761-ə hissə-Əhzabi surə-18-21 şərifə ayəon

761-ə hissə

قَدْ يَعْلَمُ اللَّهُ الْمُعَوِّقِينَ مِنكُمْ وَالْقَائِلِينَ لِإِخْوَانِهِمْ هَلُمَّ إِلَيْنَا وَلَا يَأْتُونَ الْبَأْسَ إِلَّا قَلِيلاً (18) 

Beşək Xıdovənd şıməku milləti(cihodiku) oqətə və bəştə boon bəçəmə tərəf boənən(ıştəni mədənən kıştey) votəkəson, çok-çoki zıneydə. (əvon zəyif və tarsovin)və ğərəz idastə (əvon)bə cəbhə şedənin.

أَشِحَّةً عَلَيْكُمْ فَإِذَا جَاء الْخَوْفُ رَأَيْتَهُمْ يَنظُرُونَ إِلَيْكَ تَدُورُ أَعْيُنُهُمْ كَالَّذِي يُغْشَى عَلَيْهِ مِنَ الْمَوْتِ فَإِذَا ذَهَبَ الْخَوْفُ سَلَقُوكُم بِأَلْسِنَةٍ حِدَادٍ أَشِحَّةً عَلَى الْخَيْرِ أُوْلَئِكَ لَمْ يُؤْمِنُوا فَأَحْبَطَ اللَّهُ أَعْمَالَهُمْ وَكَانَ ذَلِكَ عَلَى اللَّهِ يَسِيراً (19)

Əvon qıləy holədə ki, bəşmə ələyh pəxılin. qıləy tars(canqi) faxt bəvə boy,(əvoni) vindedəş çoko bənə con doə kəsi çəşonışon( hədəğədə bın tərəf-bə tərəf) qardə holədə bətı diyə kardedən. çən. çoko tars çı miyoniku şe,(ıştə) tınd iyən hoziyə zıvoni boşımə oj kardedən. qıləy holədə ki,(əvon) bə xəy(ğəniməti) nisbətədə pəxılin. çəvon(həyğiyə) imonışon ni və Xıdovənd çəvon əməlonış bə puç bekarde və ım ko bo Xıdo hostone.

Navnə bərnomədə Əhzabi canqi faxti mısılmlınon əhvol-ruhiyyə zəyif kardə bə mınofiğon roli işorə be. ın ayəon çə bəhsi dəvomədə hamyedə: çın mınofiğonku i dastə cəhd kardedəbin milləti de deşmınon cihod kardeyku oqəton və bəvon votedəbin: şımə həm bənə əmə çı canqiku dast bıkəşənən və boənən bəmə umuj bıqiniyənən. əvon  nəinki, canqi meydonədə ıştə coni ğıbon doey piyedəşon nıbe, bəlkəm hətta dılşon nıbe ıştə moli həm bə cəbhədə canq kardə şəxson iyən bəçəvon xıyzonon bıdəyn və jələvoni əvon pəxıləti kardedəbin. çəvon bə Xıdo bıə imon zəyife və əvon təhlukə faxti və deşımon çəvon coni sıey bənav, joqo tarso-larz bəçəvon coni nıştə ki, jıqo bızın əvon con doydən.

Əmmo ehanə fəth iyən ğələbə bə mısılmınon nəsib bıbu,ıştəni bın səbarzətiyədə şərik zınedən və canqi ğəniməton cəm kardey koyədə daspoçəti kardedən. əvon bın faxti ğəniməton tələb kardə holədə vey tınd, de tovi iyən hozi-hozi sıxanon kardedən və və bə canqi ğəniməton şərik bıeyışon piyedə.

Həlbəttə, Kərimə-Ğıroni çı pəyğombəri zəmonədə bıə mınofiğon barədə votə çi, fəğət bə zəmoni ayid ni. har zəmon iyən məkonədə, çı mısılmınon miyono joqo fərdon hestin ki, xətər hiss kardeyədə fərol kardedən iyən rifoh və rohəti faxti çı mol iyən ğudrəti kəsb kardey dumon və ıştəni bəsə cokəsonsə bənav zıneydən.

Çın ayəonku umutedəmon:

1-de deşmıni mıborizə faxti, bəbe daxili zəyifə imoni soybonku mığət bıey lozıme. əvon nəinki, ıştən çı cəbhəku fərol kardedən, bəlkəm deştə məyusəti vardə sıxanon cəhbədə bıə co şəxson həm çı cihodiku oqəteydən.

2-mınofiğon xətər iyən saxtə şərayitədə bə mıcohidon koməq kardey koyədə pəxıləti kardedən. əmmo peşo təhlukə bərtərəf bıey bədiqə, bo ğəniməton cəm kardeyro hərisin. ımon çı mınofiğon nışonəonkuye.

3-canqədə deşmoni mığobilədə tars iyən zəyifəti nışon doey və səbarzəti faxti deştə həm məzhəb bıə kəson hoziyə rəftor kardey iyən çəvonku qıləy çi tələb kardey, çı əhle-mınofiği xısusiyyətonkuye.

يَحْسَبُونَ الْأَحْزَابَ لَمْ يَذْهَبُوا وَإِن يَأْتِ الْأَحْزَابُ يَوَدُّوا لَوْ أَنَّهُم بَادُونَ فِي الْأَعْرَابِ يَسْأَلُونَ عَنْ أَنبَائِكُمْ وَلَوْ كَانُوا فِيكُم مَّا قَاتَلُوا إِلَّا قَلِيلاً (20) 

Əvon qımon kardedən(ım) dastəon hələ volo-volo bıəni və əgər(ijən) deşmıni dastə(bə mısılmınon) soyəx boy, dılışon heste kaş çı badiyə nişinə ərəbon miyono əbin. (və həni canq nıəkəyn)və fəğət bəşmə ayid bıə xəbəon dumo əbin. və ın fərdon ehanə şımə miyono bıəbin, sıvoy kamə dastə canq nıəkəyn.

In ayə çı mınofiğon tars və zəyifəti pik noxtə nışon doydə və hamyedə: deməkə ki, deşmoni ğıvvon volo-volo bıən iyən şəhre Mədinə həni de təhlukə dim bə dim ni, əmmo mınofiğon qımon kardedəbin ki, əvon hələ Mədinə şəhri ətrofədən. liza hejo xətər hiss kardedəbin və har qıləy asb iyən şaturi sədo məsedəbin, jıqo təsəvvır kardedəbin deşmıni ğıvvonin və bəçəvon tərəf omeydən.

Jıqo tarso-larz bəçəvon coni nıştəbe ki, dılışon hestebe ıştə sə peqəton bışon bə biyobonon və çı badiyə nişinon palu jimonkəyn ta deçəvon qımoni çı təhlukəku ıştə coni peroxnon. bın surətədə əvon çı şəhri xəbə çı mısofir iyən səyohətəkəku dəparson və bızınon ki, şəhrədə komilə surətədə əmniyyət bərğərol bıə, bəvədə bə şəhr oqardon.

Ayəon dəvomədə bə muminon xitob kardedə və hamyedə: həlbəttə, ehanə əvon şəhrədə bımandon həm, çəvon əksəriyyət bəşmə koməq nibomen və de deşmoni canq kardey meydonədə hozzı nibəbeyn. çən, çəvon şıeyku norohət məbənən iyən çəvon mandeyku həm xoşhol məbənən.

Çın ayəku umutedəmon:

1-mınofiğon iyən sıstə imoni soybon, hejo fik kardedən islomi deşmınon bəsə mısılmınonsə zumande. əvon qımon kardedən ki, har qıləy canqi nəticə bə deşmınon xəyri iyən de mısılmınon ziyoni obərəxe və bəçəy əsos proqramə hozzı kardedən.

2-deşmıni mığobilədə tars iyən bəştə bovə nıkardey, bəçəvon mığobilədə fərol kardey boyis bəbe. qıləy holədə ki, ağl iyən şəryət hukm kardedə ki, inson ıştə deşmıni mığobilədə bımando iyən ıştəku sıstəti və zəyfəti nışon nıdo.

لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِّمَن كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيراً (21) 

Həyğətən, boşımə Xıdo Rəsuli(rəftorədə) qıləy çokə ulqu və nımunə heste. bo əkəson ki, bə Xıdo iyən ğıyoməti ruji umuşon heste və Xıdovəndi ziyod zikr kardedən.

Vəynə ayəon dəvomədə ki, çı mınofiğ iyən zəyifə imoni soybon xısusiyyəton bəyon kardedəbe, ın ayə hamyedə: imoni əhl bə mınofiğon sıxan iyən rəftoron və çəvon ıştə vəzifəon bə vırə rosneyədə bıə səhlənkorəti dığğət kardey əvəzi, bə pəyğombəri(s) sıxan iyən əməlon nəzə kardedən. əvon bənə ə həzrəti çı deşmıni vədə ğoym iyən zumandə formədə mandən və bo Mədinə şəhri iyən mısılmınon mıdofiyə kardey xoto, ıştə dasto omə koməqon əncom doydən.

Bə tarıxiyə rəvoyəton əsos, Pəyğombəre-Əkrəm(s) bo Mədinə şəhri mıdofiyə kardey xoto, əmrış karde çın şəhri ətrofədə və çı deşmıni nufuz kardə har qıləy vırədə xəndəx bıkandon. ə həzrət ıştən həm bənə co mısılımınon de kulənq iyən bori bə dast qətey, məşğul be bo xəndəx kandey. De qırd ım ko və cəhdon bə ico, Xıdo pəyğombər Xıdo zikri dılonədə bəyji oqəteydəbe və bəvon çı Xıdo tərəfiku bıə ğələbə və`də doydəbe.

Çın ayəku umutedəmon:

1-Peyğombəre-Əkrəm(s) canqo-cihodi faxti, canqi oləti bə tan kardedəbe və çı mıhoribə komandirəti şəxsən bəştə ohdə qəteydəbe. çəy din çı hukumətiku co nıbe. ə həzrət çı milləti həm dınyəvi səodəti və həmən çəvon ğıyoməti ruji uxrəvi hərəbaxtətiş piyedəbe.

2-Pəyğombəre-Əkrəm bənə co insonon jimon kardedəbe. liza əv bo qırd muminon ulqu bıey bəzıne. əv zəminədə jimon kardedəbe, əve bo zəminədə jiyə kəson ulqu be. canqi məydonədə həm bə elmı-ğeybi əsos əməl kardedənıbe və bə canqi ğaydə-ğanuni rioyət kardedəbe.

3-ehanə dınyo mısılmınon, Pəyğombəre -Əkrəmi(s)-i boştə ulqu ğərolışon doəbe, ımruj çı deşmınon mığobilədə jıqo xar iyən zəyif nıəbin və hiçfaxti icozə nıədəyn ki, deşmınon bəvon sultə pəydukəyn.