503-ə hissə-Kəhfi surə-22-26 şərifə ayəon

503-ə hissə

سَيَقُولُونَ ثَلَاثَةٌ رَّابِعُهُمْ كَلْبُهُمْ وَيَقُولُونَ خَمْسَةٌ سَادِسُهُمْ كَلْبُهُمْ رَجْماً بِالْغَيْبِ وَيَقُولُونَ سَبْعَةٌ وَثَامِنُهُمْ كَلْبُهُمْ قُل رَّبِّي أَعْلَمُ بِعِدَّتِهِم مَّا يَعْلَمُهُمْ إِلَّا قَلِيلٌ فَلَا تُمَارِ فِيهِمْ إِلَّا مِرَاء ظَاهِراً وَلَا تَسْتَفْتِ فِيهِم مِّنْهُمْ أَحَداً (22) 

Rəyrə bəvoteyn(Əshabi-Kəhf) se nəfər bin,çəvon sıpə çominə qıləbe və(i hissə) voteşone:penc xonəxo bin,şəşminə qılə çəvon sıpə be.(ım bedəlilə sıxanon bənə) bə noməlumə dəvardə zənni tiy ğandeye və (co qılə)voteydən:haft nəfər bin iyən çəvon həştminə qılə sıpə be.vuji:çımı pərvərdıqor çəvon ədədi vey çok zıneydə. iyən çəvon ədədiku qıləy kamə dastə xəbədoe.çən,ğərəz oşko iyən zohirədə bıə çiyon deəvon mıbohisə məkə və çəvon barədə cokəsonku nəzə məpi.

Əshabi-Kəhfi macəra bəyoni dəmomədə,ın ayə çı naviku xəbə doydə ki,çı məxloğiku i dastə bə ın ilahi ovliya və Xıdopərəstə qrupi məram iyən hədəfi dığğət kardey əvəzi,çəvon ədəd və miğdori barədə deyənde hesı-pes iyən mıbohisə kardedən və hakəs qıləy çi votedən.qıləy holədə ki,çəvon ədəd se,penc  ya haft nəfər bıey, çəvon imon,əməl iyən hicrət kardeyədə hiç qıləy rolış ni və ya çəvon miğdori ziyod ya kam bıey çəvon əncom doə yolə koyədə hiç qıləy təsirış ni.əmmo məələsəf və təəssıf ki,umum-məxloğ bə zənn iyən qımoni dıço bıən iyən dılışon heste hətta ıştə nızınə çiyon barədə qıləy sıxan bıvoton iyən ıştə nəzə nışon bıdəyn.

Xıdovənde-Aləm bın ayədə bə peyğombər(s)-i hamyedə:bın koyədə de camaati hesı-pes məkə iyən çəvonku hiççi sıvol məkə.əvoni bəçəvon ıştə holi vadə ki,Xıdovənd zıneydə əvon çand nəfərin.

Çın ayəku umutedəmon:

1-ıştə nızınə çiyon barədə deştə zənn və qımoni qıləy sıxan məvotəmon iyən çı beməno və befoydə mıbohisəonku bə diyəro bımandəmon.

2-tarıxi hadisəon təhğığ kardeyədə,çı qıləy hərəkəti hədəfi barədə fikkəmon, nəinki, çı şəxson iyən rujon miğdori barədə.

وَلَا تَقُولَنَّ لِشَيْءٍ إِنِّي فَاعِلٌ ذَلِكَ غَداً (23) 

Çı hiççi iyən hiçko barədə məvot ki,əy maşki əncom bədom.

إِلَّا أَن يَشَاءَ اللَّهُ وَاذْكُر رَّبَّكَ إِذَا نَسِيتَ وَقُلْ عَسَى أَن يَهْدِيَنِ رَبِّي لِأَقْرَبَ مِنْ هَذَا رَشَداً (24) 

Fəğət bıvot inşaallah (ehanə Xıdo bıpyo) və əgər (ımi votey)yodo bekarde (bəştı yod omə cəğın) ıştə pərvərdıqori zikrkə və bıvot:”umu heste çımı pərvərdıqor mıni bə nezə ro hidoyətkəy”.

In ayəon qıləy kulliyə dəsturi barədə bəhs kardedə.harçənd çın dəsturi iiminə muxatəb islomi peyğombəre,əmmo həyğətədə bə qırd mısılmonon xitob kardedə ki, bəbe bəy rioyətkəyn.

Bə ın ayəon əsos qıləy mominə inson bəbe bə vəomə ayid bıə koonədə əy bəyon kardə faxti,”inşaallah” kəlimə bəştə zıvon carikəy və həmonə iborə zikrkəy.ım bəçəy xotoe ki,bəbe həm momin bızıno və həm ə məsəkəs dərəso ki,çımı votə çiyon, bəvədə bə həyğət bərəse ki,Xıdovənd həmçinin əy irodəkəy və əy bıpyişe və ehanə əv nıpyişe hiç qıləy ko bə əməl nibome.deqıləy co iborəti imoni əhliıştə sıxanədə bəy təkyə kardə sıxan “inşallah” kəliməy.çoko ki,Kərimə-Ğıron həm ıştə ayəonədə bənə Yəğub(ə),Şueyb(ə),Xızr(ə) iyən İsmoyil(ə) –i bıə bəzi peyğombəron ıştə sıxanonədə ın iborəti zikr kardeydən.

Ruşine ım iborə votey,de zıvoni ləğ-ləğə kardey ni və qıləy mısılmoni bovə iyən bəsirəti bəyon kardedə.harçənd har qıləy fərdi irodə iyən ixtiyorış heste.əmmo  ruşine ki, biyədə və daştədə bıə har qıləy hadisə bə fərdon irodə tabe ni və bəvədə çandə qılə illət iyən amilon rolışon heste.de qıləy co iborəti Xıdo izn nıbə holədə hiç qıləy hadisə bə əməl omeydəni.

Çın ayəonku umutedəmon:

1-bəştə zu iyən irodə təkyə məkəmon,ıştəni mıstəğil məzınəmon iyən bə ğərol omeyədə Xıdo çı yodo beməkəmon.

2-peyğombəron əgər ıştə jimoni koonədə bə ilahi hidoyəti ehtiyocışon hestebu, çən, əmə adiyə insonon çoko? liza hejo bəbe Xıdoku tələbkəmon ki,əməni bə vey çokə ro səbərokəy.

وَلَبِثُوا فِي كَهْفِهِمْ ثَلَاثَ مِئَةٍ سِنِينَ وَازْدَادُوا تِسْعاً (25) 

Əvon ıştə mağarədə sesa sor mandin və(həmçinin) nəv sor əlovə.

قُلِ اللَّهُ أَعْلَمُ بِمَا لَبِثُوا لَهُ غَيْبُ السَّمَاوَاتِ وَالْأَرْضِ أَبْصِرْ بِهِ وَأَسْمِعْ مَا لَهُم مِّن دُونِهِ مِن وَلِيٍّ وَلَا يُشْرِكُ فِي حُكْمِهِ أَحَداً (26) 

Vuji: Xıdovənd çəvon mağarədə mandə soron vey çok zıneydə.osmonon iyən zəmini ğeyb bəy məxsuse.çı əməs iyən vindedə.bo milləti ğərəz əv hiç qıləy koməqəkə ni və əv hiç kəsi(ıştə) hukumətədə boştə şərik peqətedəni.

In ayəon ijən bə Əshabi-Kəhfi macəra oqardeydə və hamyedə:de ilahi irodə iyən tələbi əvon sesa sor həmonə koçədə bəyji mandin.təbiiye nə əvon ıştən və nə cokəson çəvon əyo çand sor hıteyku xəbəşon nıbe.fəğət Xıdovəne-Aləm çəvon vəzyətiku aqah be və əvonış qıləy şərayitədə hifzış karde ki,sesa sor bədiqə çı haniku pemin.

Təbiiye sesa sor mıddətədə qıləy dastə bəyji mandey,əv həm hiç qıləy xorək və ov nıhardey, çı ilahi mecuzəonku qıləyniye.Xıdovənde-Aləm bo Əshabi-Kəhfi hərəkəti əbədi oqəteyro,jıqo qıləy koş karde ta bo vəomə milləti qıləy ibrəti dərs bıbu iyən ın macəra tarıxədə bımando.

Çın ayəonku umutedəmon:

1-har vırədə rəğəm iyən ədədi bəyoni çı movzu dırıstə təhlilədə rolış heste,bəbe dəğiğ və dırıst zikr bıbu.Əshabi-Kəhfi macəradə  çəvon hani zəmon Xıdovəndi ğudrəti dərk kardeyədə ziyodə rolış heste.

2-Xıdovənd həm malik iyən həm hukmdore və həm çı qırd aləmi oşko və punhoni zıneydə. çən,çəy sultə jiku fərol kardey iyən bə cokəson pənoh bardey nibəbe, bəlkəm çımi əks bəbe çı cokəsonku bəçəy tərəf dəviti iyən çəyku fəğət koməq tələbkəy.