472-ə hissə-İsra surə-15-17 şərifə ayəon

472-ə hissə

مَّنِ اهْتَدَى فَإِنَّمَا يَهْتَدي لِنَفْسِهِ وَمَن ضَلَّ فَإِنَّمَا يَضِلُّ عَلَيْهَا وَلاَ تَزِرُ وَازِرَةٌ وِزْرَ أُخْرَى وَمَا كُنَّا مُعَذِّبِينَ حَتَّى نَبْعَثَ رَسُولاً (15)

Hakəsi hidoyətış pəydu karde, bəştə xəyri hidoyətış pəydu kardə və hakəs bə zəlolət eqıno,fəğət bəştə ziyoni roş dəqıjniyə.və hiç kəs çı cokəsi qıno bo bəştə duş əqətni və əmə qıləy peyğombər nıvğande(huccət təmom nıbe) hiç faxti əzobımon nıdoe.

In ayə bə cəzo iyən mıkofoti  ğanuni ayid bıə se qılə kulliyə əsli işorə kardedə. sıftədə hamyedə:şımə kufr iyən imoni bə Xıdo hiç qıləy mənfəət iyən ziyonış ni, bəlkəm, çəy təsir bəşmə ıştəni obəqarde.ehanə şımə hidoyəti ğəbulkoyn iyən bə ilahi əmron pemandon,bəştə xəyri əməlon kardə və əgər şımə bə həxı tabe nıbon iyən çı həxə royku bə kəno beşiyon,çəy zərəlo-ziyon bəşmə ıştəni bərəse.

Dıminə əsl ıme ki,çı hakəsi əməli təsir bəçəy ıştən ohdəy.nəXıdovəndi əvış bə co kəsi duşış noə və nə ğəbul kardeydə ki, çı qınokori əvəzi bə coksi cəzo bıdəy.çoko ki, dınyoədə kali şəxson de mıxtəlifə surəton ıştə qınoon bə cokəson duş noydən iyən bəştə kardə koon cavabdeh nin.

Seminə əsl ilahi muhimmə ğanunonkue  iyən mıxtəlifə şikilədə Kərimə-Ğıronədə çəyku bəhs bıə.əv ıme ki,çanəndə Xıdovəndi bo məxloği hidoyətiro peyğombərış vığandəni,bəçəvon şırk iyən kufri xoto bəvon cəzo nibədoe.ım çı Xıdovəndi bəştə bandəon bıə lutfe ki,ta huccət bəvon təmom nıbu,bəvon əzob nibədoe.

Çın ayəku umutedəmon:

1-Xıdovəndi  insonış soybe-ixtoyor ofəyəşe ta əv ıştən, ıştə jimoni roy bıvıjno.

2-Xıdovənd bə hiç qıləy şəxs ya umməti hidoyəti ro nışon nıdoe,əzob nibəkay.

3-bo bəşəri səodətiro fəğət ağl vəs kardedəni.peyğombəron hidoyət həm lozıme.

وَإِذَا أَرَدْنَا أَن نُّهْلِكَ قَرْيَةً أَمَرْنَا مُتْرَفِيهَا فَفَسَقُواْ فِيهَا فَحَقَّ عَلَيْهَا الْقَوْلُ فَدَمَّرْنَاهَا تَدْمِيراً (16)

Və hafaxti bıpyimone qıləy məntəğə(milləti bəçəvon qınon xoto) həlokkəmon bəçəvon de xoş quzəroni məşğul bıə yolon əmr kardedəmon. çən,bəvədə mıxolifət iyən usyon kardedən.oxoyədə bə ilahi əzob və ğəzəbi dıço beydən. peşo əvonımon bəyənde jıe,volo kardemone.

Vəynə ayə dəvomədə ki,oxoyədə hamyeşe:huccət bə məxloği təmom nıbe, Xıdovənd bə hiçkəsi əzob nibədoe,ın ayə hamyedə:əgər ğərol bıbu ki,qıləy məntəğə camaat məhv bıbon,hukmən çəy bənav əmron iyən nəhyon boəvon təbyin kardedəmon və ehanə əvon bə əmron nıpemandon, bəvədə əvoni bə əzobi giriftor kardedəmon.

Çun umumən bəşəri camiyə yolon nosaleh iyən mol-əmvol cəm kardə kəsonin,ın ayə ilahi əmron bəvon xitob kardey zıneydə.zira əksər məxloğ bəvon tabeyin iyən çəvon fısğo-fucuron bəvon məhdud bedəni ,bəlkəm,qırd camiyə həm ebəqəte.

Çın ayəku umutedəmon:

1-bəşəri camiyədə fısğo-fucuri və fəsodi rişə,dınyopərəsti ,mol-dıvlət cəm kardey iyən eyşo-işrəte.

2-rifohtələb iyən həvəsbozə hukuməton,bə camiyədə əxloğiyə erjon suğuti iyən çı ilahi əzobi zəminəon hozzı kardedə.

وَكَمْ أَهْلَكْنَا مِنَ الْقُرُونِ مِن بَعْدِ نُوحٍ وَكَفَى بِرَبِّكَ بِذُنُوبِ عِبَادِهِ خَبِيرَاً بَصِيراً (17)‏

Nuhi  bəpeştə vey millətımon(bəçəvon qınon xoto)məhvımon karde və Xıdovəndi bəştə bandəon qınon aqah bıey və əvoni vindey kifoyət kardedə.

Vəynə ayə dəvomədə ki,qıləy tarıxiyə ğanuni bəyon kardedəbe,ın ayə hamyedə: ehanə şımə bə tarıxi qıləy muraciyət iyən ovard bıkoyn,bəvindiyon ki,həzrəte Nuh(ə)-i bəpeştə zəmini dimisə dıminə kərə həyot iyən jimon bərpo be iyən mıxtəlifə tojə ğovm iyən milləton bə məydon ome və zəmini dimisə pevolo be. əmmo bın miyono çandə qılə etnoson məhvo-nobud bin və çəvonku hiç qıləy əsər-əlomət baği nımande.

Çoko ki,zıneydon həzrəte Nuh(ə)-i zəmonədə həm de ilhi əzobi nozil bıey, qıləy yolə tufan zəmini dimış eqəte ki,ğərəz bə Nuh(ə)-i kəşti suvar bıə kəson, qırd insonon iyən hışkiyədə jiyə heyvonon məhvo-nobud bin.

Ha holədə ın ayə çokə formədə nışon doydə ki,həzrəte Nuh(ə)-i zəmon,tarıxədə qıləy tojə noxtə iyən oqardemon bıə  və de navnə nəsli rişə ğət bıey, çı bəşəri jimonədə qıləy nu və tojə fəsl iyən era oj bıə.bə tarıxiyə şoydon iyən bə Ğıroni dastonon əsos, Ad , Səmud, Mədyən iyən co ğovmon çı Nuh(ə)-i ğovmi bəpeştə çı miyoniku şıən.

Çın ayəku umutedəmon:

1-ilahi əzob fəğət bə ğıyoməti ruji ayid ni,həmonə bın dınyoədə həm kali ğovmon bə həlokət rəsəyn.

2-dəvardə tarıx bo bəşəri ımruj və vəoməy ,çı ibrəti ayinə və ovəynəy ki,bıdə əv ilahi əzobiku ğafil nıbu.

3-Xıdovəndi bəştəbandəon bıə elm iyən aqahəti, bo insonon sıxan iyən rəftoron kontrol kardeyro vey çokə amile.