771-ə hissə-Əhzabi surə-59-62 şərifə ayəon

771-ə hissə

يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاء الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ذَلِكَ أَدْنَى أَن يُعْرَفْنَ فَلَا يُؤْذَيْنَ وَكَانَ اللَّهُ غَفُوراً رَّحِيماً (59) 

Ha pəyğombər ha! bəştə zovcəon iyən kinon və muminə jenon vuji: dırozə ləçəkon ıştə səpe şodəyn. ım(əməl) boəvoni zıneyro iyən bəvon əziyyət nıkardero vey mınosibe. Xıdovənd əbaxş, rəhməkəy.

Navnə proqramədə bə Kərimə-Ğıroni nəzəku hicob iyən tankardemoni movzu işorə be. ın ayə çə bəhsi dəvomədə hamyedə: fəğət sırfən qıləy dırozə ləçək tankarde kifoyət kardedəni. bəlkəm, muminə jen iyən kinon bəbe jıqo ıştə bə tan kardə olətonku oko bıdəyn ki, çəvon qırd bədəmi iyən səymu bıpuşno, nəinki, çəvon əndomi i poə oj bımando.

Ayə dəvomədə təkid kardedə ki, ıştə hicobi jıqo komilə surətədə puşney boyis bəbe ki, şımə muminə jenon de pokdovnəti zıney bıbon və çı nopokə fərdon tərəfiku bə əzob-əziyyəti və behurməti məruz nımandon. ısət çı de zıvoni əncom doə bıə əziyyəton bıbu və ya bəşmə ruhi iyən psixoloji əziyyəti boyis bıə noloyığə rəftoron bıbu.

Çın ayəku umutedəmo:

1-hicobi fəlsəfə, jenon nopokə nəzəonku, bemənoə sıxanonku iyən ziyon rosnə rəftoronku hifz kardeye. binobərin hicob jeni mıdofiyə kardə amilonkuye, harçən kali məhdudiyyəton həm icodko.

2-islomi camiyədə umumi iffəti oqəte, Ğıron iyən Xıdo-Rəsul(s)-i təkid kardə vırəonkuye və çın koyku ibaxş bə jenon ayide ki, bəbe kəyku bə bi şe-omey faxti qıləy mınosibə tankardemonış bıbu.

3-islom çı jenon kədə nıştey tərəfdore. əmmo çəvon camiyədə de iffət iyən pokdovnəti bıə huzur və iştiroki hiç qıləy maneçətiş ni.

لَئِن لَّمْ يَنتَهِ الْمُنَافِقُونَ وَالَّذِينَ فِي قُلُوبِهِم مَّرَضٌ وَالْمُرْجِفُونَ فِي الْمَدِينَةِ لَنُغْرِيَنَّكَ بِهِمْ ثُمَّ لَا يُجَاوِرُونَكَ فِيهَا إِلَّا قَلِيلاً (60) 

Əgər mınofiğon iyən çəvon dılon noxəş bıə kəson və Mədinədə şayiə pevolo kardə kəson, ıştə(koyku) dast bıkəşon. hukmən tıni bəçəvon ələyh rost(təhrik) bəkardemon. bə zəmon əvon ğərəz qıləy kırtə mıddəti ıştı kəno bın şəhrədə mandey nibəzıneyn.

مَلْعُونِينَ أَيْنَمَا ثُقِفُوا أُخِذُوا وَقُتِّلُوا تَقْتِيلاً (61) 

Bəvon nəhlət bıə. konco əvon pəydu bin, bəbe dastgir və de ğəddorəti kıştey bıbu.

سُنَّةَ اللَّهِ فِي الَّذِينَ خَلَوْا مِن قَبْلُ وَلَن تَجِدَ لِسُنَّةِ اللَّهِ تَبْدِيلاً (62)

Im çımi bənav bıə kəson barədə adəte(ğaydəy). hiçfaxti Xıdo ğanuni əvəz bıənin nibəvindeyş.

In ayəon çə fərdon həxədəy ki, pəyğombər(s)-i zəmonədə Mədinə şəhrədə jimon kardedəbin, əmmo de mıxtəlifə formə camiyədə əmniyyəti bəyənde jedəbin. jıqo noxəşə dılon bo Mədinə kinə iyən jenon maneçəti icod kardedəbin. co tərəfo de islomi deşmınon canqi faxti de mıxtəlifə vavunəon bə cihod nışə mınofiğon, çı milləti miyono de şayiə pevolo kardey vositə bəçəvon dılon tars iyən vohimə dənoy dəbin. əvon de deşmınon ğıvvə zumand nışon doey iyən muminə dastə ğıvvon zəyif nışon doey vositə, dılışon hestebe bə millət iyən cihod kardə kəson ruhiyyə zəyifəti iyən sıstəti boyis bıbon.

Çun çı har qıləy camiyə harcurnə mınoğişədə, hətta milləti ixtisodi iyən məişət sahədə həm bıbu, əmniyyət iyən betəhlukəti hifz kardey vey muhimme. Xıdovənde-Aləm bəştə pəyğombəri(s) hamyedə: şımə de milləti ruhi iyən psixoliji əmniyyəti bəyənde jıə ha fərdi ğəddorə rəftrokənən. çəvonku idastə çı Mədinəku xarickənən və iqrupi cəzo bıdənən və ehaştənən əvoni ta ım bə cokəson ibrəti dərsi boyis bıbu və həni hiçkəs curət pəydu nıko və de har bəhonə iştimayi asayiş iyən əmniyyəti bəyənde nıjəno.

In ayəon oxoyədə, bə ilahi adət və ğanunon əvəz nıbey işorə kardedə və hamyedə: camiyədə fəsod iyən təxribaton rəğ-rişəon bırniye, ilahi sınnət və ğanunonkuye ki, Xıdovəndi ıştə pəyğombəriku tələbış kardə ımi həm ıştə zəmonədə icrokə və həmən vəomədə de islomi hukuməton vositə icro bıbu.

Çın ayəonku umutedəmon:

1-camiyədə asayiş və əmniyyəti bəyənde jıə amilon mığobilədə, ıştəku zəyfəti nışon mədəmon ki, no oroməti bənə qıləy xətərnokə noxəşəti, camiyədə jimoni de təhlukə dim bə dim kardedə.

2-cəmiyyətədə fıtnə iyən noəmni icod kardə amilon, bəbe hiç vırədə betəlukəti hiss nıkoyn. bəbe jıqo fərdon həbs bıbu və bə islomi hukmon əsos bəvon cəzo doey bıbu.

3-şayiə pevolo kardey, çı deşmıni bə islomi camiyə nufuz kardey roonku qıləyniye. həm bə məsul şəxson lozıme de həyğəton bəyon kardey vositə çı milləti etımodi cəlbkəyn və həmən bə milləti vocibe ki, bə har qıləy sıxani dığğət nıkəyn və bo ın şayiəon pevolo kardeyro qıləy vositə nıbu.

4-camiyədə fıtnə-fəsod icod kardə kəson həxədə Xıdo hukmon icro kardey ko bə təxır eğandey lozım ni. bəlkəm, bəbe Xıdo hukmi de ğətiyyəti icrokəy.