505-ə hissə-Kəhfi surə-32-36 şərifə ayəon

505-ə hissə

‏ وَاضْرِبْ لَهُم مَّثَلاً رَّجُلَيْنِ جَعَلْنَا لِأَحَدِهِمَا جَنَّتَيْنِ مِنْ أَعْنَابٍ وَحَفَفْنَاهُمَا بِنَخْلٍ وَجَعَلْنَا بَيْنَهُمَا زَرْعاً (32) 

(Ha pəyğombər ha!)Boəvon çı dıqlə merdi (sərquzəşti) misoli bıjən ki,bo çə dıqlə qıləyni, dıqlə anqı boğ ğərol domoe.və çəy qırdo de xımoə do puşnemone və çə dıqlə boği miyono (qıləy) hi ğərol domoe.

كِلْتَا الْجَنَّتَيْنِ آتَتْ أُكُلَهَا وَلَمْ تَظْلِمْ مِنْهُ شَيْئاً وَفَجَّرْنَا خِلَالَهُمَا نَهَراً (33) 

Har dıqlə boği ıştə məhsulış doe və hiççi çəyku bəkam nıbe iyən çə dıqlə miyono qıləy rəvonə ru soxtemone.

In ayəon iyən çımon bəpeştə bıə ayəon qıləy zərbul-misole ki,bo camiyə dıqlə qrupi jıey bıə.qıləy dastə dınyoprəstə camaatin ki,de ilahi lutf iyən neməton vositə bə sərvət və mol-dıvləti rəsən,əmmo  bə ğurur,təkəbbır iyən oxoyədə bə kufri  giriftor bıən.co dıminə qrup təyliyə dast və fəğırə fərdonin ki,hejo bə sərvətinə fərdon təhğır iyən məsxərə məruz mandən və çəvon tərəfiku xar iyən exroc hisob bedən. qıləy holədə ki,ım şəxson imoni cəhəto Xıdovəndi palu yolə məğam və vırəşon heste və çı dınyopərəsti əvəzi,axırəti bə dast vardey dumon.

Çın ayəonku umutedəmon:

1-ov, tul, həşi,doon iyən hi və plantasiyəon,ımon qırd çı Xıdovəndi mılke iyən həyğiyə kaştevon həm Xıdoe.

2-çı imkonatonku bəhrə bardeyədə çı insonon fərğ,ilahi hikmətonkue.ım tafuton bəbe bə sərvətinə şəxson fəxr kardey iyən bə fəğıron məyusəti boyis nıbu.

‏ وَكَانَ لَهُ ثَمَرٌ فَقَالَ لِصَاحِبِهِ وَهُوَ يُحَاوِرُهُ أَنَا أَكْثَرُ مِنكَ مَالاً وَأَعَزُّ نَفَراً (34)‏

Və bo əy ziyodə məhsul hestebe.çən,bəştə deəy sıxan kardə dusti voteşe:mı ıştısə mol-dıvlət iyən odəmon cəhəto vey zumandim”.

وَدَخَلَ جَنَّتَهُ وَهُوَ ظَالِمٌ لِّنَفْسِهِ قَالَ مَا أَظُنُّ أَن تَبِيدَ هَذِهِ أَبَداً (35) 

Və qıləy holədə ki,əv bəştə ıştən sıtəmkor be,bə boğ varid be (və de məğrurəti) voteşe: hiç  fik kardedənim ki,ım boğ məhv bıbu.

Vəynə ayəon dəvomədə ki,çı boğ iyən hi və çəvon doon təsviri tərsim kardedəbe,ın ayəon hamyedə:çın boğon soyb bə məğrurəti dıço be və ıştə jıqo qıləy imkonatonış nıbə dusti mığobilədə fəxr kardedəbe.əv jıqo təsəvvır kardedəbe ki,çəy boğon hejo dıjd iyən çı dınyo neməton hejo əbədi bəmandeyn və çəy həmişə mol-dıvlətış baği bəmande. qıləy holədə ki,bə çı Xıdoku ğafil bıey iyən bə qıno mırtəkib bıey xoto, joqo qıləy fik çəy sədəbe və hiçfaxti ım həyğət bıəni.

Çın ayəonku umutedəmon:

1-bə dınyo iyən bəçəy sərvət və ğudrəti dıl dəvastey,çı zılm iyən tuğyoni zəminə hozzı kardedə.

2-eqoyistəti, fəxr kardey iyən cokəson təhğır kardey,bə cokəson zılm kardey bənav, bəştə ıştəni zılme. zira odəmi bə heyvonati nez kardeydə iyən çı Xıdoku bə diyəro kardeydə.

وَمَا أَظُنُّ السَّاعَةَ قَائِمَةً وَلَئِن رُّدِدتُّ إِلَى رَبِّي لَأَجِدَنَّ خَيْراً مِّنْهَا مُنقَلَباً (36) 

Və qımon kardedənim ki,ğıyomət bərpo bıbu və ehanə bəştə pərvərdıqori tərəf həm oqordıney bıbum,şək ni çın(boğisə) çoki boştə pəydu bəkam.

In ayə bə dınyo dıl dəvastey iyən çəy neməton dılədə sərməst bıey işorə kardedə və hamyedə: çın fərdon ko bəvrə rəseydə ki,əvon ğıyoməti ruji bə həşə jeydən iyən hestemoni fəğət bə ın rədəvardə dınyo məhdud kardedən.təkəbbırəti və yolə məğami dumo bıey tələbi ruhiyyə bəvonədə joqo ziyode ki,bə mominon voteydən, əgər həm fərzkəmon şımə sıxanon dırıst və səhih bıbu və ğıyomət bərpo bıbu, ijən əmə rifoh iyən asayişədə bəbemon,nəinki,şımə.

Jıqo bızın əvon çı imkonatonku istifodə kardey fəğət bəştə ayid zıneydən və hejo bəbe Xıdovənd vey çokə çiyon çəvon ixtiyorədə ğərol bıdəy.jıqo bızın əvon aliyə irğin və zotən hejo  çokə məğamədə bıey ləyoğətışon heste,ısət çı dınyo bıbu ya axırətədə. qıləy holədə ki,axırət ın dınyo əks kardə vırəy,nəinki,çəy dəvom.və ilahi ədolətinə məhkəmədə bə insonon ıştən əməlon əsos,bəvon ya xeyə cəzo ya şərə cəzo doey bəbe,nəinki,bəçəvon sərvət iyən ğudrəti əsos.

Çımisə əlovə bəşəri dınyoədə bıə qırd imkonat iyən istedadon çı Xıdovəndi lutf iyən fəzlikue, nəinki,Xıdo bə bəşəri ğarzıxoe.əmmo de təəssıfi kofirə fərdon çın məsələku ğafilin.

Çın ayəku umutedəmon:

 1-sərvət iyən ğudrət ehanə çı imoni məsir və royədə ğərol nıqəto,de kufr iyən inkori obərəxe iyən insoni bə cəhəndım bəbarde.

2-bemənoə oruzo iyən umudon hiç qıləy foydəş ni,bəbe əməlkəy ta bə vəhışt bışi.