509-ə hissə-Kəhfi surə-54-56 şərifə ayəon

509-ə hissə

وَلَقَدْ صَرَّفْنَا فِي هَذَا الْقُرْآنِ لِلنَّاسِ مِن كُلِّ مَثَلٍ وَكَانَ الْإِنسَانُ أَكْثَرَ شَيْءٍ جَدَلاً (54) 

Və bərosti bın Ğıronədə(həxı bo məxloği bəyon kardeyro) de mıxtəlifə bəyoni harcurnə misol vardəmone.əmmo(de ın holi) inson har çiysə vey mıcodilə(mıbohisə) kardedə.

Vəynə proqramon dəvomədə iyən kofiron bə ilahi əmron nıpemandey barədə bıə dəvardə bəhsonku  nəticə peqətey unvanədə,ın ayə hamyedə:Xıdovənd Kərimə-Ğıronədə çı dəvardə milləton və çəvon tel iyən şinə jimoni mıxtəlifə nımunəonku vardəşe ta bo hozzı bıə dılon həxı ğəbul kardey iyən pand iyən ibrət peqətey boyis bıbu. əmmo de təəssıfi kali insonon de həxı canqo-cidol kardedən iyən boəy ğəbul kardey hozzı nin.əvon bo məntıği iyən istidloliyə sıxan votey əvəzi,de canqo-cidoli məşğul bedən.əvon qımon kardedən ıştə vijdoni orom kardey bəzıneyn iyən boştə itoət nıkardey xoto,qıləy cəvob doey bəzıneyen.

Çın ayəku umutedəmon:

1-Kərimə-Ğıron bo məxloği hidoyət və irşodiro,çı dəvardə etnoson mıxtəlifə şəxs iyən tarıxi vardedə iyən çı misoli zıvoniku bəhrə bardedə.

2-ehanə həxı ğəbul kardey ruhiyyə insonədə nıbu,çı həxə sıxani mığobilədə canq kardedə və çanəndə misol ziyod jıey bedə,anəndə həm cidolış ziyod bedə.

وَمَا مَنَعَ النَّاسَ أَن يُؤْمِنُوا إِذْ جَاءهُمُ الْهُدَى وَيَسْتَغْفِرُوا رَبَّهُمْ إِلَّا أَن تَأْتِيَهُمْ سُنَّةُ الْأَوَّلِينَ أَوْ يَأْتِيَهُمُ الْعَذَابُ قُبُلاً (55) 

Və kon çi məxloği bo əvon ilahi hidoyət omey bəpeştə çı imon vardey iyən ıştə pərvərdıqoriku istiğfor tələb kardeyku oqətedə? Ğərəz ımi ki,(piyeşone) Xıdovəndi çı navkonə umməti barədə (ki,ilahi əzob be) boəvon həm booy yaanki, əzob çəvon vədə ğərol bıqəto.

In ayə bə həxı  dərəsə iyən çəy vədə mandə,əmmo bo əy ğəbul kardey hozzı nıbə inodkorə kofiron işorə kardedə.Jıqo bızın əvoni çı həxə vədə xaze iyən muti kardə çi fəğət ıme ki,çı navkonə milləton tale bəçəvon soyəx booy və əvon hisskəyn ki,bə həlokəti tərəf şedən yaanki,bıvindon ilahi əzob çı osmon iyən zəminiku nozil bedə, bəvədə imoni iğrorkəyn.əmmo ruşine ki,jıqo qıləy imoni hiç erjo-ğeymətış ni.zira bın holətədə imon bə iztiror və məcbur mandey xotoe,nəinki,ixtiyori.

In ayə həyğətədə qıləy bəşorət və iqlə tars və xəbərdorəti doydə.bəşorət ıme ki, ehanə tobəkəyn iyən ıştə dəvardə koonku oqardon və istiğforkəyn,Xıdovənde-Aləm həm əvoni bəbaxşe və çəvon tobə ğəbul bəkay.və çəşnavi ıme ki,əgər çı həxı mığobilədə bımandon,şımə həm bənə navnə etnoson bə həlokət bərəsiyon.əmmo inodkorə kofiron bə ın tars iyən bəşorəton hiç qıləy dığğət kardeydənıbin və həxı ğəbul kardedənıbin.

Çın ayəku umutedəmon:

1-Xıdovənd de osmoniyə kitobon vığande iyən peyğombəron məbus kardey,çı hidoyəti roş bə məxloği nışon doə iyən huccətış bəvon təmom kardə ta həni bo hiçkəsi hiç qıləy bəhonə vırə nımando.

2-qınoonku istiğfor kardey,bə ilahi əzobi nozil bıey mane bedə.

3-moyizə iyən istidlolon həmmə vırədə bəvəc omeydəni.qahi faxti əzob iyən cəzo həm lozıme.

وَمَا نُرْسِلُ الْمُرْسَلِينَ إِلَّا مُبَشِّرِينَ وَمُنذِرِينَ وَيُجَادِلُ الَّذِينَ كَفَرُوا بِالْبَاطِلِ لِيُدْحِضُوا بِهِ الْحَقَّ وَاتَّخَذُوا آيَاتِي وَمَا أُنذِرُوا هُزُواً(56) 

Və əmə peyğombəronro sovə(bo mominon)bəşorət ədə iyən(bo qınokoron) tars doəkəs co çi vığandəmon ni.əmmo kofiron de botıli vositə bo həxı jıeyro mıborizə bardedən və  çımı ayə iyən nışonəon və deçəy vositə tars doey bıə çi,bə məsxərə noydən.

Navnə ayəon dəvomədə ın ayə bə islomi peyğombəri(s) dılvandi doydə və hamyedə: ha pəyğombər ha! nobənıbı çı kofiron kufr kardey bəştı ğəmqinəti boyis bıbu, zira peyğombəron vəzifə fəğət çəşnavi doey iyən torsıneye və məxloğ həm çı həxı ya kufri ğəbul kardeyədə ixtiyori soybin.təbiiye kali hissə ıştə irodə iyən ixtiyoriku suyi-istifodə kardedən və bə Xıdo imon vardey əvəzi kofir bedən.çımisə əlovə əvon səy kardedən həxı çı miyoniku bobən iyən botıli çəy əvəzi bərğərolkəyn. çı mıxolifon roonku qıləyni bə Kərimə-Ğıroni ayəon bə iyən mominon ləğ-ləğə və məsxərə kardeye.bə həmonə ayəon ki,bə məxloği çı ğıyoməti ruji xəbə doydə iyən əvoni de cəhəndımi otəşi torsıneydə.kofiron deştə xiyoli qırd ımoni bə sıvoli ji bardedən və voteydənki,ki çə dınyo,axırətiku omə iyən jıqo qıləy xəbəonış vardə ki,şımə bə cəhəndımi otəşi tarsi xoto,dınyoədə de eyşi-işrəti məşğul bedəniyon?

Çın ayəku umutedəmon:

1-peyğombəron ko,irşod iyən hidoyəte.nəinki,məxloği bo imon vardey xoto məcbur kardey.

2-mıxolifon ko əbzar,cidol iyən məsxərə kardeye,nəinki,məntığ iyən istidlol.

3-Iştə sıxan iyən rəftoronədə mığət bıbəmon ki,bə dini əmron məsxərə kardey,ilahi ayəon məsxərə kardey mənoədəy və Ğıroni ımış çı kofiron nışonəonku zınəşe.