484-ə hissə-İsra surə-56-59 şərifə ayəon

484-ə hissə

قُلِ ادْعُواْ الَّذِينَ زَعَمْتُم مِّن دُونِهِ فَلاَ يَمْلِكُونَ كَشْفَ الضُّرِّ عَنكُمْ وَلاَ تَحْوِيلاً (56)

Vuji:şımə ğərəz Xıdo qımon kardə (məbud hisob kardə) kəson vanqkənən. əvon nə şımə muşkilon həll kardey bəzıneyn və nə əy əvəz kardey bəzıneyn.

Həyğiyə mominon nışonəonku qıləyni,muşkilat iyən yavə rujonədə bə Xıdo təvəkkul kardeye.çımi mığobilədə kofiron iyən mışrikon və ya hətta zəyifə imoni soybon həm, bo co insonon ya bo beconinə məxloği ya bo əy mığəddəs zınə heyvonon həm,qıləy aliyə məğam ğayilin iyən qımon kardedən ki,əvon çəvon problemon həll kardey bəzıneyn.liza çı Xıdo əvəzi bəçəvon soyəx şeydən iyən çəvonku ıştə jimoni vəzyəti,əvəz bıey intizorədə bin.

In ayə bo qırd insonon qıləy xəbərdorətiye ki,bızınon ğərəz ibıə iyən ğadirə Xıdo, hiçkəs iyən hiççi ıştəku hiç qıləy zu və ğudrətış ni və çəy irodə nıbə holədə hiçki bə cokəsi zərəl rosney nibəzıne və ya çəy muşkilaton bərtərəf kardey əzıni.

Çın ayəku umutedəmon:

1-bə ğərəz Xıdo co kəson umudəvo bıey,qıləy xiyole ki,mışrikə insonon bəy giriftor bıən.

2-fəğət yolə Xıdo bo problemon bərtərəf kardey ğadire.həlbəttə ilahi ovliyaon həm de Xıdo izni jıqo koon kardey zıneydən.

أُولَـئِكَ الَّذِينَ يَدْعُونَ يَبْتَغُونَ إِلَى رَبِّهِمُ الْوَسِيلَةَ أَيُّهُمْ أَقْرَبُ وَيَرْجُونَ رَحْمَتَهُ وَيَخَافُونَ عَذَابَهُ إِنَّ عَذَابَ رَبِّكَ كَانَ مَحْذُوراً (57)

Mışrikon çı Xıdo əvəzi vanq kardə kəson(bənə İsa ya mələkon) bəştə pərvərdıqori nez bıeyro dumo vey nezə vositəonin.əvon bəçəy rəhməti umudəvon iyən çəy əzobiku tarseydən.həyğətən,pərvərdıqori əzob həzər(vəhşət) kardənine.

Zohirədə ın ayə bə məsihiyon işorə kardedə ki,həzrəte İsa-Məshi(ə) Xıdo zıneydən iyən əy pərəstış kardedən.Xıdovənd bın ayədə hamyedə ki,çəvon Xıdo zınə İsa(ə) ıştən bə Xıdo dərqonez bıey xoto,dumo vositəon nəvedə.qıləy ro ki,əy rə bə Xıdo dərqo nezkəy.madəm ki,əv ıştən həm bə ilahi lutf iyən inoyəti umudəvoe iyən çəy əzobiku tarseydə,ısə çokonə əy şımə Xıdo hisob kardeydon?

Çın ayəku umutedəmon:

1-bə Xıdo nez bıeyro,çandə qılə roon heste ki,bəbe həmməysə vey nezə roon bıvıjni.

2-Xıdovəndi rəhmət bəsə çəy ğəzəbisə bənave.liza çəy əzobi xofiku vey, bəbe bəçəy rəhməti umudəvo bıbəmon.

وَإِن مَّن قَرْيَةٍ إِلاَّ نَحْنُ مُهْلِكُوهَا قَبْلَ يَوْمِ الْقِيَامَةِ أَوْ مُعَذِّبُوهَا عَذَاباً شَدِيداً كَانَ ذَلِك فِي الْكِتَابِ مَسْطُوراً (58)‏

Və jəqo qıləy məntəğə ni ki,əmə çı ğıyoməti  bənav əy həlok məkəmon ya(bəçəvon qınon xoto) de şiddəti əzob nıkəmon.ım ilahi kitobədə(lovhi-məhfuzədə) təsbit bıə.

Bə Ğıroni ayəon əsos dınyo jimon faniye iyən bın zəmini kurədə bıə çəmə umr məhdud iyən təmom bıənine.liza ayə sıftədə hamyedə ki,çı ğıyoməti bərpo bıey bənav,qırd zəmin pevuşkiney bəbe iyən həmmə insonon həlok bəbeyn.ım bo qırd məntəğəone.

Əmmo kali məntəğonədə ki,qıno iyən fəsod əyo ziyod pevolo bıə,mumkine çı dınyo oxoy bənav əvon bə ilahi əzob iyən ğəzəbi dıço bıbon və çəvrə sakinon məhvo-nobud bıbon.qırd ımon çı alimə Xıdo palu məlume və mıəyyəne.

Çın ayəku umutedəmon:

1-dınyo jimon dınyo hiç qıləy vırədə həm bıbu,hiç kəsi əbədi iyən dayimi ni.

2-hestemoni aləmi bə oxo rəsey,qələy təsadufiyə ko məhsul ni.bəlkəm,bə ilahi irodə və tədbiri əsose.

وَمَا مَنَعَنَا أَن نُّرْسِلَ بِالآيَاتِ إِلاَّ أَن كَذَّبَ بِهَا الأَوَّلُونَ وَآتَيْنَا ثَمُودَ النَّاقَةَ مُبْصِرَةً فَظَلَمُواْ بِهَا وَ مَا نُرْسِلُ بِالآيَاتِ إِلاَّ تَخْوِيفاً (59)

Və hiççi əmənış bo ayə iyən mecuzəon vığande nıoqətışe.əmmo navnə umməton əvışon təkzib karde(və həlok bin)əmə bə Səmud ğovmi qıləy ruşinəkə moə şatur(dəvə) domone.əmmo bəy sıtəm kardeşone və əmə mecuzəon bo məxloği torsıneyro vığandemone.

Çoko ki,Kərimə-Ğıron iyən rəvoyətonədə omə,Məkkə kofir iyən mışrikon çı peyğombəriku çandə qılə mecuzəon tələb kardedəbin.min cumlə ımbe ki,əvon voteydəbin ki, peyğombər(s) çı Məkkə bandon bə telı iyən ğızıli təbdilkəy. Xıdovənd bın ayədə hamyedə:inodkorə fərdon de ın nışonəon vindey həm imon nibəvayn və əgər mecuzə de məxloği təklifi bıbu iyən əy təkzib bıkoyn,ilahi dınyəviyə əzob və ğəzəb bəvon həm şomil bəbe.çoko ki,çı həzrəte Saleh(ə)-i şatur ki, de milləti tələbi be,joqo be ki,oxoyədə Səmud ğovm bə həmonə şaturi kıştey xoto məhvo-nobud bin.

Çın ayəku umutedəmon:

1-Xıdovənde-Aləm bə harko ğadire.əmmo çəy ko bə hikməti əsose,nəinki,bə məxloği tələbi əsos.

2-İlahi mecuzəon və mığəddəsə çiyon təhğır karde,dınyəviyə əzob dumo ıştə vardedə.