə hamyedə: həmonə ruj bome bərəse, əmmo qımon məkən ki, həmonə ruji şımə imon vardey ğəbul nbəbe vəbəşmə ijən mohlət doey nibəbe. həmonə ruji bo oqardey iyən çəy əvəzi bekardey həni fırsət nibəbe.

Çın surə oxonə ayə qıləy dəstur nışon doydəki, jıqo inodkor, həxı nıdərəsə və muminə şəxson məsxərə kardə fərdonku bə diyəro bımandənən və bəvon jıqo bıvotən: mıntəzir bımandən və çəşkənən, bımandənən ta inki, Xıdovənd şımə iyən çəmə miyono hukm bıdəy.

Çın ayəonku umutedəmon:

1-qafi faxti sıvol kardey bo həyğəton dərk kardey xoto ni, bəlkəm bo istehzo iyən məsxərə kardey xotoe.

2-iztirori faxti imon vardey hiç qıləy mənoş ni. zira ixitiyor iyən irodə insoniku səlb(peqətey) bedə.

3-moyizə iyən istidlol foydə nıbə faxti, bəbe çı mınhərifə şəxsonku bə diyəro bımandi.