762-ə hissə-Əhzabi surə-22-25 şərifə ayəon

762-ə hissə

وَلَمَّا رَأَى الْمُؤْمِنُونَ الْأَحْزَابَ قَالُوا هَذَا مَا وَعَدَنَا اللَّهُ وَرَسُولُهُ وَصَدَقَ اللَّهُ وَرَسُولُهُ وَمَا زَادَهُمْ إِلَّا إِيمَاناً وَتَسْلِيماً (22)‏

Və çoko muminon(deşmıni) dastəonışon vinde, voteşone: ım həmonə çiye ki, Xıdo iyən çəy Rəsuli bəmə çəy və`dəş doə və Xıdo iyən çəy Rəsul rost votəşone. və(deşmıni ləşkəri vindey) fəğət çəvon imon iyən təslimış ziyod karde.

Vəynə proqramədə Əhzabi canqi faxti çı mınofiğon rəftori həxədə sohbət kardemone. ın ayə hamyedə: əmmo həyğiyə muminon ki, bə Xıdo iyən bəçəy Rəsuli sıxanon imonışon heste və de deşmıni ləşkəri dim bə dim omeyədə, voteşone: çımi bənav Xıdovənd ıştə Ğıroni ayəonədə bəmə xəbəş doəbe ki, şımə həm bənə navnə umməton saxtə şərayit iyən çı deşmıni hucumon mığobilədə ğərol bəqətiyon. Xıdo Rəsul  həm navədə hamyəşbe ki, ərəbi mıxtəlifə ğəbiləon iyən şımə deşmınon bo şıməni məf kardeyro de iyənde i bəbeyn. liza çoko ki, ım şərayitışon vinde, bənə mınofiğon şivə vitey əvəzi, çı deşmınınon mığobilədə ğoym iyən mohkəm mandin və nışon doşone ki, əvon bə Xıdo yən bəçəy rəsuli əmron tabeyin.

Çın ayəku umutedəmon:

1-mumin zıneydə ki, zolımə deşmın əy ozod nivabədoe. liza bəbe hejo ıştəni çı deşmıni şərriku əmonədə oqəteyro hozzı bıbəmon.

2-kofiron de iyənde veyə ixtilofışon bıə holədə, bo islom iyən mısılmınon məf kardey xoto, dast bə dast doydən və bəştə bın hədəfi rəseyro ıştə qırd imkonat iyən ğıvvonku oko doydən.

3-muminon hətto kam həm bıbon, deşmıni mığobliədə ehanə çəvon mığdor vey həm bıbu, mandedən və bə Xıdo əmron təslim bedən, nəinki, bə deşmınon.

مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلاً (23) 

Muminon miyono merdon hestin ki, bəştə de Xıdovəndi bastə əhd-peymoni bəfo kardeşone. (ıştənışon bo cihodiro hozzı kardeşone)çəvon kali qıləyni bəştə əhdi bəfo kardeşone(şəhid bin). və bəzi qılon həm(şəhodəti) intizorədən və hiç faxti(ıştə əğedəşon) əvəz nıkarde.

Vəynə proqramədə ki, çı həyğiyə muminon mığovimət iyən istiğamətiku bəhs kardedəbe, çə bəhsi dəvomədə, ın ayə hamyedə: imoni əhl de Xıdo əhd-peymon basteşone ki, bə Xıdo dini koməq kardey koyədə ıştə dasto omə koon əncom bədon iyən de tobə ıştə oxonə nəfəsi bın royədə mığovimət bəkayn. əve, çəvon kali qıləyni Bədr iyən Uhudi canqədə bə şəhodət məğami nayil bin. çəvonku idastə həm qıləy movğıyyəti çəş kardedən ki, bəştə əhdi bəfokəyn iyən ıştə coni Xıdo royədə təğdımkəyn. əvon cəhd karde dən ki, ıştə ım əhdi bə vırə rosney koyədə bə zəyfəti iyən sıstəti ro nıdəyn. bə imonışon zəyif bıə fərdon əks ki, ehanə canqədə həm iştirokəyn və de solimə coni oqardon, xoşholin.əgər co qıləy canq həm bəvə boy, ım şəxson ijən hozzın bışon cəbhədə iştirok kəyn.

Çın ayəku umutedəmon:

1-mısılmınon imoni cəhəto i səviyyədə  nin və bın sahədə mıxtəlifə dərəcəşon heste. i dastə çı orom iyən rifohinə jimoni dumon və co qrup Xıdo royədə şəhid bıey dumon.

2-de tobə ıştə oxonə nəfəsi bo Xıdo dini hifz kardeyro hozzı mande, ıştə imonədə sadığ bıey iyən bə ilahi əhd-peymoni bəfo kardey nışonəonkuye.

3-həyğiyə mumin deştə duston iyən əzizon şəhodəti vindey, dəboxtəni iyən bə dumo pekıriyedəni və cihodiku vitedəni. bəlkəm, ıştən həm çı şəhodəti intizorədə mandedə.

لِيَجْزِيَ اللَّهُ الصَّادِقِينَ بِصِدْقِهِمْ وَيُعَذِّبَ الْمُنَافِقِينَ إِن شَاء أَوْ يَتُوبَ عَلَيْهِمْ إِنَّ اللَّهَ كَانَ غَفُوراً رَّحِيماً (24) 

Ta Xıdovənd bə rostəvıjon bəçəvon sədoğətiro mıkofot bıdəy. və bə mınofiğon əgər bıpyişe əzobko ya(əgər tovbəkon) ıştə lurfi bəvon oqordıno ki, Xıdovənd əbaxş, mehribone.

وَرَدَّ اللَّهُ الَّذِينَ كَفَرُوا بِغَيْظِهِمْ لَمْ يَنَالُوا خَيْراً وَكَفَى اللَّهُ الْمُؤْمِنِينَ الْقِتَالَ وَكَانَ اللَّهُ قَوِيّاً عَزِيزاً (25) 

Və Xıdovənd kufr kardə kəson hiç qıləy xəyr(ğənimət ya ğələbə) bə dast nıvardə holədə de ğeyzinə dılon oqordınışe. və Xıdovənd muminonış çı canqiku be ehtiyoc kardeşe. (əvonış səbarz kardeşe)və Xıdovənd zumand, məğlub bıənin ni.

In ayəon çı Əhzabi canqi nəticə bəyon kardedə və hamyedə: sadığ iyən rostəvıjə muminon ki, de deşmıni mıborizə bardey xoto canqi oləti bə tan kardedən və çı islomi pəyğombəri kəno mandə holədə bo islomi royədə fədokorəti kardeyro hozzın, ıştə mıkofati Xıdoku ğəbul bəkayn. harçənd çı dıqlə dastə miyono qıləy mıhoribə həm nıbu və muminon canq nıkəyn iyən Xıdo royədə şəhid həm nıbon.

Əmmo mınofiğon ki, həm çəvon ruhiyyəşon zəyif bıə və həmən bə cokəson əhvol-ruhiyyə beji eqıniye boyis bedən, bə ilahi əzobi loyığin. illa ki, Xıdovənd bəçəvon tobə kardey iyən oqardey xoto, ıştə lutfi bəvon oqordıno iyən əvoni bıbaxşo və çəvon qınonku dəvardo.

Mışrikon iyən kofiron həm qımon kardedəbin ki, kardey bəzıneyn de jıqo məkrinə planon islomi rəğ-rişə hışkəyn və çı islomi peyğombər iyən mısılmınon ko bə oxo bərosneyn, hiç qıləy ğənimət iyən səbarzəti bə dast nıvardə holədə bə dumo oqardin.

Bın vağiyədə Xıdovənde-Aləm bə mısılmınon umuteşe ki, hiçfaxti çı deşmınonku mətarsiyon və deşmınon həm bızınon ki, çəvon hiyləon ilahi tədbiri vədə hiç qıləy təsirış nibəbe və əvon bə ilahi ğudrəti zu omey əzınin. liza bo islomi rişə bırniyero de iyənde vəhdət təşkil doə və bə canqi meydon omə deşmınon, xışmğin iyən ğeyzinə holədə bəştə diyori oqardin və bəştə oruzon rəsey koyədə nokom mandin.

Çın ayəonku umutedəmon:

1-sədoğət fəğət sıxanədə ni, əmələdə həm inson bəbe deştə Xıdo bastə əhd-peymoni sadığ bımandi və bə Xıdo dini koməq kardey koyədə sıstəti nışon nıdo.

2-Xıdovəndi  lutf  hiçkəsiku bə diyəro ni. hətto əhd darıştə mınofiğonku həm. bə ilahi hikməti əsos əgər əvon tobəkon, Xıdovənd əvoni bəbaxşe.

3-jimoni mıxtəlifə koonədə fəğət bə maddiyati iktifo məkəmon və maddi koonku xaric bıə iyən ilahi ğeybi koonku həm ğafil məbəmon.