772-ə hissə-Əhzabi surə-63-68 şərifə ayəon

772-ə hissə

يَسْأَلُكَ النَّاسُ عَنِ السَّاعَةِ قُلْ إِنَّمَا عِلْمُهَا عِندَ اللَّهِ وَمَا يُدْرِيكَ لَعَلَّ السَّاعَةَ تَكُونُ قَرِيباً (63) 

(Ha pəyğombər ha!)Millət hejo ıştıku ğıyoməti zəmoniku dəparseydən,(bəvon) vuji: çəy elm Xıdo paluye və tı çiç zınedəş? ğasbu ğıyomət neze.

Kofir iyən mınofiğon ki, bo ğıyoməti nıbeyro hiç qıləy dəlilışon nıbe, bo milləti miyono şək-şubhə icod kardey iyən çəvon bə pəyğombər(s)i bıə imoni sıst kardero, çın sıvoliku bəhs kardedəbin ki, ehanə əv rost voteydəbu, çən bıvoti ğıyoməti ruj keynə bome bərəse?.

Imi zikr kardey lozıme ki, qıləy ko bə əməl omey zəmoni nızıne, bəçəy bə əməl nıomey dəlil ni. əmə həmmə insonon zınedəmon ki, qıləy ruj bəmardemon. əmmo hiç kəs zıneydəni ki, əv keynə bəmarde. ısət çun,əmə ıştə mardey zəmoni zıneydənimon, çən əve bəbe bıvotəmon əmə nibəmardemon? Çımisə əlovə əgər fərzkəmon pəyğombər(s)-i hamyəşbe ki, i həzo sori bəpeştə ğıyomət bərpo bəbe. ayə əvon i həzo sor bəyji əmandin ta çı pəyğombəri(s) sıxani rost bıey dərkəkəyn iyən imon əvardin?

Ayə dəvomədə hamyedə: ğıyoməti bərpo bıey zəmoni fəğət Xıdo zıneydə. nəinki, pəyğombər(s) zıneydə və əy məxfi oqəteydə. muhim ıme ki, har qıləy muminə inson ğıyoməti ruji nez bızıno və ıştə əməl iyən rəftoronku mığət bıbu.

Çın ayəku umutedəmon:

1-ğıyoməti ruji bərpo bıey zəmoni nızıne, bəçəy omey prinsipi hiç qıləy zərəl nibərosne və çun muminon bə Xıdo iyən bəçəy rəsuli rostədə iyən de sədoğəti imonışon vardə, bə ğıyoməti omey rəsey həm imonışon heste.

2-hejo bəbe bo marq iyən mardey iyən ilahi ədolətinə məhkəmədə hozzı beyro, hozzı bıbəmon. marqi zəmoni zıney muhim ni, bəlkəm boəy hozzı bıey vey muhimme.

إِنَّ اللَّهَ لَعَنَ الْكَافِرِينَ وَأَعَدَّ لَهُمْ سَعِيراً (64)

Həyğətən, Xıdovənd bə kofiron nəhlət kardəşe və boəvon sutunə otəş hozzı kardəşe.

خَالِدِينَ فِيهَا أَبَداً لَّا يَجِدُونَ وَلِيّاً وَلَا نَصِيراً (65) 

Əvon hejo əyo bəmandeyn və əvon(boştə) nə qıləy dust pəydu bəkayn və nə yavər(koməqəkə).

يَوْمَ تُقَلَّبُ وُجُوهُهُمْ فِي النَّارِ يَقُولُونَ يَا لَيْتَنَا أَطَعْنَا اللَّهَ وَأَطَعْنَا الرَّسُولَا (66) 

Qıləy ruj ki, çəvon dimon otəşədə(bın tərəf-bətərəf) qordıney bəbe(de həsrəti) bəvoteyn: ey kaş! bə Xıdo itoət kardəmonbe iyən bə(çəy) Rəsuli pemandəbimon.

Vəynə ayə dəvomədə ki, çı kofiron şək-şubhə icod kardə sıvolon bəyon kardedəbe, ın ayə hamyedə: çı milləti bə Xıdo dini bovə iyən bəçəy pəyğombəri bıə etığodon zəyif iyən sıst kardə kəson həm dınyoədə ilahi rəhmətiku məhrum bəbeyn və həmən axırətədə bə dıjdə əzobon giriftor bəbeyn. əv həm qıləy şiddətinə əzob ki, əvon əyo oruzu bəkardeyn ki, ey kaş əmə de Xıdo dini iyən deçəy pəyğombəri bəbe jəqo rəftoron kardəmon nıbe. əmmo həni çı foydə? həni boçəy əvəzi beşero hiç qıləy zəmon mandəni və bo oqarde iyən tobə kardero həm həni imkon movcud ni. ikəs həm ni ki, kardey bızıno əvoni çın əzobiku peroxni.

Çın ayəonku umutedəmon:

1-çı inod iyən kəcbəsətiku sərçeşmə peqətə kufr iyən inkor kardey, ilahi ğəhro-ğəzəbi iyən dınyo və axırətədə Xıdo nəhləti dumo ıştə vardedə.

2-bə dınyo movcud bıə soxtemoni əks, axırətədə hiçkəs bə cokəsi koməq kardey nibəzıne və cokəsi çı əzobiku peroxney əzıni.

3-dınyo iyən axırətədə nicot pəydu kardey fəğət iqlə roş heste. əv həm bə Xıdo iyən bəçəy rəsuli pemandeye ki, çın koyku ğafil beıy bə axırəti ruji peşmonəti boyis bəbe.

وَقَالُوا رَبَّنَا إِنَّا أَطَعْنَا سَادَتَنَا وَكُبَرَاءنَا فَأَضَلُّونَا السَّبِيلَا (67) 

Və bəvoteyn: Xıdolim ha!(bərosti) əmə bəştə rəhbəron iyən yolon pemandimon. çən, əvon əmənışon çı(həxə) royku bekardeşone(bə zəlolət eğandeşone).

رَبَّنَا آتِهِمْ ضِعْفَيْنِ مِنَ الْعَذَابِ وَالْعَنْهُمْ لَعْناً كَبِيراً (68) 

Xıdolim ha! bəvon dığat əzob bıdə və qıləy dıjdə nəhlətkə!

Ğıyoməti ruji əzobi mışohidə kardeyədə çı qınokoron zıvon oj bəbe və əvon bəçəvon ro dəqıjney boyis bıə kəson tu-nəhlət bəkardeyn. qıləy holədə ki, ım sıxanon boçəvon qınon vonə bıey əzınin.zira əvon kardey əzınin bəştə yolon iyən ərbobon nıpemandon ta jəqo bə zəlolət nıeqınon. çımisə əlovə çəvon ğovmon yolon əvonışon bəvon pemandey iyən ğəbul kardey məcbur kardəşon ni və əvon kardey əzınin çəvon əğıdə ğəbul nıkəyn.

Təbiiye ki, çı qınokoron ğovmi yolonku murad və məğsəd, həmonə ğudrət iyən sərvəti soybonin ki, ımon həm həxı çı botıliku co kardey meyar bıey əzınin. əvon çı botılə şəxson palu şıey əvəzi, çı elm iyən hikməti soybon tonoku şıəbin, ğasbu boəvon qıləy umu vırə pəydu əbi.

Odəmi dığğəti cəlbəkə çi ıme ki, ım qınokoron ki, ıştən bə ilahi nəhlət və nifini dıço bıən, boştə ğovmi yolon Xıdoku dı bərobər əzob iyən nəhlət tələb kardedən. qıləy holədə ki, ehanə çəvon ım tələb ğəbul həm bıbu, ijən çəvon əzobiku hiççi bəkam nibəkay. çoko ki, Ərafi mıborəkə surə 38-ə ayədə Xıdovənd boştə ğovmi yolon dı ğat və dı bərobər əzob tələb kardə kəson cəvobədə hamyedəbe ki, bo har dıqlə dastə izofə və əlovə əzob bəbe.bo ğovmi yolon boçəvon milləti bə zəlolət eğandero və bəvon tabe bıəkəs bəçəvon bəştə rəhbəron zılmi koməq kardey xoto. zira əvon bəçtə yolon pemandə nıbin, kufri yolon iyən zolımon coyli bəştə zılmi dəvom doey nıəzınin.

Çın ayəonku umutedəmon:

1-qınokoron ğıyoməti ruji boştə səhf və qınoon bəhonə vardey dumo bəbeyn və cəhd bəkayn əvoni bə cokəson gıy şodəyn.

2-bə camiyə rəhbəron kur-kuronə surətədə tabe bıey, ağl iyən şəryəti nəzəku ğəbul bıənin ni və çım ko oxo peşmonçətiye.

3-de nodırstə sınnət iyən adəton icod kardey çı milləti ro dəqıjney zəminə hozzı kardə kəson, çəvon bə zəlolət eqıney iyən çəy yavə nəticəon koyədə cəvobdehin. harçənd ım ko çəvon mardey bəpeştə həm bıbu.