508-ə hissə-Kəhfi surə-50-53 şərifə ayəon

508-ə hissə

وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ كَانَ مِنَ الْجِنِّ فَفَسَقَ عَنْ أَمْرِ رَبِّهِ أَفَتَتَّخِذُونَهُ وَذُرِّيَّتَهُ أَوْلِيَاء مِن دُونِي وَهُمْ لَكُمْ عَدُوٌّ بِئْسَ لِلظَّالِمِينَ بَدَلاً (50) 

Və(bə yod biyə) ə zəmoni ki, bə məlayikon votemone:bə Odəmi səjdəkənən. çən, ğərəz İblisi həmməy səjdəş karde.əv çı cıni (toyfəku) be və bəştə pərvərdıqori fərmoni nıpemande.ayə(ijən) əy və çəy nəsli çımı əvəzi boştə yol vıjniyedon? Qıləy holədə k,əvon şımə deşmınonin. sıtəmkoron çı yavə çi Xıdo əvəzi vıjniyəşone.

Çı məlayikon bə Odəmi(ə)-i səjdə kardey macəra iyən şəytoni bə Xıdovənde-Aləmi əmri nıpemandey macəra Kərimə-Ğıroni çandə qılə vırədə bəhs bıə və har qıləyni bə qıləy movzu təkyəş heste.ın ayə hamyedə:qımon məkənən ki,ım macəra çı xılğəti sıftədə bə əməl omə iyən təmom bıə və həni şəytoni de şımə koş ni. bəlkəm, umumən şəyton çı mələkon cinsiku nıbe və əv çı cıni toyfəku be.əv həm bənə co cınon jen-əğıli xıvand bıey zınedə iyən çəy qırd nəslo-zurriyə həm deşmə insonon deşmonin və hejo əvon bəşmə vəsvəsə iyən şıməni bə dast dənoydən.

In ayə xəbərdorəti doydə ki,boçi şımə mığət niyon və bə Xıdo əmron pemandey əvəzi, bə şəytoni sıxanon quş doydon?ım ko bəştə ıştən nəfsi qıləy zılme və şəytoni çı Xıdo əvəzi vıjniye,qıləy yavə iyən bə xoş nomə koe ki,ın dastə zolımon bəy mırtəkib bedən.

Çın ayəku umutedəmon:

1-çı məlayikonku bəpe bıə iyən de Xıdo əmri bəy səjdə kardə bıə inson,çıro hətta boəy səjdə kardeyro hozzı nıbə  bə şəytoni muti bedə?

2-şəyton bə Odəmi(ə) səjdə nıkardey xoto ilahi dəstqoku xaric be.çən,Xıdovənd de nımoj nıvotə iyən bəy səjdə nıjardə kəson çokonə rətfor bəkay?

‏ مَا أَشْهَدتُّهُمْ خَلْقَ السَّمَاوَاتِ وَالْأَرْضِ وَلَا خَلْقَ أَنفُسِهِمْ وَمَا كُنتُ مُتَّخِذَ الْمُضِلِّينَ عَضُداً (51) 

Az əvonro(İblis və çəy fərzəndon) nə çı osmonon iyən zəmini və nə çəvon ıştəni xığəti faxti şoydom qətəni iyən az (məxloği) bə zəlolət eğandə kəson boştə koməq peqəteydənim.

Navnə ayə dəvomədə ki,çı şəytoni viloyət və hukuməti inkor kardedəbe,ın ayə hamyedə: şəyton iyən çəy tərəfdoron çı dınyo xılğətədə hiç qıləy rolışon bıəni iyən çı xılğəti sırr və rəmzonku hiç qıləy xəbəşon bıəni ta əvon deştə ğudrəti bə hestemoni aləmi koon dəxolətvə mıdoxilə bıkəyn. şəyton iyən çəy tərəfdoron bənə şımə qıləy zəyif iyən noaqahə movcudin ki,hiç faxti bəşmə koməq kardey iyən şımə problemon həll kardey nibəzıneyn.bəlkəm,umumən çı harcurnə fəsod və zılmi mənşə, şəyton iyən çəy dasti jiyədə bıə kəsonin və çəvon çı hestemoni aləmi sistemədə hiç qıləy vırəşon ni.bə mələkon əks ki,Xıdovənd çı dınyo iyən insoni koon idorə kali vırəonədə bəvon aspardəşe iyən əvon çı hestemoni aləmi xıdmətçiyon bə hisob omeydən.

Çın ayəku umutedəmon:

1-yolyəti iyən viloyət,bə bəşəri Xalıği məxsuse və sovə əy hiçkəsi bə insoni viloyətış ni.

2-Xıdo royədə hərəkət kardə kəson,bənə Xıdo çı zolımonku koməq tələb kardedənin iyən ıştə istiğlali hifz kardedən.

وَيَوْمَ يَقُولُ نَادُوا شُرَكَائِيَ الَّذِينَ زَعَمْتُمْ فَدَعَوْهُمْ فَلَمْ يَسْتَجِيبُوا لَهُمْ وَجَعَلْنَا بَيْنَهُم مَّوْبِقاً (52) 

Və(ğıyoməti ruji bə yod dənə) qıləy ruj ki, (Xıdovənd bə mışrikon) bəvote:bomı şərik fik kardə(vıjniyə) kəson vanqkənən(ta bəşmə koməqkəyn). çən, (mışrikon)əvoni sədo bəjeyn.əmmo (çəvon) cəvobi nibədon.və əmə çəvon miyono qıləy həlokəti də(vırə) ğərol bədomon.

وَرَأَى الْمُجْرِمُونَ النَّارَ فَظَنُّوا أَنَّهُم مُّوَاقِعُوهَا وَلَمْ يَجِدُوا عَنْهَا مَصْرِفاً (53)‏

Və qınokoron(ğıyoməti ruji) cəhəndımi otəşi bəvindeyn.çən,dəbərəseyn ki,əyo ebəqıniyen və bo fərol kardey qıləy ro pəydu nibəkayn.

Vəynə ayəon dəvomədə ın ayə hamyedə:bə şəytoni pemande iyən çəy sultə boştə ğəbul kardey, insoni bə şırk iyən çı ibıə Xıdoku bə diyəro mandey giriftor kardedə. çı Xıdo əvəzi məxloğ ıştə koonədə bə sərvətin iyən zumandə şəxson pemandedən iyən əvoni sıtoyiş kardedən.qıləy holədə ki,ğıyoməti ruji joqo şəxson bo ıştəni nicot doeyro hiç qıləy ğudrətışon nibəbe,ısət çı bımando cokəson.

Umumən ğıyoməti ruji ğərəz Xıdo hiç qıləy ğudrəti soyb, bə qıləy dardi dəvo kardey nibəzıne və hakəs dınyoədə sovə Xıdo bə hakəs iyən bə harçi soyəx şıəbu, həmonə ruji avarə və sərqərdon bəmande.zira harçi bıpyişone iyən əy vanq bıjənon, bəvon hiç qıləy cəvob doey əbıni və çəvon vırə çı həlokəti də və cəhəndıme.

Çın ayəonku umutedəmon:

1-ehanə Xıdo vanq bıjənəmon, cəvob bəməsemon,ısət çı dınyo bıbu ya axırətədə. əmmo əgər cokəson sədokəmon mumkine dınyoədə bəmə cəvob bıdo, əmmo ğıyoməti ruji çəvon bəmə cəvob doey ğudrətışon nibəbe.

2-şırki rişə beəsosə fikon və xiyolonin.mərıfətin,ağılmand iyən şuurinə insonon hiçfaxti bə şırki dıço bedənin.