764-ə hissə-Əhzabi surə-32-34 şərifə ayəon

764-ə hissə

يَا نِسَاء النَّبِيِّ لَسْتُنَّ كَأَحَدٍ مِّنَ النِّسَاء إِنِ اتَّقَيْتُنَّ فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلاً مَّعْرُوفاً (32) 

Ha pəyğombəri jimoni həmroon ha! şımə bənə(adiyə) jenon qıləyni niyon, əgər təğvan hestebu. çən, nam iyən de nazo-ğəmzə sıxan məvotənən ta(məbodə) noxəşə dılonədə tamə pəydu bıbu və çok iyən loyığə sıxan bıvotənən.

Vəynə proqramədə çı pəyğombəri jimoni həmroon barədə ayəonədə bəyon be ki, çəvon vırə və məğam bə milləti çokonə təsir noydə. ın ayə de ojə-oşkoə holəti bə ın ko işorə kardedə və hamyedə: pəyğombəri jimoni həmroon bə Xıdo-Rəsuli bıə nisbəti xoto, sanqinə məsuliyyətışon çəvon ohdədə heste və əvon bəbe ıştəni de cokəson mığoyisə nıkəyn. zira əvon çı bıpiyoşone ya nıpiyoşone bo camiyə co jenon ulqu və nımunə nisbətədən və çəvon çok iyən yavə koon camiyədə təsir noydə.

Peşo bə jenon iştimayi rəftoron nımunəonku qıləyni işorə kardedə və hamyedə: çı təğva şərtonku ıme ki, de noməhrəmi sıxan kardeyədə, şımə sıxani tərz nopok iyən noxəşə dılon soybon nəzə cəlbko, bəlkəm de qıləy mınosibə sədo tərzi və iffətinə formə qəp bıjənən.

Çın ayəku umutedəmon:

1-çı fərdon movğıyyət iyən məğam çəvon məsuliyyəti mığdorədə təsir noydə. bə həmonə dəlili xoto barzə məğami soyb bıə fərdon ya bəvon nez bıə kəson(bənə dini rəhbəron xıyzoni) bəbe bəsə cokəsonə vey bəştə sıxan iyən rəftoron dığğətkəyn.

2-olət tan kardey şivəsə əlovə, sıxan votey tərzi həm ziyodə əhəmiyyətış heste. liza Xıdovənd həmmə koonədə min cumlə sıxan votey iyən çəy məzmunədə həm bə təğva rioyət kardey təkid kardedə.

3-har qıləy cəmiyyətədə noxəşə dılon iyən nopokə fərdon movcude və jenon bəbe bo ıştəni jıqo fərdonku hifz kardeyro, ıştə iştimayi rəftoronku mığət bıbon.

وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَى وَأَقِمْنَ الصَّلَاةَ وَآتِينَ الزَّكَاةَ وَأَطِعْنَ اللَّهَ وَرَسُولَهُ إِنَّمَا يُرِيدُ اللَّهُ لِيُذْهِبَ عَنكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيراً (33) 

Və ıştə kəonədə ğərol bıqətənən və bənə iminə cohiliyyəti devrani ıştəni dərostə holədə zohir məbənən(ıştə ziynəton oşko məkənən). və nımoji bərpokənən iyən zəkot bıdənən iyən bə Xıdo və bəçəy Rəsuli pemandənən. həyğətən, Xıdovəndi irodəş kardə ki,(qıno) nopokətiyon şımə(pəyğombəri) Əhli-Beytiku bə diyərokəy və komilən şıməni pokkəy.

وَاذْكُرْنَ مَا يُتْلَى فِي بُيُوتِكُنَّ مِنْ آيَاتِ اللَّهِ وَالْحِكْمَةِ إِنَّ اللَّهَ كَانَ لَطِيفاً خَبِيراً (34) 

Şımə kəonədə Xıdo ayəon iyən hikmətiku tilovət bıə çiyon zikrkənən.həyğətən, Xdıovənd(bəşmə nisbətədə) lutfış heste və(şımə koonku) aqahe.

Navnə ayəon dəvomədə, ın ayəon həm bə pəyğombəri jimoni həmroon xitob kardə holədə hamyedə: bə islomi bənav bıə devroni əks ki, jenon de mınosib nıbə formə bə bi beşedəbin iyən curbəcurə dəroste-peroste alətonku oko doydəbin və camiyədə zohir bedəbin, şımə imoninə jenon çanədə ki, zəruri ni, çı kəyku xaric məbənən. ehanə şımə bə cəmiyyəti dılə omey lozım bıbu, bəvədə de qıləy mınosibə formədə olət bə tan kardey zohir bıbənən və ıştə ziynət əşyoon bə cokəson nışon mədənən.

Kərimə-Ğıroni bın ayədə oko doə təbir, iminə cohiliyyəti kəliməy. jıqo bızın Ğıron çı naviku xəbəş doə ki, qıləy co cohiliyyət həm royədəy və bome bərəse və jenon ıştəni dərostə-perostə holədə bə milləti miyon bebəşeyn. ım qıləy koye ki, ımrujnə dınyo de mıxtəlifə unvanon və de hevujə reklam iyən təbliğaton, jenon bə uryanəti tərəf şıkırneydən və ısət dınyoədə çı jenon dəroste-peroste ləvozimaton dınyo vıjoronədə həmməysə dıjdə ticorəti unvanədə bə hisob omeydə.

Ayəon idomədə bənə bə nımoj iyə zəkoti iyən bə Xıdo iyən bəçəy Rəsuli co dini vocibaton iyən əmron ciddiyə dığğət kardey bə yod vardedə ta qımon nıbu ki, çı jenon ko fəğət bə hicobi rioyət kardey iyən ıştəni çı noməhrəmonku çəş karedeye. ya təsəvvır nıbu ki, vəynə əmron fəğət bə pəyğombəri jenon ayide və həni co jenon bımi rioyət nıkəyn.

34-ə ayə həm çın ilahi əmron dəvomədə, bə jenon xitob karə holədə hamyedə: jenon kəonədə bıə huzur ki, qıləy təbiiyə koye, bəçəvon dini iyən mənəvi cəhəto inkişofi mane nıbu, bəlkəm bəbe əvon de Kərimə-Ğıroni tilovəti iyən dini barzə maarif iyən təlimon umute, hejo məşğul bıbon iyə çın koyku ğafil nımandon. əmmo çın əmron miyono sıftədə bə pəyğombəri jimoni həmroon və oxoyədə bə qırd imoninə jenon xitob kardə bıə. qıləy iborəy ki, çəy işorəon merdə işorəonin və əvış çı vəynə iyən peşonə iborəonku coş kardə.

De “innəma” iborə bino bıə luğət, nışon doydə ki, Xıdovənde-Aləmi irodə ıme ki, pəyğombəri Əhli-Beyti inov qıləy ismətışon heste. qıləy ismət ki, əvonış çı harcurnə mırdoləti iyən nopokətiku əmonədə oqətəşe ta əvon kardey bızınon bo qırd muminon qıləy ulqu iyən nımunə bıbon.

Im ismət məcburi surətədə ni ki, Əhli-Beytiiku qıno əncom doey ğudrət sıey bıbu. bəlkəm, əvon deştə loyiğə əməlon, ilahi lutfon ğəbul kardey ləyoğətışon heste və eyni holədə bə qıno mırtəkib bıə holədə, bəçəy soyəx şedənin və qınoku əmonədə mandedən. ısət Əhli-Beyt kom şəxsonin,çı mıfəssir iyən təfsirəvonon miyono ixtilof movcude. kali qıləyni əy bə pəyğombəri jenon və bəzi qılə bə pəyğombər(s)-iku bın zəminədə rəsə çandə qılə rəvoyəton əsos, etığodışon heste ki, ın ayə fəğət bə penc qılə şəxsi ayide. Pəyğombər-Əkrəm(s), çə həzrəti kinə Fatimə(ə), çəy zımo Əli ibn ƏbiTalib(ə) iyən çə həzrəti dıqlə nəvə İmom Həsən(ə) və İmom Huseyn(ə).

Çın ayəonku umutedəmon:

1-jenon iştimayi ərsəonədə ıştəni nışon doey, çı mədəniyyəti nışonə ni. bəlkəm, de Kərimə-Ğıroni təbiri cohiliyyəti nışonəy.

2-zəkoti pərdaxt kardey iyən ıştə molon i hissə bə ehtiyocinə şəsxon baxş kardey vocibaton, fəğət bə merdon şomil bedəni. bəlkəm, bə jenon həm ayid bedə.

3-dini rəhbəron xıyzonon ki, çı camiyə hidoyəti ko çəvon ohdədəy, bəbe çı nopokətiyonku bə diyəro bımandon.

4-kədoroə jenon kəyku bə bi qıləy koşon ni, bəbe elm, mərıfət iyən hikməti kəsb kardey koyədə ğafil nıbon. bəlkəm, əvon bın cəhətədə ziyodə cəhdon bıkəyn.