506-ə hissə-Kəhfi surə-37-44 şərifə ayəon

506-ə hissə

قَالَ لَهُ صَاحِبُهُ وَهُوَ يُحَاوِرُهُ أَكَفَرْتَ بِالَّذِي خَلَقَكَ مِن تُرَابٍ ثُمَّ مِن نُّطْفَةٍ ثُمَّ سَوَّاكَ رَجُلاً (37) 

Çəy de əy qəp jıə dusti voteşe:ayə bə tıni çı tuliku, çən peşo çı nutfəku ofəyə və çəy bədiqə tıni qıləy komilə(bədəninə) insoni şikilədə ğərol doə Xıdo kofir bedəş?

لَّكِنَّا هُوَ اللَّهُ رَبِّي وَلَا أُشْرِكُ بِرَبِّي أَحَداً (38) 

Əmmo(az votedəm:) ə Xıdoe çımı rəbb və mı hiçkəsi boəy şərik ğərol nibədom.

Dəvardə proqramədə votemone ki,Kərimə-Ğıron dı nəfər çəvonku qıləyni sərvətinə kofir iyən co qıləyni dastış təyli bıə momini deyənde bıə votemoni bəyon kardedəbe. ğıyoməti inkor kardə məğrurə kofiri sohbəton,vəynə bərnomədə məsemone. bın ayəonədə çəy mominə dusti cəvobi bəməsemon ki,boçəy eqoyistəti iyən məğrurəti darışteyro bəy voteydə ki,tı çı tul iyən beçizə nutfəku bə əməl oməş ki, ımruj jıqo qıləy komilə merd bıəş.ayə tı ıştən-ıştənı ofəyə ki,jıqo bə təkəbbırəti iyən məğrurəti dıço bıəş iyən tıni ofəyə Xıdo inkor kardedəş?

Odəmi dığğəti bəştə cəlb kardə çi ıme ki,həmonə kofirə merd ıştə sıxanonədə Xıdoş inkor kardə nıbe və v fəğət ğıyomətış təkzib kardəbe.əmmo çəy mominə dust əy Xıdo inmor kardə kofir hisob kardedə.zira miadi bə həşə jıey,həyğətədə Xıdovəndi sənibəton xılğəti ğudrəti inkor kardey mənoədəy və jıqo etığod Ğadir iyən Xalığə Xıdo təkzibi mənoədəy.

Çın ayəonku umutedəmon:

1-bə sərvət iyən moli dıl dəbastey,insoni bə miad iyən məbdə bıə kufri zəminə hozzı kardedə. liza bəbe hejo bə ın xətəri dığğətkəy.

2-de kofiron bəhso-cədələdə bəbe qıləy zumand istidlol iyən məntığ bıbu ta çəvon hidoyəti zəminə hozzı bıbu.

وَلَوْلَا إِذْ دَخَلْتَ جَنَّتَكَ قُلْتَ مَا شَاء اللَّهُ لَا قُوَّةَ إِلَّا بِاللَّهِ إِن تُرَنِ أَنَا أَقَلَّ مِنكَ مَالاً وَوَلَداً (39) 

Çən, çıro bəştə boği dəşeyədə nıvote: maşalla və ğərəz Xıdo hiç qıləy ğudrət ni? ehanə mıni mol iyən əvlodi nəzəku ıştəsə beji zıneydəşbu?

فَعَسَى رَبِّي أَن يُؤْتِيَنِ خَيْراً مِّن جَنَّتِكَ وَيُرْسِلَ عَلَيْهَا حُسْبَاناً مِّنَ السَّمَاءِ فَتُصْبِحَ صَعِيداً زَلَقاً (40) 

Çən, umu heste çımı pərvərdıqor ıştı boğisə vey çoki bəmı ətokəy və çı osmoniku bo həmonə boği qıləy hisob bıə əzob bıvğando ta əvırə qıləy bebeməy və sofə zəmin iyən fırsiyə vırə bıbu.

أَوْ يُصْبِحَ مَاؤُهَا غَوْراً فَلَن تَسْتَطِيعَ لَهُ طَلَباً (41) 

Ya çəy ov hışk bıbu və hiçfaxti əy pəydu kardey nıznoş.

Çə dı nəfəri diyaloqi dəvomədə,mominə fərd voteydə:boçi ım boğ iyən neməton çı Xıdo tərəfiku zıneydəniş və çəy şukri bə vırə rosneydəniş? bəqəm zıneydəniş ki, həmmə çiyon de Xıdovəndi ğudrəti bə əməl omeydə.ayə qımon kardedəş çı boğ iyən çəy doon həyğiyə malik iyən soyb tı ıştəniş və Xıdo bəvədə hiç qıləy rolış ni? Qıləy holədə ki, əslə kaştevon Xıdoe və tı fəğət çəy donə zəmini tuli dılədə kaştə iyən bəy diyə kardə. vı jıqo bıə nıbe,ov,tul,donə,həşi,vo iyən voş ımon həmmə çı Xıdovəndi tərəfikue və əy qırd çı ım do iyən beməyon təkamoli istedadonış ğərol doə. ıştı çiçı heste çəy tərəfikue iyən çəy ğudrət nıbə holədə hiççi bə vucud omeydəni.

Əv dəvomədə votedə:ehanə Xıdo bıpyişe bəmı ziyodə boğ iyən sərvət doey bəzıne iyən ıştı be-nıbey ıştı dastiku bə dumo sıey ğudrətış heste.çən,bəy dıl dəmabast iyən məğrur məbi ki,hiççi ıştı dastədə ni.ğasbu qıləy osmoniyə avəçəkə boyis bıbu ıştı boğı bısutno ya qıləy ğəhəti bıko iyən ıştı qırd zəmini hışkəy bınəy.

Çın ayəonku umutedəmon:

1-de təbyəti ğəşənqə mənzərəon iyən de təbiiyə neməton rəftorədə,bəbe Xıdo bəyod dənəmon iyən əy de zıvoni zikrkəmon.

2-mominə inson bəştə dasti təyli bıey xoto dəboxtəni iyən ıştəni zəyif  hiss kardedəni. zira bə Xıdo təvəkkulış kardə.

وَأُحِيطَ بِثَمَرِهِ فَأَصْبَحَ يُقَلِّبُ كَفَّيْهِ عَلَى مَا أَنفَقَ فِيهَا وَهِيَ خَاوِيَةٌ عَلَى عُرُوشِهَا وَيَقُولُ يَا لَيْتَنِي لَمْ أُشْرِكْ بِرَبِّي أَحَداً (42) 

Və(oxoyədə ilahi əzob ome rəse) çəy bəhrə əhotə be.(çəy boğ məhv be).çən,əv jıqo be ki, bo boği kardə xarcon xoto,ıştə dıqlə dasti(de həsrəti) bəyənde jedəbe. qıləy holədə ki,həmonə(boğ) bəsə pojəonsə rıjiyə be və əv votedəbe:ey kaş hiçkəsi boştə pərvərdıqori şərik qətəm nıbe.

وَلَمْ تَكُن لَّهُ فِئَةٌ يَنصُرُونَهُ مِن دُونِ اللَّهِ وَمَا كَانَ مُنتَصِراً (43) 

Və hiç qıləy qrup nıbe ki, bəy çı Xıdo(ğəzəbi)vədə koməqkəy və ıştən bəştə koməq kardey zıneydənıbe.

هُنَالِكَ الْوَلَايَةُ لِلَّهِ الْحَقِّ هُوَ خَيْرٌ ثَوَاباً وَخَيْرٌ عُقْباً (44) 

Əyo(sobit be ki) viloyət iyən ğudrət fəğət bə Xıdo məxsuse və vey çokə mıkofot iyən veyçokə ağıbət çəy palue.

Çı dıqlə şəxsi votemon ki,çəvon qıləy momin be və co qıləyni kofir be,bə oxo rəse. əmmo həmonə kofirə merd ıştə məğrurəti iyən kofirətiku dast kəşedənıbe iyən ıştə inkorədə mandəbe.ilahi ğəzəb ome rəse və çəy kaştemoni sahəonış qırd məhvış karde. jıqo ki, həmonə korfirə merd ım səhnəon vindeyədə,bo ım boği anəndə xarc kardeyro, həsrət hardedəbe  və çəy daston bə hiç qıləy vırə rəsedənıbe.

Bın zəmon sərəse ki,əv səhvış kardə və voteşe:ey kaş az ğafil mandə nıbim iyən hiçkəsım bo Xıdo şərik ğərolım doə nıbe iyən həmmə çiyonım çı Xıdo tərəfiku zınəmbe. əmmo həni peşonə peşmonçəti hiç qıləy foydəş nıbe iyən hiçki bəy koməq kardey zıneydə nıbe.iyo be ki,boəy ruşin be qırd koon yolyəti və viloyət Xıdovənde-Xalıği dastədəy.çoko ki,ğıyoməti ruj həm jıqoe iyən çı həmmə koon xəy iyən şərə cəzo çı Xıdo dastədəy.

Çın ayəonku umutedəmon:

1-ilahi cəzo fəğət bə axırəti ayid ni.qahi faxti həmonə bın dınyoədə həm ilahi əzob bə məğrur iyən yoləşəxə insonon soyəx omeydə.

2-ixtisodi koon təhlilədə dınyopərəstəti,Xıdo çı yodo bekardedə iyən ilahi məşiyyət və irodə ıştə nəzədə qətedəni.